Mareferensiya a txibhukwana txa mitshangano ya Mahanyelo a Wukristu
3-9 KA JUNHO
TITHOMBA TA MU KA DIPSWI DA TXIZIMU | VAGALATIYA 4-6
“‘Txidinganiso’ txi womba txani kwathu”
it-1 1018 ¶2
Hagari
Ngu kuya ngu mpostoli Paulo, Hagari wa txidiganiso a emelwa ngu ditiko da Vaisrayeli va nyama, ava va nga tshanganiswa ngu txitumelelano txa Mlayo awu wu nga khata kuthuma Mmangoni ka Sinayi, txitumelelano txonetxo txi velekile “vanana va wukhumbi.” Kota ku vathu va nga mba hetiseka, ditiko da Israyele kha da sikota ku hetisisa txitumelelano. Txitimwi ka txitumelelano txonetxo, Vaisrayeli kha va nga va vathu vo thuseka, kambe va lamutwe kota vaonhi ava va fanelwako ngu lifo; ngu toneto i ti tikhumbi. (Joh 8:34; Var 8:1-3) Jerusalema wa mbimo ya Paulo a ti fanekisela Hagari, nguko Jerusalema mzinda, awu a nga ti emelwa ngu Vaisrayeli va nyama ati maneka adi wukhumbini ni vanava vakwe. Kasi Makristu ya ma nga velekwa ngu moya mbanana va “Jerusalema wa nzumani” msikati wo fanekisela wa Txizimu. Jerusalema wu a emelwako ngu Sara wamsikati wo thuseka, kha khali kuva khumbi. Kambe kufana ni ku Isaki a nga xaniswa ngu Ismayeli, vanana va “Jerusalema wa nzumani” ava va nga khululwa ngu Mwanana, ni vona va xanisekile mawokoni ka vanana va Jerusalema wa wukhumbi. Hambi keto Hagari ni mwanana wakwe va tovetwe, a ti ti emelako ku tsukulwa ka ditiko da Vaisrayeli wa nyama ngu Jehovha.—Vag 4:21-31; wona ni Joh 8:31-40.
w14 15/10 10 ¶11
Vana ni likholo lo tsana ka Mfumo wa Txizimu
Txitumelelano txa Abrahamu txi hetisekile ngu didhawa da nyama mbimo yi liveleko la Abrahamu li nga zumba ka Ditiko da Txithembiso, kambe Mibhalo yi kombisa ti to txitumelelano txonetxo txa tshumela txi hetiseka ngu didhawa da moya. (Vag. 4:22-25) Ka kuhetiseka koneko ka hombe, nga ha a nga txhamusela ngu kona Paulo, txienge txo khata txa liveleko la Abrahamu i Kristu se txienge txa wumbidi i Makristu a 144.000 aya i ku vasawuleki. (Vag. 3:16, 29; Mtu. 5:9, 10; 14:1, 4) Wamsikati wu a nga humesa liveleko i “Jerusalema wa nzumani” i ku txienge txa nzumani txa sengeletano ya Txizimu yi yi wumbwako ngu sivangwa sa moya so thembeka. (Vag. 4:26, 31) Ngu kuya ngu txithembiso txa txitumelelano txa Abrahamu, liveleko la wamsikati li na tisa makatekwa ka vathu.
Lavetela tithomba ta moya
w09 1/4 13
Ina u ti ti ziva?
Ngu kutxani mbimo yi Jesu a nga ti khongela a di thumisile dipswi di di ku: “Abba, Tata”?
Dipswi da Txiaramayika a di di ku: ʼab·baʼʹ di nga va di txi womba “tate” mwendo ku “Tata.” Ka otshe makhambi mararu a ya di manekako mu ka Mibhalo di maha txienge txa mkombelo niku ku wombwa Jehovha Tate wa nzumani. Ngu yihi txhamuselo ya dipswi diya?
