GONDO 30
NDANDO 97 Dipswi da Txizimu da hi vhuna
Gonda timhaka ta tiphya ka tigondo ta makhato ta Bhiblia
“Ni navela kuzumba ni txi mi alakanyisa timhaka tiya, hambiko mi ti zivako, ni kuwa mi nga tsaniswa ka dona ditshuri diya mi ku nado.”—2 PEDRO 1:12.
TXIKONGOMELO TXA GONDO
Ngu wona nzila yi tigondo ta makhato ta Bhiblia ti nga hi vhunako ngu yona nyamsi.
1. Tigondo ta makhato ta Bhiblia ti txitxisile kutxani wutomi wako?
TIGONDO ta makhato ta Bhiblia ti txitxile wutomi wathu. Ngu txikombiso, mbimo yi u nga gonda to ditina da Txizimu i Jehovha, awe u khatile kuva mngana wakwe. (Isaya 42:8) Msana kova u di gondile ditshuri mayelano ni vafi, u emile kukarateka ngu kuziva ti to vafi kha va nga kuxaniswani. (Ekl. 9:10) Se mbimo yi u nga gonda ti to mafu yawa ma nava Paradhesi, u emile kukarateka ngu ti ti no humelela mbimo yi yi tako ni ku u tshumete u tsaniseka ti to u na ta hanya ngu ha kusi gumiko.—Mas. 37:29; 90:10.
2. Ngu kutxani tigondo ta makhato ta Bhiblia ti nga vhunako hambi Makristu aya ma nga vitwa ngu didhawa da moya? (2 Pedro 1:12, 13)
2 Mbimo yotshe tigondo ta makhato ta Bhiblia ta hi vhuna. Ka dipasi dakwe da wumbidi, Pedro a bhalete Makristu a ya ‘ma nga ti tsani ka ditshuri’ mwendo ya se ma nga ti vitilwe ngu didhawa da moya. (Lera 2 Pedro 1:12, 13.) Ka mbimo yoneyo, vagondisi va makuhu ni vathu vamwani vo biha va tizama kujikisa Makristu ka wukhozeli wa ditshuri. (2 Pedro 2:1-3) Pedro a txi lava kutsanisa vanathu ni ku va vhuna ku ve vayilela mlawu wonewo. Ngu toneto, a va khumbutisile tigondo ti va nga ti tigondile makhatoni. Tigondo toneto ti ndi na va vhuna ku ve simama va di thembekile ka Jehovha kala magwito.
3. Ngu txihi txikombiso atxi txi kombisako ti to tigondo ta makhato ta Bhiblia ta vhuna hambi Makristu aya i ku kale ma txi thumela Jehovha?
3 Hambi i di ti to i kale hi txithumela Jehovha, hi nga gonda timhaka ta tiphya ka tigondo ta makhato ta Bhiblia. Pimisa ngu txikombiso txiya: Mame wo kari awu i kukale a txi ziva kubhika ni mwanana wakwe awu a ku ngadi atxi gondela kubhika, ti nga maha va votshe va txi sikota kutxhoma mipawu. Kambe aku mame i kale atxi ziva kubhika, ene a nga thumisa mipawu kasi kubhika mndiwo wo hambana-hambana, wo fana ni txiginya, dithokoza ni kumaha rala. Nguha kufanako, m’thu wu i kukale a txi thumela Jehovha ni sigondo sa Bhiblia va tiziva tigondo ta makhato ta Bhiblia. Kambe vona va nga thumisa tigondo toneto ngu tinzila to hambana. Kukhukhela hi di bhabhatisilwe, ti nga maha wutomi wathu ni malungelo a ya hi nga ma mana ka sengeletano si di txitxile. Kambe, kualakanyisisa ngu tigondo ti hi nga tigonda makhatoni ta hi vhuna kumana tinzila ta tiphya to thumisa ditshuri donedo ka txiemo txi hi ku ka txona konku. Ka gondo yiya, hi na bhula ngu tigondo tiraru ta makhato ta Bhiblia ni ti Makristu ma nga tigondako ka tigondo toneto.
