Simama u kombisa lirando li li akako

1. Nji txani atxi Jesu a nga womba-womba ngu txona ni vagondiswa vakwe?

KA WUSIKU wakwe wo gwita ha mafuni a si nze kufa, Jesu a womba-wombile ngu lirando sikhati so pinda 30 ni vagondiswa vakwe. A va gete ti to va fanete ve ‘randana.’ (Johani 15:12, 17) Lirando lawe li ndi na maha ti to vamwani ve va ziva to valondeteli va Jesu va ditshuri. (Johani 13:34, 35) Lirando li Jesu a nga womba-womba ngu lona hi nga la matipfelo dwe; kambe i fanelo yo tiningela ngu mhaka ya vamwani. A wombile tiya: “Ku walo m’thu wu a ku ni lirando la hombe ngutu kupinda la wule a ningelako wutomi wakwe ngu mhaka ya vangana vakwe. Anu mi vangana vangu, ngako mi txi maha totshe ti ni mi rumako.”​—Johani 15:13, 14.

2. a) Malanda a Txizimu ma ziwa ngu txani nyamsi? b) Ngu sihi siwotiso si hi no si xamula ka msungo wuwa?

² Nyamsi, malanda a Jehovha ma ziwa ngu lirando la hombe ni wumwewo wo tsana. (1 Johani 3:10, 11) Lirando lonelo, kha li yi ngu ditiko di m’thu a humako ka dona, lixaka lakwe, lidimi, mwendo mdhawuko wakwe. Ha mafuni kotshe, malanda a Jehovha ngu ditshuri ma dhundana. Ngu kutxani lirando li txi laveka ngutu nyamsi wa ditshiku? Jehovha ni Jesu va hi akisa kutxani ngu lirando? Ni ku hi nga li kombisisa kutxani lirando liya ti to hi tsanisa vamwani?​—1 Vakorinto 8:1.

LIRANDO LA LAVEKA, NGUTU-NGUTU KONKUWA

3. Nji txani txi mahekako ka “timbimo tiya to karata”?

³ Hi hanya ka “timbimo to karata” ni ku wutomi wu tate ngu “sikarato ni kupandiseka.” (2 Timoti 3:1-5; Masalmo 90:10) Vathu vo tala se va rerekile ngu sikarato. Dilembe ni dilembe vathu va va pindako 800.000 va tisunga, ti wombako ku, ngu 40 wa masegundo ku ni m’thu mmweyo a tisungako. Bhadhi ya kona ngu ti to vanathu vamwani va manana ni sikarato soneso ha koza ni vona ve tisunga.

4. Ngu yahi malanda a Txizimu aya ma nga manana ni sikarato ha koza me navela kufa?

⁴ Ka mbimo ya kale, malanda a Txizimu o thembeka ma karatekile ngu mhaka ya sikarato asi si nga ma maha me lava ni kufa. Ngu txikombiso, Jobe a ti phandisekile ha koza a txi khene: “Wutomi wangu na wu nyenya,  . . . kha ni na mbi hanya kala kupinduka.” (Jobe 7:16; 14:13) Jona a ti karatekile, se a txi khene: “Na ku kombela koko, awe MKOMA thavisa wutomi wangu, nguko i tshuko kwangu kufa kupinda kuhanya.” (Jona 4:3) Mprofeti Elija a ti gumetwe ngu themba, se a ti khene: “Se ta dingana awe MKOMA; teka koko wutomi wangu.” (1 Vafumeli 19:4) Kambe Jehovha a ti ma randa malanda onewo o thembeka ni ku a ti lava me simama me hanya. Kha ma ninga mnando ngu mhaka ya matipfelo a ona. Hahanze keto, a ma vhuni ti to me tshumela me tsakela wutomi kasiku me simama me mthumela ngu kuthembeka.