Enciclopédia Bíblica Padrão Internacional yi womba tiya: “Ka mawombawombelo a ditshiku ni ditshiku a mbimoni ya Jesu, Abba i ti diwombo da lisima ni da txithavo a di mwanana a nga ti di thumisa ka tate wakwe.” Dona di ti komba nzila ya lirando yo mwanana e womba-womba ni tate wakwe ni ku i ti dimwani da mapswi o khata aya mwanana a nga ti magondela. Jesu a thumisile dipswi diya a txi maha txikombelo txa hombe ka Tate wakwe. Ka jaradhi ya Getsemani, ku di sate maora nyana ti to Jesu e fa, a mahile mkombelo ka tate wakwe e thumisa dipswi di di ku ‘Abba!’ Tata.—Marku 14:36.
Dibhuku di di nga wombwa txitimwi di womba ti to kuthumisa dipswi “’Abbāʼ ti sa toloveleka ka mabhuko a Txijudha ka mbimo ya Vagriki ni Varoma, eto kha ti xamalisi nguko Vajudha va ti ti wona ti si na txixonipho kuwomba-womba ni Txizimu ngu kuthumisa mapswi ya ma nga toloveleka ha mwayani.” Hambi keto, “mathumiselelo . . . a Jesu a dipswi diya ka mkombelo, i ti nzila yo kombisa ti to a ti ni wungana wa hombe ni Txizimu.” Makhambi mamwani a mambidi aha ku nga thumiswa dipswi “Abba” mu ka Mibhalo a ya ngu wumbidi ka ona ma nga bhalwa ngu mpostoli Paulo, ma kombisa ti to Makristu a dilembe dizana do khata ni ona ma ti di thumisa ka mikombelo ya ona.—Varoma 8:15; Vagalatiya 4:6.
w10 1/11 15
Ina u ti ti ziva?
Mpostoli Paulo a ti womba txani mbimo yi a nga khene “nina ni timbirimbi ta silonda si ni nga si mana ngu ndava ya Jesu”?—Vagalatiya 6:17
▪ Mapswi a Paulo ti nga maha ma di pfisisilwe ngu tinzila to tala ngu vaengiseli vakwe va dilembe dizana do khata. Ngu txikombiso ka mbimo ya kale, ku ti thumiswa simbi yo hisa ti to yi veka timbirimbi ka sibotxhwa sa yimbi, ka makhamba a ditepeleni ni ka sibotxhwa si si nga tutuma. Timbirimbi toneto ka mmidi wa m’thu ti ti thela tingana.
Hambiketo hi nga mbimo yotshe timbirimbi toneto ti nga ti wonwa ngu nzila yo biha. Vathu vo tala va kale va ti ti thumisela kukombisa ti to va lumba lixaka mwendo wukhongeli wo kari. Ngu txikombiso Dicionário Teológico do Novo Testamento yi womba ti to “Vasiriya va ti ti ningetela ka sizimu sawe Hadade ni Atárgatis ngu ku ti veka timbirimbi ka mawoko ni ka mikolo . . . Ava va nga ti ti nigetete ka Dionísio va ti ni timbirimbi to nga mazokoro.”
Titxhamuselo to tala ta konkuwa, tiwomba ti to Paulo a ti womba sibawa si si nga vangwa ngu va va nga ti m’xanisa ngu mbimo ya mthumo wakwe wa Wukristu kota murumiwa. (2 Vakorinto 11:23-27) Kambe Paulo a si womba-wombi ngu sibawa sa ha mmidi, ti nga maha a txi womba ti to mahanyelo akwe ma ti mu kombisa kota Mkristu.
