DIPASI DA WUMBIDI DA PAULO DI YAKO KA VAKORINTO

1 Ani Paulo, mpostoli wa Kristu Jesu ngu kudhunda ka Txizimu ni Timoti mwanathu, na bhalela dibanza da Txizimu adi di ku Korinto kupata ni votshe vasawuleki va ku khe Akaya, ni txi khani:

2 Wuxinji wa hombe ni kurula asi si tako ngu ka Txizimu i ku Tate wathu ni Mkoma Jesu Kristu si nave ni nanu.

3 Txi na dhumiswe Txizimu, Tate wa Mkoma wathu Jesu Kristu, Tate wa wumbilu ni Txizimu txa kotshe kuthavelela. 4 Atxi txi hi thavelelako ka sotshe siduko asi hi tshanganako naso, kasiku hi kota kuthavelela vamwani ka sotshe siduko si va tshanganako naso, ngu thavelelo ayi hi yi manako ngu ka Txizimu. 5 Nguko, aku hi xanisekako ngutu ngu mhaka ya Kristu, kuthavelelwa ku hi ku manako ngu kona ha ka Kristu ni kona nga hombe ngutu. 6 Ngako hi txi tshangana ni siduko, hi tshangana naso kasiku anu mi thavelelwa ni kuponiswa, ngako athu hi txi thavelelwa nananu ma thavelelwa, eto ti mi vhuna ku mi timisela sikarato asi nathu hi tshanganako naso. 7 Ni ku themba yi hi ku nayo ngu nganu yi tsani, nguko ha ti ziva ti to aku mi patekako ka sikarato, nananu mi na tshumela mi pateka ko thavelelwa.

8 Vanathu, kha hi lavi ku mi sisela sikarato asi hi nga tshangana naso khe ka provhinsiya ya Aziya, hi wonisanile ni kuxaniswa kupinda mtamo wathu, ahawa hi nga pimisa ti to kha hi na mbi hanya. 9 Ngu ditshuri hi ti pfite nga hi to ko sikelwa lifo, eto ti mahekile kasiku hi si ti thembi hipune, kambe hi themba Txizimu atxi txi wusako vakufa. 10 Mbimo yi hi nga di ka phango ya lifo, txona txi hi hulukisile, ni ku ngu toneto txi na hi hulukisa ni ku hi ni themba ya ti to txi na simama txi hi hulukisa. 11 Nananu mi nga hi vhuna ka mikombelo yanu kasiku vavangi ve bonga Txizimu, ngu kona ha ka kuxamulwa ka mikombelo ayi yi mahwako ngu vathu vavangi.

12 Ha ti guleta, nguko livhalo lathu la ningela wufakazi ditikoni muwa, ngutu-ngutu hagari kwanu, ti to hi ni mahanyelo a manene, o basa ni ya ditshuri aya ma tako ngu ka Txizimu, i si nga ngu wuzivi wa vathu, kambe ngu wuxinji wa hombe wa Txizimu. 13 Nguko kha hi mi bhaleli timhaka ti mi si ngako ni wusikoti wo ti lera ni ku ti pfisisa, ni emela ti to mi simama mi ti pfisisa kwati timhaka tiya. 14 Nga ha mi nga ti pfisisa nyana ngu kona ti to athu hi txivangelo txo mi ti guleta, nananu mi na va txivangelo txathu txo ti guleta ka ditshiku da Mkoma wathu Jesu.

15 Ngu mhaka ya toneto, ni ti pimisile kukhata ngu ku mi endela kasiku mi va ni txivangelo txa wumbidi txa ti to mi tsaka, 16 nguko ni txi lava kupinda ni mi wona ni txiya Makedhoniya, ni tshumela ni pinda ni mi wona mbimo yi ni wuyako ngu kona, kasiku mi ni heleketa mbimo yi ni tsulako Judheya. 17 Ina mbimo yi ni nga maha makungo yawa ni ti woni i si nga ta txilo kani? Mwendo mo pimisa ti to ni mahile ngu mamahelo a vathu, aha koza ni txi: “Ina” ni gwita ni txi khani: “Ahim-him”? 18 Kambe, kufana ni ku Txizimu i ku txo thembeka, ati hi mi gelako kha ti na ku va “Ina ni ahim-him” ngu mbimo ya yimweyo. 19 Nguko Mwanana wa Txizimu Jesu Kristu awu ani, Silivhano ni Timoti hi nga txhumayela kha va “Ina” ngu mbimo ya yimweyo e va “Ahim-him”, kambe kwakwe ku vite “Ina.” 20 Nguko ti si nga ni mhaka ni ti to sithembiso si Txizimu txi nga hi thembisa singi kuhokela hani, sona sa va “Ina” ngu kona ha kwakwe, ngu toneto ngu kona ha kwakwe ha womba hi txi khathu “Amen” ka Txizimu, ati ti mu ningako wudhumo ngu kona ha kwathu. 21 Kambe, awule a hi tsanisekisako ti to athu ni nanu hi lumba Kristu ni wule a nga hi sawula Txizimu. 22 A hi ginjile txitambo, e tshumela e hi ninga moya mbiluni kwathu kasi kuva txitsanisekiso ka ti ti tako.

23 Txizimu txa ni fakazela ti to ngako ni si ti kheyo Korinto no mi tsetsa. 24 Hi nga ti to ho va vanyamne va likholo lanu, kambe hi vathumi kulothi kasi ku mi mana litsako ni ku mi maneka mi di tsani ngu kona ha ka likholo lanu.

2 Nguko, ni mahile txisungo txa ti to ka dikhambi di ni no mi endela ni si ta mi henyisa. 2 Nguko ni txi mi henyisa, i mani a no ni tsakisa i si nga anu ni no va ni di mi henyisile kani? 3 Ni mi bhalete timhaka tiya, kasiku mbimo yi ni no hoka ni si henyiswi ngu vale va nga ti fanete ku ni tsakisa, nguko na themba ti to ati ti ni mahako ni tsaka ngu ti ti mi mahako mi tsaka nananu. 4 Nguko ni mi bhalete tiya ni txi xaniseka ni ku karateka mbiluni, ni txi dila i si nga ngu kulava ku mi henyisa, kambe kasiku mi ziva lirando la hombe ali ni ku nalo ngu nganu.

