GONDO 40
Hi nga sikotisa kutxani kuva ni mahanyelo o basa masoni ka Txizimu?
Hi nga pimisa ngu mame awu a khatalako ngu vanana vakwe a txi lulamisela txifanyana txakwe txa txidotho ti to txiya txikolwani. Ene wa m’wonisisa kasi kutsaniseka to simaha sakwe si basile ni ku a zumbisekile. Eto ndinene ka dihanyo da mwanana ni ku ti kombisa ti to vaveleki vakwe va m’xayisa. Kufana ni vaveleki va lavako ti to vanana vawe ve zumba va di basile, Jehovha Tate wathu wa lirando nene a lava ti to vathu vakwe ve zumba va di basile, ngu didhawa da nyama ni didhawa da mahanyelo. Phela kubasa ndinene kwathu ni ku ti tisa wudhumo ka Jehovha.
1. Hi nga sikotisa kutxani kuva vo basa ngu didhawa da nyama?
Jehovha a hi gela tiya: “Na nanu mahani vasawuleki.” (1 Pedro 1:16) Kasiku hiva vo sawuleka hi fanete kuva vo basa ngu didhawa da nyama ni mahanyelo. Hi nga basa ngu didhawa da nyama ngu kusamba mbimo yotshe hi kuwula siambalo sathu hi basisa nyumba yathu mmovha ni ku si zumba si di xayisekile. Hi nga tshumela hi vhuneta ka ku basisa Nyumba ya Mfumo. Ngako hi txi simama hi basa ngu didhawa da nyama hi ningela wudhumo ka Jehovha.—2 Vakorinto 6:3, 4.
2. Ngu yihi mikhuva ayi hi fanelako ku yi vayilela ti to hiva vo basa?
Bhiblia ya hi kuzeta yi txi: “He ti basiseni ka yotshe nzambwa ya mmidi ni ya moya.” (2 Vakorinto 7:1) Eto ti womba ti to hi fanete hi vayilela txihi ni txihi atxi txi nga onhako mmidi wathu mwendo mapimo athu. Hi lava ti to mapimiselo athu me tsakisa Jehovha, ngu toneto maha totshe ti hi nga tikotako ti to hi vayilela mialakanyo ya walo. (Masalmo 104:34). Ni ku hi lava ti to mawomba-wombelo athu me va a manene.—Lera Vakolosa 3:8.
Ngu tihi timwani ati ti nga hi nyetisako ngu didhawa da nyama ni da mahanyelo? Silo simwani si nga onha mmidi wathu. Ngu toneto athu kha hi dhahi hambi kuthumisa madroga. Mbimo yi hi vayilelako silo siya hi va ni dihanyo da dinene ni ku kombisa ti to ha xonipha ningo ya wutomi. Hi nga tshumela hi va vo basa ngu didhawa da mahanyelo ngu ku lwa ni simaho so biha so fana ni ku sakanisela siro sa liveleko mwendo kuxalela sithombe sa vathu ava i ku simbwiri. (Masalmo 119:37; Vaefesu 5:5) Hi nga mbimo yotshe ti nga hehukako kuxula mikhuva yoneyo kambe hi ngo si kota ngu kuvhunwa ngu Jehovha.—Lera Isaya 41:13.
ENGETELA WUZIVI WAKO
Wona nzila yi kubasa ngu didhawa da nyama ti dhumisako ngo yona Jehovha, ni ku wona nzila yi hi nga xulako ngu yona mikhuva yo biha.
3. Kubasa ngu didhawa da nyama ti dhumisa Jehovha
Hi nga pfisisa milayo ya Jehovha mayelano ni kubasa mbimo yi hi gondako ngu milayo yi a nga ti ningile va Israyeli va kale. Lera Eksodha 19:10 ni 30:17-19, mi gwita mi bhula ngu siwotiso siya:
Tindimana tiya ti kombisa ngu nzila yihi mawonelo a Jehovha mayelano ni kubasa ngu didhawa da nyama?
U nga maha txani ti to u zumba u di basile ngu didhawa da nyama?
Ti lava hi tininga mbimo mwendo kumaha mizamo ti to hi basa ngu didhawa da nyama. Hi nga maha toneto ku si na mhaka ni mu i zumbako kona, hambi hi di sisiwana mwendo hi ganyile. Xalela VHIDHIYO, mi gwita mi bhula ngu txiwotiso atxi txi londiselako.
I ngu nzila yihi kuzumba hi di basile ti nga tisako ngu yona wudhumo ka Jehovha ni ka mthumo wathu wo txhumayela?
4. Xula mikhuva ya nzambwa
Jehovha a nga hi vhuna ti to hi xula mkhuva wumwani ni wumwani wo biha
I di ti to wa dhaha mwendo kuthumisa madroga wa tiziva ti to ti karata kuhokela hayi kuxula mikhuva yoneyo yo biha. Se nji txani txi nga kuvhunako? Pimisa ngu nzila yi mikhuva yoneyo yi nga onhako ngu yona dihanyo da wena. Lera Matewu 22:37-39, mi gwita mi bhula ngu nzila yi kudhaha ni kuthumisa madroga ti nga onhako ngu yona . . .
wungana wathu ni Jehovha.
mwaya wa m’thu eneyo ni va a zumbako navo.
