8 wa vathu kha va fa ka ndambi

Nowa ni mwaya wakwe ni sihari va bete ngalavani. Ngu msana, Jehovha a to vhala ditimba da ngalava se kukhata kuwa mati. Kuwile mati a hombe, aha koza mafu me tala ngu mati se ngalava yi khatile kudeluka. Votshe vathu ava va nga di hahanze ka ngalava va to mitwa ngu mati ve fa. Kambe, Nowa ni mwaya wakwe va ti vhikelekile mndani ka ngalava. U pimisa to va ti pfisile kutxani ngu kuva va di engisile Jehovha?

Mati ma hetile 40 wa masiku ma txi wa, wusiku ni mitshikari, me gwita me txa. Mati ma khatile kuphwa kudotho-kudotho. Se ngalava yi ti ya ema txitimwi ka mmango. Kambe mafu ma ti ngadi tate ngu mati. Ngu toneto, Nowa ni mwaya wakwe ti lavile ve simama ve zumba mndani ka ngalava.

Nowa ni mwaya wakwe va hetile konamu ko pinda dilembe va di ngalavani. Kambe kudotho-kudotho mati ma phwile otshe. Se Jehovha ava gete ti to ve huma ngalavani. Mbimo yi va nga huma, ti txo fana ni kuva va txo bela ka ditiko da diphya. Nguku sigevenga ni votshe vathu ava va nga txi maha to biha, se va ti fite. Aku Nowa ni mwaya wakwe va nga di tsakile ngutu ngu kuva Jehovha a di va hulukisile, va mahile mningelo ka Jehovha.

Jehovha a tsakile ngutu ngu mningelo wawe. Se ene a thembisile ti to a si na ku ngadi e thumisa ndambi kasi kulovisa vathu vo maha wubihi. Kasiku Nowa ni mwaya wakwe va si ti divali a ti Jehovha a nga va thembisa, ene a mahile ti to kuhumelela wulaho wo khata nzumani. Ina u khala ku wu wona wulaho wa nzumani? Makhambi otshe aya u wonako wulaho wa nzumani, khumbula ati Jehovha a nga ti thembisa.

Msana kova Jehovha a di thembisile Nowa ni mwaya wakwe kwa mbi thumisa kambe ndambi kasi kulovisa vathu vo maha wubihi, ene a va gete tiya: ‘Velekani vanana mi tata mafu.’