Etetela nzila yi Jehovha ni Jesu va pimisako ngu yona

1-2. Ti pata txani kuranda Jehovha, ni ku Jesu a li kombisisile kutxani lirando lonelo?

JESU a txhamusete ti to i ti txihi txirumo txa lisima ngutu ka mlayo wa Mosi mbimo yi a nga womba tiya: “Randa Jehovha Txizimu txako ngu mbilu yako yotshe, ngu wotshe wutomi wako, ngu wotshe mtamo ni ngu otshe mapimo ako’ ni ku ‘randa muakelani wako nga ti u ti randisako tona awe upune.” (Luka 10:27) Lirando lathu ngu Jehovha li pata minavelo yathu ni matipfelo athu. Li tshumela li pata kukhozela Jehovha ngu mtamo wathu wotshe ni ngu wutomi wathu wotshe. Hahanze keto, lirando lathu ngu Jehovha li pata nzila yi hi pimisako ngu yona. Ditshuri to hi mbi thuka hi pfisisa mapimiselo a Jehovha ngu nzila yo hetiseka. Kambe athu hi nga ziva mapimiselo a Jehovha ngu kugonda mayelano ni “mialakanyo ya Kristu,” nguku Jesu a etetete ngu nzila yo hetiseka mapimiselo a Tate wakwe. — 1 Vak. 2:16.

² Jesu a ti mranda Jehovha ngu otshe mapimo akwe. Ene a txi tiziva a ti Jehovha a nga txi lava ku e ti maha ni ku ene a ti tiemisete kumaha toneto, hambi ti txi lava e xaniseka. Jesu a ti veka mapimo ko maha kudhunda ka Tate wakwe, se kha tumelela txilo txi va txa lisima kupinda toneto.

3. Ngu yihi lungelo yi Pedro a nga va nayo ni ku ngu tihi ti a nga kuzeta Makristu ku me ti maha? (1 Pedro 4:1)

³ Pedro ni vapostoli vamwani va vite ni mkhanju wo va ni Jesu ni ku va woni ngu hafuhi nzila yi a nga ti pimisa ngu yona. Mbimo yi Pedro a nga bhala dipasi dakwe do khata, ene a kuzetile makristu ku me xoma ngu mialakanyo ya Kristu. (Lera 1 Pedro 4:1.) Dipswi di Pedro a ngadi thumisa adi di ku, “xomani,” di ti tolovelekile ka masotxhwa. Ngu toneto, hi nga womba ti to kupimisa ngu nzila yi Jesu a pimisako ngu yona, ditxhari da mtamo ngutu adi hi nga di thumisako kasi kulwa ni kunavela kwathu ko maha txionho ni kulwa ni ditiko diya da Sathani.— 2 Vak. 10:3-5; Vaef. 6:12.

4. Hi na bhula ngu txani ka gondo yiya?

⁴ Ka gondo yiya, hi na tumbula ti to 1) hi nga pimisisa kutxani kufana ni Jehovha, ati ti no hi vhuna ku hi va ni mialakanyo yimweyo; 2) hi nga tivekisa kutxani hahatshi; ni 3) kuva ni mapimo a manene ngu kuthemba Jehovha ni kumaha mkombelo. Kasiku hi gonda toneto, hi na xolisisisa nzila yi Jesu a nga ti pimisa ngu yona ni nzila yi hi nga mu etetelako ngu yona.

PIMISA KUFANA NI JEHOVHA

5. Nga txiemo txihi aha Pedro a nga pimisa ngu nzila yo hambana ni ya Jehovha?

⁵ Dikhambi dimwani, Pedro a ve ni mapimiselo o hambana ni ya Jehovha. Jesu a gete vapostoli vakwe ti to a ndi na ya Jerusalema ni ku kheya a ndi na ñolwa ngu vathangeli va wukhongeli, ve mxanisa ni ku m’daya. (Mat. 16:21) Pedro a txi tiziva ti to Jesu i Mesiya wu a nga ti thembisilwe, awu a ndi no hulukisa vathu va Txizimu. Ngu toneto, ti nga maha ti di mkaratete Pedro ku e kholwa ti to Jehovha a ndi na tumelela ti to Jesu e xaniswa ngu nzila yo panda. (Mat. 16:16) Se Pedro a to dhana Jesu e m’gela tiya: “U nga wombi eto Mkoma! Eto kha ti na mbi thuka ti di mahekile ngu ngawe.” (Mat. 16:22) Kambe Jesu kha tumelelana ni mhaka yoneyo, nguku Pedro a si pimisi kufana ni Jehovha.