JEHOVHA I MVANGI
4. Kuziva ti to Jehovha i Mvangi ti hi vhunisile kutxani?
4 Athu ha tiziva ti to sotshe si si kuho hamafuni si vangilwe ngu m’thu wu a ku ni mtamo ni wutxhari. Bhiblia yi womba ti to: “Awu a nga aka sotshe Txizimu.” (Vaheb. 3:4) Kambe athu hi nga gonda timhaka ta tiphya ka ditshuri donedo. Kota Mvangi, Jehovha wa ziva totshe ngu ngathu. Ene wa khatala ngu ngathu ni ku wa tiziva ati i ku tatinene kwathu. Se kuziva ti to Jehovha i Mvangi, ti txitxile wutomi wathu ni ku hi ni txikongomelo txa wutomi.
5. Kuziva ti to Jehovha i Mvangi ti hi vhunisa kutxani kuva vathu vo tiveka hahatshi? (Isaya 45:9-12)
5 Kuziva ti to Jehovha i Mvangi ta hi vhuna kuva vathu vo tiveka hahatshi. Ngu txikombiso, kudingana mbimo yo kari Jobe a khatile kuveka mapimo kakwe apune ni ka vathu vamwani. Kasiku e mvhuna, Jehova a khumbutisile Jobe to Ene ngene Mvangi awu a ku ni mtamo wotshe. (Jobe 38:1-4) Eto ti vhuni Jobe ku e pfisisa ti to ati Jehovha ati mahako mbimo yotshe ndinene. Ngu kutsimbila ka malembe, mprofeti Isaya a wombile ti to vathu kha va fanela kupimisa ti to vona va gulekile kupinda Txizimu, mbimo yi a nga khene: “Ina dibumba di nga womba ka muwumbi wa dona, di txi kha dona: ‘U maha txani, kani?’”—Lera Isaya 45:9-12.
6. Ngu kutxani mbimo yimwani i di tatinene kualakanyisisa ngu mtamo ni wutxhari wa Jehovha? (Wona ni mifota.)
6 Mbimo yi Mkristu a yako e vitwa ngu didhawa da moya, a nga khata kuthemba mawonelo akwe hahanze ko lava mkongomiso wa Jehovha wu ku mu ka Bhiblia. (Jobe 37:23, 24) Ngaku toneto ti txi maheka, ndinene ku Mkristu eneyo e ema e alakanyisisa ngu wutxhari ni mtamo wa Jehovha. (Isaya 40:22; 55:8, 9) Ngu nzila yoneyo, gondo yoneyo ya makhato yi na mvhuna ku e simama e tiveka hahatshi ni kupfisisa ti to ati Jehova ati pimisako, nda lisima ngutu kupinda mawonelo akwe.
Nji txani txi no hi vhuna kudinganisela mayelano ni mawonelo athu? (Wona paragrafu 6)
7. Nji txani txi nga vhuna Rahela ti to e tumela m’kongomiso wa wuphya?
7 Kukhumbula ti to Jehovha i Mvangi ti vhuni Rahela wa Eslovénia kutumela mkongomiso wa wuphya wa sengeletano. Ene a womba tiya: “Mbimo yimwani ta ni karatela kutumela sisungo simwani asi si mahwako ngu va vathangelako ka sengeletano. Ngu txikombiso, ani ni xalete madungula a Mmidi wu wu Fumako a numeru 8 a 2023. Hambiketo, ni swirekile dikhambi do khata di ni nga wona mwanathu a txi veka dhixkursu a di ni maletu. Ngu toneto, ni mahile mkombelo ka Jehovha ni kombela ti to e ni vhuna ni tumela kutxitxa kuwa ka kuphya.” Rahela a pfisisile ti to a ku Jehovha i ku Mvangi wa mafu ni nzuma, ene a ni wusikoti wo kongomisa sengeletano yakwe ngu nzila yo hetiseka. Ina mbimo yimwani nawe ta kukaratela kutumela mapfisiselo a maphya mwendo kuengisa mkongomiso wa wuphya wa sengeletano? I di toneto, tiveke hahatshi ni kutiha mbimo yo alakanyisisa ngu wutxhari ni mtamo wa Mvangi wako.—Var. 11:33-36.
