Kapitulo 8—Pagkaluwas Ngadto sa Usa ka Bag-ong Yuta
Mga Maluwas Gikan sa Tanang Nasod
1. Unsang saad kang Abraham ang nagapakitang ang pag-uyon sa Diyos posible alang sa “tanang banay” sa katawhan?
Si Jehova sa kamahigugmaon interesado sa katawhan sa tanang nasod ug tribo. Iyang gihimo ang tagana aron ang tanang pamilya sa yuta makapahimulos sa iyang pag-uyon ug panalangin. Kang Abram (Abraham), usa ka kaliwat sa anak ni Noe si Sem, si Jehova miingon: “Pumahawa ka gikan sa imong yuta ug sa imong mga kabanay ug sa balay sa imong amahan ug umadto ka sa yuta nga akong ipakita kanimo; ug pagahimoon ko ikaw nga usa ka dakong nasod ug pagapanalanginan ko ikaw ug pagahimoon ko nga dako ang imong ngalan; ug pamatud-i nga ikaw usa ka panalangin. Ug akong pagapanalanginan kadtong magapanalangin kanimo, ug siya nga magatunglo kanimo akong pagatunglohon, ug ang tanang banay sa yuta magapanalangin gayod sa ilang kaugalingon pinaagi kanimo.” (Genesis 12:1-3; Buhat 7:2-4) “Ang tanang banay sa yuta”—kana nagaapil kanato karong adlawa, bisan pag sa unsang nasod kita matawo o ang atong pinulongan.—Salmo 65:2.
2. (a) Sama kang Abraham, unsang hiyas ang atong gikinahanglan? (b) Sumala sa gipakita sa Hebreohanon 11:8-10, sa unsang paagi si Abraham mihatag ug pamatuod niining hiyasa?
2 Ang tawo nga gisaaran niini ni Jehova maoy usa ka tawo sa pagtuo, maingon nga kinahanglang kita may pagtuo aron kita makaambit sa panalangin gikan sa Diyos nga gisaad dinhi. (Santiago 2:23; Hebreohanon 11:6) Ang pagtuo ni Abraham dili lamang walay-lihok nga pagtuo kondili giubanan sa buhat. Kadto nagpahinabo nga siya mipahawa sa Mesopotamia aron moadto sa layong yuta nga wala niya sukad makita. “Tungod sa pagtuo siya mipuyo ingong dumuloong sa yuta sa saad samag diha sa usa ka langyawng yuta,” nga wala moipon sa bisan hain sa mga siyudad-gingharian didto. “Kay siya nagpaabot sa siyudad [Gingharian sa Diyos] nga may tinuod nga mga patukoranan, nga ang magtutukod ug magbubuhat sa maong siyudad mao ang Diyos.”—Hebreohanon 11:8-10.
3. Unsang matugkarong pagsulay sa pagtuo ang naagian ni Abraham mahitungod kang Isaac?
3 Sa nag-edad si Abraham ug 100 ka tuig ug 90 ang iyang asawa si Sara, si Jehova milagrosong nagpanalangin kanila sa usa ka anak lalaki, si Isaac. Maylabot sa maong anak, naagian ni Abraham ang matugkarong pagsulay sa pagtuo ug pagkamasinugtanon ngadto sa Diyos. Gisugo ni Jehova si Abraham sa pagdala kang Isaac, nga niadto ulitawo na, ngadto sa yuta sa Moria ug paghalad kaniya ingong halad-nga-sinunog. Tungod sa pagtuo sa katakos sa Diyos sa pagpasig-uli sa kinabuhi sa iyang anak pinaagi sa pagkabanhaw, si Abraham misugot. (Hebreohanon 11:17-19) Si Isaac, kay mapinasakopon sa iyang amahan, gigapos na ibabaw sa halaran ug diha sa kamot ni Abraham ang punyal nga gamiton sa pagpatay kaniya dihang mibalda ang manulonda ni Jehova. Ang pagsulay igo na sa pagpamatuod nga si Abraham walay ihikaw gikan sa Diyos. Busa gilig-on sa Diyos ang iyang pakigtugon kang Abraham, sumala sa ginaingon sa Bibliya:
4. Niadtong higayona, unsang dugang importanteng saad ang gihimo sa Diyos mahitungod sa katawhan sa tanang nasod?
4 “‘Sa akong kaugalingon ako manumpa,’ mao ang mga pulong ni Jehova, ‘nga tungod kay imong gibuhat kining butanga ug wala nimo ihikaw ang imong anak, ang imong bugtong nga anak, pagapanalanginan ko gayod ikaw ug padaghanon ko ang imong binhi sama sa mga bituon sa mga langit ug sama sa mga balas sa baybayon; ug ang imong binhi managiya sa ganghaan sa iyang mga kaaway. Ug pinaagi sa imong binhi ang tanang nasod sa yuta magapanalangin sa ilang kaugalingon tungod kay ikaw nagpatalinghog sa akong tingog.’”—Genesis 22:15-18.
