TIXAMULO TA SIWOTISO SA VAGONDI

Msana kova Jesu a di velekilwe, ngu kutxani Josefa ni Mariya va nga simama ve zumba Bhetlehema va si tshumeli mtini kwawe Nazareta?

Bhiblia kha yi wombi to tala. Kambe yi hi gela to engeteleka ati ku ti lava i ku tona ti nga va maha ve sawula toneto.

Ngelozi yi gete Mariya to a ndi na mana txirumbu e veleka mwanana. Mbimo yi ngelozi yi nga ningela didungula diya, Mariya ni Josefa va txi zumba Galileya ka didhoropa da Nazareta, i ku ha Josefa a nga velekelwa kona. (Luka 1:26-31; 2:4) Ngu kutsimbila ka mbimo, va khukhile Egipta ve tshumela Nazareta. i ku ha Jesu a nga kulela kona se e dhanwa ku i Munazareta. (Mat. 2:19-23) Se ngu wuraru wawe Jesu, Josefa, ni Mariya va txi zumba Nazareta.

Mariya a ti ni dixaka di di dhanwako ku i Izabheli, di nga txi zumba Judha. Izabheli i ti msikati wa mphaxeli Zakariya, se a velekile Johani M’bhabhatisi. (Luka 1:5, 9, 13, 36) Mariya a endete Izabheli ve zumba votshe mitxima yiraru khe Judha. Mariya a gwitile e tshumela Nazareta. (Luka 1:39, 40, 56) Ngu toneto Mariya a txi kuziva nyana Judha.

Ngu kutsimbila ka mbimo Josefa a engisile mthetho wo “ya bhalelani.” Se Josefa a to khukha ka didhoropa da Nazareta e ya Bhetlehema i ngadi “didhoropa da Dhavhidha” i ku ha wuprofeti wu nga womba to Mesiya a ndi na velekelwa kona. (Luka 2:3, 4; 1 Sam. 17:15; 20:6; Mika 5:2) Msana ko Mariya a di hefemute haleya, Josefa a sa tiemela to Mariya e maha liendo lo lapha lo tshumela Nazareta ni limenzana. Vona va zumbile Bhetlehema i ngadi mu ka 9 wa makilometro kuya Jerusalema. Ahaleya ti ndi na va hehukela kutsula dithepeleni ni limenzana veya maha mningelo madingano ni ti ti ngadi bhatwe ka mlayo.—Levhi 12:2, 6-8; Luka 2:22-24.

Ngelozi yi ti gete Mariya to mwanana wakwe a ndi na ningwa “txikhalo txa tate wakwe Dhavhidha” ni ku a ndi na “fuma kota Mkoma.” Ina Josefa ni Mariya va woni kuvelekwa ka Jesu didhoropani ka Dhavhidha ku di ni txhamuselo yo kari? (Luka 1:32, 33; 2:11, 17) Ti nga maha va di pimisile to i di ta tinene kusimama haleya ve emela mkongomiso wo kari wo ta ngu ka Txizimu.

Kha hi ti zivi to va ti ni mbimo muni va di khe Bhetlehema, mbimo yi ku nga hoka titxhari. Kambe vona va txi zumba ka nyumba yo kari, ni ku Jesu i ti “mwanana wa m’dotho,” i si nga limenzana. (Mat. 2:11) Ti ti komba nga hahanze ko ve tshumela veya Nazareta, vona va simamile Bhetlehema ngu mbimonyana yo lapha.

Herodha a rumete ti to “votshe vanana va sizambiana va Bhetlehema . . . va tanga ya malembe mambidi kuya hahatshi” ve dawa. (Mat. 2:16) Akule va nga di amukete txiziviso txo ta ngu ka Txizimu mayelano ni mthetho ewo, Josefa, Mariya ni Jesu va thavete Egipta kala kuza Herodha e fa. Ngu msana, Josefa a tekile mwaya wakwe ve tsula Nazareta. Se, ngu kutxani va nga mbi tshumelela Bhetlehema? Kasi ku ti vhikela ka mwanana wa Herodha Arkelawu a nga ti Judheya ni ku hetisisa txiziviso txa Txizimu. Se a di khe Nazareta, Josefa a di vhikelekile, a ndi na wunja Jesu kota mkhozeli wa ditshuri wa Txizimu.—Mat. 2:19-22; 13:55; Luka 2:39, 52.

Ti woneka nga Josefa a fite Jesu a si se tula nzila ya ti to vamwani ve ya hanya nzumani. Josefa a na ta wuswa kasi ku e hanya ha mafuni. Wungi wawe va na ta wonana nayo ve tshumela ve gonda ta tingi mayelano ni ti to ngu kutxani ene ni Mariya va di simamile ve zumba Bhetlehema msana kova Jesu a di velekilwe.