10-16 KA JUNHO
TITHOMBA TA MU KA DIPSWI DA TXIZIMU | VAEFESU 1-3
“Wukongomisi wa Jehovha”
it-2 837 ¶4
Makungo a kusisaleka
Mfumo wa wu Mesiya. Ka mibhalo ya Paulo hi mana mawonelo o engeteleka mayelana ni txhamuselo ya makungo a kusisala a Kristu. Ka Vaefesu 1:9-11 a womba ti to Txizimu tximaha ti to ku ziwa “makungo a kusisala” ya kunavela ka txona, atxi khene: “Kota nga ti ti nga txi tsakisa ku ti maha, ngu kale ni kale ngu ka Kristu, ati ti nga ti fanela kumaheka kutatisekani ka mbimo: Ti to txi tshanganisa mfumoni ka Kristu sotshe si si ku nzumani ni si si ku ha mafuni. Ngu ngene Kristu kambe, Txizimu nathu txi hi mahile vadyi va thomba ya txona, nga ti txi nga ti wonisa tona txona txi kotako totshe ngu mtamo wa kuranda ka txona.” “Makungu a kusisala” awa, ma pata ni Mfumo wa Txizimu wa wu Mesiya. “Sotshe si si ku nzumani” asi Paulo a si wombako, mbadyi va thomba ya Mfumo wa nzumani kumweko ni Kristu. “Si si ku ha mafuni” i nava ava a no va fuma ha mafuni. Jesu a gete valondiseli vakwe to makungo a kusisala ma ti yelana ni Mfumo, mbimo yi a nga khene: “Anu mi ningilwe kuziva misisalo ya Mfumo wa Txizimu.”—Mar 4:11.
w12 15/7 27-28 ¶3-4
Jehovha a tshanganisa mwaya wakwe
Mosi a gete Vaisrayeli a txi khene: “MKOMA, Txizimu txathu, MKOMA mmweyo dwe.” (Dhewut. 6:4) Simaho sa Jehovha ni makungu akwe sa yelana. Ngutoneto, “kutatisekani ka mbimo,” Txizimu txi mahile “ati ti nga ti fanela kumaheka” mwendo kuveka wukongomisi i ku lulamiselo yo tshanganisa sivangwa sakwe so txhariha. (Lera Vaefesu 1:8-10.) Wukongomisi wonewo wu na hetisisa siyenge simbidi. Ka txienge txo khata wukongomisi wonewo wu lulamisela vasawuleki ti to ve ya hanya nzumani kumweko ni Jesu, kota Msungu wawe wa Moya. Txienge txiya txi khatile ngu Pentekoste ya 33 EC, mbimo yi Jehovha a nga khata kutshanganisa ava va no fuma ni Kristu nzumani. (Mith. 2:1-4) Aku ngu kuya ngu txisekelo txa digandelo da mtirulo wa Kristu vasawuleki va wombwako ava va nga lulama ni va va fanelako kuamukela wutomi, vona va tiziva to va xavilwe kota “vanana va Txizimu”.—Var. 3:23, 24; 5:1; 8:15-17.
Ka txienge txa wumbidi wu lulamisela ava va engisako ti to ve ta hanya ka Paradhise hamafuni va txi fumwa ngu Mfumo wa wu Mesiya. “Dibuthu da hombe” njienge txo khata txa mtxawa wuwa. (Mtu. 7:9, 13-17; 21:1-5) Ngu mbimo ya Mfumo wa Digidhi da malembe, vona va na patana ni tibhiliyoni ta vathu va va no wuswa ka vakufa. (Mtu. 20:12, 13) Hi nga wona nzila yi kuwuka ka vakufa ku no ta hi tshanganisa ngu yona! Ngu magwito ka digidhi da malembe, “si si ku ha mafuni” i ku vathu, va na dukwa da magwito. Ava va no simama va di thembekile va na va “vanana va Txizimu.”—Var. 8:21; Mtu. 20:7, 8.
