Mareferensiya ya Txibhukwana txa mitshangano ya Mahanyelo athu a Wukristu ni mthumo wo txhumayela
4-10 KA FEVEREIRO
TITHOMBA TA MU KA DIPSWI DA TXIZIMU | VAROMA 1-3
“Simama u gondisa livhalo lako”
lvs 18 ¶6
Livhalo la linene ka Txizimu
Hambi vathu ava va si thumeliko Jehovha va ti ziva ta tinene ni to biha. Bhiblia yi womba tiya: “Mapimo awe ma va kawuka kumbe ku va emela.” (Var. 2:14, 15) Ngu txikombiso votshe vathu va tiziva ti to ti bihile kudaya mwendo kupa. Hambi va si tizivi, vona va thumisa livhalo lawe, i ku kuziva ta tinene ni to biha, wusikoti awu Jehovha a nga wu simeka timbiluni kwawe. Ngu mbimo yoneyo va londisela milayo ya Txizimu, mwendo ditshuri di Jehovha a nga di simeka ti to di hi vhuna kumaha sisungo sa sinene ka wutomi.
lvs 19-20 ¶8-9
Livhalo la linene ka Txizimu
Vathu vamwani va pimisa ti to kuengisa livhalo lawe ngu londisela ati mbilu yawe yi ti lavako. Vona va pimisa ti to va nga maha totshe ti va ti wonako i di tinene ti txa nga va tsakisa. Kambe mbilu yathu kha ya hetiseka, yi nga hi mwalata. Mbilu yathu yi nga va ni mtamo wo kuzetela livhalo lathu. Bhiblia yi womba tiya: “Se mbilu mkanganyisi kupinda sotshe sile, yi sinile; i mani a no yi ziva kani?” (Jer. 17:9) Ngu toneto hi nga pimisa ti to to kari ndinene hambi ti di bihile. Ngu txikombiso, a si seva Mkristu, Paulo a xanisile vathu va Txizimu a txi pimisa ti to ati a nga ti ti maha i di tinene. Ene a ti pimisa ti to a ni livhalo la linene. Ngu kutsimbila ka mbimo a wombile tiya: “Awu a si kotako ku ni lamula ngu Mkoma.” (1 Vak. 4:4; Mith. 23:1; 2 Tim. 1:3) Mbimo yi Paulo a nga gonda a ti Jehovha a ti pfisako tona ngu ti a nga ti ti maha, ene a ti woni ti to ti lava e txitxa. Ti hakubasani, hi si se maha to kari, ti lava hi thanga ngu kutiwotisa tiya: ‘Jehovha a lava ni maha txani?’
Ngako hi txi dhunda m’thu wo kari, kha hi lavi ku mu henyisa. Aku hi dhundako Jehovha kha hi lavi kumaha timhaka ti ti no mu henyisa. Ti lava hi tsanisa txithavo txathu ngu Jehovha. Hi nga gonda ka txikombiso txa Nehemiya. Ene kha lava kuthumisa txiemo txakwe kota mkoma ti to e ganya. Ngu kutxani? Ene a ti khene, “ngu mhaka yo thava Txizimu.” (Neh. 5:15) Nehemiya kha nga maha to maha ati ti nga henyisa Jehovha. Kufana ni Nehemiya, nathu kha hi lavi kuhenyisa Jehovha ngu kumaha to biha. Hi nga gonda ati ti tsakisako Jehovha ngu kulera Bhiblia.
Lavetela tithomba ta moya
w08 15/6 30 ¶5
Timhaka ta hombe ta mu ka dipapilo da Varoma
3:4. Ngako dipswi da m’thu di txi lwisana ni ti Txizimu txi ti wombako ka Dipswi da txona, athu hi tumelela ti to ‘Txizimu txi maneka i di txa ditshuri,’ ngu kuthemba didungula da Bhiblia ni kumaha a ti i ku kudhunda ka Txizimu. Ngu kuhisekela mthumo wo txhumeyela mahungu a Mfumo ni wo maha vagondiswa, hi nga vhuna vamwani ve wona Txizimu i di txa ditshuri.
