Kusakulela wungana ni vanathu nda tinene kwathu!

1-2. Ngu tihi ati i ku ta lisima ngutu ka Jehovha, ni ku ngu tihi ati a lavako ti to hi ti maha?

NZILA yi hi ñolako ngu yona vathu nja lisima ngutu ka Jehovha. Ngu toneto, Jesu a gondisile ti to hi fanete kuranda muakelani nga ti hi ti randisako tona hipune. (Mat. 22:37-39) Eto ti pata kukombisa wunene hambi ni ka vale va si khozeliko Jehovha. Mbimo yi hi mahako toneto, hi etetela Jehovha awu a humisako “ditambo ka va vanene ni ka vabihi ni kuwisa mati ka vo lulama ni ka vo mbi lulama.”—Mat. 5:45.

² Hambiku Jehovha a randako votshe vathu, ene a dhunda ngutu avale va mahako ati i ku tatinene. (Joh. 14:21) Ene a lava ti to hi m’etetela. Se a hi kuzeta ti to hi “khatalela kurandana” ni vanathu ni ku hi ‘randana nga vanana va m’thu mmweyo.’ (1 Ped. 4:8; Var. 12:10) Lirando lonelo, li fana ni lirando ali hi li pfako ngu dixaka adi hi di dhundako ngutu mwendo ngu mngana wathu wa hombe.

3. Ngu tihi ati hi fanelako ku ti khumbula mayelano ni lirando?

³ Kufana ni mndonga awu wu lavako kukhatalelwa kasiku wu kula, lirando lathu ngu vamwani ni lona li fanete kukhatalelwa kasiku li simama li kula. Mpostoli Paulo a gete tiya Makristu: “Yanani masoni ngu kurandana nga vanawe.” (Vaheb. 13:1) Jehovha a lava ti to hi simama hi sakulela lirando lathu ngu vamwani. Ka gondo yiya, hi na wona ti to hi nga li tsanisisa kutxani lirando lathu ngu vanathu ni ti to hi nga simamisa kutxani hi maha toneto.

NGU KUTXANI HI DI FANETE KUTSANISA WUNGANA WATHU NI VAMWANI

4. Ngu kuya ngu Masalmo 133:1, hi nga kombisisa kutxani ti to ha ninga lisima wumwewo awu hi ku nawo ni vanathu? (Wona ni mifota.)

⁴ Lera Masalmo 133:1. Ha tumelelana ni m’bhali wa Masalmo awu a nga bhala ti to wungana wa ditshuri ni vale va randako Jehovha wa ‘tshamba’ ni “kutsakisa.” Kambe, kufana ni m’thu awu a nga lekako kuwona kutshura ni kuxamatisa ka mndonga nguku a wu wonako ditshiku ni ditshiku, nathu hi nga leka kuwona kutshura ka wumwewo awu hi ku nawo ni vanathu nguku hi va wonako mbimo yotshe. Se hi nga maha txani kasiku hi kulisa lirando lathu ngu vona? Lirando lathu ngu vanathu li nga simama li kula ngaku hi txi ti ninga mbimo yo alakanyisisa ngu nzila yi vona i ku va lisima ngu yona kwathu ni dibanzani.

5. Vathu vamwani va gweseka ngu nzila muni mbimo yi va wonako lirando ali hi kombisanako?

⁵ Vamwani ava va tako ve ta xalela mitshangano yathu ngu dikhambi do khata, va xamatiswa ngutu ngu lirando ali hi kombanako. Ngu mhaka ya toneto, va nga hokelela magwito a ti to va mani ditshuri. Jesu a ti khene: “Ngu toneto, votshe va na ti ziva ti to mi vagondiswa vangu ngako mi txi randana.” (Joh. 13:35) Wona txikombiso txa Chaithra awu a nga ti gonda Bhiblia ni Tifakazi ta Jehovha. Ene a tumete txirambo txo ya xalela Mtshangano wa m’ganga. Msana kova a di xalate mtshangano ditshiku do khata, ene a gete m’gondisi wakwe wa Bhiblia a txi khene: “Kha ni khali kubharasarwa ngu vaveleki vangu. Kambe ka mtshangano wuwa, ni bharasarilwe 52 wa makhambi ngu ditshiku dimwedo! Phela Jehovha a ni kombile lirando ngu kuthumisa mwaya wuwa wa moya. Ani ni lava kuva txienge txa mwaya wuwa.” Chaithra a simamile e kula ngu didhawa da moya ni ku a bhabhatisilwe ngu 2024. Ngu ditshuri, mbimo yi vathu va wonako mithumo yathu yayinene kupata lirando li hi ku nalo ngu vamwani, makhambi a mangi ti va maha ni vona ve lava kuthumela Jehovha.—Mat. 5:16.