5. Ngu kutxani ti txi lava hi kombisa lirando ka vanathu?

⁵ Nyamsi, vanathu vo tala va wonisana ni siemo so karata, se ti lava hi va komba lirando. Vamwani va poyilwa mwendo kuxaniswa. Vamwani ti lava ve timiselela kudyisetwa ni ku hembelwa mthumoni. Ti nga maha va di karate nguko va fanete kuthuma mbimo yo lapha mwendo va ni mithumo yo karata. Mbimo yimwani ti nga maha va di ni sikarato sa hombe mwayani. Vamwani ti nga maha mngana wawe wa wukati a si thumeli Jehovha, se e zumba ngu ku mu sola-sola. Sikarato soneso ni simwani, si maha ti to vo tala ve guma mtamo mwendo ve khata ku ti pfa i si nga va txilo. I mani a nga va vhunako?

LIRANDO LA JEHOVHA LA HI TSANISA

6. Lirando la Jehovha li ma tsanisa ngu nzila yihi malanda akwe?

⁶ Jehovha a thembisa malanda akwe ti to wa ma dhunda ni ku a na ma dhunda kala kupinduka. Alakanya a ti Vaisrayeli va nga tipfisa tona mbimo yi Jehovha a nga va gela tiya: “Ngako u nga randeka masoni kwangu, kambe u dhundekile, se ani ni ku randile,” ni ku “u nga thave koko, nguko ni ni nawe”! (Isaya 43:4, 5) Ha tiziva ti to hi va lisima ka Jehovha.a (Wona txhamuselo ya hahatshi.) Bhiblia yi thembisa tiya: “Ana ni mtamo ngutu kasi ku kuhanyisa; ene a na tala ngu ku kutsakela.”​—Zefaniya 3:16, 17.

7. Lirando la Jehovha ngu vathu vakwe li fanisa kutxani ni la mame ni mwanana? (Wona mfota wu wu ku makhatoni.)

⁷ Jehovha a thembisa kuninga mtamo ni kutsanisa vathu wakwe ti si nga ni mhaka ni sikarato sawe. A ti khene: “Sekoko mi na mama, va na mi gula, va txi mi khutarela. Kufana ni m’thu wule a thavelelwako ngu mwamwakwe, ngu toneto ani ni na mi thavelela.” (Isaya 66:12, 13) Alakanya nzila yi mwanana a ti pfako ngu yona mbimo yi mamwakwe amu khatalelako ni kusakana nayo! Jehovha wa kuranda ngutu ni ku a lava u tipfa u txi khatalelwa. U nga thuke u pimisa ti to khu nga wa txilo ka Jehovha.​—Jeremiya 31:3.

8, 9. Lirando la Jesu li nga hi tsanisa ngu nzila yihi?

⁸ Txivangelo tximwani txa ti to ngu kutxani hi txi tiziva to Jehovha wa hi randa: “Nguko Txizimu txi kombile lirando ka vathu, ahawa txi nga za txi ningela Mwanana wa txona wa Mmweyo ekha, kufela ku, votshe va va no kholwa kwakwe, va si lovi, aniko va na mana wutomi wo mbi guma.” (Johani 3:16) Digandelo da Jesu di kombisa to wa hi randa, se lirando lonelo la hi tsanisa. Bhiblia yi khene hambi “sikarato mwendo kuxupheka” kasi na ku “hi hambanisa ni lirando la . . . Kristu.”​—Varoma 8:35, 38, 39.

⁹ Mbimo yimwani hi manana ni sikarato asi si hi thelako dikhodho mwendo si hi tekela litsako ka mthumo wa Jehovha. Kambe hi txi khumbula ati Kristu a hi randisako tona, ti nga hi ninga mtamo wo tsanisela. (Lera 2 Vakorinto 5:14, 15.) Lirando la Jesu li hi maha hi navela kusimama hi hanya hi txi thumela Jehovha. Lona li nga hi vhuna ti to hi si rereki hambi hi txi manana ni tiphango, kuxaniswa, kuthelwa tingana ni kuvilela.

TI LAVA HI RANDA VANATHU

10, 11. I mani wu a fanelako kuaka vanathu va va ku ni dikhodho? Txhamusela.

