Kudivalelwa ka sionho ku si se maneka mterulo

Nzila yimweyo yo divalelwa sionho sathu i ngu digandelo da mterulo awu Jesu a nga hakela ngu mnoha wakwe. (Vaef. 1:7) Hambi keto Bhiblia yi womba tiya: “Txizimu txi mahile tiya kasiku kombisa kululama ka txona ngu kuva txi di divalete sionho si si nga mahwa kale.” (Var. 3:25) Kambe Jehovha a ndi na va a di si divalelisile kutxani sionho sathu na ku si se maneka mterulo hambi keto e simama e va Txizimu txa wululami?

Jehovha a thembisile ti to ku ndi nava ni “liveleko” ali li ndi no hulukisa ava va ndi no va ni likholo ka Txizimu ni ka sithembiso sa txona. Ngu kuya ngu mawonelo a Jehovha, mbimo yi a nga maha txithembiso txonetxo mterulo se wu ti haketwe. (Gen. 3:15; 22:18) Txizimu txi txi tsaniseka ti to ngu mbimo ya kona, mwanana wa txona a ndi na tiningela kasi kuta hamafuni a ta hakela mterulo. (Vag. 4:4; Vaheb. 10:7-10) Mbimo yi Jesu a nga ti hamafuni, Jehovha a mningile wusikoti wo divalela sionho hambi ku wu nga si se hakelwa mterulo. Jesu a mahile toneto nguko a txi ti ziva ti to digandelo da mterulo adi di ndi no ningelwa di ndi na sikota ku fenengeta sionho sa vale va ndi no va ni likholo.—Mat. 9:2-6.