w08 15/6 29 ¶6
Timhaka ta hombe ta mu ka dipapilo da Varoma
3:24, 25—Ti nga mahisa kutxani ti to ‘mtirulo wa Kristu Jesu’ wu dihela “sionho si si nga mahwa kale” na wu si se humeswa? Wuprofeti wo khata wa wu Mesiya, a wu wu nga bhalwa ka Genesisi 3:15, wu hetisekile ngu dilembe da 33 EC mbimo yi Jesu a nga dawa ka phande ya xaniso. (Vag. 3:13, 16) Ka mbimo yi Jehovha a nga womba wuprofeti wonewo, ti ti fana ni ku va mtirulo se wu ti dihetwe ngu kuya ngu mawonelo akwe, nguko kha ku na txi txi ndi no tsivela Txizimu kuhetisisa sithembiso sa txona. Se ngu txisekelo txa mtirulo wa Jesu Kristu awu wu ndi no humiswa mbimo yi yi tako, Jehovha a ndi na divalela sionho sa vanana va Adhamu ava va nga kombisa likholo ka txithembiso txonetxo. Mtirulo wu tshumete wu maha ti koteka ti to ava va nga fa a si se kuta Kristu ve ta wuswa.—Mithumo 24:15.
11-17 KA FEVEREIRO
TITHOMBA TA MU KA DIPSWI DA TXIZIMU | VAROMA 4–6
“Txizimu txa hi kombisa lirando la txona”
w11 15/6 12 ¶5
Txizimu txa hi kombisa lirando la txona
Ti to Paulo e txhamusela mhaka yiya, a khatile ngu ku khene: “Ngako txionho txi nga wulela ha ditikoni ngu mhaka ya m’thu wa mmweyo, ngu msana ku txi wulela lifo, ngu toneto lifo nilona li wulelete votshe vathu, nguko votshe va onhile.” (Var. 5:12) Konkuwa ha ti ziva tiya nguko Txizimu txi bhate matimu a makhato a wutomi wa vathu. Jehovha a vangile vathu vambidi i ku Adhamu ni Evha. Mvangi mbwo hetiseka, ngu toneto Adhamu ni Evha va ti hetisekile ni vona. Txizimu txi va ningile mlayo wumwewo wo kongoma txi tshumela txi txhamusela ti to kwa mbi engisa mlayo wonewo ku ndi na tisa lifo. (Gen. 2:17) Hambiketo, vona va to langa kwa mbi engisa, ve ndaka mlayo wa Txizimu wo hehuka, ve m’tshuralela kota Mningi wa mlayo ni Mkoma wa sotshe.—Dhewut. 32:4, 5.
w11 15/6 12 ¶6
Txizimu txa hi kombisa lirando la txona
Adhamu a khatile kuveleka vanana mbimo yi se a nga ti onhile, se a to pindisa txionho ni xanisa ya txona ka hotshethu. Aku hi nga mba ndaka mlayo kufana ni Adhamu, kha hi tsayiswi ngu mhaka ya txionho txo fana, ni ku Txizimu txi si se kuningela mlayo. (Gen. 2:17) Hambiketo, athu hi tshapetwe ngu txionho txa Adhamu. Se, txionho ni lifo si fumile kala mbimo yi Txizimu txi nga ninga mlayo Vaisrayeli, awu wu nga ti veka ha kubasani ti to vona i ti va onhi. (Lera Varoma 5:13, 14.) Txhatxhazelo ya txionho yi nga fananiswa ni malwati o ma mana ka vavaleki o fana ni anemia Mediterránea mwendo hemofilia. Ti nga maha u txi khala kulera mayelano ni Alexis mwanana wa mfumeli Czar Nicholas II ni Alexandra, ava va nga tshapelwa ngu malwati a mnoha i ku hemofilia. Ditshuri ti to hi nga votshe ka liveleko lo nga lonelo va nga vako va txi xaniswa ngu malwati oneyo, kambe ti nga maha va di nawo mndani. Kambe, txionho txiya txa Adhamu kha ti ngaho ku txi tutuma. Hotshethu hi ti khumbi ta txona, ni ku txi tshapelela hotshethu. Ina hi nga sikota kuxula txionho txonetxo?
w11 15/6 13 ¶9-10
Txizimu txa hi kombisa lirando la txona
Ngu yi txhamuselo ya mapswi ya a Txigriki aya ma ku khene “txi hi manisile wululami” ni “kuhanyiswa ka wutomi”? Mhunduluxeli mmwani wa Bhiblia a khene: “Mapswi o fanekisela ma lavako kuwomba kumaha timhaka ti i si ngako to biha ngu kuya ngu mlayo. Ati ti lavako kuwomba kutxitxa ka wuxaka wa m’thu ni Txizimu, i si nga kutxitxa ka mbilu ya m’thu apune . . .Txifananiso txonetxo txi kombetela Txizimu i di wu a nga maha txisungo txo tsetselela awu a nga onha, ti fanako ni ku m’thu a di wukomani ka Txizimu, ngu kwa mbi lulama. Kambe, Txizimu txi tsetselela muonhi.”