NGU KUTXANI TXIZIMU TXI TXI TUMELELA KUXANISEKA?
8. Kuziva ti to Jehovha hi nga ene a vangako kuxaniseka ti hi vhunisile kutxani?
8 Ngu kutxani Txizimu txi txi tumelela kuxaniseka? Aku vathu vamwani va si yi ziviko xamulo ya txiwotiso txiya, vona va sola Txizimu ni ku kha va kholwi ti to txona txiho. (Mav. 19:3) Kambe awe u gondile ti to ati ti hi mahako hi xaniseka njionho ni kwambi hetiseka, i singa Jehovha. Awe u tshumete u gonda ti to pasiyensiya ya Jehovha ya tulela mkhanjo vathu wo ve m’ziva ni kutumbula ti a no ti maha kasiku kugumisa kuxaniseka. (2 Pedro 3:9, 15) Ditshuri donedo di kuthavelete ni kutsanisa wungana wako ni Jehovha.
9. Ngu ka sihi siemo hi fanelako kukhumbula ti to ngu kutxani Jehovha a txi tumelela kuxaniseka?
9 Athu ha tiziva ti to ti lava hi va ni pasiyensiya mbimo yi hi emelako Jehovha kasiku e fuvisa kotshe kuxaniseka. Kambe mbimo yi hi xanisekako mwendo kuwona m’thu wu hi m’dhundako a txi xaniseka, hi nga thuka hi pimisa ti to Jehovha wa swela. (Hab. 1:2, 3) Ka siemo so nga toneto, ndatinene ku hi khumbula sivangelo asi si mahako Jehovha e tumelela ti to vathu va vanene ve xaniseka.a (Mas. 34:19) Hi nga tshumela hi alakanyisisa ngu txikongomelo txa Jehovha txo fuvisa kotshe kuxaniseka.
10. Nji txani txi nga vhuna Anne ku e wonisana ni kufelwa ngu mwamwakwe?
10 Kuziva ditshuri mayelano ni kuxaniseka ta hi vhuna ku hi timisela. Anne, awu a zumbako ka txitondolo txa Mayotte a womba tiya: “Malembenyana msana mamwangu a fite, ngu toneto ni pandisekile ngutu. Kambe mbimo yotshe ni zama kukhumbula ti to Jehovha hi nga ene a vangako kuxaniseka. Hahanze keto, ene a yi emete ngu maso o bhilivila mbimo yi a no ta fuvisa kotshe kuxaniseka, e wusa vangana vathu va va nga fa. Kualakanyisisa ngu ditshuri donedo ta ni maha nipfa kurula ka mbilu.”
11. Kuziva ti to ngu kutxani Jehovha a txi tumelela kuxaniseka ti hi vhunisa kutxani?
11 Kuziva ti to ngu kutxani Txizimu txi txi tumelela kuxaniseka ti nga hi vhuna kusimama hi txhumayela. Mpostoli Pedro a txhamusela ti to pasiyensiya ya Jehovha yi tulela mkhanju vathu vavangi kasiku ve tisola ni kuhulukiswa. A tshumete e womba tiya: “Tixolisiseni mi wona to mi vathu vo zumbisa kutxani. Mi fanete mi va vathu ava va kuni mahanyelo o sawuleka ni kukombisa kutiningetela ka Txizimu.” (2 Pedro 3:11, NM) Timwani ti hi nga ti mahako kasi kukombisa “kutiningetela ka Txizimu” ngu txhumayela. Kufana ni Tate wathu wa lirando, athu ha vadhunda vathu ni ku hi lava ti to ve ta hanya ngu ha kusi gumiko ka mafu a maphya. Jehovha wa simama e ninga mkhanju vathu va teritoriyo yako ti to ve m’ziva ni ku mthumela. Awe u ni lungelo yo thuma kumweko ni Jehovha ni kuvhuna vathu vo tala ku ve gonda ngu ngene magwito ma si se hoka!—1 Vak. 3:9.
