Jehovha wa hi vhuna kutsanisela

1. Ngu kutxani ti txi lava ku hi tsanisela, ni ku i mani wu a nga hi vhunako? (1 Pedro 5:10)

AKU wutomi wu yako wu txi bava ka masiku yawa a magwito, hotshethu ti lava hi simama hi tsanisela. Vamwani va wonisana ni malwati. Kasi vamwani va wonisana ni kufelwa ngu vathu ava va va dhundako. Se vamwani va wonisana ni kuwukelwa ngu maxaka mwendo mifumo. (Mat. 10:18, 36, 37) Kambe ti si nga ni mhaka ni sikarato asi awe u wonisanako naso, Jehovha a na kuvhuna ku u tsanisela.—Lera 1 Pedro 5:10.

2. Ngu kutxani hi txi sikota kutsanisela?

² Kutsanisela ti womba kusimama hi di thembekile ka Jehovha ni ku mthumela hambi hi txi wonisana ni sikarato, kuxaniswa ni siduko. Kambe kha hi nge sikoti kutsanisela ngu mtamo wathu. Hi ngo sikota kutsanisela ngu kuvhunwa ngu Jehovha dwe, nguku ngene a hi ningako “mtamo wa hombe.” (2 Vak. 4:7) Ka gondo yiya, hi na bhula ngu txivhuno atxi Jehovha a hi ningako kasiku hi tsanisela ni kutshumela hi wona ati hi nga ti mahako kasiku hi londola txivhuno txonetxo.

MKOMBELO

3. Ngu kutxani mkombelo i di ningo ya lisima ayi yi tako ngu ka Jehovha?

³ Kasiku e hi vhuna kutsanisela, Jehovha a hi ningile mkombelo. Ene a mahile ti koteka ku hi bhula nayo hambiku hi ku vaonhi. (Vaheb. 4:16) Pimisa ngu tiya: Athu hi nga womba-womba ni Jehovha ngu mbimo yi hi yi lavako ni ku m’gela ati hi ti lavako. Hi nga tshumela hi womba-womba nayo ngu lidimi li hi li lavako, ka wukhalo wumwani ni wumwani wu hi ku ka wona, hambi hi di hokha mwendo hi di seketwe jele. (Jona 2:1, 2; Mith. 16:25, 26) I di ti to ha vilela ngutu aha ko hi si tikoti ni kuwomba ati hi tipfako, Jehovha wa sikota kupfisisa ati ti ku timbiluni kwathu hambi hi sa tiwomba. (Var. 8:26, 27) Ngu ditshuri, mkombelo i ningo ya lisima ayi yi tako ngu ka Jehovha!

4. Ngu kutxani kumaha mkombelo ka Jehovha hi kombela txivhuno txo hi tsanisela ti txi tsimbitisana ni kudhunda kwakwe?

⁴ Ka Bhiblia, Jehovha a hi thembisa ti to ‘ti si nga ni mhaka ni si hi m’kombelako madingano ni kuranda kwakwe, ene wa hi engisa.’ (1 Joh. 5:14) Ina hi nga maha mkombelo ka Jehovha, hi mkombela ku e hi vhuna kutsanisela? Ina. Phela kumaha toneto ta tsimbitisana ni kudhunda kwakwe. Hi ti zivisa kutxani toneto? Mbimo yi hi tsaniselako ti si nga ni mhaka ni siduko, hi vhuna Jehovha ku e xamula wule a mtxhepetako, i ku Sathani. (Mav. 27:11) I singeto dwe, Bhiblia yi womba ti to Jehovha wa ti lava ngutu “kutsanisa ava i ku vakwe ngu timbilu tawe totshe.” (2 Mak. 16:9) Ngu toneto, hi nga tsaniseka ti to Jehovha a ni mtamo wo e hi vhuna kutsanisela ni ku wa ti lava kumaha toneto.—Isaya 30:18; 41:10; Luka 11:13.

