GONDO 21
Dibhuku da Mtuletelo di womba txani ngu wumangwana wako?
“Amen! Ngono! Mkoma Jesu.”—MTU. 22:20.
NDANDO 142 Themba yi yi hi tsanisako
A TI HI NO TI GONDAa
1. Ngu txihi txisungo txa lisima a txi votshe vathu va fanelako ku txi maha?
MMWANI ni mmwani nyamsi a fanete kumaha txisungo txa lisima ngutu. Hi fanete ku sawula ti to hi na seketela Jehovha Txizimu a wu a fanelwako ngu kufuma wuako wotshe mwendo ku hi na ema ni mlala wa wombe ngutu i ku Sathani Dhiyabhulosi. Ngu toneto dwe hi nga ti sawulako. Ava va no sawula ku ema ni Jehovha va na mana wuyelo ya yinene kambe a va va no sawula ku ema ni Sathani va na loviswa da magwito. (Mat. 25:31-33, 46) Ngu mbimo ya “xanisa ya hombe” vathu va na abaniswa va mwani va na abaniselwa ku loviswa a niku va mwani va na mana wutomi wo mbi guma.—Mtu. 7:14; 14:9-11; Eze. 9:4, 6.
2. a) Dibhuku da Vahebheru 10:35-39 di hi kuzeta ku hi maha txani? b) Dibhuku da Mtuletelo di nga hi vhunisa kutxani?
2 Lera Vahebheru 10:35-39. Ngako u di sawute ku thumela Jehovha, awe u mahile txisungo txa txinene. Ha tsaniseka ti to u ti emisete ngutu kuvhuna vamwani ti to ni vona ve maha txisungo txiya txa txinene. I di toneto awe u nga thumisa a ti u nga ti gonda ka dibhuku diya da Mtuletelo kasi ku va vhuna. Dibhuku diya da Mtuletelo di kombisa a ti ti no humelela ka vale va wukelako Jehovha, ni ku tshumela di kombisa makatekwa a ya ma no manwa ngu va va seketelako mfumo wa Txizimu. Se ti ni lisima kugonda ngu mhaka yiya. Hi txi maha toneto hi na tsanisa ku ti emisela kwathu ko simama hi thumela Jehovha. I si nga eto dwe hi nga thumisa a ti hi nga ti gonda kasi ku vhuna vamwani ti to ni vona ve maha txisungo txa txinene ni kutshumela ve simama ve thumela Jehovha.
3. Hi na bhula ngu txani ka gondo yiya?
3 Ka gondo yiya, hi na bhula ngu siwotiso siya: Ngu yihi txhatxhazelo yi no manwa ngu vale va seketelako mfumo wa Txizimu? Ni ku ngu tihi ti ti no maheka ka vale va sawulako ku seketela txikalani txi txo bhilivila a txi txi nga wombwa ka dibhuku da Mtuletelo?
NGU YIHI TXHATXHAZELO YI NO MANWA NGU VALE VA EMAKO NI JEHOVHA
4. Ngu wuhi mtxawa awu mpostoli Johani a wu wonako wu di kumweko ni Jesu nzumani?
4 Ka muwoniso Johani a wona mitxawa mimbidi ya vathu ava va seketelako mfumo wa Jehovha ni kutshumela ve amukela wutomi wo mbi guma. Mtxawa wo khata wu wumbwa ngu 144.000 wa vathu. (Mtu. 7:4) Vathu va va lumbako mtxawa wonewo va tekwa kona hawa hamafuni ve ya wumba Mfumo nzumani kumweko ni Jesu. Vona va ya fuma kumweko ni Jesu ve fuma mafu. (Mtu. 5:9, 10; 14:3, 4) Ka muwoniso wonewo Johani e tshumela e va wona va di emile kumweko ni Jesu nzumani ka Mmango wa Siyoni.—Mtu. 14:1.
