Kha hi nga hokha

1-2. a) Ngu kutxani hi nga wombako to kha hi nga hokha mbimo yi hi wonisanako ni sikarato? b) Hi na bhula ngu txani ka gondo yiya?

NGAKO hi txi wonisana ni sikarato, ti nga maha hi tipfa nga ho va hokha hagari ka txitinga txa hombe, aha hi si woniko ni nzila yo huma. Kambe, kha hi wonisani ni sikarato hokha. Jehovha Tate wathu wa si wona sikarato si hi wonisanako naso ni ku a tiemisete ku hi vhuna. Ngu lirando, ene a hi thembisa tiya: “Ni na kuvhuna.”—Isaya 41:10.

² Ka gondo yiya, hi na bhula ngu nzila yi Jehovha a hi vhunako ngu yona 1) ngu ku hi kongomisa, 2) ngu ku hi ninga asi hi si lavako, 3) ngu ku hi vhikela ni ku 4) hi thavelela. Jehovha a hi tsanisekisa ti to ti singa ni mhaka ni sikarato si hi wonisanako naso ka wutomi, ene kha na mbi thuka e hi divala nem ku hi leka. Ngu toneto, kha hi nga hokha.

JEHOVHA WA HI KONGOMISA

3-4. Jehovha a hi kongomisa ngu nzila muni? (Masalmo 48:14)

³ Lera Masalmo 48:14. Jehovha wa tiziva ti to hi nge sikoti ku ti kongomisa hipune. Se ene a va kongomisisa kutxani vathu vakwe nyamsi? Nzila yimwani yi a mahako toneto ngu yona, ngu thumisa Bhiblia. (Mas. 119:105) Ngu kuthumisa Dipswi dakwe, ene wa hi vhuna kumaha sisungo sa sinene ni kusakulela tifanelo ta tinene a ti ti no hi vhuna kuva ni wutomi wo tsakisa konku ni mbimo yi yi tako.a Ngu txikombiso, ene wa hi gondisa kwa mbi veketela txiviti, kuva vo thembeka ka totshe ti hi ti mahako ni kudhunda vamwani ti txi huma mbiluni. (Mas. 37:8; Vaheb. 13:18; 1 Pedro 1:22) Ngako hi txi kombisa tifanelo toneto, hi nava vangana va vanene, vaveleki va vanene, ni kuva ni wukati wo tsakisa.

⁴ Hahanze keto, Jehovha a bhate matimu a vathu ava va nga manana ni sikarato so fana ni sathu. (1 Vak. 10:13; Jak. 5:17) Mbimo yi hi lerako matimu oneyo ni kuthumisa a ti hi ti gondako, ha wuyelwa ngu tinzila timbidi. Yo khata, ha pfisisa ti to hi ngathu hokha hi wonisanako ni sikarato, vamwani ni vona va wonisanile ni sikarato so fana kambe va sikoti ku si xula ngu kuvhunwa ngu Jehovha. (1 Pedro 5:9) Ya wumbidi, ha gonda nzila yo wonisana ni sikarato sathu.—Var. 15:4.

5. Mba mani ava Jehovha a va thumisako kasiku ve hi kongomisa?

⁵ Jehovha wa hi ninga vathu ava va hi kongomisako.b Ngu txikombiso, vawoneleli va sigava va endela mabanza kasi ku hi tsanisa. Madhixkursu awe ma hi tsanisa ni ku hi vhuna kusimama hi va ni wumwewo. (Mith. 15:40–16:5) Madhota a dibanza ma thuma ngutu kasi kuvhuna mmweyo ni mmweyo wathu ti to e va ni wuxaka wo tsana ni Jehovha. (1 Pedro 5:2, 3) Vaveleki va vhuna vanana vawe ti to ve va ni wuxaka wo tsana ni Jehovha ni ku va vhuna ku ve va ni wusikoti wo maha sisungo sa sinene. (Mav. 22:6) Vanathu va txisikati ava va nga kula ngu didhawa da moya, va vhuna vanathu va txisikati ava i ku ngadi majovhem ti to ve etetela txikombiso txawe txa txinene. Va va ninga sialakanyiso ni kuva tsanisa.—Tit. 2:3-5.

6. Hi nga maha txani kasiku hi wuyelwa ngu mkongomiso wu Jehovha a hi ningako?

⁶ Jehovha wa hi ninga mkongomiso wu hi wu lavako. Se hi nga kombisa ngu nzila muni to ha bonga totshe ti a hi mahelako? Mavingu 3:5, 6 a womba tiya: “Themba MKOMA ngu yotshe mbilu yako, kambe u nga thembe mapimo ako upune.” Mbimo yi hi mahako toneto, “ene a na lulamisa tinzila [tathu],” ti wombako ti to a na hi vhuna kuvayilela sikarato so tala, se hi tidila ngu wutomi wo tsakisa. Ha m’bonga Jehovha ngu ku hi ninga sialakanyiso soneso sa lirando!—Mas. 32:8.

