Simama u kulisa lirando lako

1. Ngu dihi ditshuri adi u nga di gonda mbimo yi u nga khata kugonda Bhiblia?

INA wa khumbula mbimo yi u nga khata ku gonda Bhiblia ngu yona? Ti nga maha u di xamate nguko u nga tumbula to Txizimu txi ni ditina. Ku ti lava u mahile ku hefu mbimo yi u nga ziva to Txizimu kha txi xanisi vathu ngu ku va hisa mndiloni, ni ku ti nga maha u di tsakile ngu themba yo tshumela u wona maxaka ako ya ma nga fa ni ku u ta hanya nawo hamafuni ka paradhise.

2. Hahanze ko gonda ditshuri da Bhiblia dwe, ngu tihi timwani ti u nga ti maha ti to u kula ngu didhawa da moya? (Vaefesu 5:1, 2)

² Mbimo yi u nga txiya u gonda dipswi da Txizimu, lirando lako ngu Jehovha li txiya li kula. Lirando lonelo li ku susumetete ku u thumisa ati u nga tigonda, u mahile sisungo sa sinene si tsimbitisanako ni matshina a milayo a Bhiblia. U tshukwatisile mahanyelo ako nguko u txi lava ku tsakisa Txizimu. Kufana ni mwanana wu a etetelako Tate wakwe awu a mdhundako, nawe u etetete Tate wathu wa nzumani.—Lera Vaefesu 5:1, 2.

3. Ngu tihi ti hi nga ti wotisako tona?

³ U nga ti wotisa tiya: ‘Lirando langu ngu Jehovha li tsani ngutu konku kupinda mbimo yi ni nga khata kuva Mkristu? Ku khukhela ni nga bhabhatiswa, ina mapimiselo ni simaho sangu sa tsimbitisana ni mapimiselo a Jehovha, ngutu-ngutu ko kombisa lirando ka vanathu?’ Se ngako “lirando lako lo khata” li di hote ka kudotho, u nga godhole. Atiya ti humelete ka Makristu o khata kambe Jesu kha ma tsukula, se nathu kha na mbi hi tsukula. (Mtu. 2:4, 7) Ene wa ti ziva to hi nga tshumela hi wuseta lirando ali hi ngadi nalo mbimo yi hi nga khata kugonda ditshuri.

4. Hi na bhula ngu txani ka gondo yiya?

⁴ Ka gondo yiya hi na bhula ngu nzila yi hi nga simamako hi kulisa ngu yona lirando lathu ngu Jehovha ni vamwani. Msana keto, hi na wona makatekwa aya athu ni vamwani hi ma manako ngako hi txi tsanisa lirando lathu.

KULISA LIRANDO LAKO NGU JEHOVHA

5-6. Ngu sihi sikarato si Paulo a nga manana naso ka mthumo wakwe, ni ku ngu tihi ti ti nga m’vhuna kusimama e thumela Jehovha?

⁵ Mpostoli Paulo a vite ni wutomi wo tsakisa ka mthumo wa Jehovha, kambe a wonisanile ni sikarato so tala asi a ngadi fanete ku si xula. Paulo a txi tolovela ku tsimbila minava yo lapha ni ku maendo oneyo ma si hehuki ka timbimo tile. Ka maendo akwe, mbimo yimwani Paulo a txi manana ni “tiphango ta tingi ta mnambo” ni “tiphango ta sigevenga.” Maho makhambi ya a nga xaniswa ngu vakaneti. (2 Vak. 11:23-27) Ni ku hi nga mbimo yotshe Makristu mamwani ma nga txi ninga lisima yotshe mizamo yi Paulo a nga txi yi maha kasi ku va vhuna.—2 Vak. 10:10; Vaf. 4:15.

⁶ Nji txani txi nga vhuna Paulo ku e simama ka mthumo wa Jehovha? Paulo a gondile to tala ngu tifanelo ta Jehovha amu ka Bhiblia ni ka ma experiyensiya ya a nga ma mana. Paulo a tsanisekile to Jehovha Txizimu a txi mranda. (Var. 8:38, 39; Vaef. 2:4, 5) Se eto ti mu mahile e randa ngutu Jehovha. Paulo a kombisile lirando lakwe ngu Jehovha nguku “thumela vasawuleki va txona a vava ni konkuwa mi va thumelako.”—Vaheb. 6:10.