6. Kutsanisa wungana wathu ni vanathu ti nga hi vhikelisa kutxani?

⁶ Phela kutsanisa wungana wathu ni vamwani ti nga hi vhikela. Paulo a gete tiya Makristu kulowe: “Layanani masiku otshe . . . kasiku ku si vi ni wammweyo hagari kwanu wo ti bangisa, ngu kukanganyiswa ngu txionho.” (Vaheb. 3:13) Ngako minenge yathu yi txi lava ku hi timeta ka nzila yo lulama, Jehovha a nga thumisa vanathu kasiku ve hi ninga txivhuno atxi hi txi lavako. (Mas. 73:2, 17, 23) Txivhuno txonetxo nja txinene kwathu.

7. Ngu kuhi kuyelana aku ku kuho ka lirando ni wumwewo? (Vakolosa 3:13, 14)

⁷ Athu hi lumba mtxawa wa vathu ava va mahako totshe ati va nga ti kotako kasiku ve kombana lirando, ngu toneto ha tidila ngu makatekwa amangi. (1 Joh. 4:11) Ngu txikombiso, lirando li hi kuzeta kusimama hi “timiselana,” se eto ta hi vhuna ku hi va ni wumwewo ni vanathu. (Lera Vakolosa 3:13, 14; Vaef. 4:2-6) Ngu toneto, ka mitshangano yathu ha tidila ngu wumwewo awu wu ko va ni vathu va Jehovha dwe.

KOMBISANANI TXITHAVO

8. Jehovha a hi vhunisa kutxani ti to hi va ni wumwewo ni vanathu?

⁸ Wumwewo awu hi ku nawo ni vanathu hamafuni kotshe wo koteka ngu kuvhunwa ngu Jehovha dwe. Jehovha a maha ti to ti koteka ku hi va ni wumwewo hambiku hi nga mbi hetiseka. (1 Vak. 12:25) Bhiblia yi womba ti to athu ha ‘gondiswa kurandana ngu Txizimu.’ 1 Vat. 4:9) Ngu mapswi mamwani, eto ti womba ti to Jehovha a thumisa Mibhalo to e hi gela ati hi fanelako ku ti maha kasiku hi tsanisa wungana wathu ni vanathu. Hi nga ‘gondiswa ngu Txizimu’ ngu kuxolisisa tigondo ta txona ni ku ti thumisa ka wutomi wathu. (Vaheb. 4:12; Jak. 1:25) Phela eto, ngu ti Tifakazi ta Jehovha ti zamako ku ti maha.

9. Hi gonda txani ka Varoma 12:9-13 mayelano ni kukombisana txithavo?

⁹ Dipswi da Txizimu di hi gondisisa kutxani kutsanisa wungana wathu ni vamwani? Wona ati Paulo a nga ti womba mayelano ni mhaka yoneyo, nga ha ti nga kombiswa ngu kona ka Varoma 12:9-13. (Lera.) Wona mapswi aya ma ku “vanani vo khata kukombisa txithavo.” Ti lava kuwomba txani toneto? Ti lava kuwomba ti to hi fanete kuva vo khata kukombisa ‘lirando’ ka vamwani ngu kuva dilavalela, ku va amukela mitini kwathu, hi va ni wuha ni kukombisa simaho simwani sa lirando. (Vaef. 4:32) Kha ha fanela kuemela ti to vanathu ve khata vona ve hi komba lirando. Hi fanete ku va ‘vo khata’ kumaha toneto. Jesu a ti khene: “Kuha ka ninga ngutu litsako kupinda kuhiwa.”—Mith. 20:35.