¹⁰ Jehovha a tshumela e thumisa dibanza ti to e hi aka ngu lirando lakwe. Ngako hi txi randa vanathu, hi kombisa to ha mu randa Jehovha. Hi zama kuvhuna vanathu ti to ve wona to va ni lisima ka Jehovha ni ku wa vadhunda. (1 Johani 4:19-21) Mpostoli Paulo a ti khene: “Thavelelanani mi txi akisana, nga tona ti mi mahisako tona ni konkuwa.” (1 Vatesalonika 5:11) Hi nga thuka hi alakanya ti to eto ti nga mahwa ngu madhota dwe, kambe hi nga ditshuri. Hotshethu hi nga etetela Jehovha ni Jesu ngu kutsanisa vathu.​—Lera Varoma 15:1, 2.

¹¹ Vanathu vamwani va ni txikarato txa hombe ngu mhaka yo pimisa ngutu ni kuvilela aha ko za ti lava ve ya ni sibhejela. (Luka 5:31) Madhota ni vamwani dibanzani, va tiziva to hambiku i si ngako vadhokodhela, txivhuno ni kuthavelela kwawe nga lisima ngutu. Votshe dibanzani va nga ‘tsanisa ava va ku ni dizowa, ve vhuna ava va ku ni dikhodho, ve va ni kuhonisela ka votshe.’ (1 Vatesalonika 5:14) Hi lava kuzama kupfisisa ati vanathu va tipfisako tona. Ti lava hi va laphisela mbilu ni kuwomba-womba ngu nzila yi yi no va tsanisa ngako va di ni dikhodho. Ina awe wa zama kutsanisa vamwani? U nga maha txani ti to u va tsanisa kwati vanathu?

12. Mwanathu mmwani a vhunisilwe kutxani ngu lirando la vanathu?

¹² Mwanathu mmwani wa txisikati wa Europa a khene: “Mbimo yimwani ni navela ni ku tisunga, kambe vanathu va ni vhuna. Vanathu va dibanzani va ni hanyisile. Vanathu va ni randa ni ku ni tsanisa. Hambiko i si nga votshe va ti zivako ti to na lwala ngu kupimisa ngutu, mbimo yotshe vanathu va ti ninga mbimo yo ni vhuna. Mpatwa wumwani ni wu wona i di vaveleki vangu va moya, vona va ni xayisa ni ku va zumba hafuhi ni nani mbimo yotshe.” Ditshuri ti to votshe kha va na kuvhuna ngu nzila yi yi fanako. Hambiketo, hotshethu hi nga sikota kumaha to kari ti to hi vhuna vanathu.b (Wona txhamuselo ya hahatshi.)

HI NGA AKISA KUTXANI VAMWANI NGU LIRANDO?

13. Hi fanete hi maha txani ti to hi tsanisa vamwani?

¹³ Engisela kha kwati. (Jakobe 1:19) Kuengisela ngu mbilu ti kombisa lirando. Wotisa siwotiso sa sinene asi si no kuvhuna kupfisisa kwati matipfelo a mwanathu. Ene a na ti wona ti to wa kahatala ngu ditshuri, ngu kuwona khohe yako. Mbimo yi a womba-wombako, timisela ni ku mleka e tiphofula, u nga mu malati. U txi engisela kha kwati, u na wona nzila yi a ti pfako ngu yona ni ku u nga maha ti to e ku themba. Se, mbimo yi u duketako ku mu vhuna ti na mu hehukela nene kuengisa ti u no womba. Ngako u txi khatala ngu vamwani, u na va tsanisa.

14. Ngu kutxani hi sa fanela kusola-sola vamwani?

¹⁴ U nga sola-soli. Ngako hi txi sola-sola m’thu wu a nga rereka ngu sikarato, a na tipfa i si nga wa txilo. Se ti na karata ku hi m’vhuna. “Vaho vo kari mapswi awe ma ku nga tshoka ya ditxhari, aniko mawombawombelo a txhari mbutomi.” (Mavingu 12:18) Kha hi na kuwomba mapswi o thola kha kwenye ka m’thu wu a ku ni dikhodho. Kambe ngako hi txi womba-womba hi sa pimisa hi nga m’pandisa mbilu. Ti to hi tsanisa mwanathu, hi fanete hi m’komba ngu ditshuri to hi zama kupfisisa txiemo txakwe.​—Matewu 7:12.