Ti mahisa kutxani “Mlamuli wa ditiko dotshe” e divalela m’thu wu a nga onha kani? (Gen. 18:25) Ti to txi khata makungo oneyo, Txizimu ngu lirando txi rumete Mwanana wa txona wa mmweyo ha mafuni. Jesu a mahile kuranda ka Tate wakwe ngu kuhetiseka hambiku a nga manana ni siduko, kupoyilwa ni kuxuphwa. A simamile e thembeka ha ko za e dawa ka phande ya xanisa. (Vaheb. 2:10) Ngu kuningela wutomi wakwe wo hetiseka, Jesu a ningete digandelo ti to di terula mwendo kutxhatxha vanana va Adhamu ka txionho ni lifo.—Mat. 20:28; Var. 5:6-8.
Lavetela tithomba ta moya
w08 15/6 29 ¶7
Timhaka ta hombe ta mu ka dipapilo da Varoma
6:3-5—Ti womba txani kubhabhatiswa ngu ka Jesu Kristu ni kubhabhatiswa kufani kwakwe? Mbimo yi Jehovha a totako malanda a Kristu ngu moya wo sawuleka, ona ma patana ni Jesu me maha mtxawa wa dibanza a di i ku mmidi wa Jesu, ene kota Msungo. (1 Vak. 12:12, 13, 27; Vakl. 1:18) Eyo ngu yona bhabhatiso ka Jesu. Vasawuleki va tshumela ve “bhabhatiswa kufani kwakwe” nguko va hanya wutomi wo tiningela ni ku kha va pimisi ngu kuhanya ha mafuni. Ngu toneto lifo lawe li fana ni la Jesu i ku lifo la digandelo, kambe lifo lawe li nge sikoti kuterula. Bhabhatiso ya kufani ka Jesu yi hetiseka mbimo yi va wuswako ve ya nzumani.
w14 1/6 11 ¶1
Ngu yihi themba ya va kokwani vangu?
Mbimo yi ava vo mbi lulama va no wuswa, ina va na lamulwa ngu sionho sawe sa kale? Ahim-him. Varoma 6:7 a khene: “Awule a nga fa a thukunyutwe ka txionho.” Ava vo mbi lulama va na va se va di hakete sionho sawe ngu lifo. Ngu toneto, va na lamulwa ngu kuya ngu mithumo yawe msana ka ku va va di wukile ngu ka vakufa, i si nga tile va nga maha ngu kwa mbi ziva txilo. Vana wuyelwa ngu nzila yihi?
18-24 KA FEVEREIRO
TITHOMBA TA MU KA DIPSWI DA TXIZIMU | VAROMA 7-8
“Ina wa ‘rinzela ngu kunavela’?”
w12 15/7 11 ¶17
Leka Jehovha e kukongomisa ka mkhululeko wa ditshuri
A txi womba-womba ngu mkhululeko awu Jehovha a nga vekela malanda akwe a ha mafuni, Paulo a bhate tiya: “Sotshe si si nga vangwa sa rinzela ni kunavela ti to Txizimu txi wonekisa vanana va txona ha kubasani.” A gwitile e bhala tiya: “Sona si na poniswa ka wukhumbi wa lifo, kasiku si kota kuwulela mfumoni ka wudhumo wa vanana va Txizimu.” (Var. 8:19-21) “Sivangwa” kuwombwa vathu vo lulama ava va ku ni themba yo ta hanya ha mafuni, ava va no ta wuyelwa ngu “kuwonekiswa” ka vanana va Txizimu ava va nga sawulwa ngu moya wo sawuleka. Kuwonekiswa koneko ku na khata mbimo yi “vanana”, i ku va va nga wuselwa ku ya hanya nzumani, va no patana kumweko ni Kristu ka kukhulula ditiko ka wubihi ni ku ta xayisa “dibhutho da hombe” ti to di ta bela ka mafu a maphya.—Mtu. 7:9, 14.
