Microfilm nga “Misteryo” Nawagtang
UNSA ang imong hunahuna inigkabati nimo sa pulong “microfilm”? Misteryo ug kabangian? Super nga mga espiya ug mga detektib? Apan ang microfilm sama ra ka misteryoso sa imong adlaw-adlaw nga letrato nga gikuha sa 35mm nga rolyo sa pilm. Ugaling lang, ang imong kinabuhi maapektahan niini sa nagkadaiyang mga paagi.
Tingali ang “micro” diha sa pulong “microfilm” malimbongon. Sa pagkamatuod, ang gamay, dili mao ang pilm, kondili ang hulagway diha sa pilm. Sa unsang paagi naingon? Aw, dunay tulo ka pangunang kalainan tali sa microfilm ug sa imong ordinaryong letrato. Nahauna, ang imong letrato basin dunay mga tawo o talan-awon, samtang ang microfilm mahimong usa ka tipiganan sa napatik nga impormasyon alang sa mga tumatan-aw niini. Ikaduha, ang tipo sa pilm nga gigamit alang sa imong letrato lahi gikan sa pilm nga gigamit alang sa microfilm. Ngano? Kay ang microfilm kinahanglang makaarang sa pagkopya sa gagmayng mga detalye, sama sa mga letra diha sa pinatik nga panid. Ikatulo, ang imong letrato kasagarang mosangpot nga gipatik sa papel sa letrato, apan ang microfilm sa linangkob ipatik nganha sa pilm.
Kon sa Unsang Paagi Ikaw Apektado
Nakagamit ka bag librarya karong bag-o? Daghang librarya karon nagatipig sa makasaysayanhon o wala-na-imprentahang mga kasulatan, ingon man sa wala-sa-estak nga mga libro ug mga magasin, diha sa microfilm. Pananglitan, kon buot sa usa ka estudyante sa Bibliya nga magdukiduki sa karaan kaayong relihiyosong impormasyon, kini basin hikaplagan diha sa microfilm. Duna usab ing microfilm nga mga pagpadapat diha sa edukasyon, pagpabrika, insurance, ug pinaagi sa pederal, estado, ug lokal nga gobyerno.
Ikaw ba nagnegosyo? Ang pagbutang diha sa microfilm sa mga rekord sa mga trabahante makapanalipod kanila gikan sa dili-awtorisadong pagsusi o pag-usob, samtang mas makapasayon sa pagkuha ug pagtipig kanila. Kon ang mga rekord sa mga kuwenta nga nabayran ug nadawat ibutang sa microfilm, ang panalipod ug pagkadaling makuha maoy segurado ug mamenosan ang mga trabaho sa papeles. Ang pagbutang diha sa microfilm sa payl sa mga pumapalit mopausbaw sa mas maayong pag-alagad sa pumapalit ug sa relasyon.
Gikinahanglan ba nimo o gigamit ang mga dibuho sa inhenyeria? Ang pagbutang diha sa microfilm sa maong mga dibuho makadaginot sa imong salapi. Ang pagbutang diha sa microfilm makapamenos sa pagkadaot sa bililhong mga orihinal, sa gastos sa pagkopya ug pag-apod-apod, ug sa dili-mabungahong panahon nga gigugol sa dagkog suweldong mga trabahante. Kini makapahapsay sa permanente sa imong kuwarto sa mga dibuho. Ang paggamit sa microfilm makatipig usab sa sinulat nga mga metodo ug sa mga rekord sa mentenasyon nga anaa; ang sama ikaingon alang sa payroll ug mga rekord sa buhis nga ibutang sa microfilm.
Busa, unsa karon ang imong mahunahunaan inigkabati nimo sa pulong “microfilm”? Ang bahin ba sa misteryo niini nahanaw na alang kanimo? Pihong imo karong makita nga ang microfilm maoy usa ka daghag-gamit nga kasangkapan nga sa madugay o madali makaapektar sa imong kinabuhi.
[Kahon/Hulagway sa panid 26]
Microfiche
Usa sa labing komung gigamit nga mga microform karong adlawa mao ang microfiche. Ang usa ka microfiche, nga susama kadako sa usa ka baraha, masudlan ug mga usa ka gatos ka panid sa gimakenilyang impormasyon. Ang kasagarang microfiche, nga diha niana ang microimages kasagarang hikayon sa 7 ka lumbay ug 14 ka kolumna sa pinakadaghang 98 ka panid matag fiche, maoy mga 105 x 148 mm sa gidak-on. Ang bentaha sa microfiche ibabaw sa rolyong pilm mao ang pagbatog kompletong yunit sa sayon-ipondo, sayon-ilhon, ug sayon-basahong impormasyon diha sa usa ka pliegong pilm.
[Hulagway]
Ang sampol sa ibabaw, nga gipakita sa aktuwal nga gidak-on, nasudlan sa tanang 773,746 ka pulong sa usa ka edisyon sa “King James Version”
[Kahon sa panid 27]
Ang Dakong Kabalhinan sa Microfilm
Bisan pag kadaghanang tawo naghunahuna nga kini usa ka kauswagan sa ika-20ng siglo, ang microfilm nagsugod sa hinapos sa katuigang 1800. Panahon sa Franco-Prussian nga Gubat sa 1870-71, gigamit ni Rene Prudent Dagron ang unang matang sa microfilm sa paghatod ug mga mensahe pinaagig mga mensaherong salampati gikan sa Paris paingon sa Bordeaux, Pransiya. Kining unang microfilm, nga gitawag pellicle, gigama pinaagi sa pagletrato sa mga mensahe nga gigamit ang emulsion diha sa bildo; sa dihang namala ang emulsion, kadto gikuha gikan sa bildo ug gilikit nga gagmayng mga likit, nga gitaod ngadto sa mga salampati.
Bisan tuod ang unang microfilm reader-printer nabatonan sa 1928, ang pagpailaila sa unang push-button microfilm reader-printer niadtong 1957 nagpasugod sa dakong kabalhinan sa microfilm. Ang maong kasangkapan dili lang nagtugot sa pagtan-aw kon unsay naa sa pilm kondili nagtugot nga magama gikan niana ang gipadakong imprenta diha sa papel. Ang tuig 1958 nakakitag laing dakong kauswagan sa kabalhinan sa microfilm, ang COM (Computer Output Microfilming). Kini usa ka paagi sa pagkombertir sa mga kasayoran gikan sa usa ka kompiyutir nganha sa mga hulagway diha sa microfilm nga walay dihadihang mga tikang sa pangletrato.
Dugang pa sa COM, adunay duha ka laing natad diin gigamit ang microfilm. Ang una, ug sa pagkakaron maoy labing karaan, mao ang source document filming. Kini mao ang pagbutang diha sa microfilm sa mga kasulatang kuhaanan ug impormasyon, sama sa mga mapa, mga dibuho, mga invoice, mga tseke sa bangko, mga sertipiko sa pagkatawo, ug ubang bililhong dokumento. Ang ikaduhang natad mao ang micropublishing, nga nagatumong sa bag-ong impormasyon nga gibaligya una o giapod-apod diha sa dagway nga microfilm. Ang usa ka manual sa mentenasyon sa mga ayroplano nga gigamit sa komersiyal nga mga kompaniya sa ayroplano maoy usa ka pananglitan.
Tungod sa maong mga kausaban, ang microfilm dili lang madaginoton sa lugar kondili usa ka kasangkapan uban niining mga bentahaa: menos nga gastos, pagkakompleto sa payl, mas tulin ug mas sayong pagkupot sa impormasyon, ug pagkamenos sa pangawat, pagdaot, ug pag-usob.