5. Ngu tihi ti no maheka i si nga kale ka masalelwa ava va 144.000?
5 Kukhukhela ka timbimo ta vapostoli vathu vo tala va sawulwa ti to ve va txienge txa va va 144.000. (Luka 12:32; Var. 8:17) Johani e tshumela e gelwa ti to mmtxawa wa wudotho dwe awu wu no ta va u txi hanya ka masiku ya magwito awu wu lumbako 144.000. Masalelwa onewo ma na amukela “txixambanyo” txi kombisako ti to Jehovha wa va amukela na yi si se khata xanisa ya hombe. (Mtu. 7:2, 3; 12:17) Se ngu mbimo ya xanisa ya hombe masalelwa onewo ma na tekwa me ya nzumani me ya vhala mtengo wa 144.000, wa vale se va ku nzumani. Vona va na fuma kumweko ni Jesu ka mfumo wa Txizimu.—Mat. 24:31; Mtu. 5:9, 10.
6-7. a) Ngu wuhi mtxawa wu mwani a wu Johani a gwitako a txi wu wona, ni ku hi gonda txani ngu wona mtxawa wonewo? b) Ngu kutxani ava va 144.000 kumweko ni va va “dibutho da hombe” va di fanete kugonda ati ti ku Mtuletelo ndima ya 7?
6 Msana kova a di woni mtxawa wa 144.000 Johani a tshumete a wona “dibutho da hombe.” Kuhambana ni va va 144.000 mtxawa wuwa mbwa matanda ku bala. (Mtu. 7:9, 10) Ngu tihi ti hi tizivako ngu wona? Johani a tshumela a gelwa tiya : “Avava, ngu va va tako ngu kuxanisekani ka hombe; va nga kuwula syambalo sawe, ve si basisa ngu mnoha wa Txinvutana.” (Mtu. 7:14) Msana ko huluka ka xanisa ya hombe dibutho diya da hombe da vathu di na hanya kona hawa hamafuni di ti dila ngu makatekwa o tala.—Mas. 37:9-11, 27-29; Mav. 2:21, 22; Mtu. 7:16, 17.
7 Ti si nga ni mhaka ti to u sawutwe ku ya hanya nzumani mwendo ku ta hanya kona hawa ha mafuni, hi fanete ku ti wona hi txi amukela txhatxhazelo a yi yi nga txhamuselwa ka dibhuku da Mtuletelo ndima ya 7. Phela i na va mbimo yo tsakisa ka yotshe mitxawa ya mimbidi ya malanda ya Txizimu. Ti na tsakisa ngutu ku va hi di sawute ku seketela wukoma wa Jehovha. Ngu tihi timwani a ti dibhuku da Mtuletelo di hi gelako mayelano ni xanisa ya hombe?—Mat. 24:21.
KU NA HUMELELA TXANI NGU VA VA WUKELAKO TXIZIMU
8. Xanisa ya hombe yi na khatisa kutxani, ni ku ngu tihi ti vathu vo tala va no ti maha?
8 Nga ha hi nga ti wona ngu kona ka gondo ayi yi nga pinda wu koma wa mafu yawa i si nga kale wu na wukela Bhabhilona wa hombe, i ku wotshe wukhongeli wa makuhu wa ha mafuni hawa. (Mtu. 17:16, 17) Atiya ma na va makhato a xanisa ya hombe. Ina a tiya ti na maha ti to vathu ve maha txisungo txo lava kukhozela Jehovha? Ahim-him. Kuhambana ni eto, Mtuletelo ndima 6 yi kombisa ti to ka timbimo toneto to karata vathu va na lava wuthavelo ka mimango, ti wombako ti to vona va na veka themba yawe ka wukoma wa mafu yawa ni ka mabhindu. Akuwa vo na mbi seketela Mfumo wa Txizimu, Jehovha a na va wona kota valala.—Luka 11:23; Mtu. 6:15-17.