Lavetela tithomba ta moya
w13 15/2 28 ¶15
U nga leki txilo txi kutsivela kupfaliswa
Kutimisela kwathu kumaha ti ti tsakisako Jehovha ti na vhuna vamwani ti to ve pfaliswa. Paulo a bhate tiya ka dibanza da Efesu: “Ngu konaho, na mi kombela, mi si rereki ngu mhaka ya sixaniso sangu sa ku mi xuphekela, nguko kwanu, eto i mhaka ya kupfaliswa kwanu.” (Vaef. 3:13) I ti ngu nzila muni sixaniso sa Paulo i nga ti “kupfaliswa” ka Vaefesu? Kusimama ka Paulo e va thumela ti si nga ni mhaka ni sikarato si a nga ti tshangana naso ti ti kombisa to lungelo yi Vaefesu va nga ti nayo yo va Makristu i ti ya lisima ngutu a ha ko kha yi fananiswi ni txilo. I di ku Paulo a to guma mtamo ngu mhaka ya sikarato e ema mthumo wakwe, eto ti ndi na maha nga wuxaka wawe ni Jehovha, wuthumeli, ni themba yawe hi nga sa lisima. Kutimisela ka Paulo kumahile to Wukristu wu va txitimwi kutshumela ku kombisa to kuva mlondeteli ti lava ku ti tona so kari.
cl 299 ¶21
Kuziva lirando la Kristu
Dipswi da Txigriki adi di nga hunduluxelwa i va “kuziva” diwomba “kuhanya mhaka yo kari ngu kukongoma.” Mbimo yi hi kombisako lirando lo fana ni li Jesu a nga li kombisa, hi maha totshe ti hi nga tikotako ngu kulava kuvhuna vamwani, hi va divalela ngu mbilu, hi kombisa to ha ‘li ziva lirando la Kristu, i ku la hombe ngutu kupinda sotshe si hi si zivako.’ He khumbuleni ti to mbimo yi hi yako hi fana ni Kristu hi tshuketela ka wule Jesu a mu etetelako ngu kuhetiseka, i ku Jehovha Txizimu txathu txa lirando.
17-23 KA JUNHO
TITHOMBA TA MU KA DIPSWI DA TXIZIMU | VAEFESU 4-6
“Ti vhikeleni ngu matxhari a Txizimu”
Vaphya—Emani mi tsana mi lwa ni Dhiyabhulosi
MPOSTOLI Paulo a fananisile Makristu ni masotxhwa. Athu hi ni valala ava hi lwako navo! Kha hi lwi ni vathu, kambe hi lwa ni Sathani ni madhimoni. Vona va sikota kulwa, se va ni malembe o tala va txi lwa ni vathu. Se ti nga woneka nga hi na xulwa, ngutu-ngutu hi di ngadi vaphya. Ina vaphya va nga va xula valala vonevo va mtamo? Ina, futhi hambi konkuwa va xula! Ngu kutxani? Va ningwa mtamo ngu Jehovha. Kufana ni disotxhwa di di nga gonda kwati kulwa yimbi, vona va ‘tivhikela ngu matxhari a Txizimu,’ ti to ve maneka va di emekile kulwa.—Lera Vaefesu 6:10-12.
Vaphya—Emani mi tsana mi lwa ni Dhiyabhulosi
Kufana ni libhande, ditshuri adi hi di gondako a mu ka Bhiblia da hi vhikela ka tigondo ta makuhu. (Joh. 8:31, 32; 1 Joh. 4:1) Se ngako hi txi randa ngutu ditshuri da mu ka Bhiblia, ti na hi hehukela kuhanya ngu milayo ya Txizimu, mwendo kuambala “libhande” lathu. (Mas. 111:7, 8; 1 Joh. 5:3) Hi na sikota kwati kulwela ditshuri ka valala vathu ngako hi txi di pfisisa kwati.—1 Pedro 3:15.
Milayo yo lulama ya Jehovha yi nga faniswa ni txivhikelo, yona yi vhikela “mbilu” yathu, mwendo m’thu wa mndani. (Mav. 4:23) Phela disotxhwa di si na kutumela kutxitxisa txivhikelo txa dona txa simbi ngu tximwani txo mbi banga. Ngu kufana, kha hi na kutxitxa milayo ya Jehovha ngu ti athu hi ti wonako i di ta tinene. Kha hi nga nawo wutxhari wo vhikela mbilu yathu. (Mav. 3:5, 6) Ngu toneto, ti lava hi zumba hi txi xola ti to “txivhikelo” txi ngadi txi txi yi vhikela mbilu yathu kani.