5. Mkombelo wu nga hi vhunisa kutxani ku hi va ni kupepa ka mbilu? (Isaya 26:3)

⁵ Bhiblia yi womba ti to ngaku hi txi maha mkombelo, ‘kuthutha ka Txizimu, kupindako wotshe wuzivi, ku na veketa timbilu tathu ni mialakanyo yathu.’ (Vaf. 4:7) Phela eyo i lungelo ya hombe. Vathu va va si thumeliko Jehovha ni vona va dyisetwa ngu sikarato, se va lavetela tinzila to pepisa mbilu. Ngu txikombiso, vamwani va thumisa silo so kari so fana ni wusuke kasiku ve pepisa mapimo ni kudivala timhaka ti ti va tiselako txitrese. Kambe kuthumisa tinzila toneto ti ni phango kwathu nguku ti nga hi dayisa ngu didhawa da moya. (Wona Matewu 12:43-45.) I singeto dwe, kupepa ku hi kumanako ngu kumaha mkombelo nga hombe ngutu kupinda tinzila ti vathu va ti thumisako kasiku ve thavisa txitrese. Mbimo yi hi mahako mkombelo hi kombisa ti to ha mthemba Jehovha, se kota wuyelo ene wa hi ninga “kudikha mwendo kurula.” (Lera Isaya 26:3.) A mahisa kutxani toneto? Ene a maha toneto ngu ku hi vhuna kukhumbula tindimana ta Bhiblia ati ti hi tsanisekisako to ene wa hi dhunda ni ku a hi navelela tatinene. Kukhumbula tindimana toneto ta hi maha hi va ni kupepa ka mbilu.—Mas. 62:1, 2.

6. U nga yi londolisa kutxani ningo ya mkombelo? (Wona ni mfota.)

⁶ U nga maha txani? Ngaku u txi wonisana ni siduko, “veka wutomi wako manzani ka MKOMA” ni ku maha mkombelo u kombela kurula. (Mas. 55:22) Tshumela u khongela ka Jehovha u kombela wutxhari awu u wu lavako kasiku u wonisana ni siduko soneso. (Mav. 2:10, 11) I singeto dwe, ka mikombelo yako bonga Jehovha. (Vaf. 4:6) Zama kuwona nzila yi Jehovha a kuvhunako ngu yona ditshiku ni ditshiku ni ku m’bonge ngu toneto. U nga tumeleli ti to sikarato si kutsivela kuwona makatekwa aya Jehovha a kuningako.—Mas. 16:5, 6.

DIPSWI DA TXIZIMU

7. Ngu kutxani kulera Bhiblia ti txi hi vhuna kutsanisela?

⁷ Jehovha a hi ningile Bhiblia kasiku yi hi vhuna kutsanisela. Ka yona hi mana tindimana to tala ati ti hi tsanisekisako ti to Jehovha a na hi vhuna. Matewu 6:8 yi womba tiya: “Tate wanu wa nzumani wa tiziva ati mi ti lavako mi si se kombela.” Mapswi yawa ma wombilwe ngu Jesu awu a mzivako kwati Jehovha kupinda vathu votshe. Ngu toneto, hi nga tsaniseka ti to mbimo yi hi wonisanako ni sikarato, Jehovha wa tiziva ti hi ti lavako ni ku a na hi khatalela. Bhiblia yi tate ngu tindimana ati ti nga hi vhunako kutsanisela.—Mas. 94:19.

8. a) Ngu sihi sialakanyiso asi Bhiblia yi hi ningako? b) Hi nga maha txani kasiku hi khumbula matshina a milayo a Bhiblia a ya ma no hi vhuna kutsanisela?

⁸ Matshina a milayo a Bhiblia ma nga hi vhuna ku hi tsanisela. Ona ma hi ninga wutxhari wu hi wu lavako kasiku hi maha sisungo sa sinene. (Mav. 2:6, 7) Ngu txikombiso, Bhiblia yi hi kuzeta ku hi si karateki ngu ti ti no humelela mangwana. (Mat. 6:34) Ngaku hi txi lera Bhiblia hi tshumela hi alakanyisisa ngu ti hi ti gondako, ti na hi hehukela kukhumbula matshina a milayo a Bhiblia mbimo yi hi lavako kumaha sisungo mwendo hi txi lava kuziva nzila yo tsanisela txikarato txo kari.

9. Matimu a vathu vo thembeka aya hi ma manako mu ka Bhiblia ma nga hi vhunisa kutxani?

⁹ Ka Bhiblia hi tshumela hi mana matimu ya vathu vo fana ni nathu va va nga themba Jehovha ni kuvhunwa ngu ngene. (Vaheb. 11:32-34; Jak. 5:17) Kualakanyisisa ngu matimu a vathu vonevo, ti na hi vhuna kutsanisa themba yathu ya ti to Jehovha “mbuthavelo ni mtamo wathu, ngene a hi vhunako ka timbimo ta kuxaniseka.” (Mas. 46:1) Kugonda ngu sikombiso sa malanda onewo o thembeka, ti na hi vhuna ku hi etetela likholo lawe ni kutsanisela kwawe.—Jak. 5:10, 11.