9. Njitxani txi no maha ti to vathu ve wukela ava va khozelako Jehovha ngu ditshuri, ni ku ngu tihi ti no maheka?
9 Ka mbimo ya xanisa ya hombe ti na woneka ha kubasani ti to mba mani a va i ku malanda a Jehovha a ditshuri. Vona va na va vona dwe ha mafuni hawa va khozelako Jehovha Txizimu ni kulamba ku seketela “txikalani.” (Mtu. 13:14-17) Ku ti emisela kwawe ku na wusa kuhenya ka va wukelako Jehovha. Ngu toneto matiko ma na sengeletana kasi kuwukela vathu va Txizimu ha mafuni kotshe. Ku wukelwa koneko a mu ka Bhiblia kudhanwa ku ngu wukelwa ngu Magoge wa ditiko da Goge.—Eze. 38:14-16.
10. Nga ha ti nga txhamuselwa ngu kona ka Mtuletelo 19:19-21, Jehovha a na maha txani mbimo yi a no wona vathu vakwe va txi wukelwa?
10 Ngu tihi ti Jehovha a no ti maha mbimo yi a no wona vathu vakwe va txi wukelwa? Ene a hi gela tiya: “Kuhenya kwangu ku na hoka tithonvuni kwangu.” (Eze. 38:18, 21-23) Dibhuku da Mtuletelo ndima 19 di txhamusela a ti ti no gwita ti maheka. Jehovha a na rumela mwanana wakwe kasi ku e ta emela vathu vakwe ni ku xula valala vakwe. Jesu a na thumisana kumweko ni dibutho da nzumani “i ku tingelozi to thembeka” kumweko ni va va 144.000. (Mtu. 17:14; 19:11-15) I na va yihi wuyelo ya yimbi yoneyo? Votshe vathu kumweko ni tisengeletano a ti ti wukelako Jehovha ti na loviswa!—Lera Mtuletelo 19:19-21.
MTXHADHO WU NO VAHO MZUMANI MSANA KA ARMAGEDHONI
11. Ngu tihi ta lisima ngutu ati ti no maheka ti ku ka dibhuku da Mtuletelo?
11 Alakanya nzila yi ava va no huluka hamafuni va no tipfa ngu yona msana kova va di hulukile ka xanisa ya hombe ni ku loviswa ka valala va Txizimu. Eyo i na va mbimo yo tsakisa ngutu. Hambi ku ku no va ni litsako la hombe nzumani msana kova Bhabhilona wa hombe a di lovisilwe, ku na va ni timwani ti no tisa ngutu litsako. (Mtu. 19:1-3) Ngu tihi ta kona? I “mtxhadho wa Txinvutana” i ku kuhetiseka ka dibhuku da Mtuletelo.—Mtu. 19:6-9.
12. Nga ha ti nga kombiswa ngu kona ka Mtuletelo 21:1, 2, i ngu mbimo muni wu no maheka mtxhadho wa Txinvutana?
12 Ngu yihi mbimo wu no maheka mtxhadho wonewo? Votshe va 144.000 va na va va di nzumani na yi si se maheka Armagedhoni. Kambe eyo hi nga yona mbimo yi ku no va ni mtxhadho wa Txinvutana. (Lera Mtuletelo 21:1, 2.) Mtxhadho wa Txinvutana wu na maheka msana ka yimbi ya Armagedhoni ni ku votshe valala va Txizimu va ti lovisilwe.—Mas. 45:3, 4, 13-17.
13. Ngu tihi ti no maheka ka mtxhadho wa Txinvutana?
13 Ku na maheka txani ka mtxhadho wuwa wa Txinvutana? Kufana ni mtxhadho wamwamna ni msikati mtxhadho wuwa wo fanekisela wu joyina Mkoma Jesu Kristu ni kumweko ni va va 144.000, i ku txiwutwa txakwe. Tximahakalo txiya txo sawuleka ngu txona txi no veka makhato a mfumo wa wuphya awu wu no fuma ha mafuni kotshe kudingana 1.000 wa malembe.—Mtu. 20:6.
DIDHOROPA DO SAWULEKA DI WU GWESISA KUTXANI WU MANGWANA WAKO
Dibhuku da Mtuletelo ndima 21 di womba-womba ngu didhoropa adi di dhanwako ku i Jerusalema wamphya di txi “relela ngu nzumani, di txi ta ngu ka Txizimu.” Ka Mfumo wa Txizimu wa 1.000 wa malembe didhorapa donedo di na tisa makatekwa ka va va engisako Txizimu. (Wona paragrafu 14-16)
14-15. Dibhuku da Mtuletelo ndima 21 di fananisa va 144.000 ni txani? (Wona mfota wa kapa.)
