Mareferensiya a txibhukwana txa mitshangano ya Mahanyelo a Wukristu

1-7 KA JULHO

TITHOMBA TA MU KA DIPSWI DA TXIZIMU | VAKOLOSA 1-4

‘Xivilani m’thu wa kale mi ambala wamphya’

w11 15/3 10 ¶12-13

Amukelani moya wa Txizimu i si nga wa mafu

Mahanyelo a mina ma kombisa moya wuhi? (Lera Vakolosa 3:8-10, 13.) Moya wa mafu wu kuzetela mahanyelo a nyama. (Vag. 5:19-21) Mbimo yi ti hi tsimbilelako kwati kha ti nge woneki to hi kuzetelwa ngu moya wuhi, kambe ti woneka ngako ti si tsimbili kwati, ngu txikombiso, mbimo yi mwanathu a si hi ningiko engiso, atxi hi henyisa mwendo hambi a txi hi onhela. Hahanze keto, mtini kwako ti nga woneka to ngu wuhi moya wu wu ku kuzetelako. Ngu toneto ti nga lava u ti xolisisa. Ti wotisi tiya: ‘Ka mtxhanu wa mitxima ni wumwewo yi yi nga pinda, ina ni txhukwatisile mahanyelo a mina a Wukristu, mwendo ni lekile mawomba-wombelo a nzambwa?’

Moya wa Txizimu wu nga hi vhuna ti to hi ‘xivila m’thu wa kale ni hanyelo yakwe,’ se hi ambala “m’thu wamphya.” Eto ti na hi vhuna ti to hi va ni lirando hi tshumela hi va ni wunene. Hi nga divalelana ngu kutitsakela hambi ti txi woneka nga va hi onhete. Kha hi na mbi tshuka hi angula ngu ‘kuhenya mwendo mabava ni txitsikive mwemdo kuruka’ mbimo yi ti wonekako nga hi to vhukwa. Hahanze keto hi na tikaratela kuva “vavanene.”—Vaef. 4:31, 32.

w13 15/9 21 ¶18-19

Ina u hundutwe?

Ti to Dipswi da Txizimu di veka mihando kwathu hi fanete kulera ni kugonda Bhiblia ditshiku ni ditshiku, kambe eto ova makhato. Vathu vo tala va lera Bhiblia mbimo yimwani, ngu toneto va mana wuzivi wo kari wa Bhiblia. Ti nga maha u txi khala kumana vathu vo nga toneto u di thembweni. Vamwani va ziva mibhalo yo kari ngu msungo. Kambe ti nga maha ati va tizivako ti si va gwesi ka wutomi wawe. Ngu kutxani? Nguko ti to Bhiblia yi hundula m’thu yi veka mihando, m’thu eneyo a fanete kuleka Bhiblia yi bela ka mbilu yakwe. (Vag. 6:6) Ngu toneto hi fanete kuheta mbimo hi txi alakanyisisa ngu ti hi nga tigonda. Se ti ndi nava tinene kutiwotisa tiya: ‘Ina na tumela to tigondo tiya hi nga ta wukhongeli basi? Ina kha ni se kholwiseka to atiya ditshuri? Ina na maha mizamo yo thumisa ati ni ti gondako, i si nga kutiwona basi kota tigondo ti ti fanelako kugondiswa vamwani? Ina na tiwona to Jehovha a womba-womba ni nani ngu kukongoma? Kualakanyisisa ngu siwotiso siya ti nga hi vhuna ti to hi engetela matipfelo athu ngu Jehovha. Mbimo yoneyo, lirando lathu ngu Jehovha li na kula. Mbimo yi mbilu yathu yi gwesekako hi na wona mihando ya yinene.—Mav. 4:23; Luka 6:45.

Kulera ni kualakanyisisa ngu Dipswi da Txizimu mbimo yotshe, ti nga hi vhuna ti to hi simama hi maha ati se hi nga ti maha: ‘Kuxivila m’thu wa kale ni hanyelo yakwe, hi ambala m’thu wamphya, awuwa se a kulako ka wona wuphyewo.’ (Vakl. 3:9, 10) Ngu ditshuri hi na simama hi katekiswa ngutu mbimo yi hi yako hi pfa Dipswi da Txizimu di txi gwesa mbilu yathu. Se hi na kota kuwona m’thu wamphya a txi hi vhikela ka marindi a Sathani.