Aku tikathula ta ditsotxhwa da Muroma ti nga ti di vhuna kuxula yimbi, tikathula to fanekisela ati hi ambalako ti hi vhuna “kuzivisa mahungu a manene a kudikha.” (Isaya 52:7; Var. 10:15) Hambi keto, yimwani mbimo kutxhumayela ti lava txibindi txa hombe. Roberto, wa 20 wa malembe a khene: “Ni ti thava kutxhumayela vagondi kulothi. Ni alakanya ti to ni si ti zivi ku na khatisa kutxani. Kambe, ni txi wona msana, kha ni tipfisisi ti to ni ti thava txani. Konkuwa na tsaka nguko na si kota ku va txhumayela.”
Vaphya—Emani mi tsana mi lwa ni Dhiyabhulosi
Nji txani “siholoma sa mndilo” asi Sathani a ku zamako ngu sona? Ti nga maha a txi kuzama ngu makuho ngu Jehovha. Sathani a lava u wona nga Jehovha kha kurandi ni ti to a walo a ku ni mhaka ni nawe. Aida wa 19 wa malembe a khene: “Ni tipfa nga Jehovha a kule ni nani, ni ku ene kha ti lavi ku va mngana wangu.” A maha txani a txi tipfisa toneto? A khene: “Mitshangano yi tsanisile likholo langu. Ni ti tolovela kwa mbi xamula mitshanganoni, ni txi pimisa ti to awalo a no tsakela xamulo yangu. Kambe konkuwa, ni lulamisela mitshangano, ni ku duketa kuxamula makhambi mambidi mwendo mararu. Ta karata, kambe na tsaka ni txi tikota. Vanathu va ni tsanisa. Mbimo yotshe ni wuya ngu mitshanganoni ni txi ziva ti to Jehovha wa ni dhunda.”
Aku txigoko txi nga ti vhikela wuluvi wa disotxhwa, ‘txigoko txa kuhanyiswa’ kwathu txi vhikela mialakanyo yathu. (1 Vat. 5:8; Mav. 3:21) Themba yi hi vhuna kuveka mapimo athu ka sithembiso sa Txizimu ni kwa mbi godholiswa ngu sikarato sathu. (Mas. 27:1, 14; Mith. 24:15) Kambe ngako hi txi lava ti to themba yathu yi hi vhikela, ti lava i va ya ditshuri kwathu. Hi fanete hi ambala “txigoko” txathu ka msungo, hi si txi ñoli ngu manza.
Mpostoli Paulo a ti khene Dipswi da Txizimu di fana ni ditxhari. Jehovha a hi ningile Dipswi dakwe. Se hi fanete hi gonda ku di thumisa kwati ti to hi lwela likholo lathu mwendo kululamisa nzila yi hi pimisako ngu yona.(2 Vak. 10:4, 5; 2 Tim. 2:15) Hi nga tshukwatisa ngu nzila yihi? Sebastian wa 21 wa malembe a khene: “Ka ndima yimwani ni yimwani ya Bhiblia yi ni yi gondako, ni bhala ndimana yimweyo. Ni maha xaxamelo ya tindimana ati ni tidhundako.” Atiya ti mu vhuna kupfisisa nzila yi Jehovha a pimisako ngu yona. Daniel a khene: “Mbimo yi ni lerako Bhiblia, ni teka tindimana totshe ati ni wonako ti to ti na vhuna vathu ava ni va manako thembweni. Ni woni ti to vathu va tsakela ngako va txi wona ti to wa yi dhunda Bhiblia ni ti u ti mahako ti to u va vhuna.”