5 Ngako m’thu a txi mi henyisa, ene kha henyisi ani, a henyisa motshenu, kambe na mbi womba-womba ngutu ngu mhaka yiya. 6 Aku wamwamna wuwa a nga kawukwa ngu vathu vavangi ti enete toneto. 7 Ngu toneto, m’divaleleni ni ku m’tsanisa kasiku a si ti pfi ngutu mnando e guma mtamo. 8 Ngu toneto, na mi kombela ti to mi m’komba to ma m’randa. 9 Ni mi bhalete kasiku ni wona ti to ma engisa ka totshe timhaka kani. 10 Awu anu mi m’divalelako, nanani na m’divalela, kuwomba ditshuri mi txi m’divalela (ngako ku di ni to kari to lava ku mi m’divalela) mahani toneto ngu mhaka yanu masoni ka Kristu. 11 Kasiku hi si xulwi ngu Sathani nguko ha ti ziva tipulani* takwe.

12 Mbimo yi ni nga hoka Trowasi kasiku ni txhumayela mahungu a manene mayelano ni Kristu, ni tuletwe nzila ka mthumo wa Mkoma, 13 hambiketo, ni pandisekile ngutu, nguko kha na mana Titosi mfowethu, ngu toneto ni satisile vanathu ni khukha ni tsula Makedhoniya.

14 Txi na bongwe Txizimu, a txi mbimo yotshe txi hi thangelako kuxulani hi di kumweko ni Kristu, awu a m’thumisako kasi kuhangalasa m’bhumulo wa wuzivi wakwe ka makhalo otshe. 15 Nguko ka Txizimu hi m’bhumulo wo tshamba wa Kristu hagari ka vale va yako kuhanyiswani ni vale va yako kuloviswani. 16 Ka va vo gwita, athu hi m’bhumulo awu wu yisako kufani, kambe ka va vo khata athu hi m’bhumulo awu wu yisako ka wutomi. I mani a fanelwako ngu toneto? 17 Ta hi dingana, nguko kha hi nga vaxavisi vo tsimbila-tsimbila va dipswi da Txizimu* nga ha vamwani va mahako ngu kona, kambe hi womba-womba ditshuri nga ti hi nga rumiswa tona ngu Txizimu, hi maha toneto masoni ka Txizimu hi di kumweko ni Kristu.

3 Ina to lava hi tshumela hi mi gela to hi va mani? Mwendo to lava ku hi mi bhalela mapasi o txhamusela ti to hi va mani kwanu, mwendo mapasi o bhalwa ngu nganu ma txi txhamusela to hi va mani? 2 Anu mi dipasi dathu, adi di nga bhalwa ka timbilu tathu, adi di ziwako ni ku gondwa ngu votshe vathu. 3 Nguko ti ha kubasani ti to anu mi dipasi da Kristu, adi di nga bhalwa ngu ngathu kota vathumi, i si nga ngu tinta, kambe ngu moya wa Txizimu atxi txi hanyako, i si nga ka txileti txa dirigwi,* aniko di bhatwe timbiluni.

4 Hi ni themba yoneyo ka Txizimu ngu kona ha ka Kristu. 5 Athu hipune kha hi tiwoni hi txi faneleka kumaha mthumo wuwa, kambe Txizimu ngu txona txi hi mahako hi faneleka ku wu maha. 6 Ngene wu a nga hi maha hi faneleka ku hi va sithumi sa txitumelelano txa txiphya txa moya, i si nga ngu mlayo awu wu nga bhalwa, nguko mlayo awu wu nga bhalwa wu yisa kufani, kambe moya wu ninga wutomi.

7 Se i di ti to mlayo awu wu yisako kufani awu wu nga bhalwa ka marigwi wu tile wu txi phatima, aha vanana va Israyeli va nga si tikoti kuwona Mosi ngu mhaka ya kuphatima ka khohe yakwe, kuphatima aku ku nga gwita kupinda. 8 Se ina mthumo wa moya wo sawuleka wa Txizimu kha wa fanela kuphatima ngutu kupinda mlayo wo bhalwa kani? 9 I di ti to mlayo awu wu yisako kufani wa phatima, awu wu yisako kululamani wa phatima ngutu ku wu pinda! 10 Ngu ditshuri, mlayo awu wu nga ti tiho wu txi phatima, kambe konku kha wu swi wu phatima, nguko wu vhaletilwe ngu kuphatima ka hombe ku wu pindako. 11 Se i di ti to mlayo awu wu ndi no thaviswa wu tile ni kuphatima, awu wu ndi no simama wu ni kuphatima ka hombe ko wu pinda!

12 Aku hi ku ni themba yoneyo, hi womba-womba hi di tsani. 13 Ni ku kha hi fani ni Mosi awu a nga txi ti fenengeta khohe, kasiku vanana Vaisrayeli va si woneteli ka tile ngu magwito ti ndi no fuviswa. 14 Kambe mapimo awe ma tsharavete.* Nguko kala nyamsi, ngako ku txi gondwa mlayo wa kale, nguwo ya simama yi di va vhate, nguko nguwo yoneyo yi ngo thaviswa ngu Kristu dwe. 15 Ngu ditshuri kala nyamsi, yotshe mbimo yi ku gondwako mlayo wa Mosi, nguwo ya fenengeta timbilu tawe. 16 Ngu toneto, ngako m’thu eneyo a txi tshumelela ka Jehovha* nguwo yoneyo ya thaviswa. 17 Jehovha* i moya, ni ku aha ku ku ni moya wa Jehovha* ku ni mkhululeko. 18 Kambe hotshethu hi nga mbi fenengetwa tikhohe, hi kombisa wudhumo wa Jehovha* nga hi sibuko, ha txitxwa hi fana nayo, hi simama hi ya masoni hi kombisa wudhumo kufana ni ti Jehovha* awu i ku moya a mahako.

4 Ngu toneto, aku hi ku ni mthumo wuwa hi nga ningwa ngu kona ha ka wuxinji wu hi nga kombiswa kha hi gumi mtamo. 2 Kuhambana ni eto, hi lekile kumaha timhaka ta manyala ati ti mahwako kusisalani, ni ku kha hi tsimbili ngu wukanganyisi nem kha hi txitxi dipswi da Txizimu, kambe ha zivisa ditshuri, se hi va txikombiso txa txinene ka livhalo la votshe vathu masoni ka Txizimu. 3 Se ngako mahungu a manene aya hi ma txhumayelako ma di sisilwe ma sisilwe ka vathu ava va ku ka nzila ayi yi yisako kuloviswani, 4 i ku ava va si kholwiko, ava va nga mahwa mabhofu ka mialakanyo yawe ngu txizimu txa mafu yawa, kasiku liwoningo la mahungu a manene mayelano ni wudhumo wa Kristu i ku txifananiso txa Txizimu li si woningi kwawe. 5 Nguko kha hi txhumayeli mayelano ni nathu, kambe mayelano ni Jesu Kristu kota Mkoma, ni mayelano ni nathu kota sithumi ngu mhaka ya Jesu. 6 Nguko, Txizimu ngu txona txi nga womba ti to: “Liwoningo li na woninge txidemani,” ni ku la woninga timbiluni kwathu, kasiku hi va woninga ngu wudhumo ni wuzivi asi si tako ngu ka Txizimu, ngu kona ha ka Kristu.