w12 15/3 23 ¶11
Ha tsaka ngu themba yathu
“Txithembo” txi ningetwe ngu Jehovha ka vathu vo lulama mbimo yi a nga thembisa ku va khulula ka “mwamilambo wa hombe” Sathani Dhiyabhulosi ngu ku thumisa “liveleko.” (Mtu. 12:9; Gen. 3:15) “Liveleko” kukhata i ti Jesu Kristu. (Vag. 3:16) Ngu lifo ni kuwuswa kwakwe, Jesu a ningete themba ka vathu vo lulama ya ti to vathu va na ta khululwa ka txionho ni lifo. Kuhetiseka ka themba yoneyo ku yelana ni “kuwonekiswa ka vanana va Txizimu.” Vasawuleki ava va nga dhumiswa va wumba txienge txa wumbidi txa “liveleko.” Vona va na ‘wonekiswa’ kumweko ni Kristu ka kulovisa mafu o biha a Sathani. (Mtu. 2:26, 27) Eto ti na tisa kuhulukiswa ka tinvuta timwani ati ti no huma ngu ka xanisa ya hombe.—Mtu. 7:9, 10, 14
w12 15/3 23 ¶12
Ha tsaka ngu themba yathu
Ta tsakisa kuziva to “sivangwa” si i ku vathu si na va ni kudikha ka mfumo wa Kristu wa digidhi da malembe! Ngu mbimo yoneyo “vanana va Txizimu” va na ‘wonekiswa’ ngutu mbimo yi va no va va txi thuma kota vaprista ni Kristu, va txi thuma kota kuvhuna vathu votshe ngu kuthumisa digandelo da Jesu. Vathu votshe va na khata kupfa mkhululeko wa wuyelo ya txionho ni lifo. Ngu mbimo yoneyo, vathu va va engisako ‘va na khululwa ka wubotxhwa wa wukanganyisi.’ Va txo thembeka kala magwito ve pinda ka txiduku txo gwita, matina awe ma na bhalwa ka “dibhuku da wutomi.” Vona va na wulela ‘kuwonekiswani ka vanana va Txizimu.’ (Mtu. 20:7, 8, 11, 12) I themba yo tsakisa ngu ditshuri!
Lavetela tithomba ta moya
Wa khumbula?
Ngu kuhi kuhambana ka “kuxuva ka mmidi” ni “kuxuva ka Moya”? (Var. 8:6)
Awu a vekako mialakanyo yakwe ka kuxuva ka mmidi a zumbela kupimisa ngu minalevo ya nyama e tshumela e xengwa ngu kwa mbi hetiseka. Awu a vekako mialakanyo yakwe ka kuxuva ka moya wa ti ziva to ta lisima ngu maha kuranda ka Jehovha; kota Mkristu a leka moya wo sawuleka wu mkongomisa. Kuveka kuxuva ka mmidi ku tisa lifo, kasi kuxuva ka moya kutisa wutomi ni kudikha.
w09 15/11 7 ¶20
Mikombelo yako yi kombisa txani ngu ngawe?
Mbimo yimwani kha hi ti zivi to hi na womba txani ka mikombelo yathu hi puni. “Kha hi ti zivi ati hi fanelako ku khongelisa tona mikombeloni kwathu”, ngu ti a nga womba Mpostoli Paulo, ‘moya [wo sawuleka] wona wupune wa hi kombelela, ngu tingumo to mbi balwa. Se awule [Txizimu] i ku ene a zivako ta mbiluni ka m’thu, wa yi ziva minavelo ya Moya.’ (Var. 8:26, 27) Jehovha a mahile ti to mikombelo yo tala yi bhalwa ka Bhiblia. Ene a yi wona kota mikombelo yathu, se ngu toneto wa yi xamula. Jehovha wa hi ziva niku wa yi ziva txhamuselo ya mikombelo yi a nga tumelela ti to yi bhalwa. Jehovha wa xamula mbimo yi moya wu hi ‘kombelelako.’ Kambe hi txiya hi ziva kwati Bhiblia, ti na hi hehukela ku mana to womba ka mkombelo.
25 KA FEVEREIRO–3 KA MARÇO
TITHOMBA TA MU KA DIPSWI DA TXIZIMU | VAROMA 9-11
“Txidinganiso txa mndonga wa muolivhera”
w11 15/5 23 ¶13
‘Oh kutshima ka wutxhari wa Txizimu!’
Mpostoli Paulo a fananisile ava va mahako txienge txa liveleko la Abrahamu ni madhavi a mndonga wo fanekisela wa muolivhera. (Var. 11:21) Mndonga wu wu nga phaywa wu emela kuhetiseka ka txithembiso txa Txizimu mayelano ni liveleko la Abrahamu. Mikuloti ya mndonga yi sawulekile, yi emela Jehovha awu a ningako wutomi Israeli wa moya. (Isaya 10:20; Var. 11:16) Hatshina ka mndonga kuemela Jesu i ku ditshina da liveleko la Abrahamu. Madhavi ma emela ‘mtengo wotshe’ wa txienge txa wumbidi txa liveleko la Abrahamu.
w11 15/5 24 ¶15
‘Oh kutshima ka wutxhari wa Txizimu!’
