GONDO 15
I mani Jesu?
Jesu m’thu wo zivaneka ngutu ka matimu a vathu. Hambiketo vamwani vo ziva ditina dwe, kha va zivi to tala ngu ngene. Vamwani va ni mawonelo o hambana-hambana ngu ti to Jesu i mani. Ngu tihi ati Bhiblia yi wombako tona ngu ngene?
1. I mani Jesu?
Jesu i ngelozi ya mtamo ayi yi zumbako nzumani. Ene a wumbilwe ngu Jehovha na ku si se vangwa txilo tximwani. Ngu toneto ene a dhanwa ku “matiwula a sotshe sivangwa.” (Vakolosa 1:15) Bhiblia yi womba ti to Jesu i “Mwanana wa [Txizimu] wa mmweyo ekha” nguko i Jehovha apune a nga mmaha. (Johani 3:16) Jesu a thumile kumweko ni Tate wakwe Jehovha a txi mvhuna kuvanga sotshe silo. (Lera Mavingu 8:30.) Jehovha ni Jesu va simama va di ni wuxaka wa hombe. Jesu a dhanwa ku “Dipswi” nguko m’wombawombeli wa Txizimu awu a pindiselako didungula ni milayo ya Txizimu.—Johani 1:14.
2. Ngu kutxani Jesu a di tile hamafuni?
Ka 2.000 wa malembe aya ma nga pinda Jehovha a mahile txidiwukiso. Ngu kuthumisa moya wakwe wo sawuleka, ene a tekile wutomi wa Jesu wuva ka mrumbu wa Maria awu i nga ti mbiri. Ngu nzila yoneyo Jesu a velekilwe hamafuni. (Lera Luka 1:34, 35.) Jesu a tile hamafuni kota Kristu mwendo Mesiya awu a nga ti thembisilwe, ni ku ta hulukisa vo tala.a Wotshe wuprofeti wa Bhiblia mayelano ni Mesiya wu ti ta hetiseka kwakwe. Eto ti mahile ti to vathu ve ziva ti to Jesu i “Mesiya Mwanana wa Txizimu txi txi hanyako.”—Matewu 16:16.
3. Jesu a hani konku?
Mbimo yi Jesu a nga fa a wusilwe kota ngelozi e tshumela eya nzumani. A kheya, “Txizimu txi mu guletile ngutu.” (Vafilipiya 2:9) Konku ene a ni mtamo ngutu kupinda totshe tingelozi, ene o pindwa ngu Txizimu dwe.
ENGETELA WUZIVI WAKO
Ziva to i mani Jesu, ni ti to ngu kutxani i di ta lisima kugonda ngu ngene.
4. Jesu hi nga Txizimu txa mtamo wotshe
Bhiblia yi gondisa ti to Jesu i ngelozi ya mtamo ayi yi ku nzumani. Hambiketo ene wa tiveka hahatshi ka Txizimu txakwe Jehovha i ku Tate wakwe. Hi ti zivisa kutxani? Xalela VHIDHIYO u wona to Bhiblia yi ti kombisisa kutxani ti to Jesu hi nga Txizimu txa mtamo.
Mibhalo ayi yi londiselako ya hi vhuna kuwona ti to Jehovha ni Jesu va hambana. Lerani m’bhalo wumwewo ngu wumwewo, mi gwita mi bhula ngu siwotiso asi si londiselako.
Lera Luka 1:30-32.
Mapswi a ngelozi ma ti kombisisile kutxani ti to Jesu ni Jehovha Txizimu “Nyatxitimwi” va hambana?
Lera Matewu 3:16, 17.
Mbimo yi Jesu a nga bhabhatiswa ngu tihi ati dipswi adi di nga ti pfala ngu nzumani di nga ti womba?
U alakanya ti to i ti dipswi da mani?
Lera Johani 14:28.
Ka tate ni mwanana i mani i ku wa hombe? I mani a nga rumako mkwawe?