Lavetela tithomba ta moya

it-2 169 ¶3-5

Mfumo wa Txizimu

“Mfumoni ka Mwanana wakwe wo randeka.” Ngu Pentekoste ya 33 CE msana ka digumi da masiku Jesu a di tsute nzumani, vagondiswa vakwe va ve ni txikombiso txa ti to Jesu ati “guletilwe ngu diwoko da txinene da Txizimu” mbimo yi ene a nga va txhululela moya wo sawuleka. (Mith 1:8, 9; 2:1-4, 29-33) “Txitumelelano txa txiphya” txi khatile kuthuma kwawe, se vona va ve ditshina da “mfumo wo sawuleka,” i ku Israyele wa moya.—Vaheb 12:22-24; 1 Ped 2:9, 10; Vag 6:16.

Jesu a ti khalahatshile ka diwoko da txinene da Tate wakwe kota Msungo wa Dibanza diya. (Vaef 5:23; Vaheb 1:3; Vaf 2:9-11) Mibhalo yi kombisa ti to kukhukhela ngu Pentekoste ya 33 EC kusimekilwe mfumo wa moya txitimwi ka vagondiswa vakwe. Mbimo yi Paulo a nga bhalela Makristu a Vakolosa a dilembe dizana do khata, a wombile to Jesu se a ni mfumo: ‘[Txizimu] txi hi ponisile ka txidema, txi txi hi rurisa hi txi ya mfumoni ka Mwanana wa txona wo randeka.’—Vakl 1:13; fananisa ni Mith 17:6, 7.

Kukhukhela ngu Pentekoste ya 33 CE, mfumo wa Kristu mbwa moya, wu fuma Israyeli wa moya, i ku Makristu aya ma nga sawulwa ngu moya wo sawuleka ti to me va vanana va moya va Txizimu. (Joh 3:3, 5, 6) Mbimo yi Makristu ya ma nga sawulwa ngu moya wo sawuleka ma no mana hakelo khe nzumani, kha ma nambi fumwa kambe ha mafuni ngu mfumo wa moya wa Kristu, kambe va nava vakoma kumweko ni Kristu khe nzumani.—Mtu 5:9, 10.

w08 15/8 28 ¶9

Timhaka ta hombe ta Mapapilo a Vagalatiya, Vaefesu, Vafilipiya ni Vakolosa

2:8—Nji txani “siheno sa vathu ni mtumbuluko wa mafu” asi Paulo a nga hi kuzeta ku si vayilela? Asiya nzilo si si wumbako mafu a Sathani, i ku silo sa makhato mwendo matshina ya ma ma kuzetako mwendo ku ma kongomisa. (1 Joh 2:16) Kupatwa Tifilozofiya, kudhunda tithomba ni wukhongeli wa makuhu wa mafu awa.

8-14 KA JULHO

TITHOMBA TA MU KA DIPSWI DA TXIZIMU | 1 VATESALONIKA 1-5

“Ngu toneto thavelelanani mi txi akisana”

w11 15/6 26 ¶12

“Mi txi vekela txithavo avale va mi khutalelako ngu mikaralo hagari kwanu”

“Kuxayisa tatinene” dibanza kha ti wombi kugondisa basi. Dipswi dona diya da dimwedo di thumisilwe ka 1 Timoti 3:4. Paulo a wombile ti to muwoneleli “ku laveka a txi ziva kuxayisa tatinene m’ti wakwe apune, a txi ziva kugondisa vanana vakwe kuengisa ngu fanelo yi yi lavekako.” Ahawa dipswi di di ku “kuxayisa tatinene” kha di wombi kugondisa vanana dwe, kambe di pata kuthangela mwaya ni kuva ni ‘vanana va va engisako ngu fanelo yi yi lavekako.’ Ngu ditshuri madhota ma thangela dibanza, me vhuna votshe ti to ve engisa Jehovha.—1 Tim. 3:5.

w11 15/6 28 ¶19

“Mi txi vekela txithavo avale va mi khutalelako ngu mikaralo hagari kwanu”

