Usa ka Halandomong Semana

ANG kalibotan nakurat sa Lunes, Agosto 19, 1991, sa dihang giilog sa lider sa coup ang Unyon Sobyet, ug si Presidente Mikhail Gorbachev gipriso sa iyang kaugalingong balay sa Crimea. Dili ra layo kaayo, diha sa matahom nga Odessa, ang pangataposang mga pagpangandam gihimo alang sa hinapos sa semana nga kombensiyon sa mga Saksi ni Jehova sa maong siyudad. Makasubo, ang kombensiyon sa Odessa gikansilar sa lokal nga mga opisyal.

Bisan pa, wala mosurender ang mga Saksi. Sila nagpadayon sa ilang una-kombensiyon nga mga pagpangandam ug mihangyo sa usa ka opisyal sa siyudad sa paghimo kutob sa iyang maarangan aron dili makansilar ang kombensiyon. Ang mga hawas sa mga Saksi ni Jehova gisultihan sa pagbalik sa Huwebes, Agosto 22. Niadtong hapona, human sa miting sa konseho sa siyudad, ang mga Saksi gitunolan ug sinulat nga permiso sa kombensiyon ug gipanghinaot ang labing maayo. Sa Moscow, ang mga lider sa coup napugos sa pagsurender sa mismo nga adlaw!

Pagkadali sa panghitabo! Ug pagkakatingalahan ang pagkakita ug 12,000 nga nagtigom sa maong hinapos sa semana! Sa Agosto 27, duha ka adlaw human sa kombensiyon sa Odessa, ang mga hawas sa mga Saksi ni Jehova nakigkita kang Gn. V. K. Simonenko, tsirman sa Executive Committee sa Siyudad sa Odessa, gipasalamatan siya sa pagtugot sa paghimo sa kombensiyon, ug gihatagan siya ug usa ka kopya sa bag-ong librong Ang Labing Bantogang Tawo nga Nabuhi Sukad sa Russo nga pinulongan.

Si Gn. Simonenko mipahayag ug apresasyon sa gasa ug miingon: “Wala ako sa kombensiyon, apan ako nahibalo sa tanan nga nahitabo didto. Sukad pa sa sinugdanan sa Odessa, wala pa ako sukad makakita ug mas maayo pa kay niini . . . Saaran ko kamo nga sa matag panahong mangayo kamo ug permiso sa paghimo sa inyong mga miting, andam ako kanunay sa paghatag niana.”

[Chart sa panid 31]

MGA KOMBENSIYON SA UNYON SOBYET SA 1991

Hulyo 13, 14 Tallinn, Estonia 4,808 447

Agosto 2, 3 Kiev, Ukraine 14,654 1,843

Agosto 3, 4 Lvov, Ukraine 17,531 1,316

Agosto 24, 25 Odessa, Ukraine 12,115 1,943

74,252 7,820