6. Jesu a ti kombisisile kutxani to wa etetela mapimiselo a Jehovha?

⁶ Jesu a txi etetela ngu nzila yo hetiseka mapimiselo a Tate wakwe. Ngu toneto, ene a gete Pedro atxi: “Hambana ni nani Sathani! Nguko awe u txitsha. Ati u ti pimisako hi nga ta Txizimu, kambe nda vathu.” (Mat. 16:23) Ti nga maha Pedro a txi mnavelela ta tinene Jesu, kambe Jesu a lambile txialakanyiso txonetxo, nguku a txi tiziva ti to Jehovha kha ti lavi ku e pimisa ngu ngene apune. Ka dikhambi donedo, Pedro a gondile lisima lo pimisa kufana ni Jehovha. Eyo i gondo ya lisima kwathu.

7. Pedro a txitxisile kutxani mapimiselo akwe me fana ni ya Jehovha? (Wona ni mfota wa kapa.)

⁷ Ngu kutsimbila ka mbimo, Pedro a khatile kukombisa ti to a txi lava kuva ni mapimiselo a Jehovha. Eto ti ti kombile mbimo yi avale i nga singa Vajudha va nga khata kulumba mwaya wa Jehovha. Jehovha a rumile Pedro ku eya txhumayela Korneliyo, wamwamna wo khata kuva Mkristu, na i singa Mjudha. Vajudha va ti vayilela ngu tinzila totshe kutipata ni va i nga ti singa Vajudha. Se kha ti kanakanisi to Pedro ti txi lava e txitxa mapimiselo akwe. Mbimo yi Pedro a nga pfisisa kudhunda ka Jehovha, ene a txitxile mawonelo akwe mayelano ni va i nga ti singa vajudha, ni ku a tiya pfuxela Korneliyo na a si “kanakani.” (Mith. 10:28, 29) Kota wuyelo, ene a txhumayete Korneliyo ni mwaya wakwe, ni ku votshe va bhabhatisilwe.— Mith. 10:21-23, 34, 35, 44-48.

8. Hi nga ti kombisisa kutxani to hi pimisa kufana ni Jehovha? (1 Pedro 3:8)

⁸ Ngu kutsimbila ka malembe, Pedro a kuzetile Makristu ku me va ni “mialakanyo yimweyo,” mwendo ku ve pimisa ngu nzila yo fana. (Lera 1 Pedro 3:8.) Hi nga maha toneto ngu kugonda ngu mapimiselo a Jehovha mu ka Bhiblia ni ku mu etetela. Ngu txikombiso, Jesu a kuzetile Makristu ku me thangetisa timhaka ta moya ka wutomi wawe. (Mat. 6:33) Hi txi pimisa ngu toneto, ti nga maha mwanathu wo kari dibanzani kwathu e maha txisungo txo va nyaphandule mwendo kumaha mithumo yimwani ya mbimo yotshe. Kha hi lavi kuwomba txilo atxi txi nga mmahako e godhola mwendo ku e pimisa ngu ngene apune. Hahanze keto, hi lava kuwombawomba ngu nzila yayinene ngu makungu akwe a moya ni ku mseketela.

TIVEKE HAHATSHI

9-10. Ngu txihi txikombiso txo tiveka hahatshi a txi Jesu a nga hi vekela txona?

⁹ Ka wusiku wakwe wo gwita, Jesu a gondisile Pedro ni vapostoli vamwani gondo ya lisima mayelano ni kutiveka hahatshi. Jesu a ti kombete Pedro ni Johani ku veya lulamisela txilalelo txakwe txo gwita na a si se kufa. Ti nga maha txo khata txi va nga txi maha i di kululamisela dibhaziya ni dithawula kasiku mmweyo wawe e sambisa mikondo ya va va nga ti rambilwe na va si se kudya txilalelo. Kambe i mani a ndi no tiveka hahatshi kasiku e maha mthumo wonewo?