U nga maha txani ngako u txo amukela ningo yi yi nga mahelwa awe ngu kukongoma? Ina khu nge kombisi kubonga ngu ku yi thumisa? “Tiningo ti i ku vathu” hi to nigwa ngu Jehovha ngu kuthumisa Jesu Kristu. Yimweyo ya tinzila ati u nga kombisako ngu tona kubonga tiningo tiya, ngu engisela khakwati ati madhota ma hi gelako ni kuduketa ku ti thumisa. U nga tshumela u kombisa kubonga kwako ngu kuningela tixamulo ti ti pfisisekako u di mitshanganoni. Seketela mthumo wu madhota ma wu thangelako, wo fana ni mthumo wa thembwe. Ngako u di vhunekile ngu txialakanyiso atxi didhota do kari di nga kuninga, di bonge. I si ngeto dwe, bonga siro sa mwaya wa madhota. U nga divale ti to siro sa mwaya wa didhota sa ti tona mbimo yo zumba nado ti to di kota kutikaratela kuvhuna dibanza.

w17.10 10 ¶13

Kombisa lirando “ngu mithumo ni ditshuri”

Vhuna ava va ku ni dikhodho. Bhiblia yi hi gela tiya: “Vhunani ava va ku ni dikhodho, mi va ni kuhonisela ka votshe” hi txi maha toneto lirando lathu nda ditshuri. (1 Vat. 5:14) Ti nga maha mwanathu wu a nga ti ni dikhodho e gwita e va ni likholo lo tsana. Kambe ka vamwani ti nga teka mbimo yo lapha, ngu toneto kha ti hehuki kuvhuna mwanathu wu a ku ni dikhodho. Se hi nga va vhunisa ku txani? Hi nga thumisa Bhiblia ti to hi va tsanisa, hi nga varamba ku ya navo kutxumayelani ni ku ti ninga mkama wo va engisela kwati va txi tiphofula. Kambe kha ha fanela kulamula ti to mwanathu awuwa a “tsani” kasi wule “a ni dikhodho.” Ditshuri ngu ti to hotshethu hi ni ha hi nga tsana kona ni ha hi tandekako. Hambi mpostoli Paulo a wombile ti to ku ni ha a nga ti tandeka. (2 Vak. 12:9, 10) Hotshethu ti lava hi vhunana ni kutsaniselana.

w15 15/2 9 ¶16

Etetela kutiveka hahatshi ni wumbilu wa Jesu

Mapswi athu a wumbilu. Wumbilu wu hi ku nawo ngu vamwani wu nga hi susumetela ‘kutsanisa ava va ku ni dikhodho.’ (1 Vat. 5:14) Ngu tihi ti hi nga ti wombako ti to hi tsanisa vathu vonevo? Hi nga va tsanisa ngu ku va komba ati hi khatalisako tona ngu vona. Hi nga va ndunduzela ti txi huma mbiluni ti to hi va vhuna ve wona tifanelo ni wusikoti wawe. Hi nga va khumbutisa ti to Jehovha a va dhani kwakwe ni ka Mwanana wakwe ngu ku i ku va lisima masoni kwakwe. (Joh. 6:44) Hi nga va tsanisekisa ti to Jehovha wa khatala ngutu ngu malanda akwe aya ma “ku kupandisekani ka mbilu” mwendo ma ‘si swiko ma di ni kuthemba.’ (Mas. 34:18) Mapswi athu a wumbilu ma nga hanyisa ava va lavako kutsaniswa.—Mav. 16:24.

Lavetela tithomba ta moya

it-1 863-864

Wugango

Wugango txionho txi txi nga mahako ti to awu a nga wu maha e thaviswa ka dibanza da Wukristu. (1 Vak 5:9-13; Vaheb 12:15, 16) Paulo a wombile ti to Mkristu wu a mahako wugango a onhela mmidi wakwe, ngu kuthumisa siro sakwe sa limbewu ngu nzila yo biha. A dayisa wumoya wakwe ngu tinzila to tala, a nyetisa dibanza da Txizimu, e tshumela e tiveka ka phango yo mana malwati ya ma tshapelanako ngu timhaka ta mataho. (1 Vak 6:18, 19) A honyola fanelo yi vanathu va ku nayo (1 Vat 4:3-7) 1) ngu kuthela nzambwa, tingana, wupumbu ni txiruko dibanzani (Vaheb 12:15, 16), 2) ngu kuvhalela m’thu wu a nga maha nayo wugango ka txiemo txa mahanyelo o basa, se i di ti to kha se belela wukati, a m’vhalela ku e txhadha a di basile, 3) ngu kuvhalela mwaya wakwe ka nduma ya mahanyelo a manene ni 4) ku tisela phango ka vaveleki va wu a nga maha nayo wugango ni ka mwamna mwendo ka m’thu wu a lavako kutxhadha ni wu a nga maha nayo wugango. Ene kha henyisi vathu ava mbimo yimwani va si ti woniko ti di bihile toneto, kambe a henyisa Txizimu, atxi txi no m’tsayisa ngu mhaka ya txionho txi a nga txi maha.—1 Vat 4:8.

w15 15/7 18-19 ¶14-15

“Ku hafuhi kuhanyiswa kwanu.”