7. Ngu yihi nzila yimwani yi hi nga kulisako ngu yona lirando lathu ngu Jehovha?

⁷ Hi nga kulisa lirando lathu ngu Jehovha ngu kugonda kwati Dipswi dakwe. Mbimo yi u lerako Bhiblia, zama ku pfisisa a ti didungula donedo di ti wombako ngu Jehovha. Ti wotise tiya: ‘Matimu yawa ma ti kombisa kutxani to Jehovha wa ni randa? Ngu kuya ngu matimu awa, ngu sihi sivangelo si ni ku naso so ni randa Jehovha?’

8. Mkombelo wu nga hi vhunisa kutxani to hi kulisa lirando lathu ngu Jehovha?

⁸ Nzila yimwani yi hi nga kulisako ngu yona lirando lathu ngu Jehovha ngu m’gela ta mbiluni ngu mkombelo. (Mas. 25:4, 5) Se Jehovha a na xamula mikombelo yathu. (1 Joh. 3:21, 22) Khanh, mwanathu wa txisikati wa khe Ásia a womba tiya: “Lirando langu ngu Jehovha ku khata li ti seketetwe ka wuzivi wa Txizimu, kambe lirando langu li engetete kukula mbimo yi ni nga wona nzila yi Jehovha a nga txi xamula ngu yona mikombelo yangu. Eto ti ni susumetete ku ni lava kumaha a ti ti mtsakisako.”b

KULISA LIRANDO LAKO NGU VAMWANI

9. Timoti a txi ti kombisa ngu nzila muni to wa kula ko kombisa lirando?

⁹ Ku di pindile malembenyana Paulo a di vile Mkristu, a mananile ni dijaha di di dhanwako ku i Timoti. Phela Timoti a ti randa Jehovha ni vathu. Paulo a gete Vafilipiya a txi: “Nguko kha ni nga ni mmwani m’thu wa mbilu ya kufana ni ya [Timoti] awu a sikotako ku mi khatalela.” (Vaf. 2:20) Paulo kha ndunduzela Timoti ngu mhaka ya wusikoti wakwe wo veka kwati madhixkursu, kambe a tsakisilwe ngu lirando li Timoti a ngadi nalo ngu vanathu. Kha ti kanakanisi to mabanza ya Timoti a nga thuma ka ona, ma txi mu emela ngu maso o bhilivila to e ma endela.—1 Vak. 4:17.

10. Anna ni mwamna wakwe va li kombisile kutxani lirando li va nga txi lipfa ngu vanathu?

¹⁰ Nathu hi nga lavetela tinzila to vhuna vanathu. (Vaheb. 13:16) Wona experiyensiya ya Anna, hi nga womba-womba ngu ngene ka gondo yi nga pinda. Msana kova ku di pekile txingulo txa hombe, ene ni mwamna wakwe va endete mwaya wa Tifakazi se va ya tumbula to maxapa a nyumba yawe ma ti haxuletwe ngu moya. Ngu mhaka yeto sotshe simaha sawe si di ni nzambwa. Anna a womba tiya: “Hi tekile simaha sawe hi ya kuwula, hi pasara, hi si petela hi ya va ninga. Kwathu eto i singa ta hombe, kambe ti mahile ku hi va ni wungana wa hombe kala konku.” Lirando li Anna ni mwamna wakwe va nga ti nalo ngu vanathu li va susumetete ku ve va vhuna ngu mithumo.—1 Joh. 3:17, 18.

11. a) Mizamo yi hi yi mahako kasi ku hi kombisa lirando ka vamwani li nga va gwesisa ku txani? b) Ngu kuya ngu Mavingu 19:17, Jehovha angulisa kutxani ngako hi txi kombisa lirando?