14 Ngu msana dibhuku da Mtuletelo ndima 21 di fananisa a va va 144.000 ni didhoropa do tshura ngutu di dhanwa ku i “Jerusalema Wamphya.” (Mtu. 21:2, 9) Makhato ya madhoropa yawa ma seketetwe ka 12 wa marigwi a ha ku nga bhalwa ka wona “matina a digumi ni mambidi a vapostoli va digumi ni mambidi va Txinvutana.” Ngu kutxani mhaka yiya yi di xamatisile mpostoli Johani? Ngu ku a woni ti to ditina di bhatwe ka mamwewo a marigwi onewo. Hi nga wona lungelo yiya yo tsakisa!—Mtu. 21:10-14; Vaef. 2:20.
15 Didhoropa diya do fanekisela da hambana ni mamwani madhoropa. Mtendela wa didhoropa donedo wu mahilwe ngu ouro ni ku 12 wa matimba a kona ma mahilwe ngu dhayimana, makhato kumweko ni mimuru ya kona yi tshurisetwe ngu marigwi a lisima, ni ku otshe madhawa ma dingana. (Mtu. 21:15-21) Hambi keto ku ni ti ti nga txi txhota! Mpostoli Johani a tshumela e hi gela tiya: “Kha na wona dithepele ni da dimwedo didhoropani, nguko Mkoma Txizimu txa mtamo wotshe ngu ngene i ku dithepele da kona, kumweko ni Txinvutana. Didhoropa kha di lavi kuwoninga ka ditambo, hambi ka mtxima, nguko dona di woningwa ngu wudhumo wa Txizimu, ani dilambu da kona ngu Txinvutana.” (Mtu. 21:22, 23) Ava va lumbako Jerusalema Wamphya va wona Jehovha khohe ngu khohe. (Vaheb. 7:27; Mtu. 22:3, 4) Ngu toneto Jehovha ni Jesu ngu vona dithepele da didhoropa donedo.
I mani awu a no wuyelwa ngu malulamiselo aya Bhiblia yi ma dhanako ti to i “mnambo” ni “mndonga wa wutomi”? (Wona paragrafu 16-17)
16. Wutomi wu na va njani ngu mbimo ya 1.000 wa malembe a mfumo wa Txizimu?
16 Ta tsakisa ngutu ka va va nga sawulwa ku ve alakanyisisa ngu didhoropa diya. Hambi keto a va ni vona va ku ni lungelo yo ta hanya hawa mafuni ni ku ni vona va nga alakanyisisa ngu didhoropa diya. Ngu ku ka mbimo ya mfumo wa Txizimu wa 1.000 wa malembe Jerusalema Wamphya a na tisa makatekwa o tala. Johani a wona makatekwa onewo ma txi khulunga nga ti ta “mnambo wa mati a wutomi.” Ka otshe madhawa a mnambo wonewo ku ni “mdonga wa wutomi” a wu wu ku ni mazokoro a “kuhanyisa mifumo.” (Mtu. 22:1, 2) Votshe vathu va va no va va txi hanya ka mbimo yoneyo va na ma mana makatekwa yawa. Ku dotho ku dotho votshe vathu va naya kuhetisekani. Kha ku na mbi swa ku va ni malwati, kupandiseka, hambi kudila.—Mtu. 21:3-5.
17. Nga ha dibhuku da Mtuletelo 20:11-13 di kombisako ngu kona i mani a wu a no wuyelwa ngu makatekwa a ya ma no manwa ngu mbimo ya mfumo wa Txizimu wa 1.000 wa malembe?