Ku na maheka txani mbimo yi Goge wa Magoge a no va a di khatile kuxasela vathu va Txizimu? Dibhuku da Matewu ni da Marku ma womba tximahakalo tximwetxo: “[Mwanana wa M’thu] a na rumela tingelozi takwe, ti txi tshanganisa votshe vale va nga sawulwa, va otshe matshelo a mune, kukhukhela magemetamitshi ka mafu kala magemetamitshi ka nzuma.” (Marku 13:27; Mat. 24:31) Kutshanganisa kuwa kha kuwombi kutshanganiswa ko khata ka vasawuleki; nem kha ku wombi kusengeletwa ko gwitisa ka vasawuleki ava va no tava va di ngadi ha mafuni. (Mat. 13:37, 38) Kusengeleta kuwa kumaheka ku si se khata xanisa ya hombe. (Mtu. 7:1-4) Se nji txani kutshanganisa aku Jesu a nga womba-womba ngu kona? I mbimo yi ava va 144.000 a va va ku ngadi ha mafuni va no amukela hakelo yawe nzumani. (1 Vat. 4:15-17; Mtu. 14:1) Tximahakalo txonetxo txi na maheka mbimo yi Goge wa Magoge a no va a di khatile kuxasela. (Eze. 38:11) Se mapswi awa a Jesu ma na va ma di hetisekile: “Se valulami va na phatima nga ditambo Mfumoni ka Tate wawe”.—Mat. 13:43.

Ina atiya ti lava kuwomba ti to vasawuleki va na ta “gulwa”? Wukhongeli wo tala wa makuhu wu womba ti to Makristu ma na ta gulwa me tsula nzumani ni mimidi yawe ya nyama. Wu tshumela wu womba ti to msana keto Kristu a na ta ngu mmidi wa nyama e ta fuma ha mafuni. Kuhambana nito Bhiblia yi tiveka hakubasani ti to txikombiso txa “Mwanana wa M’thu” txi na humelela nzumani se Jesu a na ta “a di txitimwi ka marefu a nzumani.” (Mat. 24:30) Otshe mawombelo awa a mambidi ma kombisa kwa mbi woneka. Ku engetela konaho, “mmidi ni mnoha kha si na mbi dya thomba ya Mfumo wa Txizimu.” Se a va va no gulwa ve ya nzumani, kukhata va fanete ku “hinduluswa txiemo ngu txikhatianyana txo fana ni kuphanima ka diso, ngu kuvetwa ka mpundu wo gwitisa.” (Lera 1 Vakorinto 15:50-53.) Se vasawuleki ava va no tava va txi hanya va na ta sengeletwa ngu mbimwanyana.

15-21 KA JULHO

TITHOMBA TA MU KA DIPSWI DA TXIZIMU | 2 VATESALONIKA 1-3

“Kuwonekiswa ka m’bihi ha kubasani”

it-1 972-973

Wukhongeli

Ahawa ku ni msisalo wumwani, awu wu nga hambana ngutu ni “msisalo” wo sawuleka wa Jehovha. Wona msisalo wa “m’bihi.” I ti msisalo ka Makristu a ditshuri nguko ka mbimo ya mpostoli Paulo, “m’bihi” a ti si se va ka mtxawa wo kari a ha ti kotekako ku mu wona. Hambi mbimo yi a ndi nova ka mtxawa wo kari, mithumo yakwe yi ndi na simama yi va msisalo ka vathu vo tala nguko wubihi wakwe wu ndi na xengisa wu txi nga mithumo ya wukhongeli. Wona wu ndi na va wukanganyisi ka wukhongeli wa ditshuri. Paulo a wombile ti to “mithumo ya wubihi ayi yi nga sisala” yi ti tiho ka masiku akwe, nguko ku ti ni mkuzetelo wo biha ka dibanza da Wukristu, ayi ngu magwito yi ndi no vanga mtxawa wa makristu a makuhu. Ngu magwito wubihi wuwa wu ndi na ta gumiswa ngu Jesu Kristu ka txikombiso txa kuta kwakwe. “M’bihi” awu a kongomiswako ngu Sathani, i ku makristu a makuhu a ni mtamu “ka votshe vale va tigelako to ‘nzizimu’ mwendo silo si si fanelwako kukhozelwa” (Gr., seʹba·sma). Ngu toneto mkaneti wuwa wa hombe wa Txizimu, kota txithumiswa txa Sathani a ndi na va mxengeteli wa hombe ni kutisela kuloviswa ka vale va etetelako simaho sakwe. “M’bihi” a humelela nguko wubihi wakwe wu fenegetwako ngu wukhongeli wa makuhu awu wu tikombako nga mbwa ditshuri.—2 Vat 2:3-12; fananisa ni Mat 7:15, 21-23.

