Kon Unsaon sa Pagbiya sa Bisyo

AYAW sulayi ang paghinayhinay sa paghunong: Kana mopadugay sa kasakit sa mga simtoma sa paghunong sa pagtabako.

AYAW usiki ang imong kuwarta sa mahal batok-pagtabakong mga tambal: “Nga walay eksepsiyon, ang mga tabang nga karon ginabaligya nagahatag ug diyutayng tinuod nga tabang sa tigtabako,” mitaho ang New Scientist. Ug ang World Health nagaingon: “Ang dakong elemento sa kalamposan . . . sa kanunay mao ang hugot nga tinguha sa tigtabako. Ang nahibilin adorno lamang.”

DAWATA ang imong responsabilidad, apan dawata usab ang tabang: Ang mapaluyohong mga higala nga nakabiya mismo sa pagtabako bililhon kaayo. Pag-ampo. Ang tim-os nga tinguha sa pagpahimuot sa Diyos ug pagbuhat sa iyang kabubut-on mohimog mga katingalahan.—Filipos 2:4; 4:6, 13.

ILHA ang mga kaayohan sa dili pagtabako: Ang pagkunhod sa riyesgo nimo sa kamatayon (gumikan sa sakit sa kasingkasing, stroke, brongkitis, emphysema, o kanser); paghatag ug maayong panig-ingnan; pagtigom sa kuwarta; pagkagawas sa suliran, baho, pagkalisod, ug pagkaulipon sa bisyo.

SABTA ang imong mga sakit gumikan sa paghunong sa pagtabako: Sulod sa 12 oras sa imong kataposang sigarilyo, mosugod ang imong kasingkasing ug baga sa pag-ayo sa kaugalingon. Mokunhod nga kusog ang imong mga lebel sa carbon monoxide ug nikotina. Apan samtang magaayo ang imong lawas, kana masakit. Tingali bation nimo ang kairitable o baling masuko, apan dili nimo kinahanglan ang sigarilyo sa pagpugong sa imong nerbiyos. Kining temporaryong kagil-as sa pagbati mao ang sinugdanan sa mas himsog nga kinabuhi.

SABTA ang hagit: Dahoma ang mga suliran. Likayi ang pagkaluoy-sa-kaugalingon ug pagkompromiso. Apan ayaw pagduhaduha, ikaw makahimo sa pagbiya sa bisyo.