Mahungu a manene o bhalwa ngu Johani

8 12 Jesu a to tshumela a txi khene kwawe: “Ani ni liwoningo haditikoni. Wuhi ni wuhi wu a ni londisako kha na mbi tsimbila txidemani, kambe a na va ni liwoningo la wutomi.” 13 Vafarisi va to m’gela va txi kha vona: “Awe u ti fakazela upune, wufakazi wako hi nga wa ditshuri.” 14 Jesu a to va xamula a txi khene: “Hambiku ni ti fakazelako nipune wufakazi wangu mbwa ditshuri, nguko na kuziva mu ni tako ngu kona ni mu ni yako kona. Kambe anu kha mi ku zivi amu ni tako ngu kona nem amu ni yako kona. 15 Anu mi lamula ngu kuya ngu kuwona khohe, kambe ani kha ni lamuli m’thu. 16 Hambi i di ti to na lamula, kulamula kwangu nga ditshuri, nguko kha ni nga nokha, Tate wu a nga ni rumela a ni nani. 17 Ka Mlayo wanu kubhatwe ti to: ‘Wufakazi wa vathu vambidi, mbwa ditshuri.’ 18 Ani na ti fakazela nipune, ni Tate wu a nga ni rumela, nene wa ni fakazela.” 19 Se va to m’wotisa va txi kha vona: “A hani Tate wako?” Jesu a to va xamula a txi khene: “Anu kha mi ni zivi nem Tate wangu kha mi m’zivi. I di ku mo ni ziva, ni Tate wangu mi ndi na m’ziva.” 20 Ene a wombile eto a di ka wukhalo wa makaxa a miningelo mbimo yi a nga txi gondisa dithempeleni. Kambe kha ngaho wu a nga m’ñola nguko mbimo yakwe yi si nzi kuhoka.

21 Ene a to tshumela e va gela kambe a txi khene: “Ani na tsula, ni ku mi na ni lava, kambe mi na fela sionhoni kwanu. Amu ni yako kona anu kha mi na mbi sikota kuta.” 22 Se Vajudha va to khata ku ti wotisa va txi: “Ina o lava ku ti daya? Nguko a khene, ‘Aha ni yako kona kha mi na mbi sikota kuta.’” 23 Jesu a to tshumela e va gela a txi khene: “Anu mi va hahatshi, kuveti ani ni wa txitimwi. Anu mi va mafu awa, kambe ani kha ni nga wa mafu awa. 24 Ngu toneto ni nga mi gela ni txi khani: Anu mi na fela sionhoni kwanu. Aku mi si kholwiko ti to ngani, mi na fela sionhoni kwanu.” 25 Se vona va to m’wotisa va txi kha vona: “Ngawe mani?” Jesu a to va xamula a txi khene: “Ngu kutxani ni txi ti karata ni lava kuwomba-womba ni nanu? 26 Ni ni ta tingi to womba-womba ngu nganu ni kulamula. Kambe Awu a nga ni rumela mbwa ditshuri ni ku a ti ni nga ti pfa kwakwe na ti womba ka ditiko.” 27 Vona kha va ti pfisisa ti to a ti womba-womba ngu Tate. 28 Se Jesu a to khene: “Msana kova mi di hayekile Mwanana wa M’thu, ngu kona mi no ti ziva ti to ni ene, nguko ani kha ni mahi txilo ngu ku ti sukela kambe ni womba ti ni nga gondiswa ngu Tate. 29 Awu a nga ni rumela a ni nani, kha ni leka nokha nguko mbimo yotshe ni maha ti ti m’tsakisako.” 30 Mbimo yi a nga womba eto, vavangi va to kholwa kwakwe.