¹⁰ Ngu txikuluveta, Jesu a vekile txikombiso txo tiveka hahatshi. Ene a mahile mthumo awu ngu mtolovelo wu nga txi mahwa ngu txithumi ni ku eto ti nga maha ti di xamatisile ngutu vapostoli vakwe. Bhiblia yi womba ti to Jesu a thavisile txiambalo txakwe a txi a nga ti ti kapekile, e sunga dithawula ha txiwuno, e thela mati ka dibhaziya e khata kuva sambisa mikondo. (Joh. 13:4, 5) Jesu a sambisile mikondo ya 12 wa vapostoli kupata ni Judha, awu a nga gwita e xavisa Jesu. Ti nga maha Jesu a di swete kuheta mthumo wuwa, kambe a ti vekile hahatshi e va sambisa votshe. Msana keto, ngu pasiensiya, Jesu a txhamusete vapostoli vakwe tiya: “Ina mi ti pfisisile ati ni nga mi mahela kani? Anu mi ni dhana ku ni ‘Mgondisi’ ni ‘Mkoma,’ mi womba ditshuri, nguko ni ene. Se aku ani ni ku Mgondisi ni Mkoma ni nga sambisa mikondo yanu, nananu mi fanete kusambisana mikondo ngu txanu.”—Joh. 13:12-14.

11. Pedro a ti kombisisile kutxani ti to se a ti gondile kutiveka hahatshi? (1 Pedro 5:5) (Wona ni mfota.)

¹¹ Pedro a gondile ka kutiveka hahatshi ka Jesu. Msana kova Jesu a di tshumelete nzumani, Pedro a mahile txidiwukiso txo kari. Ene a hanyisile dijaha do kari di nga velekwa i di txilima. (Mith. 1:8, 9; 3:2, 6-8) Txitshungu txi woni txidiwukiso txonetxo ni ku txi randete Pedro. (Mith. 3:11) Ina Pedro a ndi na londola mkhanju wonewo ti to e tidhumisa, aku ku tidhumisa ti nga ti tolovelekile ka mdawuko wakwe? Nadha! Pedro a tivekile hahatshi, e yisa wudhumo wotshe ka Jehovha ni Jesu ngu kuwomba tiya: “Ku vite ngu ditina dakwe ni ngu kukholwa kwathu ka ditina dakwe wamwamna wuwa mi m’wonako ni ku m’ziva a nga hanyiswa.” (Mith. 3:12-16) Ka dimwedo da mapasi aya Pedro a nga bhalela Makristu, ene a va kuzetile ku ve tiveka hahatshi. Mhaka yoneyo yi hi khumbutisa mbimo yi Jesu a nga sunga dithawula ha txiwunu e sambisa mikondo ya vapostoli vakwe.—Lera 1 Pedro 5:5.

12. Hi nga simamisa kutxani hi sakulela kutiveka hahatshi kufana ni Pedro?

¹² Nathu hi nga etetela Pedro ngu kusakulela kutiveka hahatshi. Kambe, khumbula tiya, kha ta enela kuwombawomba ngu nzila yo nga hi vathu vo tiveka hahatshi. Dipswi di di nga thumiswa ngu Pedro, adi di nga hunduluxewa ngu “kutiveka hahatshi” dipata a ti hi ti pimisako ngu ngathu ni ti hi ti pimisako ngu vamwani. Hi mahela tatinene vamwani nguku hi dhunda Jehovha ni vathu i singa ngu kulava kuwonwa. Athu hi kombisa ti to hi vathu vo tiveka hahatshi mbimo yi hi thumelako Jehovha ni vanathu hambi hi si wonwi.—Mat. 6:1-4.

