Bag-ong mga Pasilidad sa Shipping sa mga Saksi ni Jehova

KINING dako kaayong edipisyo, sa tabok sa pantalan gikan sa iladong Wall Street nga lugar sa patigayon sa New York, mao ang prominenteng bahin sa piyer sa Brooklyn. Nahimutang sa 360 Furman Street, sa pipila ka bloke gikan sa mga pabrika sa imprintahan sa mga Saksi ni Jehova, maayong lugar kini sa pagpadala sa ilang literatura sa Bibliya sa tibuok-kalibotan.

Unang gitukod sa 1928, ang edipisyo sa Furman Street gipalit sa mga Saksi ni Jehova sa Marso 15, 1983. Sukad niadto, miagi kinig daghan dagkong mga pag-ayo. Sa Enero niining tuiga, ang kataposang namuyo sa edipisyo mibalhin, busa gigamit sa mga Saksi ni Jehova ang tibuok luna.

Ang edipisyo adunay usa ka milyong piye kuwadrado (93,000 sq m) nga luna sa salog, o hapit 23 ka akre (9 ha), hapit ang ikatulong bahin niini gigahin sa bag-ong Departamento sa Shipping. Ang lapad kaayong ikaduhang andana—373 piye por 345 piye (hapit sama ka dakoa sa 1 1/2 nga nataran sa soker)—nagapahiluna sa mga opisina ug modernong conveyor system nga nagapadali sa pag-atiman sa mga pedido sa literatura.

Sa wala pa ibalhin ang Departamento sa Shipping ngadto sa Furman Street sa tinghunlak sa 1985, mokabat ug unom ka semana sa pag-atiman sa mga pedido sa literatra nga naghuot diha sa dapit sa shipping sa 30 Columbia Heights. Apan karon, pinaagi sa sistema sa kompiyoter, sa conveyor system, ug sa dakong luna nga katrabahoan, ang pedido sagad mapadala sulod sa pito ka adlaw gikan sa adlaw sa pagdawat sa pedido. Atong tan-awon ang departamento ug ang pagpalakaw niini.

Dinhi ang mga libro ug mga pulyeto nga kapin sa usa ka gatos ka nagkalainlaing pinulongan gipundo. Kada bulan, hapit usa ka libong tonilada sa literatura ang ginapadala sa tibuok yuta, nga gikan sa lokasyon sa Furman Street o direkta sa duol nga imprintahan ngadto sa pantalan aron ikapadala sa gawas sa nasod. Mga 2,000 ka pedido sa literatura sa usa ka semana ang

giatiman sa Furman Street ug ipadala ngadto sa kapin sa 8,400 ka kongregasyon sa mga Saksi ni Jehova sa Tinipong Bansa.

Ang modernong conveyor system gipalit aron mas masayon ang pagtigom, pag-impake, ug pagpadala sa literatura. Gitaod kini sa mga Saksi ni Jehova. Mikabat ug hapit upat ka bulan ang pagtaod ug nahuman sa sayong bahin sa Oktubre 1985. Mga tulo ka bahin sa tres-kuwarto sa usa ka milya (1 km) sa mga gamit sa conveyor apil sa 54 ka makinang nagapadagan sa nagkalainlaing belt ug mga kable ug sa 30 ka photoelectric eyes aron sa pagkontrolar sa agos sa literatura.

Ang pagpalakaw sa shipping adunay upat ka seksiyon. Ang unang seksiyon, ang opisina sa shipping, diin dinhi madawat ug atimanon ang mga pedido. Kompiyoter ang gigamit sa paghimog resibo ug sa listahan sa literatura nga pagatigomon alang sa matag pedido. Ang ikaduhang seksiyon mao ang sistema sa pagtigom aron kabutangag literatura ang mga pedido. Ang ikatulo mao ang dapit sa pag-impake diin dinhi susihon ang mga literatura ug impakehon sa mga karton. Ang ikaupat mao ang estasyon sa pagprisyo sa selyo, diin ang matag karton timbangon ug butangag tukmang selyo. Dayon kining kartona ipadala ngadto sa pundohanan sa mga trak aron ikapadala.

Apan, ang edipisyo sa 360 Furman Street, nagapahiluna ug daghan pa kay sa Departamento sa Shipping. Napahiluna usab dinhi ang uban pang mga departamento.

[Mga Letrato sa panid 18]

Ubang mga Buluhaton sa Edipisyo sa Furman Street

Niining dakong Pandayan, nga may 56,000 piye kuwadradong luna sa salog, dinhi himoon ang mga muwebles alang sa mga opisina ug sa mga lawak sa mga trabahante sa hedkuwarter

Ang Departamento sa Braille nagagamag kapin sa 48 ka publikasyon, ug sa enterong isyu sa matag “Watchtower” alang sa kapin sa 600 ka mga tigsuskriber. Ang mga butang sa Braille gipadala ngadto sa kapin sa 35 ka nasod

Hangtod sa 35,000 ka librang ductwork ug ubang sheet-metal gigama dinhi ug gitaod bulan-bulan diha sa mga edipisyo sa Sosyedad sa Brooklyn ug sa Watchtower Farms

Sulod sa miaging tulo ka tuig, ang Departamento sa Pagkopya sa mga Teyp nakahimog kapin sa 11 ka milyong mga rekording sa cassette sa Ingles, Kinatsila, Pranses, ug Portuges

Ang aluminum nga mga kuwadro sa bentana ug mga bildong giputos sa thermopane gigama dinhi alang sa mga edipisyo sa Watchtower Society nga nakamenos ug dako sa gastos. Ang gasto sa heater nga madaginot gikan sa bag-ong mga bentana makatapal ning proyektoha sa mubong yugto

Ginahimo usab dinhi ang personal nga mga trabaho alang sa 2,500 ka sakop sa hedkuwarter

Lugar kini sa pag-apholster sa muwebles alang sa mga lobby ug sa mga opisina sa hedkuwarter sa mga Saksi ni Jehova

Ang pagpintura pinaagig isprey nagpasinaw sa tanang muwebles, mga bangko sa pandayan, tarima, pultahan, ug uban pa sa Sosyedad