JEHOVHA WA HI NINGA ASI HI SI LAVAKO

7. Ngu tihi tinzila timwani a ti Jehovha a hi vhunako ngu tona? (Vafilipiya 4:19)

⁷ Lera Vafilipiya 4:19. Hahanze ko hi khatalela ngu didhawa da moya dwe, Jehovha a tshumela e katekisa mizamo yi hi yi mahako ti to hi mana sakudya, siambalo ni wukhalo wo zumba ka wona. (Mat. 6:33; 2 Vat. 3:12) Hambiku i ku ta mtumbuluko kuvilela ngu silaveko sathu sa nyama, kambe Jehovha wa hi kuzeta ku hi si zumbeli kuvilela ngu mhaka yoneyo. Ngu kutxani? Nguko Tate wathu kha na mbi thuka e leka malanda akwe o thembeka ngako ma di ka sikarato. (Mat. 6:8; Vaheb. 13:5) Se hi nga kholwa ka mapswi akwe a ti to a na hi ninga asi hi si lavako.

8. Jehovha a mvhunisile kutxani Dhavhidha?

⁸ Wona nzila yi Jehovha a nga vhuna ngu yona Dhavhidha. Ka malembe ya a nga ma heta a di kubaramani, Jehovha a vhuni Dhavhidha ni vathu vakwe ngu kuva ninga asi va nga txi si lava kasiku ve kota kuhanya. A txi pimisa ngu nzila yi Jehovha a nga mkhatalela ngu yona ka malembe oneyo, Dhavhidha a wombile tiya: “Ni ti mfana se konkuwa ni kumbile, kambe kha ni zivi kuwona m’thu wo lulama e lekwa wusiwanani.” (Mas. 37:25) Ti nga maha nawe u di woni nzila yi Jehovha a nga kukhatalela ngu yona ni kukhatalela vanathu vamwani ka timbimo to karata.

9. Jehovha a va vhunisa kutxani vathu vakwe mbimo yi va welwako ngu tiphango ta mtumbuluko? (Wona ni mifota.)

⁹ Jehovha wa vhuna vathu vakwe ava va nga welwa ngu tiphango ta mtumbuluko. Ngu txikombiso, mbimo yi Makristu o khata ma nga wonisana ni txikarato txa nzala, vanathu va matiko mamwani va rumete sakudya kasi kuvhuna vanathu vonevo. (Mith. 11:27-30; Var. 15:25, 26) Vathu va Jehovha nyamsi va kombisa moya wonewo wa wuha. Ngako ku txi humelela tiphango ta mtumbuluko, Jehovha wa thumisa vanathu kasi kuvhuna ava va nga humelelwa ngu tiphango toneto, ngu kuva ninga sakudya, mati, siambalo ni mirende. Vanathu va va thumako ko aka, va wuseta Tinyumba ta Mfumo ni tinyumba ta vanathu a va va nga welwa ngu tiphango toneto. Vanathu va kuluveta kuningela txivhuno ngu didhawa da moya ka vanathu va va nga welwa ngu tiphango.c

10-11. U gondile txani ka txiperiyensia txa Borys?

¹⁰ Jehovha a tshumela e kombisa wuha ka va va si mthumeliko. Ngu ha kufanako, nathu hi nga etetela Jehovha ngu kulavetela tinzila to vhuna ava va si mkhozeliko. (Gal. 6:10) Hi txi maha eto, hi nga va vhuna ti to ve gonda to tala ngu Jehovha. Wona txikombiso txa Borys, dheretori wa txikolwa txo kari khe Ucrânia. Hambiku i nga singa Fakazi ya Jehovha, ene a txi va ñola kwati va alunu vakwe ava i ngadi Tifakazi ta Jehovha ni ku a txi xonipha likholo lawe. Mbimo yi Borys a nga maha txisungo txo khukha aha a nga ti zumba kona ngu mhaka ya yimbi eya ka ditiko dimwani, vanathu va mvhuni. Ngu kutsimbila ka mbimo, ene a xalete Txialakanyiso txa lifo la Kristu. Atxi alakanya ngu txiperiyensia txakwe, Borys a wombile tiya: “Tifakazi ta Jehovha ti ni kombile wunene ni kutshumela ti ni khatalela. Na ti bonga ngutu ngu wunene wu ti nga ni mahela.”

