Astrolohiya—Kini ba Dili-Makadaot nga Kalingawan?
DlLI pa dugay, ang Britanikong astronomo si Patrick Moore miingon: “Kataw-anan ang paghunahunang gikontrolar sa mga bituon ang mga kinabuhi ug mga dulnganan . . . [Ang astrolohiya] mao lamay dili-makadaot nga butang, apan ingong usa ka matang sa siyensiya kini wala gayoy pasikaranan.”
Ugaling, sa pagtan-aw sa mga butang gikan sa praktikal lamang nga punto de vista, ang usa mapugos sa paghinapos nga ang astrolohiya dili ingong dili makadaot.
‘Basola ang mga Bituon!’
Usa sa labing dayag nga mga kapeligrohan mao nga ang astrolohiya dili magdasig sa mga tawo sa pagpanubag sa ilang mga lihok. Pananglitan, tagda ang kaminyoon. Mipahayag ang usa ka astrologo sa South Africa mahitungod sa mga magtiayong may dili-magkabagay nga mga horoskopyo: “Gisultihan ko ang daghang tawo nga ang ilang kaminyoon walay purohang molampos, nga angay silang magdiborsiyo.”
Apan palandonga: Makataronganon ba ang pagtapos sa usa ka kaminyoon tungod kay ang mga bituon ug mga planeta dili maayong pagkaparis? Dili ba mas maayong ang mga magtiayong may mga suliran manubag sa ilang mga lihok ug magtinguhag tabang? Ang Bibliya nasudlan ug daghang praktikal nga tambag sa pagsulbad sa mga suliran sa kaminyoon. (Tan-awa, pananglitan, ang Efeso 5:22-25.) Ug daghan nga nagpadapat niana nakadiskobreng kini gayod ang hustong tabang ug nakaluwas sa ilang mga kaminyoon. Tinong kini mas maayo kay sa ipasangil ang mga suliran sa mga bituon!
Ug komosta ang daghang sayop nga atong mahimo sa kinabuhi? Maayo bang modangop sa astrolohiya aron pakamatarongon kana? Pila ka tuig kanhi, ang usa ka lalaking taga-Miami, Florida, (T.B.A.) gikiha sa panulis, panglugos, ug pangatake. lyang depensa? lyang gitigom ang tulo ka astrologo nga miangkong siya dili makasagubang tungod sa “wala magkauyong han-ay sa mga planeta.” Ang pagsunod niining matanga sa pangatarongan makapagahi lamang sa usa sa pagsubay sa dalan sa buhat nga daotan.
Gawas pa, hunahunaa kon ang katawhang responsable, sama sa mga pangulo sa nasod, mosugod sa pagsalig sa mga bituon alang sa giya. Sa librong Human Destiny—The Psychology of Astrology, si Gwyn Turner mihatag niining makapakurog nga pahinumdom: “Ang mga Hari ug mga Magmamando sa nangagi sa kanunay may mga Astrologo sa ilang kiliran ug bisan sa dili pa dugayng ikaduhang gubat sa kalibotan ang usa ka Hungarianong Astrologo, si Louis de Wohl, hilom nga gigamit sa Britanikong Opisina sa Guerra.” lyang gitagana sa mga Britaniko ang mga panagna bahin sa kalamposan sa tinong opisyales ug mga kadaogan sa tinong mga sangka. Nakatug-an usab siya sa Britanikong Opisina sa Guerra kon unsang tambag ang nabatonan ni Hitler gikan sa iyang mga astrologo sumala sa iyang horoskopyo. Ang pipila nagaangkon pang daghang politiko karong adlawa nagasalig sa mga bituon alang sa giya.
Alang kanimo daw dili ba makadaot nga ang mga desisyong maylabot sa kinabuhi ug kama-tayon isalig sa posisyon sa mga planeta?
Nagpaluyo sa Gahom sa Panagna
May panahong ang astrolohikanhong mga panagna matuman. Apan tungod ba gayod kana sa pagbasa sa mga bituon? Pila ka tuig kanhi, ang anhing sikologo si Vernon Clark nagtigi sa mga abilidad sa pila ka astrologo. lyang gihatagan silag napulo ka kaso sa kasaysayan ug gihangyo ang mga astrologo sa pagbagay sa matag usa ngadto sa usa sa duha ka horoskopyo. Ang mga astrologo talagsaong nagmalamposon! Tulo ka astrologo tukmang nakabagay gani nianang tanan!
Ang Amerikanong astrologo si Dal Lee nakakuhag pito ka husto sa pulo. Apan unsay hinungdan sa iyang kalamposan? Lagmit nalangkit ang labaw pa kay sa pagbasa sa mga bituon. “Angay mokabat labing menos tunga sa oras aron ang astrologo makatimbangtimbang sa matag tema, nga buot ingnon, napulo ka oras tanan,” gikatahong miingon si Lee. Apan, kay siya puliki niadtong panahona, si Lee “mihatag lamag usa ka minuto sa matag tema.” Nan, angkonon, ang iyang kalamposan dili “bug-os astrolohikanhon.” Mikompisal si Lee: “Ako nagtuo hinuon nga kadto usa ka kaso sa ‘extra-sensory perception.’”