5. (a) Unsay gilandongan sa paghalad unta ni Abraham kang Isaac? (b) Ingong katumanan sa Genesis 12:3, sa unsang paagi ang katawhan ‘magatawag ug daotan’ diha sa Labawng Abraham, ug unsay sangpotanan? (c) Sa unsang paagi kita “makapanalangin” kaniya?
5 Kon atong hisabtang ang Labawng Abraham mao si Jehova ug nga si Isaac naglandong kang Jesu-Kristo, kita makapabili nga kining mga hitaboa hinungdanon kanato sa personal. Sa kamatuoran, ang atong paagi sa paglihok bahin kang Jehova nga Diyos mao ang maghukom sa atong umaabot. Ang kalaomang kinabuhing dayon posible alang kanato tungod kay gihatag sa Diyos ang iyang bugtong Anak ingong halad alang sa atong mga sala, sumala sa gihulagway sa paghalad unta ni Abraham kang Isaac. (Juan 3:16) Si bisan kinsang mopadayon sa ‘pagtawag ug daotan’ kang Jehova, nga magatamay kaniya o dili magpakabana sa iyang mahigugmaong mga katuyoan, mailalom sa tunglo nga magkahulogan sa ilang walay-kataposang kalaglagan. (Itandi ang 1 Samuel 3:12-14; 2:12.) Apan kon kita mga tawong may pagpabili, atong “pagapanalanginan” ang Labawng Abraham. Sa unsang paagi? Pinaagi sa pag-ila nga ang tanang maayong butang nagagikan kang Jehova, apil ang dili-takos nga gasa sa kinabuhi pinaagi sa iyang Anak. Gawas pa, atong sultihan ang uban mahitungod sa pagkamaayo ni Jehova ug ang labing maayong mga hiyas sa iyang pagmando. (Santiago 1:17; Salmo 145:7-13) Niining paagiha kita mahalinya sa pagdawat sa mga panalangin gikan kaniya sa walay kataposan.
Ang Gisaad nga “Binhi” ni Abraham
6. (a) Kinsa ang pangunang “binhi” ni Abraham? (b) Sa unsang paagi atong mabatonan ang panalangin nga moabot pinaagi kaniya?
6 Ingong bahin sa iyang kahikayan sa pagpanalangin sa katawhan gituyo ni Jehova ang usa ka matarong langitnong kagamhanan. Si Jesu-Kristo natawo ingong kaliwat ni Abraham, ingong iyang labing importanteng kaliwat, o “binhi,” ug diha kaniya gihatag ni Jehova ang pagkahari. (Galacia 3:16; Mateo 1:1) Busa, sumala sa gipaila sa panumpa sa Diyos ngadto kang Abraham, pinaagi kang Jesu-Kristo nga ang katawhan sa tanang nasod sa yuta pagapanalanginan. Ginabuhat ba nimo kon unsay gikinahanglan aron mabatonan ang panalangin sa imong kaugalingon? Pananglitan, ang imo bang dalan sa kinabuhi nagapasundayag nga imong giila kon unsa ka hinungdanon kanimo ang halad sa kinabuhi ni Jesus? Ikaw ba nagapasakop gayod sa iyang awtoridad ingong Hari?—Juan 3:36; Buhat 4:12.
7. (a) Kinsa pa ang naapil sa “binhi ni Abraham”? (b) Sa unsang paagi kita nahibalo nga dili tanang matinumanong magaalagad sa Diyos moadto sa langit?
7 Gihatagan si apostol Juan ug usa ka matagnaong pasiunang talan-awon sa langitnong mga hitabo nga niana iyang nakita ang ubang kauban ni Jesu-Kristo sa langitnong Bukid Sion. Sila, usab, maoy bahin sa “binhi ni Abraham.” Sumala sa giingon sa Pinadayag 14:1-5, sila “gipalit gikan sa katawhan” ug ang ilang gidaghanon maoy 144,000. (Galacia 3:26-29) Kinsay naapil kanila? Ang Bibliya nagapatin-aw kaayo nga dili gayod katuyoan sa Diyos ang pagdala sa tanang tawong mahilig sa pagkamatarong ngadto sa langit. (Mateo 11:11; Buhat 2:34; Salmo 37:29) Ang dakong pribilehiyo sa pagpakig-ambit uban kang Kristo diha sa Gingharian sa langit limitado ngadto sa “gamay nga panon” nga mahimong mga hari ug mga saserdote uban niya sulod sa usa ka libo ka tuig.—Lucas 12:32; Pinadayag 5:9, 10; 20:6.
