100 ka Tuig na ug Mas Lig-on Kay Sukad Masukad!
100 KA TUIG
ANG Watch Tower Society nailalom gihapon sa pagdili o pagpiot diha sa pila ka nasod diin walay matuod nga kagawasan sa relihiyon. Nagkahulogan ba kana nga ang maayong balita sa kagamhanan nga Gingharian sa Diyos wala isangyaw diha nianang mga nasora? Sa gidid-an ang Kristohanong mga apostol sa Hudiyong klero, unsay ilang sanong? Sila miingon: “Kinahanglang sugton namo ang Diyos ingong magmamando inay sa mga tawo. Ug kami mga saksi niining mga butanga, ug maingon man ang balaang espiritu, nga gihatag sa Diyos niadtong nagasugot kaniya ingong magmamando.”—Buhat 5:29, 32.
Anaa dinha ang hinungdanon nga punto. Ang mga Saksi ni Jehova nagauswag ug karon mas lig-on kay sukad masukad, bisan sa dapit nga gipiotan, salamat sa giya ug panalipod sa balaang espiritu sa Diyos. Sa pagkamatuod, ingong katawhang neyutral ug mahigugmaon sa pakigdait, mopatim-aw usab nga sila labing mahuyang. Sila walay politikanhong impluwensiya o mga kaabin sa pagpanalipod kanila. Nan sa unsang paagi sila nakalahutay ug nagmauswagon?
Ang Diyos sa Bibliya nagatubag. “‘Ang bisan unsang hinagiban nga pagahulmahon batok kanimo dili molampos, ug bisan unsang dila nga motungha batok kanimo sa paghukom imong pagahukman. Kini mao ang panulondon sa mga alagad ni Jehova, ug ang ilang pagkamatarong maoy gikan kanako,’ nagaingon si Jehova.” “‘Dili pinaagi sa militaryong kusog, ni sa gahom, kondili pinaagi sa akong espiritu,’ si Jehova sa mga panon nagaingon.”—Isaias 54:17; Zacarias 4:6.
100 ka Tuig ug Mas Lig-on Kay Sukad Masukad
Sa pagkatapos sa 1918 may pila ra ka libong aktibong Saksi sa tibuok kalibotan, ug ang ilang mga basahon sa Bibliya gipatik diha sa mga 17 ka pinulongan. Sumala sa atong makita, gikan sa 1933 ngadto 1945 ang Watch Tower Society miagi sa laing lisod nga yugto sa paglutos diha sa daghang kanasoran. Bisan sa Tinipong Bansa, diin ang kagawasan sa pagsimba gipanalipdan sa balaod, ang mga Saksi ni Jehova nanalipod pinaagi sa balaod sa ilang katungod sa pagsangyaw sa maayong balita sa Gingharian sa Diyos. (Filipos 1:7) Sa Korte Suprema sa Tinipong Bansa nakadaog sila sa 21 ka desisyon nga paborable sa ilang pagsimba ug mga prinsipyo. Pagkatapos sa Gubat sa Kalibotan II, may 141,606 ka Saksing aktibo diha sa 68 ka kayutaan kon itandi sa 71,509 sa pag-ulbo sa gubat. Sa 1945 ang katibuk-ang 186,137 ka tawo miatender sa tinuig Memoryal nga pagsaulog sa pagkamatay ni Kristo.
Unsay kahimtang sa mga Saksi 39 ka tuig sa ulahi? Karon dunay kapin ug 2,670,000 ka Saksi nga nagasangyaw diha sa 205 ka kanasoran ug diha sa mga 190 ka pinulongan. Ang Memoryal nga tumatambong sa 1984 maoy duolag 7,000,000. Kana dako pa kay sa populasyon sa kinabag-an sa mga kanasoran sa kalibotan!
Giangkon ba sa mga Saksi ni Jehova ang dungog niini? Wala. Bisan tuod ilang gidawat ang responsabilidad sa pagsangyaw sa maayong balita sa Gingharian, ilang giila nga ‘ang Diyos ang nagapatubo niini.’—1 Corinto 3:6, 7.