Ang Hunahuna sa Bibliya

Mga Katalagman—Mga Silot Gikan sa Diyos?

SA Pilipinas, usa ka yuta nga kanunay hampakon sa natural nga mga katalagman, daghang tawo nahibulong, ‘Ang Diyos ba nagasulay sa tawo pinaagi nianang mga katalagmana?’ Sa 1991, human sa labing malaglagong pagbuto sa bolkan niining sigloha, ang ulong-tudling sa usa ka mantalaan sa Pilipinas nagsukna: “Pagbuto: Silot Gikan sa Diyos?”

Ang kolumnistang si Nelly Favis-Villafuerte nagpahayag sa susamang panlantaw sa dihang siya misulat: “Alang sa nagtuog-Bibliya nga mga Kristohanon hinuon​—duna lamay usa ka katin-awan: Ang pagbuto sa bolkang Bukid Pinatubo maoy usa ka langitnong pagbisita aron pagpahinumdom kanato makausa pa nga dunay makapahingangha ug soberanong Diyos nga may nagalabawng gahom diha sa mga kalihokan ug dulnganan sa mga tawo ug mga nasod.” Tungod sa maong pagpatuo, kita makapangutana:

Ang Labing Gamhanang Diyos ba Nagahukom sa mga Komunidad Karong Adlawa?

Nga kana gibuhat sa Diyos sa nangagi dili ikalimod. Ang mga pananglitan nga narekord diha sa Kasulatan bahin sa Lunop sa adlaw ni Noe, ang kalaglagan sa Sodoma ug Gomora, ug sa duha ka higayon ang pagsunog sa Jerusalem, ang siyudad nga nalambiggit sa iyang dako nga ngalan, nagpakita nga ang Labing Gamhanang Diyos arang makadala ug tinuyong paghukom ibabaw nilang sa balikbalik napakyas sa paghupot sa iyang mga sukdanan.​—Genesis 7:11, 17-24; 19:24, 25; 2 Cronicas 36:17-21; Mateo 24:1, 2.

Apan komosta na man karong adlawa? Nga adunay usa ka panahon sa tibuok kalibotang katalagman maoy gitagna na ni Kristo Jesus diha sa Mateo kapitulo 24, Marcos kapitulo 13, ug Lucas kapitulo 21. Niining mga kapituloha, siya naghatag ug matagnaong pasidaan sa mga panghitabo ug mga kahimtang nga ikalambiggit sa kataposan sa sistema sa mga butang aron ang mahunahunaong mga tawo makasabot nga siya sa dili makita nagamando gikan sa langit. Kining mga tagnaa nagakatuman karong adlawa. Angay nga matikdan, ugaling, nga uban sa matag usa sa gihisgotan-sa-itaas nga mga paghukom, si Jehova nga Diyos naghatag ug tin-aw, pabalikbalik nga mga pasidaan sa dili pa moabot ang kalaglagan. (Amos 3:7) Hinuon, sa kaso sa kinaiyanhong mga katalagman nga nagakahitabo sa atong panahon, ang mga pasidaan sagad nagaabot gikan sa sekular nga mga awtoridad, pinasikad sa siyentipikanhong pagpaniid.

Dugang pa, ang disipolong si Santiago nagpahibalo kanato diha sa unang kapitulo sa iyang sulat, bersikulo 13: “Ang Diyos dili arang matental ug daotan, ug walay bisan kinsa nga iyang pagatentalon.” Tungod sa nagausbaw tibuok kalibotang populasyon, ang tawo nakadangat sa pagpuyo duol sa daghang hulga sa mga katalagman. Ang mga panginahanglan alang sa luna aron kapuy-an ug aron pagtanom ug kalan-on misangpot sa pagkaingin sa kanhi kalasangang mga dapit, nga usahay nakaamot pa sa gidak-on sa pila ka kinaiyanhong mga katalagman gumikan sa hilabihang pagbundak sa ulan ug kusog nga pagbanlas.

Busa, dili husto ang pagsulti nga ang kinaiyanhong mga katalagman maoy direktang gipadala sa Labing Gamhanang Diyos ingong silot sa katawhan nga nagapuyo diha sa mga apektadong dapit. Sa pagkamatuod, sayon rang makit-an nga daghang inosente, sama sa mga kabataan, nagaantos ug labaw sa mga panahon sa kalisdanan. Bisan pa, bisan tuod kon ang Labing Gamhanang Diyos wala magapahinabo sa maong mga katalagman, kita sa gihapon makapangutana:

Duna bay mga Leksiyon nga Atong Makat-onan?