8. Kanus-a nagsugod ang pagpili sa “gamay nga panon,” ug hangtod kanus-a kini mopadayon?
8 Giunsa pagpili ang maong “gamay nga panon”? Ang malulutong pagdapit sa pag-ambit sa langitnong Gingharian gipaabot pag-una ngadto sa kinaiyanhong mga Israelinhon. Apan tungod sa kakulang sa ilang pagtuo, wala nila itagana ang bug-os 144,000. Busa ang mga Samarianhon ug, sa ulahi, ang katawhan sa tanang nasod gidapit. (Buhat 1:8) Ang una sa kaubang mga manununod ni Kristo gidihogan sa balaang espiritu panahon sa Pentekostes sa 33 K.P. Ang pagpili sa maong grupo nagapadayon hangtod ang 144,000 gipatikan sa Diyos ingong inuyonan. Unya ang pagtagad gitumong ngadto sa pagtigom ug mga tawo nga mabuhi sa yuta ingong mapabilhong mga ginsakpan sa langitnong kagamhanan.
9. (a) Unsang mga ekspresyon diha sa Bibliya mapadapat niining langitnong matang? (b) Kinsay gilandongan sa kinaiyanhong mga Israelinhon?
9 Kadtong mga manununod sa langitnong Gingharian uban kang Kristo gitumong diha sa Kasulatan ingong “mga pinili,” “mga balaan,” mga tawong “dinihogan . . . [sa] Diyos.” (2 Timoteo 2:10; 1 Corinto 6:1, 2; 2 Corinto 1:21) Sila gibatbat usab nga tingob ingong “pangasaw-onon” ni Kristo. (Pinadayag 21:2, 9; Efeso 5:22-32) Kon tan-awon gikan sa ubang punto de vista, sila gitawag “mga igsoon” ni Kristo, “kaubang mga manununod ni Kristo” ug “mga anak” sa Diyos. (Hebreohanon 2:10, 11; Roma 8:15-17; Efeso 1:5) Walay pagsapayan sa ilang nasyonalidad, sila, sa espirituwal nga pagkasulti, “ang Israel sa Diyos.” (Galacia 6:16; Roma 2:28, 29; 9:6-8) Sa dihang gitapos ni Jehova ang iyang tugon sa Kasugoan uban sa unodnong Israel, iyang gidala ang espirituwal nga Israel sa bag-ong tugon uban kaniya. Apan ang iyang mga pakiglabot sa unodnong Israel samtang sila nailalom sa Kasugoan maoy hulad sa mga butang umaabot. (Hebreohanon 10:1) Nan, kinsay gilandongan sa nasod sa unodnong Israel, nga gipili sa Diyos ingong iyang “linaing kabtangan”? Ang mga kamatuoran nagapunting sa espirituwal nga Israel, kadtong si kinsa gipili sa Diyos sa pagmando uban kang Kristo sa langit. (Itandi ang Exodo 19:5, 6 sa 1 Pedro 1:3, 4 ug 2:9.) Uban kang Kristo sila mao ang ahensiya nga pinaagi niana ang mga panalangin ipaabot sa tanang masinugtanon sa katawhan. Ang pag-ila niini maoy usa ka yawi sa pagsabot sa Bibliya.
Kadtong Gipanalanginan Pinaagi sa “Binhi”
10. Kinsay gihulagwayan sa dili-Israelinhong mga magsisimba ni Jehova?
10 Sa panahong ang Diyos nakiglabot sa linaing paagi sa nasod sa Israel, gihimo usab niya ang mahigugmaong mga tagana alang sa mga tawong dili sakop nianang nasora apan kansang mga kasingkasing nagtukmod kanila sa pagpakig-ambit sa matuod nga pagsimba duyog sa mga Israelinhon. Sila linaing gihisgotan diha sa talaan sa Bibliya. Sila ba, usab, may mga katumbas karong adlawa? Aduna gayod. Sila nagahulagway sa daghang paagi niadtong dili espirituwal nga mga Israelinhon apan nagamahal sa kahibulonganong kalaoman sa kinabuhing dayon ingong yutan-ong mga sakop sa Gingharian sa Diyos. Kini sila mao ang gihisgotan sa Diyos ngadto kang Abraham, sa pag-ingong ang katawhan gikan sa “tanang nasod sa yuta” magapanalangin sa ilang kaugalingon pinaagi sa iyang “binhi.”—Genesis 22:18; Deuteronomio 32:43.
