“Wala Namo Basola ang Diyos”
SA DIHANG ang flight 103 sa Pan American gipabuto sa mga terorista didto sa panganod sa miaging Disyembre uban sa 259 ka tawo nga nagsakay, ang Romano Katolikong obispo sa Galloway, si Maurice Taylor, may mapait nga mga pulong alang sa Diyos:
“Amahan, kon Ikaw mao ang Diyos sa gugma, nganong Imong gitugotan kini nga mahitabo? Nganong Imong gitugotang mamatay ang ginatos ka inosenteng mga kinabuhi? Ang 10 kinsa mga lungsoranon sa Lockerbie? Ang dinosena pang uban kinsa wala makadungog pa sa Lockerbie, apan kansang mga kinabuhi natapos sa makalilisang diha sa mga karsada ug sa kaumahan niining bahina sa Scotland? Ug nganong Imong gitugotan nga daghan kaayong tawo ang mag-antos sa mabangis makalilisang nga palas-anon sa pagbangotan?”
Dinosenang mga estudyante gikan sa Syracuse University sa Tinipong Bansa ang naapil sa mga biktima. Si Mildred Sachuck, mayordoma sa usa sa mga praternidad niini, miingon bahin sa mga terorista nga nagbutang sa bomba: “Maayo pang pabuthan nato sila paingon sa ispidno.”
Ang usa ka taho sa prensa miingon: “Ang flight attendant si Paul Garrett, 41, nagplano sa pagbukas ug tindahan sa Paris human sa 15 ka tuig nga pagtrabaho sa kompaniya sa ayroplano. ‘Ang makalilisang nga trahedya mao nga kini unta mao ang iyang kataposang biyahe,’ miingon si Jan MacMichael, usa ka higala sa Millbrae, Calif.”
Ang reaksiyon sa mga ginikanan ni Paul, si Ernest ug Nadine Garrett, mga Saksi ni Jehova nga nagpuyo sa Millbrae, lahi kaayo sa mga reaksiyon sa obispo sa Galloway ug sa mayordoma sa Syracuse. Ang reaksiyon sa mga ginikanan ni Paul gipabanaag diha sa usa ka sulat nga ilang gipadala sa pagtubag sa mga pahasubo nga nadawat gikan sa kaubang Saksi sa New York City:
Usa ka Tibuok-Yuta nga Panag-igsoonay
“Pagkabuotan nimo, Karl, sa paggahin ug higayon gikan sa imong okupado nga iskedyol sa pagpadala kanamo ug makahupay nga sulat. Usa kini sa daghan. Kami nakadungog gikan sa mga Saksi sa Norway, Italya, Pransiya, Inglaterra, ug Cameroon—halos 600 ka kard, mga telegrama, ug mga sulat, ug kapin sa 250 ka tawag sa telepono gikan sa tibuok kalibotan. Daghan kaayog kaila si Paul, sa pagkahimong flight attendant sa daghang tuig sa kompaniya sa ayroplano sa Pan American. Ang mga serbisyo sa paglubong gihimo sa Paris, San Francisco, ug sa Jacksonville, Florida, nga may total nga tumatambong nga 1,385.
“Ang lokal nga mga Saksi sa among nasakopang kongregasyon ug sa silingang mga kongregasyon maoy miatiman sa among panimalay ug namalit sa pagkaon, nagluto ug nag-andam niana, nanglimpiyo sa among balay, nagpulihay sa pagkatulog diha sa among balay, wala gayod kami biyai nga nag-inusara bisan usa ka gutlo sulod sa duha ka semana aron sa pagtino nga kami okey. Sa pagkamatuod, ang mga Saksi ni Jehova sa tibuok-yuta dunay ‘gugma sa ilang taliwala.’—Juan 13:35.
“Ang hawas sa Pan American nga natudlo sa among pamilya sa paghatag paglipay ug pahasubo mikomento: ‘Ako mianhi aron sa paglipay ninyo, apan ako hinoon ang napahalipayan. Dunay butang lahi niining mga tawhana nga akong namatikdan ning okasyona.’ Sa gipangutana kon unsay iyang buot ipasabot, siya miingon: ‘Kining mga tawhana tinuod nga may kabalaka sa usa ug usa.’
“Mapasalamaton kami nga nakasabot kami sa Bibliya ug nahibalo nga ang ‘panahon ug dili-madahom nga hitabo’ mapildihon. (Ecclesiastes 9:11) Nakasabot niini, Karl, dili gayod kami sa pagkadimakataronganon magayubit sa Diyos o magapasipala kaniya tungod ning trahedya, sama sa gihimo sa Katolikong obispo sa Galloway. Wala, wala namo basola ang Diyos sa kamatayon sa among anak. Ang obispo, hinunoa, nagaingon nga si Jehova dili Diyos sa gugma.—1 Juan 4:8.
“Ni naninguha kami sa pagpanimalos sa mga terorista, sama sa gihimo sa mayordoma sa Syracuse nga praternidad nga namatyag sakop sa pagkahulog sa ayroplano, kinsa miingon: ‘Maayo pang pabuthan nato sila paingon sa ispidno.’ Kining mga butanga among isalig sa Diyos, kinsa miingon: ‘Akoa ang panimalos; ako ang magabalos.’—Roma 12:19.