HI HANYA “KA MASIKU A KUGWITISA”
12. Kuziva ti to hi hanya “ka masiku a kugwitisa” ti hi vhunisa kutxani?
12 Bhiblia ya txhamusela nzila yi vathu va ndi no hanyisa tona “ka masiku a kugwitisa.” (2 Tim. 3:1-5) Phela vathu vavangi nyamsi va ni mahanyelo o xanga, se eto ta hi maha hi pfisisa ti to wuprofeti wuwa wa hetiseka. Kupfisisa ditshuri diya ta hi maha hi themba Bhiblia.—2 Tim. 3:13-15.
13. Hi gonda txani ka txidinganiso txa Jesu txi txi ku ka Luka 12:15-21?
13 Kuziva ti to hi hanya ka masiku a magwito ta hi vhuna ku hi thangetisa timhaka ta lisima. Ka dibhuku da Luka 12:15-21. (Lera.) Jesu a kontarete txidinganiso atxi txi hi vhunako kuwona ati hi fanelako kutithangetisa. Ngu kutxani wamwamna wo ganya a di dhanwi ku “dibhemba”? Hi nga ku a nga ti ni tithomba to tala, kambe nguva a di thangetisile silo so mbi vhuna txilo ka wutomi wakwe. Ene ‘a ti sengeletela tithomba takwe, kambe ka Txizimu i ti txisiwana.’ Ngu kutxani ti nga ti bihile kumaha toneto? Txizimu txi gete wamwamna wule txi txi: “Wusiku wuwa u na fa.” Hi gonda txani ka txidinganiso txiya? Mbimo yi yi nga sala ti to magwito me hoka yidotho ngutu. Ngu toneto, hi fanete kutiwotisa tiya: ‘Ina makungu angu ma kombisa ti to ni thangetisa timhaka ta lisima? Ngu yahi makungu ya ni kuzetako vanana vangu ku ve ma hokelela? Ina ni thumisa mbimo yangu, mtamo wangu ni silo si ni kunaso kasiku ni ti sengeletelela tithomba mwendo kusengeletelela tithomba nzumani?’
14. Hi gonda txani ka txikombiso txa Mwanathu Miki?
14 Kualakanyisisa ngu sikombiso asi si kombisako ti to hi hanya ka masiku a magwito ti nga txitxa wutomi wathu. Phela eto ngu ti ti nga humelela mwanathu Miki. Ene a womba tiya: “Mbimo yi ni nga heta kugonda ni txi lava kuthuma kota m’xolisisi wa wutomi wa sihari. Ngu mbimo yoneyo ni txi lava kuthuma kota nyaphandule wa mbimo yotshe ni kuya a mu ku ku ni txilaveko. Kambe vangana vangu ava va ku ni txiperiensiya, va ni vhuni kuwona ti to ti ndi na ni karatela kuthuma kota mxolisisi wa ta wutomi wa sihari ni kuthuma kota nyaphandule wa mbimo yotshe! Vona va ni khumbutisile ati to magwito a mafu yawa ma hafuhi ni ku ka mafu a maphya na ta na va ni mbimo yo tala yo gonda mayelano ni wutomi wa sihari. Se ni mahile txisungo txo maha kursu ayi yi ndi no ni ninga mbimo yo thuma kota nyaphandule. Ngu toneto, ni sikoti kuthuma kota nyaphandule ni ku ngu kutsimbila ka mbimo ni yite ka teritoriyo ayi yi nga ti ni txilaveko txa vatxhumayeli khe Equador.” Nyamsi, Miki ni mwamna wakwe va thuma kota vawoneleli va txigava khe Equador.