VANA ‘M’THU WA MAPIMO’

13. Ti pata txani ku va ‘m’thu wa mapimo’?

¹³ Tipata txani kuva ‘m’thu wa mapimo?’ (1 Pedro 4:7) Mkristu wu a ku ni mapimo, a maha totshe kasi kumaha sisungo asi si tsimbitisanako ni mapimiselo a Jehovha. Ene wa tipfisisa ti to kha ku na txa lisima ngutu ka wutomi kupinda wuxaka wakwe ni Jehovha. Hahanze keto, ene a ni mawonelo o dinganisela ngu ngene apune ni ku wa tiziva ti to kha zivi totshe. Awu a ku ni mapimo a kombisa kuthemba Jehovha ngu kumaha mkombelo e kombela mkongomiso wakwe.a

14. Nga txiemo txihi aha pedro a nga kombisa kwa mbi themba Jehovha?

¹⁴ Ka wusiku wakwe wo gwita asi se kudawa, Jesu a gete tiya vagondiswa vakwe: “Wusiku wuwa, motshenu mi na ni leka ngu mhaka ya ti ti no ni humelela.” Ngu ku tithemba ngutu, Pedro a xamute a txi khene: “Hambi votshe va txo ku leka ngu mhaka ya ti ti no ku humelela, ani kha ni na mbi ku leka.” Ka wusiku wonewo, Jesu a pekile nzeve ya vamwani vagondiswa vakwe ngu ku va gela tiya: “Zumbani mi di rinzete, mi khongela mi si karali.” (Mat. 26:31, 33, 41) I diku Pedro a ti engisile txialakanyiso txonetxo, ti nga maha a di vite ni txibindi e womba to ene m’gondiswa wa Jesu. Kambe Pedro a lambile Jesu ni ku ngu msana a tipfite mnandu ngu mhaka ya toneto.—Mat. 26:69-75.

15. Nji txani txi nga vhuna Jesu ku eva m’thu wa mapimo ka wusiku wakwe wo gwita a si se kudawa?

¹⁵ Jesu a txi mthemba ngutu Jehovha. Ene a khongete makhambi o tala ka wusiku wule a si se kufa. Eto ti mningile txibindi txo maha kudhunda ka Jehovha. (Mat. 26:39, 42, 44; Joh. 18:4, 5) Pedro a woni nzila yi Jesu a nga khongela ngu yona ka txiemo txile txo karata, ni ku eto ti gwesile wutomi wakwe.

16. Hi tizivisa kutxani to Pedro a vite m’thu wa mapimo? (1 Pedro 4:7)

¹⁶ Ngu kutsimbila ka mbimo, Pedro a thembile Jehovha e maha mkombelo e kombela mkongomiso wakwe. Msana kova Jesu a di wusilwe, a tsanisekisile Pedro ni vamwani vapostoli ti to va ndi na amukela moya wo sawuleka kasiku ve txhumayela mahungu a manene. Kambe Jesu a va kombete to ve zumba Jerusalema kala ve amukela moya wonewo. (Luka 24:49; Mith. 1:4, 5) Ngu tihi ti Pedro a nga ti maha mbimo yi a nga txi emela? Ene ni vathu vamwani “va ti simama ve maha mikombelo.” (Mith. 1:13, 14) Ngu kutsimbila ka mbimo, ka dipasi dakwe do khata, Pedro a kuzetile Makristu ku me va ni mapimo ni ku mbimo yotshe ve maha mkombelo ve kombela mkongomiso ka Jehovha. (Lera 1 Pedro 4:7.) Pedro a gondile kuthemba Jehovha ni ku a vhunile ngutu dibanza.—Vag. 2:9.

17. Ngu tihi ti hi fanelako ku hi simama hi ti maha ti singa ni mhaka ni wusikoti wathu? (Wona ni mfota.)

¹⁷ Kasiku hi va vathu va mapimo, mbimo yotshe hi fanete kumaha mkombelo ka Jehovha ti singa ni mhaka ni wusikoti wathu. Mbimo yi hi lavako kumha sisungo sa lisima, hi fanete kumaha mkombelo ka Jehovha hi kombela mkongomiso wakwe hi txi themba ti to ene wa tiziva ti i ku tatinene kwathu.

18. Hi nga m’etetelisa kutxani Jehovha?

¹⁸ Ta tsakisa ngutu kuva Jehovha a di hi wumbile ni wusikoti wo etetela tifanelo takwe. (Gen. 1:26) Ditshuri ti to kha hi nge sikoti kuetetela tifanelo takwe ngu nzila yo hetiseka. (Isaya 55:9) Kambe kufana ni Pedro, hi lava kuya masoni hi etetela nzila yi Jehovha a pimisako ngu yona ngu kuva vo tiveka hahatshi ni kuva va mapimo.