10. U na wuyelwa ngu txani ngaku u txi gonda Dipswi da Txizimu?

¹⁰ U nga maha txani? Gonda Bhiblia ditshiku ni ditshiku ni ku vana ni lixta ya tindimana ti ti nga kuvhunako. Vamwani va dhunda kulera m’bhalo wa ditshiku nimixo nguku eto ta va vhuna kualakanyisisa ngu wona ditshiku dotshe. Eto ngu ti mwanathu Mariea a nga ti maha mbimo yi a nga ti khatalela vaveleki vakwe ava va nga ti ni malwati a cancer. Ene a womba tiya: “Ditshiku ni ditshiku ni txi gonda m’bhalo wa ditshiku nimixo, ni ku ni txi alakanyisisa ngu wona. Kumaha toneto ti txi ni vhuna ku ni alakanyisisa ngu ti ni nga txi tigonda, se ni si veki mapimo ka sikarato si ni nga ti wonisana naso.”—Mas. 61:2.

VANATHU

11. Ngu kutxani kuziva ti to hi nga hokha hi wonisanako ni sikarato ti txi hi vhuna kutsanisela?

¹¹ Jehovha wa thumisa vanathu kasiku ve hi vhuna kutsanisela. Kuziva ti to “vanathu va va nga hangalaka ni ditiko va xupheka ngu sixaniso so nga soneso,” ta hi maha hi tsaniseka to kha hi nga hokha. (1 Pedro 5:9) Hamafuni kotshe vanathu va wonisana ni sikarato so fana ni si hi wonisanako naso, kambe vona va tsanisela. Eto ti kombisa ti to ti singa ni mhaka ni sikarato si hi wonisanako naso, nathu hi nga sikota kutsanisela!—Mith. 14:22.

12. Vanathu va hi vhunisa kutxani ni ku athu hi nga va vhunisa kutxani? (2 Vakorinto 1:3, 4)

¹² Vanathu va nga tshumela ve hi vhuna kutsanisela ngu ti va ti wombako ni ti va hi mahelako. Phela mpostoli Paulo atxi woni txivhuno txonetxo. Ka mapasi akwe, ene a bhate matina a vanathu va va nga m’vhuna ni kutshumela eva bonga. Vanathu vonevo va mthavelete, ve mtsanisa ni ku mninga txivhuno txi a nga ti txi lava. (Vaf. 2:25, 29, 30; Vakl. 4:10, 11) Eto ta maheka ni nyamsi. Mbimo yi hi wonisanako ni sikarato, vanathu va hi tsanisa, va hi thavelela ni ku hi vhuna kutsanisela. Nathu ha va ninga txivhuno txi va txi lavako ngaku va txi wonisana ni sikarato.—Lera 2 Vakorinto 1:3, 4.

13. Nji txani atxi txi nga vhuna mwanathu Maya ku e tsanisela?

¹³ Ngu 2020, maphoyisa a Rússia ma ti ya setxha mtini ka mwanathu Maya. Ona ma mu yisile tribhunali ngu mhaka yo bhula ni vathu mayelano ni likholo lakwe. Ka mbimo yoneyo, Maya a tsanisilwe ngu vanathu. Ene a womba tiya: “Ku ni mbimo yi ni nga ti godhote, kambe vanathu va txi ni ligarela ni ku ni bhalela mapasi ve ni gela to va ni dhunda. Ani ni txi ti ziva to ni ni mwaya wa hombe wa hamafuni kotshe awu wu ku ni lirando, kambe kukhukhela ngu 2020 ni li woni lirando lonelo ngu kukongoma.”

14. U nga maha txani kasi kulondola txivhuno txi vanathu va kuningako? (Wona ni mfota.)

¹⁴ U nga maha txani? Ngaku u txi wonisana ni sikarato, zumba hafuhi ni vanathu. U nga ve ni tingana to ya kombela txivhuno ka madhota. Ona ma nga va “txivhikelo txo vhikela moya ni wuthavelo ka txihuhuri.” (Isaya 32:2) I singeto dwe, khumbula ti to vanathu ni vona va wonisana ni sikarato. Se va vhune ku ni vona ve tsanisela sikarato sawe. U txi maha toneto, u na va ni litsako ni ku ti na kuvhuna ku nawe u tsanisela.—Mith. 20:35.