Jesu a ti lava kuwomba txani mbimo yi a nga khene Jehovha i Tate wakwe?
Lera Johani 12:49.
Ina Jesu a ta nga thuka e pimisa ti to wa fana ni Tate wakwe? U ti wonisa kutxani?
5. Jesu a kombisile ti to ngene Mesiya
Amu ka Bhiblia ku ni wuprofeti wo tala awu wu nga vhuna vathu ku ve ziva ti to Jesu ngene Mesiya, awu Txizimu txi nga mu m’rumela ti to e ta hulukisa vathu. Xalela VHIDHIYO kasiku u wona wuprofeti wumwani awu wu nga hetiseka mbimo yi Jesu a nga ta hamafuni.
Lera wuprofeti awu wu londiselako, mi gwita mi bhula ngu siwotiso siya:
Lera Mika 5:2 kasi kuwona to Mesiya a veleketwe hani.b
Ina wuprofeti wonewo wu hetisekile? —Matewu 2:1.
Lera Masalmo 34:20 ni Zakariya 12:10 kasi kuwona wuprofeti mayelano ni kufa ka Jesu.
Ina wuprofeti wonewo wu hetisekile? —Johani 19:33-37.
Vamwani va womba ti to Jesu a to pulanisa kasi ku wuprofeti wu hetiseka. Ina toneto ta pfisiseka?
Kuhetiseka ka wotshe wuprofeti wuwa wu komba ti to Jesu i mani?
6. Kugonda ngu Jesu ta hi wuyelisa
Bhiblia ya kombisa ti to nda lisima kugonda ngu Jesu ni mthumo wakwe. Lera Johani 14:6 ni 17:3, mi gwita mi bhula ngu txiwotiso txiya:
Ngu kutxani i di ta lisima kugonda ngu Jesu?
Jesu a hi tulete nzila yo hi kota kuva vangana va Jehovha. Ene a gondisile ditshuri mayelano ni Jehovha, ni ku ngu kona ha kwakwe hi nga mana wutomi wo mbi guma
NGAKO VATHU VA TXI KHONA: “Tifakazi ta Jehovha kha ti kholwi ka Jesu.”
U nga xamulisa kutxani?
ATI HI NGA TI WONA
Jesu i ngelozi ya mtamo ngutu. Ene i mwanana wa Txizimu ni ku i Mesiya.
Ngu tihi ti u nga ti gonda
Ngu kutxani Jesu a txi dhanwa ti to “matiwula a sotshe sivangwa”?
Ngu tihi ati Jesu a nga ti maha a si se ta hamafuni?
Hi tizivisa kutxani ti to Jesu ngene Mesiya?
XOTA TIMWANI
Wona timwani ti kombisako ti to Jesu i ti Mesiya.
“Ina wuprofeti wa mu ka Bhiblia wu kombisa ti to Jesu i ti Mesiya?” (Msungo mhaka wu ku ka site)
Wona ti to ngu kutxani Bhiblia yi txi womba to Jesu i mwanana wa Txizimu.
“Ngu kutxani Jesu a txi dhanwa ku i Mwanana wa Txizimu?” (Msungo mhaka wu ku ka site)
Wona to ngu kutxani gondo ya vathu vararu ka m’thu mmweyo yi sa seketelwa ka Bhiblia.
Wona nzila yi wutomi wa wamsikati wo kari wu nga txitxa ngu yona msana ka kuva a di gondile ati Bhiblia yi ti wombako ngu Jesu.
“Wa msikati wa M’judha awu a nga xolisisa ati a nga ti ti kholwa” (Khenjemuka! wa Maio wa 2013)
a Ka gondo 26 ni 27 hi na ta gonda to ngu kutxani vathu ti txi lava ve hulukiswa ni ku Jesu a hi hulukisisa kutxani.
b Wona Txhamuselo yo gwitisa 2 kasi kuwona wuprofeti awu wu nga profeta ngu mbimo ayi Jesu a ndi no humelela ngu yona.