it-2 245 ¶7

Makuhu

Jehovha wa tumelela “mithumo yo biha” ya avale va nga ti womba makuhu, “ti to ve tumela ta makuhu” i si nga mahungu a manene mayelana ni Jesu Kristu. (2 Vat 2:9-12) Mhaka yiya yi kombiswa kwati ka ti ti nga maheka kale ka mhaka ya Akabhe a wu i nga ti Mkoma wa Vaisrayeli. Vaprofeti va makuhu va tsanisekisile Akabhe ti to a ndi na ya xula ka yimbi yakwe ni Ramoti-Gileyadhi, kambe Mikaya mprofeti wa Jehovha a ti womba ti to a ndi na ya xulwa. Nga ha ti nga kombiswa ngu kona ka m’woniso wa Mikaya, Jehovha a tumelete txiwumbiwa txakwe txa moya ti to txi va “moya wa makuhu” ka txisofu txa vaprofeti va Akabhe. Ati ti wombako ti to txiwumbiwa txiya txa moya txi thumisile mtamo wa txona ka vaprofeti ti to va si wombi ditshuri, kambe ve womba ati vona va nga ti lava kuwomba ni ti Akabhe a nga ti lava kutipfa. Hambi ku Akabhe se a nga ti txharihisilwe, a sawute kuengisa makuhu awe se a nigete ngu wutomi wakwe.—1 Vafu 22:1-38; 2 Mak 18.

Lavetela tithomba ta moya

it-1 834-¶5

Mndilo

Pedro a bhate tiya: “Nzuma ni mafu sa konakuwa, si veketilwe ngu dona Dipswi, si txi rinzela mndilo.” Ngu kuya ngu tindimana timwani ta pfisiseka ti to kha ku wombwi mndilo wa txiviri ti womba kuloviswa da magwito. Kufana ni Ndambi ya masiku a Nowa yi nga mbi lovisa nzuma ni mafu sa txiviri, kambe yi nga lovisa vathu va vo mbi na wukhongeli, ni kuwoneka ka Jesu Kristu ni tingelozi takwe ta mtamu va di ha mdhikilani ka mndilo, ti womba kuloviswa da magwito ka wubihi ni matsimbitiselo awa o biha a sa mafu aya i ku txienge txa wona.—2 Ped 3:5-7, 10-13; 2 Vat 1:6-10; fananisa ni Isa 66:15, 16, 22, 24.