Ti mahele makungo o xula mikhuva yo biha.a Xalela VHIDHIYO.
Lera Vafilipiya 4:13, mi gwita mi bhula ngu txiwotiso txiya:
Kuva ni txiemiso txa mkombelo, kugonda Bhiblia ni kuxalela mitshangano ti nga m’vhunisa kutxani m’thu ti to e xula mikhuva yo biha?
5. Lwana ni mapimiselo o biha kumweko ni mikhuva yo biha
Lera Vakolosa 3:5, mi gwita mi bhula ngu siwotiso siya:
Hi tizivisa kutxani ti to kuxalela sithombe sa simbwiri ni ku sakanisela siro sa liveleko mikhuva yo biha masoni ka Jehovha?
U pimisa ti to ti nga koteka ku hi va ni mahanyelo o basa nga ha Jehovha a lavako ngu kona? Ngu kutxani?
Wona nzila yi hi nga lwisanako ngu yona ni mikhuva yo biha. Xalela VHIDHIYO.
Jesu a thumisile sikombiso kasi kukombisa ti to ti lava hi maha to kari kasi ku hi va ni mahanyelo o basa. Lera Matewu 5:29, 30, mi gwita mi bhula ngu txiwotiso txiya:
Jesu a si wombi to ti lava hi gangela sihango sathu kambe a ti womba to ti lava hi maha to kari. Ngu tihi ati m’thu a nga ti mahako kasi ku e vayilela mapimiselo o biha?b
Ngako u txi lwa ni mapimiselo o biha Jehovha wa yi ninga lisima mizamo yoneyo. Lera Masalmo 103:13, 14, mi gwita mi bhula ngu txiwotiso txiya:
Ngako ti txi kukaratela kuxula mikhuva yo biha, ndimana yiya yi nga kuvhunisa kutxani ti to u simama u lwa?
U nga karali!
Ngako m’thu a txi wa, ta hehuka ku pimisa ti to ni tandekile. Pimisa ngu tiya: ngako m’tutumi a txi thuka e humbwa e wa, kha ti wombi ti to a tandekile; ti lava e wuka e simama e tutuma. Ngu ha kufanako ngako u txo wa ka mizamo yako yo lwa ni mikhuva yo biha, kha ti wombi to u tandekile da magwito. U nga yi divali yotshe mizamo ayi u nga yi maha kala hawa. Ti tolovelekile kuwa, u nga wuka. Ngu toneto, u nga karali! Jehovha a nga kuvhuna ti to u xula mikhuva yo biha.
NGAKO VATHU VA TXI KHONA: “Ani se ni vhisiyarekile. Ni nge si koti ku leka.”
Ngu wuhi m’bhalo awu u nga wu thumisako kasi kukombisa ti to ngu kuvhunwa ngu Jehovha u nga sikota kuxula mikhuva yo biha?
ATI HI NGA TI WONA
Ngako hi txi simama hi va vo basa ka mahanyelo ni ka nzila yi hi pimisako ngu yona, hi na tsakisa Jehovha.
Ngu tihi ti u nga ti gonda
Ngu kutxani i di ta lisima kuzumba hi di basile?
U nga sikotisa kutxani kuva wo basa ngu didhawa da nyama?
U nga sikotisa kutxani kuzumba u di basile ka mialakanyo ni ka mahanyelo?
XOTA TIMWANI
Ngu tihi timwani ati u nga ti mahako ti to u simama u di basile hambi i di ti to u txisiwana?
Wona tinzila ati ti nga kuvhunako kuema kudhaha.
“Ni nga lekisa kutxani kudhaha?” (Khenjemuka! wa Maio wa 2010)
Gonda ngu wuyelo yo xalela sithombe sa vathu ava i ku simbwiri.
Wona nzila yi wamwamna wo kari a nga xula ngu yona mkhuva wo xalela sithombe sa vathu ava i ku simbwiri.
“Msana ka makhambi o tala ni txi zama ngu magwito ni xute” (Muwoneleli No. 4 2016)
a Kasi ku u mana nzila yo xula ngu yona vhisiyo yo kari, wona ka txienge atxi txi ku: Xota timwani, ka mhaka yi yi ku: “U nga lekisa kutxani kudhaha.”
b Kasi ku hi xula mikhuva yo sakanisela siro sa liveleko, wona msungo mhaka awu wu ku: “Hi nga wu xulisa kutxani mkhuva wo sakanisela siro sa liveleko?” ka dibhuku adi di ku: Siwotiso sa vaphya—Tixamulo ati ti vhunako, vholume 1, ndima 25.