Hi nga gonda txani ka mapasi mambidi a Pedro

1. A sise kufa, Pedro a huhutetwe kumaha txani?

PEDRO a txi ti ziva to wutomi wakwe i si nga kale wu ndi na guma. Otshe malembe ya a nga thuma ngu kuthembeka ene a tsimbite ni Jesu, e tula mikhanjo yo txhumayela ni kuthuma kota txiro txa mmidi wu wu fumako. Kambe mthumo wakwe wu si se kuguma. Ngu malembe ya 62-64 E.C., a huhutetwe kubhala mapasi mambidi—i ku mabhuku a Pedro wo khata ni wa wumbidi . A kombisile kunavela ka ti to mapasi oneyo me vhuna Makristu hambi msana ko a di fite.—2 Pedro 1:12-15.

2. Ngu kutxani hi nga wombako to mapasi a Pedro ma hokile ngu mbimo ya yinene?

² Pedro a huhutetwe kubhala mapasi akwe mbimo yi Makristu kulowe ma nga txi ‘manana ni siduko.’ (1 Pedro 1:6) Vaprofeti va makuhu va txi zama kugondisa tigondo ta makuhu ni mahanyelo a nzambwa ka Makristu mabanzani. (2 Pedro 2:1, 2, 14) Ni ku Makristu ya ma nga txi zumba Jerusalema ma di na wonisana “ni magwito a sotshe simaha,” i ku ti to Varoma va ndi na hoxota Jerusalema ni dithepele da kona. (1 Pedro 4:7) Kha ti kanakanisi ti to mapasi a Pedro ma vhuni Makristu kuwona nzila yi ma di no simama ma di thembekile ngu yona, ni kutilulamisela ku ta kuwonisana ni sikarato si si ndi no londisa.b

3. Ngu kutxani hi di fanete kumaha wuxolisisi ka mapasi a Pedro?

³ Hambiku Pedro a nga bhala mapasi akwe a txi alakanyela Makristu o khata, Jehovha a patile mapasi oneyo ka dipswi dakwe. Ngu toneto nathu hi nga vhuneka ngu mapasi oneyo. (Var. 15:4) Aku hi hanyako ka masiku o biha nathu ha wonisana ni sikarato a si si nga mahako ti si hi hehukeli kuthumela Jehovha. I si nga kale, hi na wonisana ni xanisa ya hombe kupinda yi ma nga wonisana nayo Makristu o khata, ya kuhoxotwa ka Jerusalema ni dithepele da kona. Hi mana sialakanyiso sa lisima ka mapasi mambidi a Pedro. Eto ti na hi vhuna ku hi zumba hi di ti lulamisete ka ditshiku da Jehovha, ti hi vhuna kuxula dizowa da ti vathu va pimisako ngu ngathu ni kusakulela lirando la hombe ngu vamwani. Sialakanyiso siya si nga tshumela si vhuna madhota kuwona nzila yi va nga vhunako ngu yona vanathu dibanzani, kuzumba va di tsani.

ZUMBA U DI RINZETE

4. Ngu kuya ngu 2 Pedro 3:3, 4, ngu tihi ti nga holisako likholo lathu?

⁴ Hi zumba hi di randetwe ngu vathu va va si kholwiko ka wuprofeti wa mu ka Bhiblia. Vakaneti va nga hi poyila nguku hi nga womba i di ngadi kale to magwito ma na hoka. Vatseketseli vamwani va womba ti to magwito kha ma na mbi thuka ma di hokile. (Lera 2 Pedro 3:3, 4.) Ngaku hi txi pfa mapswi oneyo ka va hi va txhumayelako, vakolega vathu va txikolwani mwendo maxaka athu, likholo lathu li nga hola. Pedro a txhamusete ti ti nga hi vhunako.

5. Nji txani txi nga hi vhunako kuzumba hi txi rinzela kugumiswa ka mafu yawa o biha? (2 Pedro 3:8, 9)

⁵ Ka vamwani ti woneka nga Jehovha o swela kutisa magwito ya mafu yawa o biha. Mapswi a Pedro ma nga hi vhuna ni ku hi khumbuxeta ti to nzila yi Jehovha a yi wonisako tona mbimo kha yi fani ni ya vathu. (Lera 2 Pedro 3:8, 9.) Ka Jehovha, 1000 wa malembe ti fana ni ditshiku dimwedo. Jehovha wa laphisa mbilu nguko kha lavi ti to ni wa mmweyo e lova. Ngaku ditshiku dakwe di txi hoka, mafu yawa o biha ma na loviswa. Hi ni mkhanjo wo thumisa mbimo yi hi ku nayo kasi ku txhumayela vathu ha mafuni.