“Ug sa kataposan, apan hinungdanon, mao ang katingalahang paglaom sa pagkabanhaw nga nagalig-on kanamo sa matag adlaw hangtod nga among makita ang among pinalanggang anak pag-usab. ‘Kon ang tawo mamatay, mabuhi ba siya pag-usab?’ nangutana ang tawong si Job sa dugay nang kasiglohan kanhi. Buweno, gitubag sa Bibliya kanang pangutanaha diha sa Isaias 26:19: ‘Ang imong mga patay mangabuhi . . . Sila mangabanhaw.’ Kami nalipay nga ang among anak namatay nga matinumanon ingong usa sa mga Saksi ni Jehova, nga may maayong ngalan sa Diyos, usa ka ngalan nga Iyang hinumdoman sa panahon sa pagkabanhaw. (Ecclesiastes 7:1, potnot; Juan 5:28) Busa, gibati namo ang kaguol sa kamatayon sa among anak, apan kay may paglaom sa pagkabanhaw, ‘kami wala managsubo sama sa uban nga walay paglaom.’”—1 Tesalonica 4:13.
Gibiyaan ni Paul ang iyang asawa, si Dominique. Siya nagpuyo sa Paris, Pransiya, nga usa sa mga Saksi ni Jehova, ug mibati sama sa gibati sa mga ginikanan ni Paul. Wala usab niya basola ang Diyos sa iyang makasubong kapildihan ug nagaatubang sa umaabot uban ang kaisog ug paglaom.
Ang mga Tawo ba Nagtinguha Gayod nga Hunongon na sa Diyos ang Pagtugot sa Pagkadaotan?
Sa karaang panahon ang tawong ginganlag Job nag-antos sa mga kalamidad nga dili gikan kang Jehova, apan iyang gitamay si Jehova uban niini nga pangutana: “Maayo ba kanimo nga ikaw magabuhat ug daotan?” Gitubag siya ni Jehova sa laing pangutana: “Pakasaypon mo ba ako ug ikaw maoy husto?” (Job 10:3; 40:8) Aron matudloan si Job, gisobli sa Diyos ang daghan sa Iyang mga kalalangan sa kalangitan ug sa yuta nga nagapabanaag sa Iyang mga hiyas sa hustisya, kaalam, gahom, ug gugma. (Job, kapitulo 38-41) Si Job nakaamgo sa iyang sayop ug sa iyang kabalaka sa kaugalingon, nga nagaingon: “Bawion ko ang akong gisulti, ug ako maghinulsol sa abog ug abo.”—Job 42:6.
Pinaagi sa ilang pagpakasala ang mga tawo, mohatag daghang kalamidad sa ilang kaugalingon ug sa uban. Sila nanagwali batok sa pagtugot sa Diyos sa pagkadaotan samtang sila managsamang nagatugot ug nagabuhat niana. (Itandi ang Roma 2:1, 21-24.) Ang ilang pagkadaotan dunay daghang porma—pagpamakak, panikas, pangawat, pagdaogdaog, pakighilawas, panapaw, homoseksuwalidad, pagbuno, paghimog mga armas ug mga bomba, nagapakiggubat ug mga rebolusyon, ang tanan dagayang giwisikan sa mga pagpakamatarong sa kaugalingon, mga pagkasalingkapaw, ug mga pagpanamastamas. Ang ubang sosyal nga mga siyentipiko nag-ingon nga ang mga katilingban, tungod sa ilang pagpihig ug sa mga pagdaogdaog sa pipila ka grupo, nakamugnag usa ka yuta nga diin ang rebelyon nanungha, ug ang mga nangawad-an sa paglaom sa pagkadi-makataronganon nangahimong mabangis nga mga terorista, nga ginapatay ang walay labot nga mga inosente. (Itandi ang Exodo 1:13, 14; 1 Hari 12:12-14, 16, 19; Miqueas 7:3, 4; Mateo 7:12.) Matin-aw nga nagsulti sa matuod ang Ecclesiastes 8:9 sa dihang kini nag-ingon: “Ang tawo nagmando sa tawo alang sa iyang kadaot.”
Kon wala pa itugot sa Diyos ang ilang pagkadaotan, kon siya nangilabot pa pinaagig puwersa sa pagsumpo niana, ang ilang singgit sa pagprotesta nga gilapas ang ilang mga kagawasan mosangko sa hataas nga kalangitan! Sila sa pagkamatuod gusto nga iyang tugotan sila sa ilang pagkadaotan, apan gusto sila nga mopugas niana nga walay pag-ani sa mga resulta niana.—Galacia 6:7, 8.
Sila dili-matinud-anon ug mapaubsanon sama kang Job, kinsa naghinulsol sa nakasabot siya nga si Jehova dili mao ang tuboran sa iyang mga kalamidad. Ang katilingban karong adlawa wala maglakaw uban sa Diyos ug busa nagaani sa mga kalamidad sa iyang mga dalan, kay “wala diha sa tawo nga nagalakaw aron sa pagtultol sa iyang mga lakang.” (Jeremias 10:23) Daghang milenyo sa tawhanong kasaysayan nagpamatuod nga kini matuod.
Apan kining tanan mabag-o sa dili pa matapos kining kaliwatana, dihang pulihan sa Gingharian ni Kristo kining satanikong sistema sa mga butang. (Daniel 2:44; Mateo 24:34; 2 Corinto 4:4; 1 Juan 5:19) Dayon, ‘wala na unyay pagminatay, ni paghilak, ni kasakit, wala na unyay kamatayon,’ kay si Jehova nga Diyos nagaingon: “Tan-awa! Ginabag-o ko ang tanang mga butang.”—Pinadayag 21:1, 4, 5; 2 Pedro 3:13.
[Letrato sa panid 15]
Flight attendant nga si Paul Garrett