Lavetela tithomba ta moya
it-1 1128 ¶3
Kusawuleka
Moya wo sawuleka. Mtamo wu wu thumako wa Jehovha mwendo moya, wu mtamoni kwakwe ni ku mbimo yotshe wu maha kudhunda kwakwe. Wona wu basile, wu sawulekile ni ku wu thumiswa ngu nzila ya yinene ngu Txizimu. Ngu toneto wu dhanwa ku i “Moya wo Sawuleka.” (Mas 51:11; Luk 11:13;Var 1:4;Vaef 1:13) Moya wo sawuleka a wu wu thumako ka vathu, wu thuma ka m’thu wu a nga basa. Ngako m’thu a ti ni simaho sa nzambwa mwendo kumaha to biha, moya wo sawuleka kha wu nge thumi kwakwe, mwendo a nga wu ‘henyisa’. (Vaef 4:30) Hambiku moya wo sawuleka wona wu pune i si ngako m’thu, wona wu kombisa wuthu wo sawuleka wa Txizimu se ngu toneto wu nga ‘henyiswa’. Simaho sa nzambwa si nga ‘tima moya’ wo sawuleka. (1 Vat 5:19) Ngako hi txiya masoni ni simaho sa nzambwa si nga maha hi henyisa moya wo sawuleka, ti nga tshumela ti maha ti to hi va valala va Txizimu ngako hi si engise. (Isa 63:10) Awu a henyisako moya wo sawuleka a nga hokela ko e wu ruketela, i ku txionho txi Jesu Kristu a nga txi womba ti to m’thu kha nge divalelwi, konkuwa nem ka mbimo yi yi tako.—Mat 12:31,32; Mar 3:28-30.
it-1 1006 ¶2
Timbiti
Ti woneka ngu simaho. Timbiti, mwendo kunavela tithomba ti woneka ngu simaho asi si kombisako minavelo ya m’thu yo biha mwendo yo mba eneliseka. Jakobe m’bhali wa Bhiblia a hi gela ti to kunavela ko biha, ka mana txirumbo, ku txi veleka txionho. (Jak 1:14, 15) M’thu wu i ku mnaveli wa tithomba a nga woneka ngu mithumo yakwe. Mpostoli Paulo a womba ti to kuva mnaveli wa tithomba ti womba kuva mkhozeli wa sawalo. (Vaef 5:5) M’thu wu i ku mnaveli wa tithomba, a teka silo asi a si lavako i di txizimu txakwe, a txi si veka masoni ko thumela ni ku khozela M’vangi.—Var 1:24, 25.
24-30 KA JUNHO
TITHOMBA TA MU KA DIPSWI DA TXIZIMU | VAFILIPIYA 1-4
“Mi nga karatekeni ngu txilo”
“Kuthutha ka Txizimu, kupinda wotshe wuzivi”
Nji txani atxi txi no hi vhuna kwa mbi “karateka ngu txilo” kambe hi va ni “kuthutha ka Txizimu”? Mapswi aya Pawulo a nga gela Vafilipiya ma kombisa ti to ngako u txi thava txikarato txo kari, mrende wa kona i mkombelo. Se ngako hi txi karateka, ti lava hi maha mkombelo. (Lera 1 Pedro 5:6, 7.) Mbimo yi u khongelako ka Jehovha, tsaniseka ngu mbilu yotshe ti to ene wa kukhatalela. Mbimo yotshe alakanya ngu makatekwa aya Jehovha a nga kuninga. U nga divali ti to Txizimu txa sikota “kumaha sasingi ngutu kupinda asi hi txi kombelako mwendo asi hi si pimisako.”—Vaef. 3: 20.
“Kuthutha ka Txizimu, kupinda wotshe wuzivi”
Mbimo yi vanathu va Filipiya va nga lera dipapilo da Paulo, va alakanyile txani? Wungi wawe ti nga maha va di khumbute ati ti nga ti humelete Pawulo ni Silasi ni masingita aya Jehovha a nga ti va vhunile ngu ona. Ka dipapilo donedo nji txani atxi Paulo a nga va gondisa? Ngu tiya: Mi nga thaveni. Khongelani, se mi na amukela “kuthutha ka Txizimu aku kupindako wotshe wuzivi”. Toneto ti womba txani? Tibhiblia timwane ti wombisa tiya: “kupinda yotshe miloro yathu” mwendo “kupala otshe makungo a vathu”. Ngu toneto Paulo a ti womba ti to “kuthutha ka Txizimu” ka xamalisa ngutu kupinda ati athu hi ti alakanyako. Hambi hi si tizivi ti to hi na maha txani hi di ka txikarato txo kari, Jehovha wa tiziva. Se ene a nga maha ati athu hi nga ti sa tiemela.—Lera 2 Pedro 2:9.