6. Hi nga rinzela ngu nzila muni “ni ku kuluvetisa” ditshiku da Jehovha? (2 Pedro 3:11, 12)

⁶ Pedro a kuzeta ku hi rinzela “ni kukuluvetisa” kuhoka ka ditshiku da Jehovha. (Lera 2 Pedro 3:11, 12.) Hi nga ti mahisa kutxani toneto? I ngava ta tinene kualakanyisisa ditshiku ni ditshiku, ngaku ti txi koteka ngu makatekwa ya hi no ma mana ka mafu a maphya. Ti wone u txi hefemula moya wa wunene ngutu, ni kudya sakudya sa sinene ngutu u tshumela u hoyozela maxaka yako ya ma no ta wuswa, ni kugondisa ava va nga hanya ka timbimo ta kale, mayelano ni ku hetiseka ka wuprofeti wa mu ka Bhiblia. Kualakanyisisa koneko ku na kuvhuna ku u rinzela ni ku tivhikela ka masiku yawa o biha ya magwito. Aku “hi nga songolela kutiziva” ngu wumangwana kha hi nambi thuka ‘hi humiswa ka likholo lathu lo tsana’ ngu vaprofeti va makuho.—2 Pedro 3:17.

XULA KUTHAVA VATHU

7. Nji txani txi nga humelelako ngaku hi txi thava vathu?

⁷ Aku hi zivako to ditshiku da Jehovha di hafuhi, eto ta hi susumetela ku txhumayela mahungu a manene ka vamwani. Hambiketo, mbimo yimwani hi nga thava kuwomba-womba. Ngu kutxani? Nga ha ti nga mahekela Pedro, mbimo yimwani hi nga thava ti vathu va nga ti pimisako mwendo va nga ti mahako ngu ngathu. Ka wusiku wu va nga ñola Jesu, Pedro a thavile kuwomba to mmweyo wa valondeteli va Jesu ni ku a mlambite kuraru ti to wa mziva. (Mat. 26:69-75) Kambe Pedro ngu msana, a xute kuthava ku a ngadi nako. A bhate tiya a di tsani: “Mi nga thaveni kudhukisela kwawe, kambe mi nga karatekeni.” (1 Pedro 3:14) Mapswi a Pedro ma hi tsanisa, hi nga sikota kuxula kuthava vathu.

8. Nji txani txi nga hi vhunako kuxula kuthava vathu? (1 Pedro 3:15)

⁸ Nji txani txi nga hi vhunako kuxula kuthava vathu? Pedro a hi gela tiya: “Dhumisani Mkoma Kristu timbiluni kwanu.” (Lera 1 Pedro 3:15.) Eto ti pata ku alakanyisisa ti to Jesu Kristu Mkoma wathu ni ku ene a ni mtamo wa hombe. Ngako u txi telwa ngu dizowa mbimo si u manako mkhanjo wo txhumayela mahungu a manene khumbula Mkoma Jesu. Alakanya Jesu a di khalahatshile ka txikhalo txa wukoma a di randetwe ngu tingelozi to tala. Khumbula ti to Jesu a “ningilwe wotshe mtamo . . . ha mafuni ni nzumani” ni ti to “a nava ni nawe yotshe mbimo kala kugumani ka mafu.” (Mat. 28:18-20) Pedro a hi kuzeta “kuzumba hi di lungekile” kasi ku emela likholo lathu. Ina wa ti tsakela kutxhumayela mthumoni, txikolwani ni makhalo mamwani? Alakanyisisa ngu ti to u nga timaha dihi ditshiku ni ku ti lungisela ka ti u no tiwomba. Kombela txibindi ka Jehovha ni kuthemba ti to ene a na kuvhuna kuxula kuthava vathu.—Mith. 4:29.

“KOMBISA LIRANDO LA HOMBE”

9. I ngu nzila muni Pedro a nga tandeka kukombisa lirando? (Wona mfota.)

⁹ Pedro a gondete ku kombisa lirando. Ene ati tiho mbimo si Jesu a nga khene: “ni mi ninga mlayo wa wuphya, randanani nga ti ani ni nga mi randa nananu mi fanete kurandana.” (Joh. 13:34) Hambiketo, Pedro a lekile kudya ni Makristu ya i ngati si nga Majudha ngu kuthava Makristu ya i ngati Majudha. Mpostoli Paulo a dhani tile Pedro a nga maha kota “wukanganyisi.” (Vag. 2:11-14) Pedro a tumete ku a nga kawukwa ngu Paulo ni ku a gondile txo kari. Ka mapasi akwe a mambidi, ene a bhate ti to kha ha fanela kuva ni lirando basi ngu vanathu, kambe hi fanete ku li kombisa.

