Gikan sa Among mga Magbabasa
Pagpaniwang Sa una kong nakita ang artikulo sa Mayo 22, 1989, nga isyu bahin sa pagpaniwang, sa ubay-ubayng semana akong gilangan ang pagbasa niana. Abi ninyo, ako tambok sa tibuok kong kinabuhi. Aw, bag-o ko lang nabasa kini ug nadasig kaayo ako, maikagon pa, sa pagtuman sa maayo, mahigugmaong mga sugyot. Ang inyong empatiya, pagkamasinabtanon, ug mahigugmaong kabalaka gipasalamatan kaayo.
L. B., Tinipong Bansa
Salamat kaayo sa artikulo mahitungod sa pagkasobra sa timbang. (Mayo 22, 1989) Ako dili hingaon apan may ubay-ubayng sulirang metaboliko nga maoy nakapatambok nako. Mobati ako sa kadaghanang panahon nga dili normal. Dili ko gustong ang mga tawong niwang magahukom daan nako, nga magtuo nga ang ako lamang ginabuhat mao ang pagkaon, pagkaon, pagkaon. Salamat sa pagpunting nga dili tanang tambok ang hingaon kaayo. Ako nasayod nga si Jehova nahigugma ug nakasabot kanako ug nagadawat kanako bisan pa sa akong panagway. Gipanghinaot ko lamang nga ang mga tawo mahimong mas mahigugmaon ug masinabtanon.
P. R., Tinipong Bansa
Sukad sa pagbasa sa inyong artikulo, nasugdan ko na ang programa sa ehersisyo ug nagapaningkamot nga dili mokaon ug daghan kaayo sa gabii. Nawad-an na akog pito o walo ka libra ug maayo ang akong pagbati. Salamat kaayo ninyo!
G. V., Pederal nga Republika sa Alemanya
Dili tanan ang makasinatig madaling mga resulta. Alang sa pila ka tawo, ang pagpaniwang maoy usa ka lisod nga bugno nga kinahanglag dakong paningkamot, determinasyon, ug pagpaluyo—dili kritisismo.—ED.
Grabe pa kay sa AIDS Dulot akong natandog sa artikulong “Usa ka Butang Mas Grabe pa kay sa AIDS.” (Abril 22, 1989) Ang artikulo nagpahinumdom kanako sa akong kahimtang. Ako nakabuhat usab ug pila ka butang nga dulumtanan kaayo kang Jehova nga Diyos. Samtang gibasa ko kana, ang akong mga mata napunog luha. Naamgohan ko nga kon wala si Jehova, kini nahisama sa pagpuyo sa laing planeta nga walay tubig! Ako karon maningkamot sa dugang sa pagbuhat kon unsay makapahimuot sa mga mata sa Diyos.
I. A., Tinipong Bansa
Pagpilig mga Karera Daghang salamat sa artikulong “Unsang Karera ang Akong Pagapilion?” (Mayo 8, 1989) Nagtinguha ako niadto nga mosulod ug unibersidad apan gibiyaan ko ang akong pangandoy tungod sa lainlaing suliran. Kasamtangan misugod ako sa pagtuon sa Bibliya uban sa mga Saksi ni Jehova. Nakatabang kaayo nako ang inyong artikulo. Ako wala nay pagbasol. Ako may inoras nga trabaho ug nagaalagad nga tibuok-panahong magwawali. Sa akong hunahuna wala nay karera nga mas makapatagbaw kay niini.
A. P., Italya
Mga Milagro ug mga Panan-awon Ako makanunayong tigbasa sa Pagmata! Ugaling, gibati ko nga wala kamo manumbaling sa daghang punto mahitungod sa Lourdes. (Marso 8, 1989) Ako nagduaw sa Lourdes sulod sa 18 anyos, ug bisan tuod ako wala makakitag mga milagro o mga panan-awon, adunay ubang benepisyo. Alang sa daghan kini makapahigmata, ug sa daghan pa kini nagahatag tinubdan sa direksiyon sa ilang mga kinabuhi. Ang pagduaw sa Lourdes dili kay pagpangitag milagro. Kini maoy pagkahidangat sa kaamgohan sa sugo ni Jesus: “Maghigugmaay kamo sa usag usa.” Ang bisan unsang dapit nga makapasabot niini sa daghan kaayong tawo dili mahimong daotan.
R. K., Britanya
Ang mga halaran sa maong mga dapit sama sa Lourdes ug Fátima minahal kaayo sa mga kasingkasing sa daghang sinserong mga Katoliko, ug kami makaapresyar gayod sa ilang mga gibati. Hinuon, gipakita sa among artikulo nga ang pagbalaan sa maong mga dapit nakagamot sa kabakakan ug supak sa Kasulatan. Ug bisan pag ang maong mga dapit tingali may dakong emosyonal nga pangdani, pagahinumdoman nato nga si Jesu-Kristo miingon nga ang “matuod nga mga magsisimba” dili magbalaan sa usa ka linaing dapit kondili “magasimba sa Amahan uban sa espiritu ug kamatuoran.”—Juan 4:21-23.—ED.