Gikan sa Among mga Magbabasa
Pagpaniwang Ako 37 anyos ug baldado. Sa daghan na karong katuigan, nakigbisog ako sa pagkatambok. Ang doktor nagreseta sa pagpuasa ug mga diyeta sa protena, ug sa sinugdan kusog ang akong pagniwang. Apan unya nanambok na usab ako. Kana misangpot sa pagkawala sa kadasig ug, sa kataposan, pagkawalay-pagtagad. Nga nasangkapan sa katin-awan diha sa artikulo (Mayo 22, 1989) kon sa unsang paagi ang lawas mosanong sa mga diyeta, karon gibati kong nadasig igo aron makigbugno na usab sa sobrang timbang.
G. E., Pederal nga Republika sa Alemanya
Ang impormasyon maayo kaayo, ug mas daghan ang akong nakat-onan nianang pila ka panid kay sa akong nakat-onan gikan sa dimaihap nga mga magasin sa “pagpagamay” nga akong gipalit ug gibasa sulod sa kapig pulo ka tuig. (Dako untang salapi ang akong natigom sa akong kaugalingon!) Nakaamgo ako karon kon unsa ang praktikal ug hustong paagi sa pagwala sa sobrang timbang, nga mosangpot sa mas malipayon ug mas himsog nga tawo.
C. L., Gran Britanya
Pakigtrato Ang panaghisgot sa deyting ug pakigtrato sa Abril 22, 1989, Pagmata! mao ang labing maayo nga sukad inyong napatik. Ang mga sakop sa among kongregasyon sa tanang panuigon nagahisgot niini, nga nagapahayag sa apresasyon alang sa realistikong direksiyon nga gihatag. Kini miila nga kadtong nagatratohay kinahanglang mogugol ug panahon nga magkauban, ug kana mihatag direksiyon kon unsay isulti ug buhaton panahon sa panagtratohay. Namatay ang akong asawa duha ka tuig nga miagi, ug ako nasayod nga makatabang kanako ang artikulo sa dihang mosulay ako sa pagpakigtrato na usab. Salamat kaayo niining praktikal nga impormasyon.
M. T., Tinipong Bansa
Gitudloan ko ang akong mga anak nga maalamon kanunay ang pagbatog tsaperon. Naglagot ako sa dihang kini wala hisgoti sa maong bag-ong artikulo. Gibati ko nga kini modasig sa pakigdeyt nga walay tsaperon.
S. W., Tinipong Bansa
Ang moral nga mga kapeligrohan sa pakigtrato gihisgotan sa Hunyo 8 ug Hunyo 22, 1982, nga mga isyu. Ug ang pagkamaayo sa pagkadunay tsaperon gihisgotan nga detalyado sa Abril 22, 1986, nga isyu. Ang bag-ong artikulo nagdugang lamang sa nangaging tambag pinaagi sa pagsentro sa panginahanglan nga ang lalaki ug babaye magkailhanay sa usag usa.—ED.
Sugilanon sa Kinabuhi sa Musikero Nahimuot ako sa artikulo bahin kang Larry Graham sa punto nga ako kanang gibasa sa makadaghan. Ako nagtubo pa panahon sa katuigang 1960, ug ang iyang kanhing banda maoy usa sa akong paboritong mga grupo. Nadasig kaayo ako nga iyang napaambit sa daghan diha sa patigayon sa musika ang mensahe sa Bibliya. Nalipay usab ako nga siya karon usa na ka bug-os-panahong magwawali.
M. P., Tinipong Bansa
Serye sa Kasaysayan sa Relihiyon Buot kong ipahayag ang lalom kaayo nakong pagtahod sa inyong pagtuon sa mga relihiyon sa kalibotan. Kasagaran nga ang mga relihiyon hataas kaayog pagtamod sa ilang kaugalingon samtang nagatamay sa uban. Ako nakadayeg kaayo sa tinamdan nga gisagop sa inyong hamiling relihiyon, nga milabaw niana.
Y. T., Hapon
Mapasipad-anong Sinultihan Ako gipasipad-an sukad sa pagkabata hangtod sa pagbiya nako sa balay. Bisan tuod ako wala gayod niya dapati, buakon sa akong amahan ang mga plato, gub-on ang muwebles—iya ganing gisuntok ang bungbong kas-a nga milusot ang iyang kumo. Ako ang iyang gibasol sa iyang pagkamapasipad-anon. Ang mensahe nga akong nadawat gikan sa inyong artikulo (Hunyo 8, 1989) mao nga husto ang akong amahan, nga ang biktima maoy nagadasig sa pagpasipala.
A. N., Tinipong Bansa
Gikasubo namo kon ang artikulo nagpahinabog kasakit sa pagbati ngadto sa mga biktima sa pagpasipala sa ginikanan. Ang artikulo nagtumong kon sa unsang paagi ang usa ka batan-on makasagubang, ug tingali makalikay sa paghagit, sa kasagarang mga pagsilaob sa kasuko sa ginikanan. Wala gayod namo ipasabot nga ang usa ka bata maoy responsable sa kinaiya sama sa gibatbat sa ibabaw. Mahitungod nianang seryosong mga matang sa ginikananhong pagkamapasipad-anon, ang artikulo miingon: “Ang usa ka batan-on maalamong mangayog tabang sa gawas, tingali moduol sa usa ka Kristohanong ansiano sa iyang lokal nga kongregasyon.”—ED.