15. Hi nga thumisa txani ti to hi kota kuthavelela vanathu?

¹⁵ Tsanisa vamwani ngu Bhiblia. (Lera Varoma 15:4, 5, NM.) Bhiblia yi ta ngu ka “Txizimu atxi txi ningako kutsanisela ni thavelelo,” se kha ti xamalisi hi txi thavelelwa ngu mapswi a yona. Hi tshumela hi va ni Índice das Publicações da Torre de Vigia ni Guia de Pesquisa para Testemunhas de Jeová. Ka mabhuku onewo hi nga mana mibhalo ni mabhuku aya hi nga ma thumisako ti to hi thavelela ni kutsanisa vanathu.

16. Ti to hi tsanisa ava va ku ni dikhodho da mialakanyo hi fanete hi va vathu vo zumbisa kutxani?

¹⁶ Vana ni wumbilu ni txingana. Jehovha i “Tate wa wumbilu, Txizimu txa kotshe kuthavelela,” ni ku a ni “wumbilu wa hombe” ka malanda akwe. (Lera 2 Vakorinto 1:3-6; Luka 1:78; Varoma 15:13) Paulo a hi vekete txikombiso txa txinene ka mhaka yiya nguko a ti tekelela Jehovha. Ene a ti khene: “Aniko hi ti mahile nga sivananana hagari kwanu, mwendo kufana ni mame wu a mamisako vanana va a nga va valeka. Ngu ha kufanako, nanathu kota nga ti hi nga ti mi dhunda, hi xuvile kuabana ni nanu i si nga dipswi da Evhangeli ya Txizimu, dokha, aniko hambi ni wona wutomi hi ti ti lava ku wu ningela ngu kota yanu, nguko anu mi vo randeka ngutu kwathu.” (1 Vatesalonika 2:7, 8) Ngako hi di ni wumbilu kufana ni Jehovha, hi na va hi di xamulo ya mikombelo yawe yo lava kutsaniswa!

17. Ngu yahi mawonelo hi fanelako hi va nawo ti to hi tsanisa vanathu?

¹⁷ U nga rinzeli ti to vanathu ve va vo hetiseka. Vana ni mawonelo a manene. Ngako u txi emela ti to vanathu va nga phazami, u na karateka mapimo. (Ekleziyaste 7:21, 22) Khumbula ti to Jehovha, wa tiziva ti to mbimo yimwani ha phazama. Kambe ti lava hi timiselelana. (Vaefesu 4:2, 32) Kha hi lavi kumaha ti to vanathu ve tipfa va txi maha ta tidotho mwendo ku va dinganisa ni vamwani. Hahanze keto, ha va tsanisa vanathu ni ku va komba ta tinene ati va ti mahako. Atiya ti nga va vhuna kumana litsako va txi thumela Jehovha.​—Vagalatiya 6:4.

18. Ngu kutxani ti txi lava hi akisana ngu lirando?

¹⁸ Otshe malanda a Jehovha nga lisima kwakwe ni Jesu. (Vagalatiya 2:20) Vanathu ha va randa ngutu, se ti lava hi va ñola kha kwati. Athu “he xoteni kumaha ati ti vangako kudikha ni ti ti hi akako amu ka likholo.” (Varoma 14:19) Hi wu emete wutomi wa Paradhise, mbimo yi hotshethu hi no mbi va ni txivangelo txo va ni dikhodho! Kha ku na mbi va ni malwati kambe mwendo tiyimbi. Txigoho txi na mbi ngadi txi daya vathu, kha ku na mbi va ni kuxaniswa, sikarato sa mwaya mwendo sikarato sa wutomi. Ngu magwito ka 1000 wa malembe, vathu votshe va na va vo hetiseka. Votshe va va no thembeka ka txiduko txo gwitisa, Txizimu txi na va maha vanana va txona ha mafuni ni ku va nava ni “wudhumo wa vanana va Txizimu.” (Varoma 8:21) Hi tsakela ti to hotshethu hi kombisa lirando li li akako ni kuvhunana ti to hi huluka kasiku hi bela ka mafu a maphya a Txizimu o tsakisa.