THEMBA YATHU

15. Themba yi mvhunisile kutxani Jesu ni ku yi nga hi vhunisa kutxani nathu? (Vahebheru 12:2)

¹⁵ Themba yi Jehovha a nga hi ninga nja ditshuri aha ko ya hi vhuna kutsanisela. (Var. 15:13) Themba yoneyo yi vhuni Jesu. Ene atxi tiziva ti to ngaku atxo simama adi thembekile, a ndi na basisa ditina da Tate wakwe. Phela Jesu ati yi emete ngu maso o bhilivila mbimo yi a ndi no tshumela eya zumba ni Tate wakwe nzumani ni kufuma kumweko ni vasawuleki. Themba yi a nga ti nayo yi mvhuni ku e tsanisela lifo lo panda ngutu. (Lera Vahebheru 12:2.) Nguha kufanako, themba yi hi ku nayo yo ta hanya ka mafu a maphya ya hi vhuna kutsanisela sikarato si hi wonisanako naso ka mafu yawa a Sathani.

16. Themba yi mvhunisile kutxani mwanathu Alla ni ku hi gonda txani ka ti a nga tiwomba?

¹⁶ Wona nzila yi themba yo ta hanya ka mafu a maphya yi nga vhuna ngu yona mwanathu Alla wa Rússia. Mwamna wakwe ati khotetwe jele atxi emela ditshiku do ta xuxiswa. Alla a womba tiya: “Kumaha mkombelo mayelano ni themba yo ta hanya ka mafu a maphya ni kualakanyisisa ngu yona, ti ni vhuni ku ni si godholi. Na ti ziva ti to siduko siya i singa kale si na fuviswa. Jehovha a na xula valala vakwe ni ku a na hi katekisa.”

17. Hi nga maha txani kasiku hi wuyelwa ngu themba yi Jehovha a nga hi ninga? (Wona ni mfota.)

¹⁷ U nga maha txani? Tihe mbimo yo alakanyisisa ngu themba yo tsakisa ya mbimo yi yi tako. Pimisa u txi hanya ka mafu a maphya u txi maha totshe ati ti kutsakisako. Sikarato si hi wonisanako naso nyamsi nza “mbimonyana ni ku nzo hehuka” si txi fananiswa ni mbimo yi hi no ta yi hanya ka paradhesi. (2 Vak. 4:17) Tshumela u gela vamwani mayelano ni themba yi u ku nayo. Pimisa ngu nzila yi vathu ti va karatelako ngu yona kuwonisana ni sikarato va singa ni themba yo ta hanya ka mafu a maphya. Phela dibhulo do koma ni vathu vonevo, di nga va maha ve navela kuziva to tala mayelano ni themba yathu.

18. Ngu kutxani hi txi themba to sithembiso sa Jehovha si na hetiseka?

¹⁸ Msana kova adi wonisani ni sikarato sasingi, Jobe a gete tiya Jehovha: “Ani se na tiziva khakwati ti to wa ti ziva totshe ni ku kha txi ngaho txi u nga tandekako ku txi maha.” (Jobe 42:2, NM) Jobe a gondile ti to txi walo atxi txi nga tsivelako Jehovha ku e hetisisa txikongomelo txakwe. Ditshuri donedo di nga hi ninga mtamo wo hi tsanisela. Pimisa ngu txikombiso txiya: Wamsikati wo kari i ku kale atxi lwala a godhote nguku vadhokodhela vo tala kha va tikoti kuthuma malwati akwe. Se ngu kutsimbila ka mbimo, e mana dhokodhela a ku ni txiperiyensiya, awu a nga tumbula malwati aya a ku nawo e tshumela e m’gela nzila yi a no mthuma ngu yona. Hambiku wamsikati eneyo ati zivako ti to ti na teka mbimo yo lapha kasiku e kalamuka, ene wa pepa mialakanyo. Kuziva ti to ditshiku dimwani a na kalamuka ka malwati ya aku nawo, eto ta m’vhuna ku e tsanisela. Nguha kufanako, ngaku hi txi tsaniseka ti to txithembiso txa Jehovha mayelano ni wumangwana txi na hetiseka, eto ta hi vhuna ku hi simama hi tsanisela.

19. Nji txani txi hi fanelako ku txi maha kasiku hi tsanisela?

¹⁹ Nguha hi nga tiwona ngu kona, mkombelo, Dipswi da Txizimu, vanathu ni themba yathu, nji vhuno atxi Jehovha a hi ningako kasiku hi tsanisela. Ngako hi txi londola kwati txivhuno txiya, hi na wona nzila yi Jehovha ahi vhunako ngu yona ka txikarato tximwani ni tximwani. Hi na tshumela hi sikota kutsanisela kala ditshiku di sotshe sikarato asi hi vangelwako ngu mafu a Sathani si no fuviswa.—Vaf. 4:13.