Vaisrayeli kha va maha ati va nga di ti thembisile

Jehovha a gete Mosi ti to e kwela ka Mmango wa Sinayi. Ene a ti ya zumba khe kudingana 40 wa masiku. Se Jehovha a bhaletete 10 wa milayo ya lisima ka marigwi mambidi. Milayo yoneyo yi txi dhanwa ku milayo ya digumi.

Ku di pindile mbimonyana, Vaisrayeli va khatile kupimisa ti to Mosi a si na kutshumela kambe e wuya. Ngu toneto, vona va gete tiya Aroni: ‘Mosi a nyamalate! Athu hi lava m’thu wo hi kongomisa kasiku hi khukha hawa. Hi mahele txizimu.’ Se Aroni a to khene: ‘Ni ningeteni ouro yanu.’ Ene a to teka ouro yile e yi nyivilikisa e maha txifananiso txa txihomwana. Mbimo yi a nga gwita kumaha txifananiso txile, Vaisrayeli va to kha vona: ‘Txihomwana txiya ngu txona i ku txizimu txathu, ngu txona txi nga hi humisa Egipta!’ Vona va to khata ku txi khozela ni ku txi mahela fexta. Ina Vaisrayeli va ti fanete kumaha toneto? Ahim him. Vona va ti thembisile kukhozela Jehovha dwe, kambe kha va maha ati va ngadi thembisile.

Mbimo yi Jehovha a nga wona tile a gete tiya Mosi: ‘Txhika u ya wona Vaisrayeli. Vona va lekile ku ni engisa, va mahile txizimu txa makuhu ni ku vo txi khozela.’ Mosi a txhikile ngu mmangoni ka Sinayi.

Mbimo yi a nga txi txhika, a va pfite va txi embelela. Se mbimo yi a nga hoka hafuhi, a va woni va txi sinya ni kukhozela txifananiso txile txa txihomwana. Mosi a to henya ngutu e rinza marigwi yale a mambidi hahatshi, a ma rinzile ngutu aha koza me fayeka. Msana keto, a fayetete txifananiso txile txa txihomwana. Se, a to gwita e wotisa tiya: ‘Aroni, ngu kutxani u di tumelete vathu vava ve ku kuzetela kumaha txifananiso txiya? U sa fanela kumaha tiya.’ Aroni a to khene: ‘Mosi, no kombela u nga henye. Awe wa va ziva vathu vava, vona va txi lava txizimu. Se va to tisa ouro, i ku yona yi ni nga yi teka ni yi nyivilikisa ka mndilo se ni maha txihomwana txiya!’ Mosi a to tshumela kambe e kwela ka Mmango wa Sinayi eya kombela Jehovha ti to e divalela Vaisrayeli.

Jehovha a to divalela basi ava va nga txi lava ku m’engisa. Atiya ti kombisa ti to nda lisima ngutu kuengisa Jehovha.