31 Jesu a to gela Vajudha va va nga ti khotwe kwakwe a txi khene: “Ngako mi txi engisa mapswi angu, mi na va vagondiswa vangu ngu ditshuri, 32 anu mi na ziva ditshuri ni ku ditshuri di na mi khulula.” 33 Se vona va to m’xamula va txi kha vona: “Athu hi vanana va Abrahamu kha hi khali ku va ti khumbi ta m’thu. Ngu kutxani u txi womba to, ‘Hi na khululwa’?” 34 Jesu a to va xamula a txi khene: “Ngu ditshuri ani ni khani, wuhi ni wuhi wu a mahako txionho i khumbi ya txionho. 35 I si nga eto basi, khumbi kha yi zumbi mtini ka nyamne wa yona otshe masiku, kambe mwanana ngene a zumbako otshe masiku. 36 Ngu toneto ngako mwanana a txi mi khulula mi na va mi di khululekile ngu ditshuri. 37 Na ti ziva ti to anu mi vanana va Abrahamu. Kambe mi lava ku ni daya nguko kha mi tumeli mapswi angu.* 38 Ni womba-womba ngu ti ni nga ti wona ni di ngadi ni Tate wangu, kambe anu mi maha ti mi nga ti pfa ni tate wanu.” 39 Vona va to m’xamula va txi kha vona: “Tate wathu i Abrahamu.” Se Jesu a nje khene kwawe: “I di ku mo va vanana va Abrahamu mi ndi na kombisa mithumo ya Abrahamu. 40 Kambe anu mi lava ku ni daya, ani ni mi gelako ditshuri a di ni nga di pfa ka Txizimu, Abrahamu kha maha eto. 41 Anu mi maha mithumo ya tate wanu.” Se va txi kha vona: “Athu ka ha velekelwa wugangoni, hi ni Tate mmweyo, i ku Txizimu.”

42 Jesu a to va gela ku khene: “I di ku Txizimu o va Tate wanu, anu mi ndi na ni dhunda nguko ni ta ngu ka Txizimu. Ani kha na ta ngu ku ti sukela, kambe ngu txona txi nga ni rumela. 43 Ngu kutxani mi si pfisisi ati ni wombako kani? Nguko kha mi sikoti kuengisa mapswi angu. 44 Anu mi vanana va tate wanu Dhawulosi, ni ku mi lava kumaha kunavela ka tate wanu, nguko ene m’dayi kukhukhela makhatoni ni ku kha simama ditshurini, nguko ditshuri kha di nga ho kwakwe, ngako a txi hemba a kombisa ati ene i ku tona, nguko m’hembi ni ku i tate wa makuhu. 45 Kambe aku ani ni mi gelako ditshuri, anu kha mi kholwi kwangu. 46 I mani kwanu a nga ni kombisako to ni muonhi? Se ngako ni txi womba ditshuri, ngu kutxani mi si kholwi kwangu? 47 Awu a tako ngu ka Txizimu, wa engisa timhaka ta Txizimu. Ngu toneto anu mi si engisiko, nguko kha mi ti ngu ka Txizimu.”

48 Se Vajudha va to m’xamula va txi kha vona: “Ngu toneto hi wombako hi txi khathu, ‘Awe u Msamariya ni ku u ni didhimoni.’” 49 Jesu a to xamula a txi khene: “Ani kha ni nga ni didhimoni, ani ni dhumisa Tate wangu, kambe anu mo ni txhipisa. 50 Ani kha ni ti laveli wudhumo nipune, ku ni Wu a wu lavako ni ku eyo wa lamula. 51 Na mi gela ditshuri ni txi khani, wuhi ni wuhi wu a engisako ati ni ti gondisako, kha na mbi wona lifo.” 52 Se Vajudha va to kha vona kwakwe: “Konku ngu ditshuri ha ti wona ti to u ni didhimoni. Abrahamu a fite, vaprofeti ni vona va fite, kambe awe u khawe: ‘Wuhi ni wuhi wu a engisako ti ni ti gondisako kha na mbi danza lifo.’ 53 Ina awe wo va wa hombe kupinda tate wathu Abrahamu awu a nga fa kani? Vaprofeti ni vona va fite. Wo va mani awe?” 54 Jesu a to va xamula a txi khene: “Ngako ni txi ti dhumisa nipune, wudhumo wangu hi nga wa txilo. Kambe i Tate wangu wu a ni dhumisako, awu anu mi ku khanu Txizimu txanu. 55 Hambiketo, anu kha mi m’zivi, kambe ani na m’ziva. Ngako ni txi khani kha ni m’zivi, ani ni ndi na hemba kufana ni nanu. Kambe ani na m’ziva ni ku na engisa dipswi dakwe. 56 Abrahamu tate wanu a tsakete ngutu kuwona ditshiku dangu, se a di woni e tshumela e nengela.” 57 Se Vajudha va to m’gela ku kha vona: “Awe nem khu nga ni 50 wa malembe, se u khawe u woni Abrahamu?” 58 Jesu a to khene kwawe: “Na mi gela ditshuri ni txi khani, na Abrahamu a si se ku va ho, ani se ni ti ti ho.” 59 Se vona va to rola marigwi kasi ku m’faya ngu ona, kambe Jesu a to sisala e huma dithempeleni.