11. (a) Unsang paghisgot ang gihimo bahin niining grupoha sa pagpahinungod sa templo ni Solomon? (b) Sa unsang paagi ang “mga dumuloong” ‘mianib kang Jehova’ sa atong adlaw, sumala sa gitagna sa Isaias 56:6, 7?
11 Sa tanang panahon maoy katuyoan sa Diyos nga ang tanang tawo mahiusa sa matuod nga pagsimba. Haom, sa pagpahinungod sa templong gitukod ni Solomon sa Jerusalem, ang hari miampo nga si Jehova mamati sa pag-ampo sa mga langyaw nga matinguhaon sa paghatag ug dalawatong pagsimba uban sa Israel. (2 Cronicas 6:32, 33) Ug, sa Isaias 56:6, 7, ang Diyos misaad: “Ang mga dumuloong nga mianib kang Jehova aron sa pag-alagad kaniya ug sa paghigugma sa ngalan ni Jehova, aron mahimong iyang mga alagad, . . . Pagadad-on ko usab sila ngadto sa balaan kong bukid ug papagmayaon sila sulod sa akong balay sa pag-ampo. . . . Kay ang akong balay pagatawgon nga balay sa pag-ampo alang sa tanang katawhan.” Nga nagabanaag sa espiritung gipaila dinhi, ang modernong-adlawng “mga dumuloong” karon natigom gikan sa tanang nasod, dili lamang ingong kaswal nga mga maniniid, kondili ingong mga tawo nga ‘mianib kang Jehova.’ Kini ilang ginabuhat pinaagi sa pagpahinungod sa ilang mga kinabuhi ngadto kaniya, pinaagi sa pagpasimbolo niini pinaagi sa pagtuslob sa tubig ug dayon pag-alagad sa paaging nagapasundayag sa ilang gugma alang sa “ngalan ni Jehova” ug sa tanang gihawasan niini.—Mateo 28:19, 20.
12. Sa unsang paagi ang Moisesnong Kasugoan nagapaila kon kaha kadtong nagalaom nga mahimong yutan-ong mga ginsakpan sa Gingharian sa Diyos kinahanglang magpahiuyon ngadto sa hatag-as nga mga sukdanan nga mapadapat sa espirituwal nga Israel?
12 Ang pagkamatinumanong gikinahanglan gikan kanila sama ra niadtong sa dinihogan-sa-espiritung mga Kristohanon. Ilalom sa Moisesnong Kasugoan, gibaod ni Jehova sa “langyawng molupyo” nga midawat sa matuod nga pagsimba ang pagsunod sa samang kasugoan nga gipatuman sa Israel. (Numeros 15:15, 16) Ang relasyon tali kanila dili lamang kay pagkamatinugoton kondili may gugmang tiunay. (Levitico 19:34) Sa susama, kadtong gilandongan sa langyawng mga molupyo matinguhaon sa pagpahiuyon sa ilang mga kinabuhi nga bug-os nahiuyon sa mga kinahanglanon ni Jehova ug pag-alagad diha sa mahigugmaong panaghiusa uban sa mga nahibilin sa espirituwal nga Israel.—Isaias 61:5.
13. Unsang mga detalye sa Isaias 2:1-4 ang atong ibutang sa kasingkasing aron kita maluwas ngadto sa “bag-ong yuta”?
13 Pinaagi sa iyang manalagnang si Isaias, gibatbat ni Jehova ang maikagong panon sa mga tawo gikan sa “tanang nasod” nga karon nagahugop ngadto sa unibersohanong balay sa pagsimba ni Jehova. Siya mitagna: “Ang daghang mga katawhan motungas gayod ug magaingon: ‘Umari kamo, kamong katawhan, ug manungas kita ngadto sa bukid ni Jehova, ngadto sa balay sa Diyos ni Jacob; ug kita iyang pagatudloan sa iyang mga dalan, ug kita magalakaw sa iyang mga alagianan.’” Ingong sangpotanan, ilang ‘gisalsal ang ilang mga pinuti nga mga punta sa daro’ ug, bisan taliwala niining gubot nga kalibotan, sila ‘dili na makakat-on sa gubat.’ (Isaias 2:1-4) Nahisakop ka ba nianang malipayong panon? Gibati ba usab nimo ang ilang tinguha nga makakat-on sa mga kinahanglanon ni Jehova, sa pagpadapat niini diha sa imong kinabuhi ug sa paghunong sa pagsalig sa mga hinagiban sa gubat? Ang Diyos nagsaad nga ang usa ka dakong panon nga magasunod niining dalana “manggula gikan sa dakong kasakitan” ingong mga maluwas ngadto sa iyang malinawong “bag-ong yuta.”—Pinadayag 7:9, 10, 14; Salmo 46:8, 9.