¹¹ Nathu hi nga etetela Tate wathu wa lirando, ngu kuvhuna ava va ku ka sikarato ti singa ni mhaka ni ti to va thumela Jehovha mwendo nem. (Luka 6:31, 36) Ha themba ti to mizamo yathu yo kombisa lirando ka vathu yi nga va vhuna ti to ve va vagondiswa va Kristu. (1 Pedro 2:12) Ti singa ni mhaka ni wuyelo yi hi no yi mana, hi na tidila ngu litsako la hombe ali li tiswako ngu kuva ni wuha.—Mith. 20:35.

JEHOVHA WA HI VHIKELA

12. Jehovha a na va vhikelisa kutxani vathu vakwe kota mtxawa? (Masalmo 91:1, 2, 14)

¹² Lera Masalmo 91:1, 2, 14. Nyamsi Jehovha wa thembisa ku hi vhikela ngu didhawa da moya. Ene kha na mbi thuka e tumelela Sathani ti to e emisa wukhozeli wa ditshuri. (Joh. 17:15) Mbimo yi “xanisa ya hombe” yi no khata, hi nga tsaniseka ti to Jehovha a na ta hetisisa txithembiso txakwe txo hi vhikela ngu didhawa da moya ni da nyama.—Mtu. 7:9, 14.

13. Jehovha a vhikelisa kutxani mmweyo ni mmweyo wathu?

¹³ Jehovha a vhikelisa kutxani mmweyo ni mmweyo wathu? Ngu kuthumisa Bhiblia, Jehovha wa hi vhuna ku hi ziva kuhambanisa ta tinene ni to biha. (Vaheb. 5:14) Mbimo yi hi thumisako ati hi ti gondako mu ka Bhiblia, ha vhikela wungana wathu ni Jehovha ni kumaha sisungo sa sinene asi si hi vhunako ku hi va ni wutomi wo tsakisa. (Mas. 91:4) Hahanze keto, Jehovha wa hi vhikela ngu kuthumisa dibanza. (Isaya 32:1, 2) Kuheta mbimo ni vathu va va dhundako Jehovha, ava va hanyako ngu milayo yakwe ta hi tsanisa ni ku hi ninga mtamo wo vayilela mikuzetelo yo biha.—Mav. 13:20.

14. a) Ngu kutxani Jehovha a si vhikeli malanda akwe ka sotshe sikarato? b) Masalmo 9:10 yi hi tsanisekisa ka ti to txani? (Wona ni txhamuselo ya hahatshi.)

¹⁴ Ka timbimo ta kale, Jehovha a ti vhikela malanda akwe ka tiphango. Hambiketo, hi nga mbimo yotshe a nga ti maha toneto. Mbimo yimwani ha welwa ngu “simahakalo so mbi si emela.” (Ekl. 9:11, NM) I singeto dwe, Jehovha a tumelete ti to malanda akwe me wonisana ni ku xaniswa me tshumela me dawa kasi kukombisa ti to Sathani m’hembi. (Jobe 2:4-6; Mat. 23:34) Eto ta maheka ni nyamsi. Hambiku Jehovha a si thavisiko sikarato sathu, hi nga tsaniseka ti to ene kha na mbi thuka e leka avale va mrandako.d—Mas. 9:10.

JEHOVHA WA HI THAVELELA

15. Jehovha a hi thavelelisa kutxani ngu kuthumisa mkombelo, Bhiblia ni vanathu? (2 Vakorinto 1:3, 4)

¹⁵ Lera 2 Vakorinto 1:3, 4. Mbimo yimwani ha dila, ha vilela ni kujujeka mapimo. Ti nga maha konku nawe u txi wonisana ni txiemo txi txi ku mahako u jujeka msungo, se u tipfa u di wekha. Ina u tipfa nga kha ku nga ni m’thu wu a pfisisako txiemo txako? Jehovha wa txi pfisisa. Ene kha njo pfa kupanda aku hi kupfako dwe, kambe a tshumela e hi “thavelela ka sotshe sixaniso sathu.” A mahisa kutxani toneto? Mbimo yi hi mahako mkombelo ka Jehovha hi wuyelela, ene wa hi ninga “kuthutha ka Txizimu kupindako wotshe wuzivi.” (Vaf. 4:6, 7) Ha tshumela hi mana kuthavelelwa mbimo yi hi gondako Bhiblia. Mapswi onewo a lirando, wuzivi ni themba, i thomba ayi yi nga hi pepisako mbilu. Mitshangano ya Wukristu ya hi thavelela ni ku hi tsanisa.