10. Hi nga kombisisa kutxani kuhiseka mbimo yi hi ‘kombisanako txithavo’? (Wona ni mfota.)

¹⁰ Msana kova a di wombile ti to hi fanete kuva vo khata kukombisa txithavo ka vamwani, Paulo a hi kuzeta ti to hi ‘thuma ngu kuhiseka hi si ti mahi mikara.’ M’thu wu a dhundako kuthuma wa hiseka. Mbimo yi a ningwako mthumo, ene a wu maha ngu kuhiseka. Mavingu 3:27, 28 yi hi kuzeta tiya: “U nga va tone somaha a vale si va lumbako, na mtamo wo maha eto wu di manzani kwako.” Se mbimo yi hi wonako ti to m’thu wo kari a lava txivhuno, ngu txikuluveta hi maha totshe ati hi nga ti kotako kasiku hi m’vhuna. Kha hi sewukiseli mwendo kuleka ati hi nga ti fanete kumaha, ngu kupimisa ti to m’thu mmwani a na ti maha.—1 Joh. 3:17, 18.

11. Nji txani atxi txi nga hi vhunako kutsanisa wungana wathu ni vanathu?

¹¹ Nzila yimwani yo kombisa txithavo ka vamwani ngu tiemisela ku va divalela ngu txikuluveta ngako va txi hi onhela. Vaefesu 4:26 yi womba tiya: “Ditambo di nga swe mi di ngadi henyile.” Ngu kutxani? Xamulo hi yi mana ka vhersikulu 27 yi wombako ti to ngaku hi txi maha toneto, athu hi ndi na va hi txo ‘ninga mbimo Sathani.’ Ka Dipswi dakwe, Jehovha wa hi gela makhambi amangi ti to hi fanete kudivalelana. Vakolosa 3:13 yi hi kuzeta kusimama hi ‘divalelana mmwani ni mmwani.’ Kudivalela tiphazamo ta vamwani, ngu yona nzila yayinene yo tsanisa wungana wathu navo. Mbimo yi hi mahako toneto, hi vhuneta ko ‘veketa mpatano wa moya, ngu kupfana ko dikha.’ (Vaef. 4:3) Ti ha kubasani ti to mbimo yi hi divalelako vamwani hi maha ti to hi va ni wumwewo ni kurula.

12. Jehovha a hi vhunisa kutxani kasiku hi divalela vamwani?

¹² Ditshuri ti to ti nga karata kudivalela avale va nga hi onhela. Kambe, hi nga sikota ku va divalela ngu kuvhunwa ngu moya wo sawuleka wa Txizimu. Bhiblia yi hi kuzeta ‘kurandana nga vanana va m’thu mmweyo’ ni ‘kuthuma ngu kuhiseka.’ Yi tshumela yi hi kuzeta tiya: “Tumelelani moya wo sawuleka wu mi maha mi hiseka.” Eto ti womba ti to moya wo sawuleka wu nga hi maha hi hiseka, ni kutshumela wu hi vhuna kukombisa lirando ni kudivalelana ti txi khukhela mbiluni. Ngu toneto, athu ha kombela Jehovha ti to e hi vhuna.—Luka 11:13.

“MI ZUMBA MI SI NGA NI MIBHANDO HAGARI KWANU”

13. Ngu tihi ati ti nga vangako mibhando hagari kwathu?

¹³ Dibanza di wumbwa ngu “vathu” va matiko o hambana-hambana. (1 Tim. 2:3, 4) Ngu mhaka ya toneto, hi nga maha sisungo so hambanelana mayelano ni maambalelo, nzila yo ti lungisa ngu yona ni nzila yo ti hungata ngu yona. Phela hi si ti woneli toneto ti nga vanga mibhando hagari kwathu. (Var. 14:4; 1 Vak. 1:10) Aku ‘Txizimu txi hi gondisako ku hi randana,’ hi fanete ku tiwonela kasiku hi si woni sisungo sathu i di sa lisima kupinda sa vamwani.—Vaf. 2:3.