it-1 1206 ¶4

Wuprofeti

“Dipswi da wuprofeti”—Wa ditshuri ni wa makuhu. Dipswi da Txigriki di di ku pneú·ma (moya) di thumisilwe ngu nzila yo sawuleka ka mibhalo ya vapostoli. Ngu txikombiso ka 2 Vatesalonika 2:2, Paulo a gete Makristu kulowe a Tesalonika ti to ma si jikiswi ka ti ma ti tumelako ku ngava “ngu dipswi da wuprofeti [ngu kukongoma i ku ‘moya’], hambi ngu mawombelo mamwane, mwendo dipswi di di ku nga di ta ngu kwathu, asi si ndino mi ninga kukholwa ti to ditshiku da Mkoma di hokile.” Ti hakubasani ti to Paulo a thumisile dipswi, pneú·ma (moya) kuyelanisa ni txhamuselo ya “mawombawombelo” mwendo ngu dipapilo. “Ngu toneto, Comentário Sobre as Escrituras Sagradas, de Lange (p. 126), yi womba tiya ngu ndimana yiya: Ngu kona ha ka tiya Mpostoli a junyatisa wonelo ya moya, ngu kuwomba wuprofeti ni mapswi aya ma nga wombwa.” (Ti hunduluxetwe ngu P. Schaff, 1976) A obra de Vincent, Estudos de Palavras do Novo Testamento yi womba tiya: “Ngu moya. Ngu mapswi a wuprofeti ya m’thu ni m’thu ka mtshangano wa Wukristu, awu a nga ti tsanisekisa ti to a ti ni mtamu wo womba mapswi ya matako ngu ka sizimu.” (1957, Vol. IV, p. 63) Ngu toneto, wuhunduluxeli wumwani wu hunduluxelako dipswi, pneú·ma ka mhaka yiya ni ka yimwani yi yi fanako, di va “moya”, kasi wuhunduluxeli wumwani wu khona i “dipswi da Moya” (AT), “mwoniso” (JB), “wuprofeti” (D’Ostervald; Segond [Francês]); “dipswi da wuprofeti” (Bhiblia yo Sawuleka).

22-28 KA JULHO

TITHOMBA TA MU KA DIPSWI DA TXIZIMU | 1 TIMOTI 1-3

“Lwela kumaha mthumo wa wunene”

w16.08 21 ¶3

Ina wa txi woma txilaveko txo kula ngu didhawa da moya?

Lera 1 Timoti 3:1. Dipswi da Txigriki adi di ku “lwela” di womba ku tikaratela kumana txo maha, kutilava njomaha txi txi kulumbako. Ngu kuthumisa dipswi edo, mpostoli Paulo a wombile ti to ti lava kutikarata ti to m’thu e kula ngu didhawa da moya. Alakanya ngu mwanathu wu a lavako kuva dilanda da wuthumeli. Ene wa tiziva ti to ti lava e tikarata ni kusakulela tifanelo ta moya ti to e thuma kota dilanda da wuthumeli. Ngako se a txi thuma kota dilanda da wuthumeli, ti lava e simama e tikaratela kukombisa tifanelo ti ti lavekako ti to e thuma kota didhota.

km 9/78 4 ¶7

A va va manako ‘txhatxhazelo ya txikhunja txa kuxonipheka’

Ta hehuka kuwona ti to ngu kutxani Paulo a di wombile ti to ‘va mana txhatxhazelo ya txikhunja txa kuxonipheka.’ Atiya hi nga mawonelo mwendo kuva ni txikhunja ka txhetxhe yo kari. Kuhambana nito, malanda a wuthumeli aya ma “thumako tatinene” ma tsaniseka ti to ma na katekiswa ngu Jehovha ni Jesu, me tshumela me xoniphwa ni kuseketelwa ngu dibanza dotshe. Ngu ditshuri ona ma mana “kutsaniswa ka hombe ka likholo ka Jesu Kristu.” Ngu kuthembeka ka txiemo txa ona, mthumo wa ona wa wunene wa tsakelwa; ona ma va ni likhlolo lo tsana ni ku ma nga womba-womba ngu likholo la ona ma di tsani ma si na tingana mwendo kuthava kukoneka.

Lavetela tithomba ta moya

it-1 914-915

Sibongo

Ku si na txivangelo txo heta mbimo ngu kugonda ni kulondisela sibongo, ngutu-ngutu ka masiku aya Paulo a nga bhalela Timoti ngu ona. Ti si swi ti sunga kuveketa mxaxamelo wa sibongo awu wu ndi no kombisa lixaka li m’thu a humelako ka lona, nguko Txizimu txi si swi txi hambanisa Majudha ni Magriki ka dibanza da Wukristu. (Vag 3:28) Ni ku mxaxamelo wa sibongo se wu ti tsanisekisile a mu Kristu a humelako kona ngu kona ha ka mxaxamelo wa lixaka la Dhavhidha. Kambe wu si na ku ngadi wu thuma msana ka ku va Paulo a di bhate txialakanyiso txiya, nguko Jerusalema a ndi na loviswa ni otshe mabhuku a Vajudha. Txizimu txi si na ku yi vekisa. Ngu toneto ti txi m’vilelisa Paulo ti to Timoti kumweko ni dibanza ve heta mbimo ngu kumaha wuxolisisi ni kukanetisana ngu timhaka ta lixaka li m’thu a humako ka lona, nguko ti si na txivhuno ka likholo la Makristu. Mxaxamelo wa tixaka wa mu ka Bhiblia se wu ti enete ti to wu kombisa kusawulwa ka Kristu kota Mesiya, i ku sibongo si i nga ti sa lisima ka Makristu. Mixaxamelo yimwani ya sibongo ayi yi nga bhalwa ka Bhiblia, yi maha wufakazi wo tsana wa mibhalo ya Bhiblia, ngu kukombisa ti to yona yi ni matimu a ditshuri.

cl 12 ¶15

“Wonani Txizimu txathu”!