10. Nji txani txi nga hi vhunako ku kombisa “lirando la txikoma ni txinanda”? Txhamusela. (1 Pedro 1:22)

¹⁰ Pedro a khene hi fanete “kurandana ngu lirando la txikoma ni txinanda” ni vanathu dibanzani. (Lera 1 Pedro 1:22.) Hi nava ni lirando lonelo ngaku hi txi engisa ni kulondisa “totshe ti hi ti gondako ka Bhiblia.” Ditshuri donedo di pata gondo yi yi ku “Txizimu kha txi khedhi m’thu.” (Mith. 10:34, 35) Hi nge sikoti kulondisa mlayo wa Jesu mayelano ni lirando ngaku dibanzani hi txi sawula va hi no va kombisa lirando hi leka vamwani. Ditshuri ti to ti nga maha hi va ni wungana wa hombe ni vo kari kupinda vamwani kufana ni Jesu. (Joh. 13:23; 20:2) Kambe Pedro a hi khumbutisile to hi fanete ku tikaratela kuva “ni lirando la txikoma ni txinanda,” hi randa votshe vanathu ngu ku va maha txienge txa mwaya wathu.—1 Pedro 2:17.

11. Tiwomba txani kurandana “ngu kukhutala ngu lirando la kuta ngu mndani ka mbilu”?

¹¹ Pedro a hi kuzetile ti to “hi randana nguku khutala ngu lirando la kuta ngu mndani ka mbilu.” Ka mhaka yiya, kurandana “ni ku khutala,” ti womba kuranda m’thu hambi ti si hehuki kukombisa lirando lonelo. Ngu txikombiso, ngaku m’thu a txi hi henyisa ti nga maha hi lava ku phota hahanze ko kombisa lirando. Kambe Pedro a gondisilwe ngu Jesu ti to kuphota kha ti tsakisi Jehovha. (Joh. 18:10, 11) Pedro a bhate tiya: “Mi nga tshumeteleni wubihi ngu wubihi, hambi txiruko ngu txiruko aniko wombani wunene.” (1 Pedro 3:9) Ngako u di ni lirando lo khutala ngu vamwani u na maha wunene ka votshe ni ku ninga lisima hambi va ti nga mahako va di ku khuvekisile.

12. a) Lirando lo huma mbiluni, li na hi susumetela kumaha txani? b) Nga ha hi nga tiwona ngu kona ka vhidhiyo yi yi ku Xayisa wumwewo i ku ningo ya lisima, ngu tihi ti u ti karatelako kumaha?

¹² Ka dipasi dakwe do khata, Pedro a thumisile mapswi ya ma ku “khatalelani kurandana.” Lirando lonelo li fenengeta “m’talo wa sionho.” (1 Pedro 4:8) Ti nga maha Pedro a di khumbute ti Jesu a nga m’gondisa malembe msana mayelano ni ku divalela. Ka mbimo yoneyo Pedro ti nga maha a txi alakanya ti to a txo kombisa wunene ngu ku divalela mwanawe “mtxhanu wa makhambi ni kumbidi.” Kambe Jesu a gondisile Pedro ni nathu ku hi divalela 77 wa makhambi” i ku kudivalela ko mbi na magwito. (Mat. 18:21, 22) Ngako ti txi ku karatela kulondisa txileletelo txiya, u nga godholi nguko otshe malanda a Jehovha o mbi pelela ti va karatete kudivalela. Txa lisima ngutu kwako konku ngu maha totshe ti u nga ti kotako kasi kuteka dizambo do divalela mwananu ni ku maha kurula nayo.c

MADHOTA, KHATALELANI TINVUTA TA JEHOVHA

13. Nji txani txi nga mahako to madhota ti si va hehukeli kudyisa tinvuta ta Txizimu?

¹³ Ha tsaniseka ti to Pedro kha divala ti Jesu a nga m’gela msana ko a di wusilwe ngu ka vakufa to: “Dyisa tinvuta tangu.” (Joh. 21:16) Ngaku u di didhota, sileletelo siya sa ku kongoma nawe. Kha ti hehuki ka didhota ku khatalela txiavelo txiya txa lisima. Nguko madhota, kukhata ma fanete ku khatalela timwaya tawe ngu didhawa da nyama ni da moya. Ma va txikombiso txa txinene ka mthumo wo txhumayela, kululamisela mitshangano, masembleya ni makongresu. Vamwani va ni wutixamuleli kota siro sa makomisawu yo womba-womba ni sibhejela, vamwani va tumela siavelo so vhuneta ka maprojeto yo aka. Ngu ditshuri, madhota ma ni mthumo wa wungi!