“Kuthutha ka Txizimu, kupinda wotshe wuzivi”
Nji txani txi no humelela ngako hi di ni “kuthutha ka Txizimu, kupindako wotshe wuzivi”? Bhiblia yi womba ti to kuthutha koneko ku na “veketa” timbilu ni mialakanyo yathu. (Vaf. 4:7) Dipswi di di ku “veketa” ngu Txigriki di txi thumiswa ka masotxhwa na ku txi wombwa ale ma wonelelako didhoropa. Vathu va dhoropani ka Filipiya va ti wonelelwa ngu masotxhwa onewo. Se vathu va ndina otela kwati ni wusiku va txi themba ti to didhoropa di vhiketwe. Ngu ha kufanako, ngako hi di ni “kuthutha ka Txizimu” kha hi thavi txilo, futhi timbilu ni mialakanyo yathu sa mana kuhumula. Ha tiziva ti to Jehovha wa khatala ngu ngathu, ni ku a navela ti to ti hi tsimbilela kwati ka wutomi. (1 Pedro 5:10) Se toneto ta hi vhikela ka kuguma mtamo ni dikhodho.
Lavetela tithomba ta moya
it-2 528 ¶5
Miphaxo
Miphaxo ya sa kusela. Miphaxo ya sakusela yi ti ningelwa kumweko ni miphaxo yimwani yo tala, ngutu-ngutu mbimo yi Vaisrayeli va nga ti ngadi kuhoka ka Ditiko da Txithembiso. (Mit 15:2, 5, 8-10) Ngu txitalo ku ti thumiswa vhinya (wusuke wo bava) ti to yi theketwa txiluveloni. (Mit 28:7, 14; fananisa ni Eks 30:9; Mit 15:10.) Mpostoli Paulo a bhalete tiya Makristu a Vafiliphiya: “Idiku no theketwa kota mphaxo wa sa kusela, txitimwi ka digandelo ni ka mthumo wa ha kubasani ngu kona ha ka likholo lanu, na nengela.” Ahawa a fananisile ni mphaxo wa sakusela, kukombisa kutiemisela kwakwe ko tiningela ti to ku vhuneka Makristu kulowe. (Vaf 2:17, Tradução do Novo Mundo.) Mbimo yi a nga ti hafuhi ni kufa a bhalete tiya Timoti: “Nguko se ni theketilwe kota mphaxo wa sa kusela, se mbimo ya kukhululwa kwangu yi hokile.”—2 Tim 4:6, NM.
w07 1/1 26-27 ¶5
“Kuwuka ko khata ka vafi” se ka humelela!
Ngu kulondisela, vasawuleki i ku siro sa “Israyeli wa Txizimu” si na ya patana ni Mkoma Jesu Kristu ka wudhumo wa nzumani, aha va no “ya zumba nayo yotshe mbimo”. (Vagalatiya 6:16; 1 Vatesalonika 4:17) Tximahakalo txonetxo txi dhanwa ku “kuwuka ko khata ka vafi.” (Vafilipiya 3:10, 11; Mtuletelo 20:6) Ku txi na gwita kuwuka kuwa, ku nava se ku di hokile mbimo yi timiliyoni ta vakufa ti no wuselwa ku ta hanya ha mafuni ti di ni themba yo hanya ngu ha ku si gwitiko Paradhise. Ngu toneto ti si na mhaka ni ti to themba yathu njo ya hanya nzumani mwendo njo ta hanya ha mafuni, “kuwuka ko khata ka vafi” ka hi tsakisa hotshethu. Ngu wuka ka mxaka muni koneko? Kuhumelela mbimo muni?