7 Ngu toneto, hi ni thomba yiya ka siya so mahwa ngu mraka,* hi amukete mtamo wa hombe wo ta ngu ka Txizimu, i singa wathu hipune. 8 Ha kamwa ngu totshe tinzila, ngu sixaniso, kambe kha hi gumi mtamo, ha karateka kambe kha hi rereki, 9 ha xaniswa kambe kha hi nga hokhelela, ha ginyalatelwa kambe kha hi fuviswi. 10 Yotshe mbimo ha timisela mmidini kwathu sikarato so fana ni sa Jesu, kasiku wutomi wathu wu fana ni wa Jesu. 11 Nguko nanathu hi hanyako, yotshe mbimo hi wonisana ni lifo ngu mhaka ya Jesu, kasiku wutomi wa Jesu wu wonekiswa ka mimidi yathu ayi yi fako. 12 Ngu toneto, kwathu kuthuma lifo, kambe kwanu kuthuma wutomi.

13 Akuwa hi kholwako ka timhaka ta timweto, to fana ni ti ti nga bhalwa ati ti ku: “Ni kombisile likholo, ngu toneto ni wombawombile,” nanathu hi kombisile likholo, se ha womba-womba. 14 Athu ha ti ziva ti to Awule a nga wusa Jesu, a na hi wusa kumweko nayo Jesu, ni ku a na hi tisa masoni kwakwe kumweko ni nanu. 15 Totshe tiya ti maheka ngu mhaka yanu, kasiku wuxinji wa hombe wa Txizimu wuya wu engeteleka. Ni ku vathu vavangi va bonga Txizimu. Se toneto ta txi ninga wudhumo.

16 Ngu toneto, kha hi godholi hambi i di ti to mmidi wathu ngu hahanze wa karala, ngu mndani ha wusetwa ditshiku ni ditshiku. 17 Kuxaniseka ku hi tshanganako nako nga mbimonyana ni ku ngo hehuka, kona ka hi ninga wudhumo wa hombe ngutu, wudhumo wo mbi guma. 18 Hi veka maso ka silo asi si si wonekiko i si nga ka silo si si wonekako, nguko silo asi si wonekako nza mbimonyana, kambe asi si si wonekiko nza kala kupinduka.

5 Nguko ha ti ziva ti to ngako nyumba yathu ya hamafuni i ku ditenda diya yi txi na loviswa, hi na va ni nyumba yo ta ngu ka Txizimu, i ku nyumba yo mbi na magwito ayi yi ku nzumani yo kha ya mahwa ngu manza a vathu. 2 Nguko ha keta ka nyumba yathu ya hamafuni, hi txi navela kuwulela ka nyumba yathu ya nzumani, 3 kasiku ngako hi txi wulela ka yona kha hi na mbi manwa hi sa ambala txilo. 4 Kuwomba ditshuri, athu hi ku mu ka ditenda diya ha keta ni ku karateka, nguko kha hi lavi kuhuma ka nyumba yiya, kambe hi lava kuwulela ka nyumba ya yiphya kasiku asi si fako si vhaletwa* ngu wutomi. 5 Awu a nga hi lulamisela wutomi wuwa Txizimu, atxi txi nga hi ninga moya wa txona wo sawuleka kota txitsaniso txa si si tako.

6 Ngu toneto, yotshe mbimo ha tsaniseka, ni ku ha ti ziva ti to mbimo yi hi ku ngadi ni mmidi wuwa hi kule ni Mkoma, 7 nguko athu hi tsimbila ngu likholo i si nga ngu kuwona. 8 Kambe athu hi ni kuthemba ni ku ha navela kuhuma mmidini muwa hi txi ya zumba ni Mkoma. 9 Ngu toneto, ti si nga ni mhaka ni ti to hi zumba nayo mwendo hi kule nayo txikongomelo txathu ngu mtsakisa. 10 Nguko hotshethu, hi na ya ema masoni ka Kristu kasi kulamulwa ngu ngene ti to mmwani ni mmwani e mana hakelo yakwe, ngu kuya ngu ti a nga ti maha tatinene mwendo to biha a di ngadi ni mmidi wakwe wa nyama.

11 Ngu toneto, kota ku hi ti zivako to kuthava Mkoma ti womba txani, he simameni hi kholwisa vathu, nguko athu ha ziwa ngu Txizimu. Kambe hi emela ti to nanathu hi ziwa ngu livhalo lanu. 12 Kambe, athu kha hi lavi ku ti guleta hagari kwanu kambe hi mi kuzeta ku mi ti guleta ngu mhaka yathu, kasiku mi si kota kuxamula ava va ti guletako ngu ti va nga zumbisa tona ngu hahanze i si nga ngu mbiluni. 13 Ngako hi di xangile hi xangela Txizimu, aniko ngako hi di ni mapimo a manene eto ti vhuna anu. 14 Lirando la Kristu la hi kuzeta, nguko hi hokelela magwito ya ti to m’thu wammweyo a fete votshe, ngu ditshuri votshe va ti fite. 15 Ene a fete votshelele, kasiku ava va hanyako va si ngadi ve ti hanyela vona vapune, kambe ve hanyela awu a nga va fela e tshumela e wuswa.

16 Se konkuwa kha hi swi hi ziva m’thu ngu kuya ngu mawonelo a vathu. Hambi hi txi ziva Kristu i di m’thu wa nyama, kuwomba ditshuri kha hi swi hi txi m’ziva i di wa nyama. 17 Ngu toneto, ngako m’thu a di ni wumwewo ni Kristu ene a maha txivangwa txa txiphya, silo sa kale si pindile, se silo sa siphya se si vangilwe. 18 Kambe sotshe si ta ngu ka Txizimu. A txi txi nga hi tshanganisa kumweko natxo ngu kuthumisa Kristu, txi tshumela txi hi ninga mthumo wo tshanganisa vathu ka Txona. 19 I ku tiya, Txizimu txi to tshumela txi wuseta kupfana ka txona ni ditiko ngu kuthumisa Kristu, ti si nga ni mhaka ni sionho sa dona, ni ku txi hi ningile mahungu aya ma tshanganisako vathu ni txona.

20 Athu hi vaemeli ava va vhaletako Kristu, se aku hi ku vaemeli ava va vhaletako Kristu ti fana ni ku Txizimu txi di thumisile athu kasi ku khongotela vathu hi txi khathu: “Wusetani wungana wanu ni Txizimu.” 21 Nguko Kristu kha onha, kambe Txizimu txi m’ningete kota digandelo da sionho sathu, kasiku ngu kona ha kwakwe hi va vo lulama masoni ka Txizimu.