Txithopo tximwani a txi txi thumiselwako Jehovha dwe ngu txi txi ku: “Mkoma wa totshe timbimo”. (1 Timoti 1:17; Mtuletelo 15:3) Ti lava kuwomba txani toneto? Ta karata kwathu kutipfisisa aku mialakanyo yathu yi nga koma, kambe Jehovha mbwa ha ku si gwitiko ngu madhawa otshe; ku ngava mbimo yi yi nga pinda mwendo yi yi tako. Dibhuku da Masalmo 90:2 di womba tiya: “Kukhukhela kale, kala kupiduka, awe u Txizimu!” Ngu toneto, Jehovha kha nga va ni makhato; ni ku mbimo yotshe a ti tiho. Ene ta m’fanela ku dhanwa “Didhota da kale” nguko mbimo yotshe a ti tiho nem ku si se vangwa m’thu mwendo txilo tximwani mbimo yi wuako wu nga vangwa! (Dhaniyeli 7:9, 13, 22) I mani wu a nga kana-kanako fanelo yakwe yo va Mkoma wu a nga Guleka?

29 KA JULHO–4 KA AGOSTO

TITHOMBA TA MU KA DIPSWI DA TXIZIMU | 1 TIMOTI 4-6

“Kuthumela Jehovha mwendo tithomba”

w03 1/6 9 ¶1-2

Gonda txihunja txo ziva kutipimela

Atxi txi nga ti maha mpostoli Paulo e tipfa a di tsakile ni kueneliseka i ti kuziva kutipimela. Se ti la kuwomba txani kuziva kutipimela? Ngu mawombelo o hehuka ti la kuwomba kueneliseka ngu silo si silavekako to m’thu e hanya. Mayelana ni tiya, Paulo a bhalete Timoti awu i nga ti mthumi kulowe nayo atxi khene: “Ina, wukhongeli njisima txa dibhindu ka wu a zivako kutipimela. Nguko kha ha ta ni txilo ha mafuni, kambe kha hi na mbi teka txilo txa ha mafuni, ngako hi txi khukha. Ngu toneto, ngako hi di ni sakudya ni sakuambala, he tsakeleni soneso.”—1 Timoti 6:6-8.

Wona ti to Paulo a kombisile to kuziva kutipimela ti tsimbitisana ni wukhongeli. A ti tiziva to txisima txa litsako lathu i ti wukhongeli wathu, tiwombako to txa lisima ngu thumela Jehovha i si nga tithomba. “Sakudya ni sakuambala,” i ti si a nga ti si lava ti to e kota kuheta mbimo yakwe a txi thumela Jehovha. Ngu toneto, ka Paulo txihunja txo ziva kutipimela i ti kuthemba Jehovha ti si nga ni mhaka ni siemo si hi nga mananako naso.

g 6/07 6 ¶2

Kulava tithomba ti nga gwesa wutomi wako ngu nzila yihi?

Ditshuri ti to vathu vavangi kha vafi ngu kulava tithomba. Kambe wutomi wu nga va tutuma va si tiwoni va txi zama kuhokelela makungu o va ni tithomba. Tximwani kambe ngu ti to wutomi wawe wa txitxa wu va nemelela ngu ku jujeka msungu ngu mhaka ya kupwata mali ni kunemelwa ngu mthumo, se eto ti va maha ve pwata wukohe, ve va ni malwati o fana ni kupandwa ngutu ngu msungo mwendo malwati a didhowo, eto ta hunguta masiku a kuhanya kwawe. Hambi loko m’thu a txo tshuka e ti tumbula to ti lava e maha kutxitxa ko kari, ti nga maha ta tingi se ti di onhekile. Ti nga maha mkatakwe a si swi e m’themba, hambi mialakanyo ni dihanyo da vanana vakwe si di onhekile. Ti nga maha ti txi koteka kululamisa timwani, kambe tilava kutikarata ni mbimo. Ngu ditshuri vathu vava va “ti nemeta vapune ngu kuvilela ko tala.”—1 Timoti 6:10.