¹¹ Hi txi ñola vamwani ngu lirando ni wunene va na wona mizamo yi hi yi mahako yo etetela mamahelo ni mapimiselo a Jehovha. Ni ku va nga ninga lisima wunene awu hi wu kombisako ngu nzila yo pinda ayi hi nga txi alakanya ngu yona. A txi khumbula nzila yi vanathu va nga m’vhuna ngu yona, Khanh awu hi nga bhula ngu ngene makhatoni a womba tiya: “Na bonga ngutu votshe vanathu va txisikati ava va nga ni vhuna ka mthumo wa thembwe. Vona va txita ve ni teka, ve ni ramba hi ya susula ni ku ni heleketa mtini. Konkuwa na wona to eto ti txi lava mizamo ya hombe ni ku va txi maha toneto ngu lirando.” Ditshuri ti to hi nga votshe va no hi bonga ngu ti hi va mahelako. Anne a womba tiya ngu va va nga mvhuna: “Ni txi tsakela ku va mahela to kari ngu wunene wu va nga ni komba, kambe hi nga votshe ni zivako mtini kwawe. Hambi keto Jehovha wa yi ziva miti yawe. Ngu toneto ani na maha mkombelo kasi ku Jehovha e va mahela a ti ani ni tandekako ku ti maha.” Ati Khanh a ti wombako ditshuri. Jehovha wa wona hambi wunene wa wudotho awu hi wu kombisako ka vamwani. Ene a wona toneto kota digandelo da lisima ni txikweneti txi a no txi hakela.—Lera Mavingu 19:17.

12. Vanathu va txiwamna va nga kombisa lirando dibanzani ngu nzila muni? (Wona ni mifota.)

¹² Ngako u di mwanathu wa txiwamna u nga kombisisa kutxani lirando ka vamwani ngu kumaha txo kari kasi ku va vhuna? Mwanathu wu i ku ngadi jovhem a dhanwako ku i Jordan a wotisile didhota to a nga maha txani kasiku e vhuneta dibanzani. Didhota dile di mu ndunduzete ka ti a nga ti kota ku ti hokelela, kambe di mningile sileletelo so engeteleka sa ti a nga ti mahako. Ngu txikombiso, ene a kuzetile Jordan ku e hoka Nyumbani ya Mfumo ku di ngadi ni mbimo ni ku e losana ni vamwani, ku xamula mitshanganoni, kupateka ka mthumo wo txhumayela ka mtxawa wakwe wa thembwe ni ku lavetela tinzila to vhuna vamwani. Mbimo yi Jordan a nga thumisa sileletelo siya a si ngo kulisa wusikoti wakwe dwe kambe a txo tshumela e kulisa lirando lakwe ngu vanathu. Jordan a gondile to mbimo yi mwanathu a vekwako kota mvhuneteli wa madhota kha njo khata kuvhuna vamwani kambe o simama e va vhuna.—1 Tim. 3:8-10, 13.

13. Lirando li kuzetisile kutxani mwanathu Christian ti to e wuyiselwa kota didhota?

¹³ Se ku wombwa txani ngako u di thumile kota mvhuneteli wa madhota? Jehovha wa khumbula mithumo yi u nga yi maha ni lirando li li nga ku susumetela kasiku u yi maha. (1 Vak. 15:58) Ni ku ene wa li wona lirando li u simamako u li kombisa. Mwanathu wu a dhanwako ku i Christian a nga emiswa kuthuma kota didhota kha ta mtsakisa. Ene a womba tiya: “Ni mahile txisungo txo simama ni thumela Jehovha hambi ku ni nga singa ni malungelo.” Se ngu kutsimbila ka mbimo a wuyisetwe kota didhota, ene a khene: “Ti ni karatete kutshumela ni thuma kota didhota. Kambe ni ti gete tiya, aku Jehovha ngu wuxinji wakwe a nga ni tumelela ku ni tshumela ni thuma kota didhota, se ni ndi na maha toneto ngu mhaka ya lirando li ni ku nalo ngu Jehovha ni vanathu.”

14. U gonda txani ka ti ti nga wombwa ngu mwanathu wa txisikati wa khe Geórgia?

¹⁴ Vathu va Jehovha va kombisa lirando ni ka vaakelani. (Mat. 22:37-39) Ngu txikombiso, Elena, mwanathu wa txisikati wa khe Geórgia, a womba tiya: “Makhatoni, ni txi txhumayela ngu mhaka ya lirando li ni ku nalo ngu Jehovha. Kambe mbimo yi lirando lonelo li nga txiya li kula, lirando langu ngu vathu ni lona li kute. Ni zamile kuwona sikarato si ti nga mahako va txi wonisana naso ni kuwona mhaka yi yi nga gwesako timbilu tawe. Mbimo yi ni nga txiya ni pimisa ngutu ngu vona, ti txi ni maha ni lava kuva vhuna.”—Var. 10:13-15.

