Nasayod Ka bag Unsay Gipamatian sa Imong mga Anak?

ANG 15-anyos nga anak babaye sa magsusulat si Kandy Stroud miingon, ‘Pamati ra gud ni, Ma!’ Unya midugang siya, “Apan ayawg pamatii ang mga pulong.” Iyang gipatokar ang usa ka awit sa usa ka bantog nga mag-aawit sa rock. Nanimati ang iyang inahan, ug ibabaw sa kompas nadungog niya ang mga pulong. Ang awit maoy bahin sa usa ka babayeng nag-abusar sa iyang kaugalingon sa seksuwal nga paagi sa salas sa usa ka hotel.

Si Kandy Stroud, sa pagsulat diha sa Newsweek, mipadayon: “Sa walay kaulaw ang mga pulong bahin sa sekso nga sama niini . . . mao ang musikal nga kalan-on nga ginapakaon sa minilyong kabataan panahon sa mga konsiyerto, diha sa mga album, sa radyo ug MTV [usa ka cable TV channel nga nagaespesyalisar sa musikang rock sa Tinipong Bansa].”

Midugang siya: “Isip ginikanan ug maghohoni ako nabalaka sa daghang popular nga mga awit nga matawag lamang nga porn rock, ug sa dili-ligdong, klaro ug walay-bayad nga hilig sa sekso nga nagasuhot sa kahanginan ug nagaabot sa atong mga balay.”

Isip ginikanan, nabalaka ka ba sa matang sa musika nga nagaimpluwensiya sa imong mga anak, o sa matang sa musika nga gipalabi sa imong mga anak? Nganong hinungdanon kini? Kay kini may itug-an kanimo bahin sa pagpangatarongan sa imong anak ug kon asa nahimutang ang kasingkasing. Sumala sa gitaho sa Newsweek, si Dr. Joseph Novello, direktor sa usa ka programa sa droga, nangutana sa tin-edyer nga mga pasyente bahin sa ilang kinaham nga musika. “Kon kaha satanasnon, seksuwal o maylabot sa droga—kini may ginatug-an mahitungod sa panghunahuna sa bata.”

Nakasusi ka ba sa panghunahuna sa imong anak sa dili pa dugay? Nasayod ka ba unsang matang sa musika ang iyang gipamatian sa balay o sa laing dapit? Kon ikaw mohinapos nga ang musika dili makapalig-on, unsaon nimo kana pagdumala? Pinaagi sa pagsaway nga dogmatiko o pinaagi sa mabinantayong pagpangatarongan ug disiplina? Mitambag si apostol Pablo: “Kamong mga amahan, sa makausa pa, kinahanglang dili ninyo iduso ang inyong mga anak sa kayugot, apan ihatag kanila ang pagtulon-an, ug ang pagtul-id, nga iya sa Kristohanong pagmatuto.”—Efeso 6:4, The New English Bible.

Adunay igong lainlaing musikal nga ekspresyon aron makaplagan sa usa ang kahimut-anang musika nga may hinlong mga pulong. Tingali kinahanglang usbon sa uban ang ampay nilang musika, apan gikan sa Kristohanong punto de vista kana normal nga bahin sa ‘pagsul-ob sa bag-ong pagkatawo nga sama kang Kristo.’ Uban ang hustong tinguha ug panukmod, kana mahimo.—Efeso 4:20-24.