15. Txikombiso txa Jakobe txi hi vhunisa kutxani kuwona ti to hi ya fanela kugodhola kutxhumayela? (Wona ni mifota.)
15 Khaha fanela kugodhola ngaku avale hi va txhumayelako va txi lamba ku hi engisa. Phela ditshiku dimwani va nga txitxa. Wona txikombiso txa Jakobe, mnanda wa Jesu. Ene a woni Jesu atxi kula, eva Mesiya ni kuva m’gondisi wa hombe. Kambe kudingana malembe amangi Jakobe kha ngava mlondeteli wa Jesu, ene a tova mlondeteli wa Jesu msana kova Jesu a di wusilwe. Phela Jakobe a vite mgondiswa wo hiseka.b (Joh. 7:5; Vag. 2:9) Ngu toneto, u nga godhole ngaku maxaka ako ni vathu va teritoriyo yako va si kombisi kutsakela ditshuri. Ti nga maha vona ve ta gonda ditshuri msana kova xanisa ya hombe yi di khatile.c
Nji txani txi no hi vhuna ku hi si godholi hi simama hi txhumayela maxaka athu? (Wona paragrafu 15)e
SIMAMA U NINGA LISIMA SIALAKANYISO SA JEHOVHA
16. Sialakanyiso sa Jehovha si kuvhunisile kutxani? (Wona ni dikwadru adi di ku “Thumisa ditshuri adi di ku mu ka Bhiblia kasi kuvhuna vamwani.”)
16 Sakudya simwani asi hi si amukelako ngu didhawa da moya si mahetwe avale va si ziviko txilo ngu ta Bhiblia. Ngu txikombiso, madhixkursu aya ma mahwako ka mitshangano ya magwito ka divhiki, mabhuku a vathu votshe, misungo ya timhaka ni mavhidhiyo a si si ku ka site ya jw.org si mahetwe ngutu-ngutu avale i si ngaku Tifakazi ta Jehovha. Hambiketo, sialakanyiso soneso sa Jehovha si nga hi vhuna nathu. Sona sa engetela lirando li hi kunalo ngu Jehovha si tshumela si tsanisa likholo lathu ka Bhiblia ni ku hi vhuna kuva vagondisi va vanene.—Mas. 19:7.
17. Ngu ka sihi siemo i ku tatinene kuema hi alakanyisisa ngu tigondo ta makhato ta Bhiblia?
17 Athu Tifakazi ta Jehovha ha tsaka ngutu mbimo yi hi amukelako mapfisiselo a maphya a ditshuri da mu ka Bhiblia. Kambe ha tshumela hi ninga lisima tigondo ta makhato ta Bhiblia ati ti nga hi maha hi ziva ditshuri. Ngaku hi di ni moya wo kanyisa mkongomiso wa sengeletano, hi fanete kutiveka hahatshi hi khumbula ti to Mvangi wathu a ni wutxhari ni mtamo ni ku ngene a kongomisako sengeletano yakwe. Ngaku athu mwendo m’thu wu hi m’dhundako a txi xaniseka, ndatinene ku hi va ni pasiyensiya, hi alakanyisisa ngu sivangelo asi si mahako to Jehovha e tumelela kuxaniseka. Se hi txi sawula nzila yo thumisa silo sathu ni mbimo yathu, hi fanete kuthangetisa a ti i ku ta lisima ni kukhumbula ti to hi hanya ka masiku o gwitisa. Ngaku hi txi maha toneto, sialakanyiso sa Jehovha si na simama si hi tsanisa, si hi kuzeta ni ku hi ninga wutxhari.
NDANDO 95 Liwoningo se la woninga ngutu
a Wona msungo mhaka awu wu ku “Mhaka Leyi Ha Yona Ku xaniseka Hinkwako Ku Nga Ta Hela Ku Nga Ri Khale” ka Muwoneleli wa 15 ka Maio wa 2007, pajina 21-25, ngu txitsonga.
c Wona msungo mhaka awu wu ku “Ngu tihi ati hi ti zivako mayelano ni wulamuli awu Jehovha a no ta wu maha mbimo yi yi tako?” ka Muwoneleli wa Maio wa 2024 pajina 8-13.
d TXHAMUSELO YA MFOTA: Didhota do kari di txi ningela mawonelo kambe madhota mamwani kha ma tumelelani ni mawonelo oneyo. Ngu msana, ene wa wona nzumani ko tala ngu tinyeleti e alakanyisisa ngu wutxhari ni mtamo wa Mvangi. Se eto ta mmaha e pfisisa ti to ati Jehovha a ti pimisako nda lisima ngutu kuphinda mawonelo akwe.
e TXHAMUSELO YA MFOTA: Ka gondo yakwe a pune, mwanathu wa wona sikombiso asi si kombisako ti to hi hanya ka masiku a magwito. Eto ta mkuzeta ku e ligarela mnanda wakwe e m’txhumayela.