6 Kota ku hi thumisanako ni Txizimu, ha mi kombela ti to mi si amukeli mahala wuxinji wa hombe wa Txizimu. 2 Nguko, Txizimu txi ti kha txona: “Ngu ditshiku da dinene ni ku pfite, ngu ditshiku da kuhanyiswa ni ku vhuni. ”Phela, ayiya ngu yona mbimo ya yinene yo Txizimu txi hi komba wuxinji. Ngu ditshuri! Adiya ngu dona ditshiku da kuhanyiswa!

3 Kha hi lavi kukhuvekisa m’thu, kasiku mthumo wathu wu si solwi. 4 Ka totshe hi ti komba hi di sithumi sa Txizimu, ngu kutimisela ka siduko, sixaniso, wusiwana, sikarato, 5 kupekwa, majele, mazunga, kuthuma nzima, kwa mbi otela, kupwata sakudya, 6 mahanyelo o basa, wuzivi, pasiyensiya, wunene, moya wo sawuleka, lirando lo mbi na wukanganyisi, 7 mapswi a ditshuri, mtamo wa Txizimu, kuthumisa matxhari a wululami, aya hi ma nõlako ngu dianza da txinene ni da txibhabha,* 8 kudhumiswa, kuthelwa tingana, kuwombwawombwa kwati ni kuwombwawombwa kubiha ngu ngathu. Hi wonwa kota vakanganyisi hambiku hi wombako ditshuri. 9 Hi wonwa nga kha hi ziwi, kasi ha ziwa, hi wonwa nga ho lava kufa kambe ha hanya, ha tsayiswa hambiketo kha hi dawi, 10 va hi wona hi sa tsaka, kuveti hi tsakile, va hi wona hi di sisiwana, kuveti hi ganyisile vo tala, va hi wona hi si nga ni txilo, kuveti hi ni silo sotshe.

11 Hi womba-womba ni nanu Vakorinto hi di txhatxhekile, ni ku hi mi tulete timbilu tathu. 12 Athu kha ha mi tona lirando lathu, aniko anu nganu mi hi tonako lirando lanu. 13 Ni womba-womba ni nanu kota vanana vangu, nananu tulani timbilu tanu.

14 Mi nga ti sungeni ha dikangeni kumweko ni va vo mbi kholwa. Ina kululama ni ku biha sa yelana kani? Ina liwoningo ni txidema sa yelana kani? 15 I si ngeto dwe, ina ka Kristu ni Bheliyali kuho kuyelana kani? Ina ka ava va kholwako ni va vo mbi kholwa kuho kuyelana kani? 16 Ngu ku hi kupfana ku kuho hagari ka dithempele da Txizimu ni sithombe? Nguko athu hi lumba dithempele da Txizimu atxi txi hanyako nga ha txi nga womba ngu kona: “Ni na va hagari kwawe ni tsimbila hagari kwawe, ni na va Txizimu txawe ni ku vona va na va vathu vangu.” 17 “‘Ngu toneto, humani hagari kwawe mi ti hambanisa navo,’ kuwomba Jehovha,* ‘mi nga gweseni txilo txo nyenyeza,’” “‘ani na mi amukela.’” 18 Ani ni na va tate wanu, se anu mi na va vanana vangu, kuwomba Jehovha, Nyamitamo.

7 Ngu toneto, vanathu vo randeka, aku hi ku ni sithembiso siya, he ti basiseni ka yotshe nzambwa ya nyama ni ya moya, hi basa kota vathu ava va thavako Txizimu.

2 Hi amukeleni timbiluni kwanu. Kha ha mahela wubihi m’thu, kha ha kanganyisa m’thu, nem kha ha londola* m’thu. 3 Kha hi wombi eto kasi ku mi ni nga mnando, nguko ani se ni mi gete ti to anu mi timbiluni kwathu, kasi ku hi fa kumweko ni ku hanya kumweko. 4 Ni womba-womba ni nanu ni di khululekile. Na ti guleta ngutu ngu nganu, ni ti pfa ni di thaveletwe, ni ku tala ngu litsako ka sotshe sixaniso sangu.

5 Ngu ditshuri mbimo yi hi nga hoka Makedhoniya, kha ha mana mkhululeko, kambe hi simamile hi xaniseka ngu otshe madhawa, nguko vathu va txi hi wukela, ni ku athu hi txi karateka ngu mhaka ya mabanza. 6 Kambe Txizimu, atxi txi thavelelako ava va nga godhola, txi hi thavelete ngu kuta ka Titosi. 7 I si nga ngu kuta kwakwe dwe, kambe ni thavelelo ayi a nga ta yi mana kwanu, nguko ene ani gete ti to ma ti xuva ngutu ku ni wona, a hi gete kambe ngu ku hi dilela kwanu, ni ku karateka kwanu ka hombe ngu mhaka yangu, eto ta ni tsakisa ngutu.

8 Nguko, hambiku dipasi adi ni nga mi bhalela di nga mi maha mi pandiseka, kha ni ti layi ngu toneto. Hambiku makhatoni ni nga ti laya (nguko ni woni ti to di mi mahile mi pandiseka ngu mbimonyana). 9 Konku na tsaka, i si nga ngu ku anu mi nga pandiseka, kambe nguko kupandiseka kwanu ku mi mahile mi tisola ngu nzila ayi yi tsakisako Txizimu, ni ku kha ma luzekelwa ngu txilo ngu mhaka yathu. 10 Nguko kupandiseka ngu nzila ayi yi tsakisako Txizimu ku maha ti to m’thu e tisola kasiku e mana kuhanyiswa, ni ku kha nga ho awu a nga ti solako ngu eto, kambe kupandiseka ko fana ni ka vathu va matiko ku yisa ka lifo. 11 Wonani ti to kupandiseka kwanu ngu nzila ayi yi tsakisako Txizimu ku vite ni mihando ya yinene kwanu, mi ti basisile, mi ti layile ka to biha ati mi nga txi ti maha, mi thava Txizimu, mi navela kumaha ta tinene, mi lulamisa tiphazamo tanu. Mi mahile totshe ngu kuya ngu mlayo kasi kukombisa ti to anu mi basile ka mhaka yiya. 12 Kha na mi bhalela ngu mhaka ya wule a nga onha, mwendo awule a nga onhelwa, kambe ni mi bhalete kasiku mi kombisa masoni ka Txizimu ti to ma hi engisa. 13 Ngu toneto hi thavelelekile.