14. Nji txani txi nga vhunako madhota ku me khatalela tinvuta ta Jehovha? (1 Pedro 5:1-4)

¹⁴ Pedro a kuzetile madhota ku ‘me dyisa mtxhambi wa Txizimu.’ (Lera 1 Pedro 5:1-4.) Ngaku u di didhota, ha ti ziva ti to wa randa vanathu ni ku wa ti lava ku va khatalela. Kambe mbimo yimwani u nga tipfa u di karate mwendo u si na mbimo yo khatalela txiavelo txonetxo. U nga maha txani? Gela Jehovha ti u ti pfisako tona. Pedro a bhate tiya: “awu a thumako a na thumi madingano ni txiavelo txi a nga hiwa ngu Txizimu.” (1 Pedro 4:11) Makristu kuloni, ti nga maha me wonisana ni sikarato si ti nge kotekiko ku si lulamisa ka mafu yawa. Khumbula ti to Jesu Kristu awu “a lumbwako ngu ku pfaliswa” a nga va vhuna ka ti u tandako ku ti maha. Ene a nga timaha nyamsi ni ka mafu a maphya. Jehovha a kombela madhota ti to me randa ni ku khatalela vanawe ni kuva “txikombiso txa txinene ka mtxhambi.”

15. William a khatalelisa kutxani vanathu? (Wona mfota.)

¹⁵ William, awu i ku kale a txi thuma kota didhota wa li pfisisa lisima lo khatalela vanathu. Mbimo yi ku nga khata COVID-19, va tiwone i di txilaveko ku ligarela mmweyo ni mmweyo wa grupu yawe divhiki ni divhiki. Ene a txhamusela tiya: “Vanathu vo tala va ti vokha mitini kwawe, se toneto ti ndina va maha vava ni mialakanyo yo mbi tsakisa.” Mbimo si vanathu va wonisanako ni sikarato, William a engisela khakwati kasi kutumbula txilaveko txi va ku natxo ni ti ti va karatako. A zama ku mana mavhidhiyo mwendo mabhuku a ya a nga vhunako ngu wona vanathu. Ene a engetela a txi: “Ku khatalela vanathu txilaveko txa hombe ngutu konku. Aku hi mahako totshe ti hi nga ti kotako kasiku hi vhuna vathu ku ve gonda ngu Jehovha, ti lava hi maha mizamo yi yi fanako kasi kukhatalela vanathu ni ku va vhuna ku ve simama va txi thumela Jehovha.”

TUMELELA JEHOVHA KU E KU AKA NI KU KUTSANISA

16. Ngu sihi siwotiso si u nga ti wotisako kasi ku kota kutshukwatisa?

¹⁶ Hi bhute ngu ta tidotho ati ti ku ka mapasi mambidi a Pedro. Ti nga maha u di woni mu u fanelako ku tshukwatisa. Ngu txikombiso, ina wa tsakela ku alakanyisisa ngu makatekwa ya u no ta mamana ka mafu a maphya? Ina u ti vekete makungo o txhumayela mthumoni, txikolwani mwendo ka makhalo mamwani? Ina mbimo yotshe wa xota tinzila to kombisa lirando la hombe ka Makristu kulowe? Madhota mi tiemisete ku khatalela tinvuta ta Jehovha ngu lirando ni ku ti dhundela? Va na wo thembeka, u ti xola upune kasi kuwona ha u nga tshukwatisako kona, kambe u nga godholi. Nguko “wunene wa Mkoma” wu nga kuvhuna ku u tshukwatisa. (1 Pedro 2:3) Pedro a wombile tiya: “Txizimu . . . txi na mi wusa ni ku mi aka ni ku mi tsanisa mi si xulwi ngu txilo.”—1 Pedro 5:10.

17. Ngaku hi txi timisela ni kuleka Jehovha e hi aka, i nava yihi wuyelo?

¹⁷ Makhatoni Pedro a txi tipfa a si faneleki kuva masoni ka mwanana wa Txizimu. (Luka 5:8) Kambe ngu kuvhunwa ngu Jehovha ni Jesu, Pedro a simamile e timisela ni kuva wo thembeka. Kota wuyelo Jehovha a tulete Pedro “diphango da wukoma wo mbi guma da Mkoma wathu ni muhanyisi wathu Jesu Kristu.” (2 Pedro 1:11) Hi nga wona wuyelo ya yinene! Nawe ngaku u txi timisela kufana ni Pedro ni ku tumelela ku Jehovha e kuaka, u na amukela hakelo ya wutomi wo mbi guma. Ni ku u na ‘amukela hakelo ya likholo lako, i ku kuhanyiswa ka moya wako.’—1 Pedro 1:9.