g 11/08 6 ¶4-6

Mtxhanu wa silo ni tximwetxo si ngo hi maha hi humelela

Nga ha hi nga tiwona txa txienge txi txi nga pinda, vathu va valavetelako tithomba kota khiya ya kuhumelela, ngu ditshuri va thumela mloro. Wutomi wo nga toneto kha wu tisi basi kutisola, kambe wu tisa ni sikarato. Ngu txikombiso, vathu vaheta mbimo yi va nga ti fanete kuzumba ni mwaya mwendo vangana vawe, va txi thumela tithomba. I si nga eto dwe, kuthuma kupinda mpimo, kuvilela ni kukarateka ti maha vathu ve pwata wukohe. “Wukohe wa mthumi wa tshamba, hambi a di dyite sa sidotho mwendo sa singi; aniko kukhura ka nyatithombe ka mpwatisa wukohe,” eyo mapswi a Ekleziyaste 5:12.

Hahanze ko maha m’thu txibotxhwa, male yi tshumela yi kanganyisa. Jesu a womba-wombile ngu “kukanganyiswa ngu tithomba.” (Marku 4:19) Ngu mawombelo mamwani, tithomba ti thembisa litsako kambe kha ti hetisise txithembiso txonetxo. Tona ti maha m’thu e engetela kunavela kuva nato ngutu. “Awu a dhundako male kha nambi dhuka e kolwa ngu male,” kuwomba Ekleziyaste 5:10.

Ngu mapswi a madotho, kudhunda tithomba kha ku heti sikarato, kambe kutisa kupandiseka, kutisola hambi kudayana ka vathu. (Mavingu 28:20) Asi si tisako litsako ngu va ni wuha, kudivalela, kubasa ngu didhawa da mahanyelo, lirando ni kuva ni wumoya.

Lavetela tithomba ta moya

lvs 23-24 ¶17

Kuva ni livhalo la linene masoni ka Txizimu

Pedro a bhate tiya: ‘Mi fanete kuva ni mbilu ya kululama.’ (1 Pedro 3:16) Kambe txo mbi tsakisa ngu ti to ngako m’thu a si engisi milayo ya Jehovha, ngu kutsimbila ka mbimo livhalo lakwe la fa li leka kuthuma. Paulo a wombile to livhalo lo nga toneto li to “vekwa txivango ngu simbi yo hiswa.” (1 Timoti 4:2) Kumaheka txani ngako hi txo gwesa simbi ayi yi hisako? Ngu ditshuri hi na hya. Ngako hi di hyite ngutu, didhowo di hola di sala ni txibawa, kha di na mbi pfa kupanda kambe. Ti mahisa toneto ni ka wu a hanyako ngu kumaha ta walo, livhalo lakwe ti fana ni loko li di hyite, kha liswi kambe li txi peka.

it-2 714 ¶1-2

Kulera ka hakubasani

Ka dibanza da Wukristu. Ka dilembe dizana do khata, i ti vathu vadotho va nga ti ni tikopi ta mabhuku a Bhiblia, ngu toneto kulera ka hakubasani i ti ka lisima ngutu. Mpostoli Paulo a wombili to mapapilo akwe ma ti fanete kulerwa ka mabanza a Wukristu, ni ku mabanza ya a nga ti mabhalete mapapilo ma ti fanete kuninga mabanza mamwani ti to ni ona me lera. (Vakl 4:16; 1 Vat 5:27) Paulo a kuzetile mphya Timoti awu i nga ti muwoneleli ti to a na “ti ningetele amu ka kugonda dibhuku, amu ka kulaya, amu ka kugondisa.”—1 Tim 4:13.

Kulera ka hakubasani kufanete kumahwa ngu nzila ya yinene. (Hab 2:2) Aku kulera ka hakubasani ku ku ni txikongomelo txo gondisa vamwani, awu a lerako a fanete kupfisisa kwati ati m’bhali a nga ti lava kuwomba tona, e lera kwati, e ti wonela ti to a si ningeli didungula adi i si ngako dona. Ngu kuya ngu Mtuletelo 1:3, awu a lerako ngu dipswi do guleka kumweko ni wu a engisako ni ku tivekisa va katekile.