Kambe hahanze ka thavelelo ayi hi nga yi mana, hi tshumela hi tsaka ngutu ngu mhaka ya Titosi, nguko anu mi m’tangalisile. 14 I di ti to ni wombawombile ngu nganu kwakwe ngu nzila yo ti guleta kha na pfa tingana, totshe ati ni nga m’gela ngu nganu ditshuri, ni ku kutiguleta kwathu masoni ka Titosi ngu nganu ku ti kombile i di ditshuri. 15 I si nge to basi, a txi khumbula kuengisa kwanu, ni nzila yi mi nga mu amukela ngu yona ngu txithavo txa hombe, eto ti maha ti to e mi dhunda ngutu. 16 Ani na tsaka nguko na mi themba ka totshe.

8 Konkuwa vanathu, hi lava mi ziva mayelano ni wuxinji wa hombe wa Txizimu, awu wu nga kombiswa ka mabanza a Makedhoniya. 2 Hambiku va nga txi wonisana ni siduko sa hombe, ni wusiwana wa hombe, vona va ningete asi va nga ti naso va di tsakile, eto ti kombisile ti to va ni wuha wa hombe. 3 Nguko ati va nga ti maha va ti mahile ngu ku ya ngu si va nga ti naso ni kupindisa, ani ni fakazi ya toneto. 4 Ngu ku ti tsakela kwawe va hi kombete ngutu kasiku ve pateka ka mthumo wo vhuna vasawuleki. 5 Vona va mahile to tala to pinda ni ti hi nga ti ti emete, ni ku ngu kudhunda ka Txizimu vona va ti ningetete ko thumela Mkoma kumweko ni nathu. 6 Ngu toneto, hi kombela ti to Titosi e hetisa mthumo wonewo kota ku i ku ene a nga wu khata. 7 Ngu toneto, kota ku mi nga ganya ka totshe, ka mapswi, ka likholo, ka wuzivi, ka kotshe kuhiseka ni ka kuranda vathu nga ti hi mi randisako tona. Vanani vo ganya ti txi ta ka mthumo wuwa.

8 Kha ni wombi tiya kota txirumo, kambe ni mi gela ngu mhaka ya kuhiseka ka vamwani, ni kulava kuwona ti to ina lirando lanu nda ditshuri kani. 9 Nguko anu ma wu ziva wuxinji wa hombe wa Mkoma wathu Jesu Kristu, hambiku a nga ti ganyile a ti mahile txisiwana ngu mhaka yanu, kasiku anu mi va vo ganya ngu mhaka ya wusiwana wakwe.

10 Ngu mawonelo angu ni pimisa ti to mthumo wuwa wu na mi vhuna, nguko kupinda dilembe se mi di wu khatile, ni ku ta ti komba ti to ma wu xuva ngutu ku wu maha. 11 Konkuwa hetisani mthumo awu mi nga wu khata, kasiku ku ti emisela kwanu kutatiseka ngu kuya ngu si mi ku naso. 12 Ngako ku di ho ku ti emisela kuninga, ningo yoneyo ya amukeleka ngu kuya ngu si m’thu a ku naso, i si nga ngu si m’thu a si ngako naso. 13 Nguko kha ni lavi kuhehukisela vamwani ni nemetisela anu. 14 Kambe akuwa mi ku ni sasingi va vhuneni ka silaveko sawe, kasiku mbimo yi va no va ni sasingi ve mi vhuna ka silaveko sanu, ngu nzila yoneyo ku na va ni kudingana. 15 Nga ha ti nga bhalwa ngu kona ti to awu a nga ti naso kha nga va ni sasingi ngutu, awu a nga ti ni sasidotho, kha nga va ni sasidotho ngutu.

16 Txi na bongwe Txizimu ngu ku txi nga ninga Titosi mbilu yo khatala ngu nganu, kufana ni ku nathu hi khatalako ngu nganu. 17 Nguko, kha ngo tumela txikombelo txathu dwe, kambe ngu kuranda kwakwe wa ta e ta mi pfuxela. 18 Hi tshumela hi m’rumela ni mwanathu awu a tsakelwako ka otshe mabanza ngu mhaka ya ati a ti mahako ngu konaha ka mahungu a manene. 19 I si ngeto dwe, a tshumete e sawulwa ngu mabanza ku e enda ni nathu kasi ku e hi vhuna kukhatalela mthumo awu wu ningako wudhumo Mkoma ni ku va txikombiso txo ti emisela ko vhuneta. 20 Hi thumisa tiya kasiku ni wamweyo a si hi soli ngu mthumo wu hi wu mahako. 21 Nguko hi maha totshe ngu kuthembeka, i si nga masoni ka Jehovha* dwe, kambe ni masoni ka votshe vathu.

22 I si ngeto dwe, hi va rumela kumweko ni mwanathu awu a nga kombisa kuhiseka makhambi o tala ni ka timhaka ta tingi, kambe konkuwa a kombisile ti to wa hiseka ngutu ngu mhaka ya ku a mi thembako. 23 Se ngako ku txi thuka kuva ni kukanakana mayelano ni Titosi mi lava kuziva ti to ene i mani, ene mpangalati wangu ni txithumi kulothi atxi txi thumako kasi kukhatalela silaveko sanu. Ngako ku di ni kukanakana ngu vanathu, vona vapostoli va dibanza ni ku va ninga wudhumo Kristu. 24 Ngu toneto, va kombeni lirando, mi kombisa mabanzani ti to ngu kutxani hi womba-wombako ngu ku ti guleta ngu nganu.

9 Mayelano ni mthumo wo vhuna vasawuleki, kha ti sungi ku ni mi bhalela txilo. 2 Nguko na kuziva kuhiseka kwanu, ni ku na ti guleta ngu nganu mbimo yi ni wombawombako ni va Makedhoniya, ni txi womba ti to Akaya se ku lungile kudingana dilembe ni ku kuhiseka kwanu ka kuzeta vavangi. 3 Kambe ni mi rumelela vanathu kasiku ku ti guleta ku hi ku nako ngu nganu, ku sive ka mahala ni ti to anu mi va mi di lungile ngu ditshuri nga ha ni nga womba ngu kona. 4 Kambe ngako athu ni va Makedhoniya hi txi ta hi ta mi mana mi sa lungeka, hotshethu hi na theleka tingana, ngutu-ngutu athu ngu kuva hi di vekile themba yathu kwanu. 5 Ngu toneto, ni woni i di tshuku ku ni kuzeta vanathu ti to ve ta kheyo ku di ngadi ni mbimo, ve ta lulamisela ningo yi va nga yi thembisa kasiku yi ta maneka yi di pronto kota ningo ya ku ti dhundela i si nga yo sinziswa.