Nji txani atxi Jehovha a nga tximaha ti to e hetisisa txikongomelo txakwe? Paulo a txhamusete to madhavi a muolivhera wa txitinga ma ti ta txhomekwa ka muolivhera wa mtini kasi ku txitxa aya ma nga funyeka. (Lera Varoma 11:17, 18) Makristu ya ma nga sawulwa ka va matiko, o fana ni Varoma, va fanekisela madhavi ya ma nga txhomekwa ka muolivhera. Ngu nzila yoneyo tikotekile ti to me va liveleko la Abrahamu. Makhatoni ti ti fana ni loko i ti madhavi a muolivhera wa txitinga, va si nga ni lungelo yo maha txienge txiya txo sawuleka. Kambe Jehovha a va tulete mkhanjo wo ve maha txienge txa vajudha va moya.—Var. 2:28, 29.
w11 15/5 25 ¶19
‘Oh kutshima ka wutxhari wa Txizimu!’
Kha ti kana-kanakisi ti to txikongomelo txa Jehovha mayelano ni “Israyele wa moya” txa hetiseka ngu nzila yo tsakisa. (Vag. 6:16) Ngu ha a nga womba ngu kona Paulo, “votshe va ka Israyeli va na hanyiswa.” (Var. 11:26) Ngu mbimo yi Jehovha a nga yi vekisa, “votshe va ka Israyele”, i ku mtengo wotshe wa va israyele va moya, va na ta thuma kota vakoma ni vaprista nzumani. Kha ku na txi txi ngo thindekisa txikongomelo txa Jehovha!
Lavetela tithomba ta moya
w13 15/6 25 ¶5
Tumela kuwumbwa ngu Jehovha
Kumaheka txani ngako m’thu atxi lamba kuwumbwa ngu Jehovha? Jehovha a wu kombisisa kutxani wukoma wakwe? Alakanya ngu ti ti mahekako ngu mraka ngako ti si koteki ti to kuhuma atxi txi nga tilava kumahwa ngu wona. Muwumbi a nga khanda txilo tximwani ngu wona mwendo ku so wu leka. Mbimo yimwani eto ti maheka nguku muwumbi a nga tanda ku wumba. Kambe eto kha ti maheki ngu Jehovha, ene wa tikota kuwumba vathu ngu nzila ya yinene. (Dhewut. 32:4) Ngako m’thu a si tumeli kuwumbwa ngu Jehovha, mnando mbwakwe. Se Jehovha a maha txani? Athumisisa kutxani lungelo yakwe ya wu wuwumbi? Ene wa maha kutxitxa ka nzila yi a wumbako ngu yona ngu kuya ngu m’thu. Ngako vathu va txi tumela kuwumbwa ngu Jehovha, ene wa vathumisa. Ngu txikombiso, vasawuleki ‘nziya sa wumbilu’ asi si nga wumbwa kasi kuthumiswa kota ‘siya so xonipheka.’ Kasi ava va si laviko ko wumbwa ngu Jehovha va fana ni ‘siya so henyelwa’ asi si si vhuniko txilo, magwito a sona ngu loviswa.—Var. 9:19-23.
it-1 1260 ¶2
Dibava, mabava
Kuhiseka ko biha. M’thu a nga va ni kuhiseka mwendo mabava ngu mhaka yo kari kambe eva a si tsakisi Txizimu. Ngu ti ti nga ti maheka ngu Vajudha va dilembe dizana do khata. Va ti emela to kululama kumaneka ngu kulondisela Mlayo wa Mosi. Kambe Paulo a va kombile to Kuhiseka kwawe i ti ko biha nguko va nga si nga ni wuzivi. Ngu toneto kha va mana kululama ka Txizimu. Va ndina tisola ka sionho sawe ngu mtirulo wa Kristu, se ve mana kudikha ni mkhululeko wa Mlayo. (Var. 10:1-10) Sawule wa Tarxixi i ti mwani wa va va nga ti hiseka ngu nzila yo biha, a ti hisekela ngutu Wujudha, e ‘xanisa Dibanza da Txizimu ni kulava ku di fuvisa.’ (Vag. 1:13, 14; Vaf. 3:6) Mabava akwe ngu Wujudha i ti o biha. A ti ni mbilu ya yinene, i ku ti ti nga maha Jehovha e mkomba wuxinji wo mbi faneleka, ngu Kristu, kasi ku mkomba nzila ya wukhozeli wa ditshuri.—1 Tim. 1:12, 13.