Oo. Alang kanilang nagpuyo diha sa mga apektadong dapit, anaa ang pagsulay sa kon unsa kadakong pagpabili ang gibutang nila sa ilang materyal nga mga kabtangan kon itandi sa kinabuhi mismo. Ang mga tawo nakahimog wala kinahanglana, nagpameligro-sa-kinabuhi nga mga risgo sa maong mga panahon aron lamang sa pagluwas sa pipila ka mga kabtangan. Kita kinahanglan maghinumdom nga si Jesus nagpahayag: “Bisan pag ang usa ka tawo dunay kadagaya ang iyang kinabuhi wala magagikan sa mga butang nga iyang nabatonan.” (Lucas 12:15) Ang materyal nga mga butang mahimong maalid-an, apan walay tawo ang makapuli sa iyang kinabuhi.​—Mateo 6:19, 20, 25-34.

Ang natural nga mga katalagman usab makatukmod sa mga indibiduwal sa paghinuktok bahin sa paagi sa ilang pagkinabuhi. Si apostol Pablo nag-aghat sa mga Kristohanon nga magmaampingon sa paagi nga sila mogawi sa ilang mga kaugalingon: “Busa pagbantay kamo pag-ayo sa inyong paggawi, dili ingon nga mga buangbuang kondili ingon nga mga masinabuton, nga magpahimulos sa labing maayo sa kalisdanan, tungod kay ang mga adlaw daotan.” (Efeso 5:15, 16, Byington) Matag pagsulay nga pagaatubangon sa usa ka tawo sa iyang kinabuhi maoy usa ka pahinumdom sa kaimportante sa pagbatog lig-ong pagtuo.

Ang ikatulong leksiyon nga atong matun-an gikan sa natural nga mga katalagman mao nga kita kinahanglan mougmad sa mas dako nga pagbati-sa-isigkaingon, o empatiya, alang sa uban. Sulod sa dapit sa gikahitaboan sa katalagman, ang mahigugmaong kabalaka kinahanglan nga ipakita alang sa isigkaingong nagaantos inay kay mosagop sa tinamdan nga iya-iyahay sa pag-atubang sa iyang kaugalingon. Ilabina nga kini tinuod bahin nilang gikapiyalan ug kaakohan sa pag-atiman sa uban. Ang propetang si Isaias naghubit kanila nga iyang gitawag ug “mga prinsipe” ingong “samag usa ka tagoanan gikan sa hangin ug usa ka salipdanan batok sa bagyo, ingon sa mga sapa sa tubig sa usa ka dapit nga mamala, ingon sa usa ka landong sa usa ka dakong pangpang nga bato sa yuta sa kahago.”​—Isaias 32:1, 2.

Sa pagpakita ug empatiya sa panahon sa mga katalagman, dunay daghang mga kahigayonan sa pagpaambit sa uban sa kon unsay nabatonan sa usa, pareho diha sa pulong ug sa buhat. Pananglitan, ang pagbuto sa bolkang Bukid Pinatubo ug ang iyang mingsunod nga mga dakong kadaot naghatag ug dili maihap nga mga kahigayonan sa pag-ambit diha sa pagtabang kanila kinsa kinahanglang moikyas sa kalisdanan. Daghan ang walay ikaarang sa pagbaton bisan gani sa matag-adlaw nga pagkaon. Mao nga, ang mga indibiduwal nakaarang sa pagpakita sa ilang pagkadili-hakog pinaagig paghatag ug hinabang sa uban. Bisan pa, daghan sa gihapon ang nahibulong:

May Kataposan Bang Paghukom sa Katawhan?

Oo, aduna unya, sama sa tin-aw nga gipakita diha sa Pulong sa Diyos. (Mateo 24:37-42; 2 Pedro 3:5-7) Sa dili pa moabot kanang paghukoma, usa ka tibuok kalibotang pagpasidaang buluhaton ang angay himoon una, maingon sa dugang gitagna ni Jesus: “Usab, diha sa tanang mga nasod ang maayong balita kinahanglang igawali una.”​—Marcos 13:10.

Mao nga, matag usa kanato kinahanglang mosukna sa iyang kaugalingon, ‘Unsay akong buhaton?’ Kami nagaaghat kanimo sa paggugol ug panahon sa pagsusi kon unsay ginatambag sa Bibliya sa matag usa kanato nga atong buhaton aron maluwas nianang tibuok-yutang katalagman.