6 Kambe awu a no phaya a txi siyeta a na elula sasidotho, awu a no phaya sasingi a na elula sasingi ngutu. 7 Mmwani ni mmwani a na ningele ngu kuya ngu ti a nga sunga mbiluni kwakwe i si nga ngu kungurangura mwendo kusinziswa, nguko Txizimu txi randa awule a ningelako a di tsakile.

8 I si ngeto basi, Txizimu txa sikota kuandisa wuxinji wa txona wa hombe kasiku mi si txhotelwi ngu txilo mi tshumela mi mana sotshe asi mi si lavako kasiku mi maha mithumo ya yinene. 9 (Nga ha ti nga bhalwa ngu kona ti to: “Ene wa ninga a si feleli, wa ninga sisiwana. Kululama kwakwe ka simama ngu ha ku si gumiko. 10 Awule a ningako mbewu mphayi ni sakudya, a na mi ninga ni kuengetela mbewu ngu txitalo kasiku mi phaya ni kuengetela mihando ya kululama kwanu.) 11 Ka totshe ati mi ti mahako, anu ma katekiswa kasiku mi kombekisa wuha ngu totshe tinzila, ati ti no maha ti to Txizimu txi bongwa. 12 Nguko mthumo wuwa kha wu na mbi vhuna silaveko sa vasawuleki basi, kambe wu na maha ti to Txizimu txi bongwa. 13 Eto ta dhumisa Txizimu nguko mthumo wuwa wo vhuneta wu veka hakubasani ti to anu ma engisa mahungu a manene mayelano ni Kristu, nga ha mi nga ti veka ngu kona hakubasani ti to mi ni wuha wo maha miningelo yo vhuna vasawuleki ni votshelele vathu. 14 Mbimo yi va mi kombelelako, va ti veka hakubasani ti to va mi dhunda ngu kona ha ka wuxinji wa hombe wa Txizimu.

15 Txi na bongwe Txizimu ngu kona ha ka ningo ya txona yo mbi balwa.

10 Ani Paulo nipune na mi kombela ngu moya wo rula ni wa wunene wa Kristu, hambiku ni wonekako ni si nga ni mtamo ni di ni nanu,* kambe ni di kule ni nanu ni ni mtamo. 2 Ni kombela ti to mbimo yi ni ku kheyo ni si ta sinziseka kukawuka avale va pimisako ti to athu hi tsimbila ngu kuya ngu nyama i ku ti ni pimisako ti to ni nga ta maha. 3 Hambiku hi tsimbilako ngu ka nyama, kha hi lwi yimbi ngu kuya ngu ti hi ku ka tona ngu nyama. 4 Nguko matxhari a yimbi yathu hi nga a nyama, kambe nga mtamo wa Txizimu kasi kuvhandamula silo asi si nga mila mikuluti.* 5 Athu hi hasamula yotshe mialakanyo ni sotshe asi si ti guletako kasi kuvhalela vathu ku ve ziva Txizimu ni ku hi maha mipimiso yathu yi engisa Kristu. 6 Mbimo yi kuengisa kwanu ku nova ku di hetisekile, hi na va hi di ti emisete kasi kutsayisa kotshe kwa mbi engisa.

7 Anu mi lamula ngu kuya ngu khohe. Ngako m’thu a txi tsaniseka ti to a lumba Kristu, a fanete kutshumela e alakanyisisa ngu mhaka yiya. Kufana ni ku nene a lumbako Kristu, nanathu hi lumba Kristu. 8 Hambi i di ti to no ti gelanyana ngu mhaka ya mtamo awu Mkoma a nga ni ninga wo mi aka i si nga ku mi haxula, ni si na kuva ni tingana. 9 Kambe kha ni lavi ti woneka nga no lava ku mi dhukisela ngu mapasi angu. 10 Nguko vona va womba tiya: “Mapasi akwe ma nemela ni ku ma ni mtamo, kambe ngako adi ho hawa kha nga ni mtamo ni ku ati a wombako kha ti vhuni txilo.” 11 M’thu eneyo a fanete kuziva ti to ati hi bhalako ka mapasi athu hi na ta ti maha mbimo yi hi no hoka. 12 Nguko athu kha hi ti pati ni vale va ti fananisako mwendo va ti kambelako* vapune. Nguko mbimo yi va ti kambelako vapune mwendo ku ti fananisa vapune, vo ti komba ti to kha va pfisisi.

13 Kambe kha hi na mbi ti gela ngu kuthuma hahanze ka wukhalo wu hi nga mbi avelwa, aniko hi na ti gela ngu kuthuma mndani ka mihingano ayi hi nga avelwa ngu Txizimu, makhalo oneyo kupata ni nanu. 14 Kuwomba ditshuri, athu kha ha ndaka mihingano ya makhalo aya hi nga avelwa ona ngu kuva hi di mi hokete, nguko ngathu vo khata ku mi hokela ni mahungu a manene mayelano ni Kristu. 15 Athu kha hi ti guleti ngu mthumo wu hi nga mbi ningwa nem ngu mthumo wa vamwani, kambe hi emela ti to likholo lanu li simama li kula, ni ti mi ti mahako ti simama ti kula ka wukhalo wanu. Se hi na simama hi maha ta tingi, 16 kasiku hi txhumayela mahungu a manene ka makhalo a kule, kasiku hi si ti guleti ngu mthumo awu wu nga mahwa ka makhalo a vamwani. 17 “Kambe awu a ti guletako, a na ti gulete ngu ka Jehovha.”* 18 Nguko hi nga awu a ti kambelako apune a amukelwako, kambe awu a amukelwako ngu wu a kambelwako ngu Jehovha.*

11 Hambiku ni wonekako ni di txiphukuphuku, ni txi tsakela ku mi ni timiselela nguko ngu ditshuri ma ni timisela. 2 Nguko na lusa, kulusa kule ko fana ni ka Txizimu, nguko ani ni mi thembisile ku mi na txhadha ni wamwamna mmweyo, i ku Kristu, kasiku ni ta mi kombisa kwakwe mi di divhirjem* adi di nga basa. 3 Kambe na thava ti to kufana ni ku mnyoka wu nga kanganyisa Evha ngu tipulani ta wona, mialakanyo yanu ni yona yi onhwa, yi thaviswa wunene ni kubasa aku hi fanelako kuva na ko masoni ka Kristu. 4 Nguko ngu ditshuri, ngako ku txi hoka m’thu hagari kwanu e ta txhumayela to hambana ni ti hi nga txhumayela mayelano ni Jesu, mwendo ku mi amukela moya wo hambana ni wu hi nga wu amukela, mwendo mahungu a manene o hambana ni ya hi nga ma amukela, anu ma timisela. 5 Aniko ni pimisa ti to kha va ni pali ngu txilo ni txa txidotho avale va ti gelako ku vapostoli va hombe. 6 Kambe hambiku ni si nga ku ni wusikoti wo womba-womba kwati, ani ni ni wuzivi. Ngu ditshuri, na ti veka hakubasani eto ngu totshe tinzila ni ka totshe.