MAKATEKWA YA HI MA MANAKO NGU KU KOMBISA LIRANDO KA VAMWANI

15-16. Ngu ha ti nga kombiswa ngu kona ka mifota, ngu yahi makatekwa ya hi ma manako hi txi kombisa lirando ka vamwani?

¹⁵ Hi txi kombisa lirando ka vanathu, vamwani va wuyelwa. Msana kova ku di khatile COVID-19, mwanathu Paolo ni msikati wakwe va vhuni vanathu va va nga ti kute ngu tanga kuthumisa sithumiswa sawe sa eletroniko kasiku ve txhumayela ngu sona. Se mwanathu mmwani wa txisikati awu ti nga txi mkaratela makhatoni, a gwitile e ti tolovela. Ene a sikoti kuthumisa sithumiswa siya kasiku e ramba maxaka akwe ka Txialakanyiso. Se 60 wa vona va xalete Txialakanyiso ngu videoconferência. Mwanathu wule wa txisikati ni maxaka akwe va wuyetwe ngu mizamo yi Paolo ni msikati wakwe va nga yi maha. Ngu msana, mwanathu wule wa a bhalete Paolo a txi: “Na bonga ngutu ku hi gondisa athu hi nga kula ngu tanga. Kha ni na mbi divala nzila yi Jehovha a nga hi khatalela ngu yona ni yotshe mizamo yako.”

¹⁶ Paolo a gondile timhaka ta lisima ngutu ngu ma experiyensiya o fana ni awa. Eto ti mu khumbutisile ku lirando nda lisima kupinda wuzivi mwendo wusikoti awu m’thu a nga velekwa nawo. Ene a womba tiya: “Ni thumile kota muwoneleli wa txigava. Se nyamsi ni wona to hambi vahuweleli va txo thuka ve divala madhixkursu ya ni nga ma veka, va na simama ve khumbula txivhuno txi ni nga va ninga.”

17. I mani wu a wuyelwako ngako hi txi kombisa lirando?

¹⁷ Mbimo yi hi kombisako lirando ka vamwani nathu ha wuyelwa hi sa ti rinzela. Jonathan, awu a zumbako Nova Zelândia, wa tumelelana ni mhaka yiya. Ngu mlongiso mmwani ni minova ku txi hisa ngutu a woni nyaphandule a txi txhumayela txitaratoni, se Jonathan a mahile malulamiselo o thuma ni nyaphandule wule ka milongiso ayi yi ndi no londisela ni minova. Makhatoni, kha yi wona nzila yi a nga txi wuyelwa ngu yona ngu kukombisa wunene. Jonathan a womba tiya: “Ka timbimo tile ni si wu dhundi mthumo wa txhumayela, kambe mbimo yi ni nga tiya ni thuma ni nyaphandule wule, ni woni nzila yi a nga ti gondisa ngu yona ni nzila yi a nga ti wuyelwa ngu yona ka mthumo wa thembwe, eto ti ni mahile ni wu dhunda ngutu mthumo wuwa. Ni ku ni mani mngana wa hombe awu a nga ni vhuna to ni kula ngu didhawa da moya, ni ti dila ka mthumo wa thembwe ni ku tshuketa hafuhi ni Jehovha.”

18. Jehovha a lava ti to hi maha txani?

¹⁸ Jehovha a lava ti to hotshethu hi kulisa lirando lathu ngu ngene ni ngu vamwani. Nga ha hi nga ti wona ngu kona, hi nga kulisa lirando lathu ngu Jehovha ngu kugonda Dipswi dakwe ni kualakanyisisa ngu dona, ni ku mbimo yotshe hi womba-womba nayo ngu mkombelo. Hi nga kulisa lirando lathu ngu vanathu ngako hi txi va vhuna ngu simaho. Se mbimo yi lirando lathu li kulako hi na tshuketa ka Jehovha ni ka mwaya wathu wa moya, ni ku hi na tidila ngu wungana wuwa ngu ha ku si gumiko!