14. Ngu tihi ati hi fanelako kuzama ku ti maha, ni ku ngu kutxani?

¹⁴ Hi nga tshumela hi vayilela mibhando dibanzani, nguku mbimo yotshe hi tiemisela kutsanisa ni kuthavelela vamwani. (1 Vat. 5:11) Ka timbimo tiya ta magwito, vathu vavangi ava va nga ti thavisilwe dibanzani mwendo va nga ti hote ngu didhawa da moya va tshumete ve wuyela dibanzani. Athu ha va hoyozela vathu vonevo! (2 Vak. 2:8) Wona ati ti nga humelela mwanathu wa txisikati awu a nga wuyela dibanzani msana kova adi ti hambanisile ni dibanza kudingana 10 wa malembe. Ene a womba tiya: “Votshe va ni sekete ni ku ni losa.” (Mith. 3:19) Ti m’gwesisile kutxani toneto? A womba tiya: “Ni woni to Jehovha a txo ni vhuna ti to ni tshumela ni va ni litsako.” Ngako hi txi zama kutsanisa vanathu, Jesu Kristu a nga hi thumisa kasiku hi vhuna avale va ‘nemelwako.’—Mat. 11:28, 29.

15. Ngu yihi yimwani nzila yo sakulela wumwewo? (Wona ni mfota.)

¹⁵ Kuwombawomba kwati i nzila yimwani yo sakulela kuva ni wumwewo. Jobe 12:11 yi womba tiya: “Ina nzeve kha yi na kuxola mapswi, nga mkanani kupfako sakudya kani?” Kufana ni m’bhiki wamnene awu mbimo yotshe a pfako sakudya ti to sa tsamba mwendo nem a si se phamela vamwani, nathu hi lava kukhata ngu kupimisa hi si se womba-womba. (Mas. 141:3) Mbimo yotshe, hi lava kutsaniseka ti to ati hi lavako ku ti womba ti na tsanisa ni kuthavelela ‘avale va ti engisako.’—Vaef. 4:29.

16. Mba mani ava ngutu-ngutu va fanelako kukhatala ngu nzila yi va wombawombako ngu yona?

¹⁶ Vavamna ava va nga txhadha ni vaveleki va fanete kuwombawomba ngu nzila yi yi no tsanisa vamwani. (Vakl. 3:19, 21; Tit. 2:4) Madhota ni ona ma fanete kuva txisima txa thavelelo kota vadyisi va m’txhambi wa Jehovha. (Isaya 32:1, 2; Vag. 6:1) Bhiblia yi hi khumbutisa tiya: “Dipswi do wombwa ngu mbimo ya kona, ndinene!”—Mav. 15:23.

“HE RANDANENI NGU MITHUMO NI DITSHURI”

17. Ngu tihi ati hi nga ti mahako kasiku hi tsaniseka ti to lirando li hi ku nalo ngu vanathu nda ditshuri?

¹⁷ Mpostoli Johani a hi kuzetile ti to hi si ‘randani ngu txisofu ni lidimi, aniko hi randana ngu mithumo ni ditshuri.’ (1 Joh. 3:18) Hi lava ti to lirando lathu ngu vanathu li khukhela mbiluni. Hi nga ti kotisa kutxani kumaha toneto? Ngako hi txi heta mbimo hi di ni vanathu, lirando lathu ngu vona li naya masoni li kula. Ngu toneto, zama kulava mikhanjo yo heta mbimo u di ni vanathu mitshanganoni ni ka mthumo wo txhumayela. Tihe mbimo yo pfuxela vanathu. Ngako hi txi maha toneto, hi kombisa ti to ha ‘gondiswa kurandana ngu Txizimu.’ (1 Vat. 4:9) Se hi na hi tipfa ati ti “tshambisako tona ni kutsakisa, ngako maxaka ma txi hanya kumweko ngu kupfana!”—Mas. 133:1.