16. U gondile txani ka txiperiyensia txa Nathan ni Priscilla?

¹⁶ He woneni txikombiso txa Nathan ni Priscilla va khe Estados Unidos, kasi kuwona nzila yi Jehovha a thavelelako ni ku hi tsanisa ngu yona ngu kuthumisa Bhiblia. Ka malembenyana msana, vona va mahile txisungo txo ya thuma ka wukhalo wu ku ku ni txilaveko txa vatxhumayeli va Mfumo. Nathan a womba tiya: “Hi txi themba ti to Jehovha a na katekisa mizamo yathu.” Kambe mbimo yi va nga hoka ka txiavelo txawe, vona va wonisanile ni siemo so mbi si emela, sa malwati ni sa timale. Ti lavile ve tshumela veya mtini aha va nga simama ve wonisana ni sikarato sa timale. Nathan a tshumela e womba tiya: “Ani ni tshumete ni ti wotisa ti to ngu kutxani Jehovha a sa hi katekisa ngu nzila yi hi nga ti pimisa ngu yona. Ni zile ni tiwotisa to ina ni to maha to kari to biha.” Hambiketo, ngu kutsimbila ka mbimo, Nathan ni Priscilla va pfisisile ti to Jehovha a sa va leka ka timbimo tile to karata. Nathan a womba tiya: “Ka timbimo tile to karata, Bhiblia yi hi tsanisile, yi hi thavelela ni ku hi kongomisa. Kuveka mapimo ka nzila yi Jehovha a nga hi vhuna ngu yona ka timbimo tile to karata, ti hi vhuni kutilulamisela ku ta wonisana ni sikarato mbimo yi yi tako.”

17. Mwanathu Helga a thavelelisilwe kutxani? (Wona ni mfota.)

¹⁷ Vanathu va nga hi thavelela. Ngu nzila muni? Wona txikombiso txa Helga, awu a zumbako Hungria. Kudingana malembe a mangi a txi wonisana ni sikarato asi si nga ti mmaha e godhola. Kambe a txi wona msana, a wona nzila yi Jehovha a nga txi mkhatalela ngu yona ngu kuthumisa dibanza. Ene a bhate tiya: “Yotshe mbimo Jehovha a txi ni vhuna ngako ni di godhote ngu mhaka ya mthumo wangu wo ti hanyisa, kukhatalela mwanana wangu wo lwala ni sikarato simwani. Ka 30 wa malembe ya ma nga pinda, Jehovha kha leka kuhetisisa txithembiso txakwe txo ni thavelela. Mbimo yotshe ene a ni tsanisile ngu kuthumisa mapswi o thavelela a vanathu. Ni txi amukela mamesaji, mapasi ni ku nduduzelwa mbimo yi ni nga ti karateka ngutu.”

18. Hi nga va thavelelisa kutxani vamwani?

¹⁸ Hi ni lungelo yo etetela Txizimu ngu kuthavelela vamwani. Hi nga ti mahisa kutxani toneto? Ngu kuva engisela kha kwati, hi va gela mapswi o tsanisa ni kuva ninga txivhuno txi va txi lavako. (Mav. 3:27) Ha maha mizamo yo thavelela votshe vale va xanisekako kupata ni va va si thumeliko Txizimu. Mbimo yi vavhizinyo vathu va wonisanako ni kupandiseka, malwati ni kuvilela, ha va endela hi va engisela kwati ni kuva tsanisa ngu kuthumisa Bhiblia. Ngako hi txi etetela Jehovha, “Txizimu txa kotshe kuthavelela,” hi na mbi vhuna vanathu dwe, kambe ni va va si thumeliko Jehovha ti to ve ta ka wukhozeli wa ditshuri.—Mat. 5:16.

MBIMO YOTSHE JEHOVHA A NA HI VHUNA

19. Ngu tihi ti Jehovha a hi mahelako ni ku hi nga mu etetelisa kutxani?

¹⁹ Jehovha wa khatala ngu votshe vale va mrandako. Ene kha na mbi thuka e hi leka ngako hi di ka sikarato. Kufana ni mveleki wu a ku ni lirando awu a khatalako ngu mwanana wakwe, Jehovha wa khatala ngu malanda akwe o thembeka. Ene wa hi kongomisa, wa hi ninga asi hi si lavako, wa hi vhikela ni ku hi thavelela. Hi nga etetela Tate wathu wa lirando ngu kuseketela ni kutsanisa vamwani ngako va di ka sikarato. Ti singa ni mhaka ni sikarato si hi wonisanako naso, hi nga tsaniseka ti to Jehovha a ni nathu. Ene a hi thembisa tiya: “U nga thave nguko ani ni ni nawe.” (Isaya 41:10) Txithembiso txiya txa hi tsanisekisa ti to Jehovha a ni nathu! Ngu ditshuri kha hi na mbi thuka hi va hokha.