“Seksuwal nga Krisis” Taliwala sa Klero
“ANG seksuwal nga krisis nagadaot sa sentral nerbiyos nga sistema sa Iglesya Katolika,” mipahayag si Jason Berry, usa ka awtor sa Louisiana nga nakadawat sa usa ka ganti sa Catholic Press Association tungod sa iyang pagkobre sa pedophilia diha sa National Catholic Reporter. Bahin sa hiwing mga buhat seksuwal sa klero batok sa mga bata, si Berry miingon diha sa The Washington Post:
“Sukad sa 1985, kawhakawhaan nga mga kaso sa pedophilia nga nalangkit ang mga pari o mga brader narekord sa tibuok Amerika ug sa Canada. Ingong sangpotanan, ang mga diosisis sa U.S. nakaagom ug grabeng mga kapildihan diha sa mga asunto, ug ang pagkobre sa seguro o insurance nianang mga buhata nahanaw. Kining mga kausabana miabot taliwala sa daghang taho nga abot ug 10 ngadto 20 porsiento sa mga pari sa U.S. tingali aktibong homoseksuwal.”
Ang The Providence Sunday Journal sa Rhode Island miingon: “Ang mga obispo diha sa 29 ka estado . . . nag-atubang sa mga kleym sa danyos sa mga biktima sa pag-abusar sa sekso pinaagi sa Katolikong klero, ug ang Simbahan nakabayad ug labing menos $60 milyon sa pagkakaron diha sa mga hukom ug mga areglo.” Sa Louisiana ang usa ka pari miangkon nga nag-abusar sa 35 ka batang lalaki ug gisentensiyahan sa 20 ka tuig sa prisohan, bisan pag, matud sa Journal, tin-aw nga siya “nag-abusar sa labing menos 75 ka bata latas sa 10 ka tuig.” Ug ang usa ka pari sa Rhode Island miangkon nga sad-an sa 26 ka kaso sa pag-abusar sa sekso nga nalangkit ang batang mga lalaki.
Ang usa ka imbestigasyon sa Covenant House, usa ka puy-anan sa nanglayas nga mga batan-on sa New York City, nagpadayag nga ang paring tagdumala naghimo sa seksuwal nga kahiwian uban sa ubay-ubay nga mga batan-on ug batang lalaki. Ug ang Romano Katolikong arsobispo sa Atlanta miluwat tapos moangkon nga siya may duha-ka-tuig nga relasyong seksuwal uban sa dili-kinasal nga inahan.
Ang usa ka komperensiya sa Katolikong mga obispo sa U.S. nakadawat ug taho bahin sa “katalagman” maylabot sa mga kaso sa paring pedophile. Ang 100-panid nga taho, matud sa Journal, “naghisgot nga hinagpat sa usa ka estratehiya sa paglimite sa tulubagon sa Simbahan sa mga sibil nga asunto sa $1 bilyon [$1,000 milyon] nga gibase sa 30 ka asunto nga wala pa kahukmi.” Ang mga asunto gipasaka sa Katolikong mga ginikanan sa mga batang nalangkit. Ug ang mga sikyatrista nga nagatambal sa batan-ong mga biktima sa maong mga krimen nagtahog tagdugay, kasagaran permanente, nga kadaot.
Ang Pulong sa Diyos naghisgot sa maong “makauulaw nga mga gana sa sekso” nga tungod niana ang mga lalaki “mainiton sa ilang pagbati sa usag usa, ang mga lalaki uban sa mga lalaki, nga nagabuhat sa malaw-ay,” ug nagdugang nga ang “matarong nga hukom sa Diyos” mao nga “kadtong nagabuhat nianang mga butanga takos sa kamatayon.”—Roma 1:26, 27, 32; tan-awa usab ang 1 Corinto 6:9, 10.
Sa walay duhaduha, ang kadaghanan sa suliran motungha tungod sa dili-kasulatanhong praktis sa selibasiya, nga nagadili sa mga pari sa pagminyo. Bisan pa niana, ang Bibliya, ang Pulong sa Diyos, nagapahayag sa tin-aw nga kadtong anaa sa Kristohanong ministeryo mahimong magminyo. Sumala sa pagpahayag niini sa Katolikong Douay Version sa Bibliya: “Busa ang usa ka obispo kinahanglan . . . bana sa usa ka asawa.” (1 Timoteo 3:2) Ug kini nagaingon usab nga ang “pagdili sa pagminyo” maoy usa ka ebidensiya nga “ang pipila mobulag sa pagtuo, nga magpatalinghog sa mga espiritu sa kalapasan, ug sa mga doktrina sa mga yawa.”—1 Timoteo 4:1-3.