17 Mba mani ava va no mana makatekwa yawa? Vo khata ngu va va dibutho da hombe ava va no huluka ka yimbi ya hombe ya Armagedhoni, kumweko ni vanana vawe ni va mwani ava va no yo velekwa ka mafu a maphya. Kambe dibhuku da Mtuletelo ndima 20 di thembisa ti to ava va nga fa va na ta wuswa. (Lera Mtuletelo 20:11-13.) A va vo thembeka i ku “vo lulama” ava va nga fa mbimo yi yi nga pinda, kumweko ni “va kwa mbi lulama” i ku va va nga mbi mana mkhanjo wo gonda ngu Jehovha ni vona wuswa va ta hanya a hawa mafuni. (Mith. 24:15; Joh. 5:28, 29) Ina a tiya ti womba ti to votshe a va va nga fa va na ta wuswa ngu mbimo ya mfumo wa 1.000 wa malembe? Ahim-him ava va nga fa kambe va di lambile ku thumela Jehovha kha va na mbi ta wuswa. Vona va vite ni mkhanjo wo ve sawula ku thumela Jehovha kambe va ti vekile ha kubasani ti to vona kha va faneleki ku ya hanya ka mafu a maphya a Paradhise.—Mat. 25:46; 2 Vat. 1:9; Mtu. 17:8; 20:15.
TXIDUKO TXO GWITA
18. Wutomi wu na va njani ngu magwito ka 1.000 wa malembe?
18 Ngu magwito ka 1.000 wa malembe votshe va va no va va txi hanya hamafuni va na ta va va di ni wutomi wo hetiseka. Kha ngaho wu a no ta va ni txikarato atxi txi tiswako ngu kwa mbi hetiseka ko khukhela ka Adhamu. (Var. 5:12) Txiruko a txi txi tiswako ngu kona ha ka Adhamu txi na va txi di thavisilwe. Ngu toneto votshe vathu ha mafuni ka mbimo yoneyo va na ta “tshumela ve hanya” kota vathu vo hetiseka magwito ka 1.000 wa malembe.—Mtu. 20:5.
19. Ngu kutxani ti txi laveka ti to ku va ni txiduko txo gwita?
19 Athu ha ti ziva ti to Jesu kha tumela ku xulwa ngu siduko sa Sathani. Ene a simamile a di thembekile hambi ku a nga txi dukwa. Kambe ina m’thu wo mbi hetiseka a nga si kota nga ha Jesu a nga maha ngu kona nga ku Sathani a txi m’duka? Mmwani ni mwani a na ta va ni mkhanjo wo ti xamulela a pune txiwotiso txonetxo mbimo yi Sathani a no humiswa ngu diphalani ko hokoma msana ko va ku di pindile 1.000 wa malembe. (Mtu. 20:7) Ava va no simama va di thembekile ka txiduko txo gwita va na amukela wutomi wo mbi guma ni ku tidila ngu khululeko wa ditshuri. (Var. 8:21) Kambe a va va no ti pata ni Sathani ko wukela Txizimu va na loviswa kumweko nayo ni madhimoni akwe.—Mtu. 20:8-10.
20. U ti pfisa kutxani ngu wuprofeti awu wu ku ka dibhuku da Mtuletelo?
20 U tipfisa kutxani msana ko va hi di xolisisile dibhuku diya da Mtuletelo? Ina kha ti ku tsakisi ku wona ti to nanawe wa pateka ka wuprofeti wuwa wo xamalisa? Ina kha ti ku mahi ti to u ramba vamwani kasi ku ni vona ve ta khozela Txizimu ngu nzila yo sawuleka? (Mtu. 22:17) Msana ko va hi di xolisisile a ti ti no maheka i si nga kale, ha susumeteleka nanathu ku womba mapswi o fana ni ya mpostoli Johani a nga womba o khene: “Amen! Ngono! Mkoma Jesu.”—Mtu. 22:20.
NDANDO 27 Txizimu txi wonekisa vanana va txona
[Txhamuselo ya hahatshi]
a Ayiya i gondo yo gwita ka mxaxamelo a yiya yi womba-wombako ngu Dibhuku da Mtuletelo. Nga ha hi no ti wona ngu kona ka gondo yiya, ava va simamako va di thembekile ka Jehovha va na mana wumangwana wo tsakisa, kambe a va wukelako wukoma wa Txizimu va na loviswa da magwito.