‘Ang Atong Kaulawan Tin-aw sa Tibuok nga Kalibotan’
ANG The New York Times sa Hulyo 20, 1990, nagdala sa pangunang-ulohan: “Canadianong Obispo Miundang Tungod sa Eskandalo sa Sekso sa mga Klerigo.” Unsa ang estorya? Lain pang kaso sa mga klerigo nga giakusar sa seksuwal nga pag-abusar sa mga batang lalaki. Sa maong okasyon ang eskandalo maoy didto sa probinsiya sa Newfoundland, Canada, ug ang klero maoy Katoliko. Unsay nakapalahi niadto?
Ang Times mitaho: “Ang Arsobispo sa Newfoundland miluwat tapos ang mga sumbong nga ang herarkiya sa Iglesya Romana Katolika wala manumbaling o napakyas sa pagsulbad nga epektibo sa tulo ka tuig nga eskandalo nga naglangkit sa mga pagpatuo sa seksuwal nga pag-abusar batok sa mga akolito, ilo nga mga bata ug uban pa pinaagi sa mga pari ug mga nanguna sa simbahang Romano Katoliko.” Usa ka pari, nga unang giakusar sa labihang kalaw-ayan niadtong 1979, karong bag-o gisilotan sa upat ka tuig nga pagkapriso tapos moangkon nga sad-an sa 36 ka sumbong!
Kasagaran nga ang maong mga kaso hilomon lang, ug walay himoong dakong pagdisiplina. Tingali ang usa ka pari ibalhin ngadto sa laing parokya o katungdanan, diin ang pagkalaw-ayan mosugod na usab tingali. Sa maong okasyon ang arsobispo natukmod sa pagluwat tapos moingon: “Kita makasasala nga simbahan. Kita hubo. Ang atong kasuko, atong kasakit, atong kaguol, atong kaulawan tin-aw sa tibuok nga kalibotan.”—Itandi ang Pinadayag 17:15-18.
Ang usa ka hudisyal nga pakisusi nagpakita nga ang mga sumbong gihimo sa kapin sa 15 anyos, apan ang kapolisan ug opisyales sa gobyerno napakyas “sa paglihok nga mahukmanon batok sa mga tagsala.” Ug daotan pa, ang herarkiya sa simbahan napakyas sa paglihok nga mahukmanon. Sila giakusar nga labaw pang mabalak-on bahin sa mga paring nakasala kay sa mga biktima. Bisan pa niana, unsay ginaingon sa Katolikong Bibliya bahin sa maong imoral nga mga buhat?
Mahitungod niadtong nagbuhat sa kahiwian, ang New American Bible, St. Joseph Edition, nagaingon: “Ang Diyos nagtugyan kanila tungod sa ilang mga kaulag ngadto sa mahugaw nga mga buhat; sila nagbuhat sa mutuwal nga pagdaot sa ilang mga lawas, . . . ug ang mga lalaki mibiya sa kinaiyanhong pakigsekso sa mga babaye ug nasunog sa kaulag alang sa usag usa. Ang mga lalaki nagbuhat ug makauulaw nga mga butang uban sa mga lalaki . . . Sila nahibalo sa matarong nga hukom sa Diyos nga ang tanang nagabuhat nianang mga butanga takos sa kamatayon; apan sila wala lamang magbuhat niana apan nagauyon niana diha sa uban.”—Roma 1:24-32.
Unsay ginaingon sa Katolikong Bibliya nga mahitabo sa maong mga dili-mahinulsolon? “Dili ba kamo makaamgo nga ang mga dili balaan dili mahimong manununod sa gingharian sa Diyos? Ayaw ninyo limbongi ang inyong kaugalingon: walay mga makihilawason, . . . walay mga nagabuhat sa kahiwian sa sekso . . . ang magapanunod sa gingharian sa Diyos.” Bisan pa niana, alang nianang mga tawhana adunay gipasukad-sa-Bibliya nga disiplina: ang pagpalagpot gikan sa Kristohanong kongregasyon, sumala sa giingon ni Pablo: “Gisulatan ko kamo sa akong sulat nga dili makig-uban sa mga tawong imoral . . . nga dili makig-uban kang bisan kinsa nga nagbaton sa titulong ‘igsoon’ kon siya imoral . . . Tin-aw nga kinahanglang dili kamo makigsalo sa maong tawo. . . . ‘Palagpota ang tawong daotan gikan sa inyong taliwala.’”—1 Corinto 5:9-13; 6:9, 10, NAB.