7 Ina ni ngava ni di mahile txionho ngu ku ti veka hahatshi kasiku anu mi guletwa, mbimo yi ni nga mi txhumayela ngu ku ti dhundela mahungu a manene a Txizimu mahala kani? 8 Mabanza mamwani ni ma pete ni tumela silo sawe kasiku ni mi thumela. 9 Ngu toneto, mbimo yi ni nga va ni txilaveko ni di ni nanu, kha na nga va mrwalo ka m’thu, nguko vanathu vota ngu Makedhoniya va ni vhuni ngutu ka sotshe silaveko sangu. Ditshuri, ni ti wonete ngutu ti to ni si thuki ni va mrwalo ngu totshe tinzila kwanu, ni ku na simama ni maha toneto. 10 Na xambanya ngu ditshuri da Kristu adi di ku kwangu, na mbi leka ku ti guleta ngu nganu akhe Akaya. 11 Ngu kutxani? Ina no mbi mi randa? Txizimu txa ti ziva ti to na mi randa.

12 Kambe ati ni mahako na simama ni maha, kasiku avale va lavako txivangelo txa ti to ve fana ni nathu ni ku ti guleta ngu ti va mahako, va si txi mani txivangelo txo maha toneto. 13 Nguko vavamna vonevo vapostoli va makuhu, vona vakanganyisi, va ti maha nga vapostoli va Kristu. 14 Eto kha ti xamalisi nguko Sathani wa ti maha ngilozi ya liwoningo. 15 Ngu toneto, kha ti xamalisi ku vathumi vakwe ni vona ve ti maha vathumi vo lulama. Kambe magwito awe ma naya ngu mithumo yawe.

16 Na tshumela ni womba tiya: Kha ngaho wu a fanelako kupimisa ti to ni txiphukuphuku. Kambe ngako mi txi pimisa toneto, ni amukeleni kota txiphukuphukutxo kasiku ni ti guletanyana. 17 Ni womba-womba ni si londisi txikombiso txa Mkoma, kambe kota m’thu wa txiphukuphuku wo ti themba ni ku ti gela. 18 Aku vavangi va ti guletako ngu kuya ngu nyama, nanani na ti guleta. 19 Anu mi ku ni “wuzivi,” timiselani ngu mbilu yotshe avale i ku siphukuphuku. 20 Ngu ditshuri, timiselani mmwani ni mmwani awu a mi mahako tikhumbi, mmwani ni mmwani awu a mi dyelelako, mmwani ni mmwani awu a mi tekelako sanu, mmwani ni mmwani awu a ti guletako hagari kwanu ni mmwani ni mmwani awu a mi pekako mpama.

21 Tingana kwathu kuwombawomba ngu tiya, nguko ti woneka nga kha hi nga ni mtamo.

Kambe ngako vamwani va txi maha timhaka ngu ku ti gela, ni womba-womba nga txiphukuphuku ti to nanani na ti gela. 22 Vona Vahebheru? Nanani. Vona va Israyeli? Nanani. Vona mba liveleko la Abrahamu? Nanani. 23 Mi sithumi sa Kristu kani? Ni womba-womba nga txiphukuphuku, na mi pala: Ani ni thumile ngutu, ni betilwe jele makhambi o tala, ni peketetwe ni ku makhambi o tala ni vite ka phango ya lifo. 24 Ni pekilwe mtxhanu wa kona ngu Vajudha, ni ku va ni kwapile 39 wa sisephu, 25 ni kwapetwe sikhati siraru ngu timhika, txikhati tximwetxo ni balisetwe ngu marigwi, sikhati siraru ni dhibhile ni ngalava, ni hetile ditshiku dimwedo ni di lineneni. 26 Ni mahile maendo a mangi, ni mananile ni tiphango ka minambo, tiphango ta makhamba, tiphango ta va ka kwathu, tiphango ta vamatiko, tiphango didhoropani, tiphango txiwulani, tiphango lineneni, tiphango hagari ka vanathu va makuhu, 27 sifuta,* kuthuma ngutu, kwa mbi otela, nzala, ditora, kwa mbi na sodya, pheho ni kwa mbi na so ambala.

28 Hahanze ka siya, ku ni simwani si ni mahako ni karateka ditshiku ni ditshiku, i ku kuvilela ngu otshe mabanza. 29 I mani awu a ku ni dikhodho, ani ni si ngako nado kani? I mani awu a khuvekako, ani ni si pandiseki?

30 Ngako ni txi lava ku ti guleta, na ti guleta ngu silo si si kombisako kutandeka kwangu. 31 Txizimu i ku Tate wa Mkoma Jesu Kristu, Awule a fanelwako ngu kudhumiswa yotshe mbimo wa ti ziva ti to kha ni njo hemba. 32 Akhe Dhamasku govhernadhori awu a nga ti hahatshi ka mkoma Aretasi, a rumisile ti to kuwonelelwa didhoropa da Dhamasku kasi ku ni nõla. 33 Ni hulukile manzani kwawe ngu ku ve ni beta mu ka mrava* ve ni txhikisa ngu ka ditshoko da mmuru wa didhoropa.

12 Ni na ti guleta, hambiku ti si vhuniko txilo, hambi keto na womba-womba ngu miwoniso yo ta ngu nzumani ni kutuletelwa kota ngu ka Mkoma. 2 Ni ziva m’thu a ku kumweko ni Kristu kudingana 14 wa malembe, a nga tekwa* e yiswa nzumani ka wuraru. Ti to a tekilwe a di ni mmidi wo zumbisa kutxani kha ni ti zivi, Txizimu ngu txona txi ti zivako. 3 Ngu ditshuri na mziva m’thu eneyo, kambe ti to a ti ngu mmidi mwendo ngu hahanze ka mmidi, kha ni ti zivi, Txizimu ngu txona txi ti zivako. 4 A tekilwe* e yiswa ka paradhise, ni ku a pfite mapswi aya ma si fanelwiko kuwombwa ni ku kha ku nga ni m’thu awu a tumelelwako ku ma womba. 5 Ani na ti gela ngu m’thu eneyo i si nga ngu ngani nipune, kambe ngu kutandeka kwangu. 6 Nguko hambi ni txi ti guleta, na mbi va txiphuku-phuku, nguko ni womba-womba ditshuri. Kambe kha ni mahi toneto kasiku ni wammweyo a si wombi to pinda ati a ti wonako ni ku ti pfa kwangu, 7 ngu ku ni amukelako mituletelo yo xamalisa.

