Jehovha e ninga mtamo Samsoni

Vaisrayeli va tshumete ve khozela sizimu sa makuhu. Ngu toneto, Jehovha a va lekile ve xaniswa ngutu ngu Vafilista. Vafilista i ti vathu ava va nga txi maha timhaka to biha, va nga txi zumba ka ditiko da Kanana. Kambe, ku ti ngadi ni vamwani Vaisrayeli ava va nga txi khozela Jehovha. Mmweyo wawe i ti Manowa. Ene ni msikati wakwe va si nga ni vanana. Se ditshiku dimwani, Jehovha a rumete ngilozi kasiku yi ya gela tiya msikati wa Manowa: ‘Jehovha a na kuninga mwanana, awu a no hulukisa Vaisrayeli ka Vafilista. Kambe mwanana wako a nava Mnazira.’ Wa tiziva ti to i ti va mani Vanazira? I ti vathu ava va nga txi thumela Jehovha ngu nzila yo sawuleka, nem va si kayi misisi.

Ku di pindile mbimo, Manowa ni msikati wakwe va velekile mwanana awu va nga mraya ditina do i Samsoni. Jehovha a mahile ti to Samsoni e va dijaha da mtamo ngutu. A di ni mtamo wa hombe aha ko a txi tikota kudaya ngonyamu ngu manza. Ditshiku dimwedo, Samsoni a date 30 wa Vafilista ekha. Vafilista va txi m’nyenya ngutu ni ku va txi zama ku m’daya. Ka wusiku wo kari, Samsoni a tiya otela ka didhoropa adi di nga txi dhanwa ku i Gaza, se Vafilista va tiya m’emela ditimbani kala kuza ditxa kasiku ve m’daya. Kambe, Samsoni a wukile ni wusiku e gwanda ditimba da didhoropa e di rwala ka makata akwe e tsula txitimwi ka mmango awu wu nga ti hafuhi ni didhoropa dimwani. Vafilista kha va mmana Samsoni, hambiketo va simamile ve m’lavetela!

Vafilista va tiya kombela txivhuno ka Dhalila i nga ti txigango txa Samsoni. Vona va tiya m’gela tiya: ‘Athu hi lava kuñola Samsoni. Se ngaku awe u txo hi gela ti to ngu kutxani ene adi ni mtamo wa hombe wo nga tile, athu hi na kuninga male yayingi.’ Dhalila a txi yi lava male. Ngu toneto, ene a sinzisile Samsoni ti to e m’gela to a txi wu mana hayi mtamo wule wa hombe. Makhatoni, Samsoni a lambile ku m’gela. Kambe Dhalila a simamile e m’sinzisa, se Samsoni a njo khene: ‘Ngu tona, ni na kugela. Phela ani ni Mnazira, ni ku kha ni khali kuwila misisi. Se ngaku va txo ni wila misisi, wotshe mtamo wangu wu na guma.’ Phela Samsoni a xanisekile ngutu aku a nga gela Dhalila ti to wu txita ngu hani mtamo wakwe.

Wa ti ziva ati ti nga maheka? Dhalila a to tutuma eya geletela Vafilista totshe ati Samsoni a nga ti m’gete. Ngu msana, ene a wile e ta otelisa Samsoni hammidi kwakwe. Mbimo yi Samsoni a nga mana wukohe, Dhalila a kombete m’thu ti to eta wila misisi yakwe. Vafilista va tile va ta lwa ni Samsoni, se ene a zamile ku ti lwela kambe a tumbute ti to a si nga ni mtamo nguku va ti m’kayile misisi. Se Vafilista va to ñola Samsoni ve m’xokolela maso veya m’beta jele.

Ditshiku do kari, Vafilista va tshanganile kasiku ve khozela txizimu txawe Dhagoni. Vona va txi veka ni kusinya va txi kha vona i Dhagoni a nga va vhuna kuñola Samsoni. Va to ya teka Samsoni ve m’tshuketisa ka tiphande timbidi ati ti nga txi tsanisa nyumba ayi va nga ti ka yona, ve khata ku m’seka ni ku m’poyilela. Kuve ka mbimo yile, misisi ya Samsoni yi ti khatile kukula. Se ene a to maha mkombelo a txi dila, atxi khene: ‘Jehovha no kombela, ni ningi mtamo.’ Samsoni a to tshumela e mana mtamo se a tikoti kuretha tiphande tile ta timbidi. Ahale ku ti ni Vafilista vavangi. Se nyumba yile yi to wa txitimwi kwawe, votshe va fite kupata ni nene Samsoni.