Nahibalik ang Astrolohiya!

Ang babayeng hinigugma sa Iyang Kamahalan nagbuy-od nga patay. Gipatawag sa naguol nga hari sa iyang atubangan ang astrologong mitagna sa maong trahedya. Nga nahupong sa tinguhang mopatay, ang hari miingon: “Ikaw nagapakaarong-ingnong abtik kaayo ug maalamon. Tug-ani ako, unsa ba ang imong kapalaran?”

“Senyor,” mitubag siya, “Akong napanan-aw nga ako mamatay nga maunag tulo ka adlaw sa Imong Kamahalan.” Ang alistong panghunahuna nakaluwas sa kinabuhi sa maong astrologo!

Kon tinuod man o dili kini nga sugilanon, kini nagailustrar sa kamatuorang sa nangaging mga siglo ang mga astrologo giisip nga maugdang, bisan sa mga hari. Mahitungod kang Louis XI sa Pransiya, ang usa ka historyano misulat: “Ang usa ka panon sa mga astrologo . . . nagpahimulos sa iyang mga kahadlok—ug sa iyang pitaka.” Sa ika-15 ug ika-16 nga siglo, ang astrolohiya nakaabot sa pungkay sa kabantogan sa Uropa. Bisan ang inilang mga siyentipiko nagtuo niana.

Ugaling, ang misilang nga bituon sa astrolohiya sa wala madugay misugod pagkahulog. “Usa ka paglantaw pinaagi sa teleskopyo,” miangkon ang librong Astrology—The Celestial Mirror, “ug ang tibuok nga kosmolohiya gipadpad. . . . Ang mauswagong awtoridad sa siyentipikanhong pangatarongan nagpalagpot sa astrolohiya.” Kadto gidili sa mga unibersidad sa Uropa. Ug sa sinugdan sa ika-20ng siglo, ang historyanong si Bouché-Leclercq mibatbat sa Kasadpanhong astrolohiya ingong “patay na gayod.”

Kapin sa 30 ka tuig kanhi, ang usa ka surbing Gallup sa Inglaterra nagpadayag nga 6 porsiento lamang sa gisurbi nagtuo sa astrolohiya. Karon 80 porsiento ang gitahong nagtuo! Ug ang mga magasin, mga programa sa TV, ug mga mantalaan nagtaho sa mausbawong kaikag sa katilingban sa astrolohiya diha sa ubang kanasoran. “Ang unang butang akong basahon inigkakupot ko sa akong mantalaan,” ang usa ka tawo sa South Africa misulti sa koresponsal sa Pagmata!, “mao ang mga bituon.”

Nganong may pagkabanhaw? Sa gisukna nganong siya ug ang uban nagakonsulta sa mga astrologo, ang usa ka babayeng Italyana mitubag: “Nagkadaotdaot ang daghan kaayong butang niining kalibotana.” Oo, kita nagapuyo sa “mga panahong lisod sagubangon.” (2 Timoteo 3:1) Ug gibati sa pila ka tawo nga ang astrolohiya mohatag kanila sa gikinahanglang giya. Sa ingon misugod na usab pagsilang ang bituon sa astrolohiya. Mikaylap ang mga libro bahin sa ulohan. Ang ekspresyong “Unsa ang imong senyal?” nahimong pang-abli sa estorya. Ang pila ka tawo dili gani makigdeyt kon ang ilang “mga senyal”a dili magkauyon.

Apan, bisan pa sa tanan nga kabantogan niana ang mga panagna sa astrolohiya gipasukad gihapon sa kaduhaduhaang pasikaranan: nga ang mga posisyon sa adlaw, bulan, ug mga planeta panahon sa pagkahimugso sa usa ka tawo mopadayag sa iyang pagkatawo ug iyang kaugmaon. Bisan pa niana, ang propesyonal nga mga astrologo dili mag-ukon-ukon sa pagsulat sa mga horoskopyo nga nagagikan sa pila ka linya ngadto sa daghang panid—depende kon pilay andam ibayad sa usa ka tawo. Sumala sa magasing Psychology Today, “ang minilyong dolyar gigasto sa paghan-ay sa mga horoskopyo.” Sa pagkamatuod, ang Amerikanong siyentipiko si John Wheeler karong bag-o mireklamo nga ang iyang nasod “makaabot sa 20,000 ka astrologo ug 2000 lamang ka astronomo.”

Kusog kaayo ang pagbalik sa astrolohiya sa kanasoran sa Kasadpan nga ang anhing Swisong sikyatrista si Carl Jung misulat: “Kini nanuktok sa mga pultahan sa mga unibersidad nga gikan niana kini giabog mga 300 ka tuig kanhi.” Ngani, ang ubay-ubayng unibersidad sa Kasadpan karon nagatanyag ug mga kurso sa astrolohiya. ‘Mahimo kahang may kamatuoran ang astrolohiya?’ tingali mangutana ang usa ka tawo.

[Footnote]