Makaiikag, ang daghang astrologo susamang nag-angkon nga migamit sa butang katumbas sa okultong gahom. Kini butang tagdon sa mga tawong interesadong mopahimuot sa Diyos. Kay sa Isaias 1:13, ang Diyos pintok nagaingon: “Ako dili makaantos sa paggamit sa misteryosong gahom.” Ngano? Ang Bibliya nagapadayag nga ang katawhang nagapasundayag sa mga gahom sa panagna kadaghanan ilalom sa pagbuot o impluwensiya sa espirituhanong mga demonyo. (Itandi ang Buhat 16:16-18.) Busa ang astrolohikanhong mga panagna usahay mga pamahayag gayod sa mga demonyo—dayag nga mga kaaway sa Diyos ug sa katawhang nagaalagad kaniya! Kadaot lamay modangat kang bisan kinsang nagatinguha sa giya sa demonyo!
Astrolohiya—Usa ka Relihiyon?
Hinuon, giangkon sa pipila nga ang ilang kaikag sa astrolohiya kaswal o panagsa lamang. Apan ang kadaghanang magsugod nga panagsang interes maugmad nga butang susama sa relihiyosong debosyon. Ang usa ka siyentipikong mipirma sa gihisgotan nang deklarasyon batok sa astrolohiya miingon: “Alang sa pipila, ang astrolohiya pihong usa ka matang sa pag-eskapo . . . Alang sa uban, ang astrolohiya nahimong balaang pagpadayag, lunsayng kamatuoran—nga mao, usa ka tinuod nga relihiyon.” Ang mga awtoridad nagaingong ang pipila may kiling sa pagtuo nga ang mga panagna sa horoskopyo mahimong makapatagbaw-sa-kaugalingon nga mga tagna. Kon ingon niini ka dako ang pagkontrolar sa astrolohiya sa usa ka tawo, kini nahimo na gayong relihiyon.
Sa pagkamatuod ang astrolohiya nahimong opisyal nga bahin sa relihiyon sa karaang Babilonya. Apan kadto bang relihiyona nakahatag nianag kaayohan? Sa kaatbang, ang Bibliya nasudlan niini nga pamahayag batok sa karaang Babilonya: “Ikaw gilaayan sa kapid-an nimong magtatambag. Karon, patindoga sila, ug ipaluwas ka, ang mga magsisimba sa mga langit, ang mga astrologo, kadtong nagahatag ug kahibalo panahon sa bag-ong mga bulan mahitungod sa mga butang modangat kanimo.” (Isaias 47:13, potnot sa Ref. Bi.) Ang mga panagna sa mga astrologo wala makaarang sa pagluwas sa siyudad gikan sa pagkaagom sa malungtarong kagun-oban.—Isaias 13:19, 20.
Makaiikag, hinunoa, ang relihiyosong impluwensiya nakalahutay sa pagkalaglag sa Babilonya. “Gikan sa Babilonya,” matud sa librong A History of Astrology, “ang mga taga-Kaldea nagdala sa astrolohiya ngadto sa Ehipto, ug labaw pang hinungdanon ngadto sa Gresya.”
Busa ang pagtuman sa relihiyon sa astrolohiya peligroso. Ngano man? Kay sumala sa Bibliya, ang tanang relihiyon nga gipasukad sa mga pagtuo nga Babilonyanhon gikatakda nang malaglag. Sa pagkamatuod, ang pagkapukan sa Babilonya nagapunting niining umaabot nga pagkalaglag. Sa Pinadayag 18:4, kita gipasidan-an: “Gumula ka kaniya [Babilonyanhong organisasyon], akong katawhan, kon dili nimo buot makaambit sa iyang mga sala, ug kon dili nimo buot makadawat sa bahin sa iyang mga hampak.”
Busa ang astrolohiya dili matawag ‘dili-makadaot nga kalingawan.’ (Itandi ang Deuteronomio 18:10-12.) Ang pagtuman niana mamahimong unang tikang sa pagkailalom sa peligroso, demonyohanong mga impluwensiya ug pagkawala sa pagpakighigala sa Diyos! (2 Corinto 6:17, 18) Tinuod, kitang tanan nagkinahanglag giya. Apan pagkalabi pang luwas ug maayo ang pagdangop sa Bibliya alang sa giya! (Salmo 119:105) Kadtong nagapamati sa Pulong sa Diyos makaangkon sa praktikal nga tabang sa pagsagubang sa mga suliran sa kinabuhi, usa ka butang wala ikahatag sa astrolohiya.
[Letrato sa panid 8]
Mipahayag ang usa ka astrologo sa South Africa: “Gisultihan ko ang daghang tawo nga ang ilang kaminyoon walay purohang molampos, nga angay silang magdiborsiyo”
[Letrato sa panid 9]
Ang pagsalig sa karaang Babilonya sa astrolohiya wala makapugong sa iyang kalumpagan