Kasiku ni si ti guleti ko pinda mpimo, ni ningilwe m’pa mmidini kwangu, i ku ngilozi ya Sathani kasiku yi ni peketela ti to ni si ti guleti ko pinda mpimo. 8 Makhambi mararu ni kombete ka Mkoma ti to a txi ni thavisa m’pa wuwa. 9 Kambe ene a ni gete a txi: “Wuxinji wangu wa hombe wu enete kwako, nguko mtamo wangu wu na ti kombekisa aha ku ku ni kutandeka.” Ngu toneto, ngu litsako la hombe, ani na ti gela ngu kutandeka kwangu, kasiku mtamo wa Kristu wu simama kwangu nga ditenda. 10 Ani na tsaka kutandekani kwangu, na tsaka kurukwani kwangu, na tsaka ka timbimo ta kupwata, ka kuxaniswa ni ka sikarato ngu mhaka ya Kristu. Nguko mbimo yi ni tandekako, nguyo mbimo ni ku ni mtamo.

11 Ni ve txiphuku-phuku, anu mi ni sinzisile kumaha toneto, nguko i ti anu mi nga ti fanete ku ni kambela* ni ku ni pasisa, nguko vapostolivo vanu kha va ni pali ngu txilo, hambiku ni wonekako ni si nga wa txilo. 12 Ngu ditshuri ni mi kombile txikombiso txa ti to ni mpostoli, ngu kutsanisela ka hombe, sikombiso, sidiwukiso ni mithumo yo xamalisa. 13 Ina mabanza mamwani ma mi pala ngu txani, hahanze ka kuva ni sa mi kombela txilo kani? Ni divaleleni ngutu ngu phazamo yoneyo.

14 Adiya dikhambi da wuraru ni txi mi endela, kambe kha na mi nemeta. Nguko kha ni lavi silo sanu, nguko kha ku emelwi ti to vanana va vekela thomba vaveleki vawe. Kambe vaveleki ngu vona va fanelako kuvekela thomba vanana vawe. 15 Nguko na ningela sotshe silo sangu ni wutomi wangu ngu mhaka yanu. Aku ni mi randako ngutu, ina ani ni fanete kurandwa ka kudotho? 16 Ti si nga ni mhaka ni eto, kha na mi nemeta. Hambi keto, anu mi womba ti to ani ni m’thu wa “tipulani”* ni ku ni to mi “kanganyisa.” 17 Ina ni mi londote ngu kuthumisa mmweyo wa vale ni nga mi rumelela? 18 Ni kombete ti to Titosi e mi endela kumweko ni mwanathu. Ina Titosi a mi londote kani? Ina kha londetela mkondo wangu kani?

19 Ina mi alakanya ti to mbimo yotshe hi lava to kari kasi ku ta ti emelela ngu tona masoni kwanu kani? Ahim-him. Aku hi ku valondeteli va Kristu hi womba-womba ditshuri masoni ka Txizimu. Vanathu, totshe ati hi mahako hi mahela ku mi aka. 20 Nguko kha ni lavi ti to mbimo yi ni no hoka, ni ta mi mana ngu nzila yi ninga sa ti emela ku ta mi mana ngu yona, mwendo ku nanani ni hoka ngu nzila yi mi nga sa yi emela ku ni hoka ngu yona, mwendo ku ni ta mana mazunga, mabava, kuhenyelana, mibhando, kulumbetana, malengo, ku ti guleta ni vhilinganya. 21 Ti nga maha mbimo yi ni no wuya, Txizimu txi ni veka hahatshi masoni kwanu, se ti lava ku ni dila ngu mhaka ya vathu vavangi ava va nga maha sionho ve gwita va si ti soli, sionho sa wubhemba ni sa mahanyelo a nzambwa.

13 Adiya dikhambi da wuraru ni txi lava ku mi endela. “Yotshe mhaka yi fanete kutsaniswa ngu wufakazi wa vathu vambidi mwendo vararu.” 2 Hambiku ni si nga ho kheyo, veketani ati ni mi gelako kufana ni kuva ni di ni nanu kheyo ngu dikhambi da wumbidi. Ni womba ku di ngadi ni mbimo ka va va nga onha, ti to kha ni na mbi ta va tsetsa mbimo yi ni no ta. 3 Ni maha tiya kasi ku mi komba ti to Kristu a thumisa ani kasi kuwombawomba ni nanu, ni ku Kristu hi nga m’thu wa kwa mbi na mtamo ni ku mtamo wakwe a wu kombisa ngu kona ha kwangu. 4 Nguko ngu ditshuri, ene a gogotetwe ha ka phande ngu mhaka ya kutandeka,* kambe wa hanya ngu mhaka ya mtamo wa Txizimu, ni ku ditshuri ti to nanathu ha tandeka kumweko nayo, kambe ha hanya kumweko nayo nguko mtamo wa Txizimu wu hagari kwathu.

5 Simamani mi ti xolisisa kasi kuwona ti to mi ngadi tsani ka likholo kani. Simamani mi ti xola kasi kuziva ti to mi vathu vo zumbisa kutxani. Ina kha mi tumeli ti to Jesu Kristu a kumweko ni nanu kani? Hahanze ka kuva mi si amukeleki. 6 Na themba ti to anu ma ti ziva ti to athu ha amukeleka.

7 Ha mi kombelela ka Txizimu ti to anu mi si mahi timhaka to biha. Kha hi mahi eto kasiku athu hi amukeleka, kambe kasiku anu mi maha ta tinene, hambi hi txi woneka nga kha hi amukeleki. 8 Kha hi na kumaha ati ti lwisanako ni ditshuri, kambe ati ti yelanako ni ditshuri. 9 Athu ha tsaka mbimo yotshe ayi athu hi si nga ku ni mtamo na anu mi di ni mtamo. Ni ku athu ha mi kombelela ti to mi lulamiswa* ngu didhawa da moya. 10 Ngu toneto ni mi bhalelako timhaka tiya ni si se hoka, kasiku ni si ta mi nemetisela mbimo yi ni thumisako mtamo wu ni nga ningwa ngu Mkoma, i ku wo aka i si nga kukhundumusa.

11 Ngu magwito vanathu, simamani mi tsaka, mi lulamiswa, mi thavelelwa, mi pimisa ngu nzila yo fana, mi hanya ngu kurula, se Txizimu txa lirando ni txa kurula txi nava ni nanu. 12 Losanani ngu kupswopswana ko sawuleka. 13 Votshe vasawuleki va mi dungula.

14 Wuxinji wa hombe wa Mkoma Jesu Kristu ni lirando la Txizimu kumweko ni moya wo sawuleka, si nave ni nanu motshenu.