AIDS—Mga Trabahante sa Pag-atiman sa Panglawas Pag-amping!
“ANG mga trabahante sa pag-atiman sa panglawas nameligro nga matakdan sa HIV gikan sa naimpeksiyon nga mga pasyente.” Kining pasidaana, gikan sa College of Medicine sa Habagatang Aprika, gikutlo diha sa South African Medical Journal. Miabot kini ingong resulta sa ubay-ubayng nangamatay sa medikal nga mga propesyonal nga nawad-an sa ilang mga kinabuhi tungod kay aksidenteng natakdan sa AIDS.
Ang mga direktiba nga gituyo sa pagpanalipod sa mga trabahante sa pag-atiman sa panglawas seryosong gitagad na karon. Ang mosunod maoy pila ka mga punto gikan sa pahayag sa polisa sa kolehiyo ngadto sa mga kawani sa medisina kinsa, samtang nagabuhat sa ilang mga trabaho, hayan makiglabot sa mga tawong adunay HIV:
Sa kahimtang nga walay emerhensiya, kon ang pasyente dili mosugot nga eksaminon ang dugo alang sa kagaw sa AIDS, ang trabahante sa pag-atiman sa panglawas makapili sa “dili-paghatag ug propesyonal nga pag-atiman . . . human sa bug-os nga pagpakigsulti sa pasyente.” Usa ka pasidaan giisyu nga diha sa emerhensiya nga kahimtang, ang tanang pasyente kinahanglang “isipon nga may HIV.”
Diha sa gidugang nga dokumento, usa ka malangkobong listahan sa mga tikang sa panagana gilaraw. Pananglitan, ang pagsul-ob ug gomang mga guwantis “sa dihang mohikap ug dugo ug mga pluwido sa lawas, sip-onong mga membrana, o bisan unsang peligrosong mga dapit sa panit . . . , sa dihang mogunit sa mga butang o mga dapit nga nahugawan sa dugo o mga pluwido sa lawas . . . , sa dihang magabuhat ug mga trabaho diin ang mga kamot dakog posibilidad nga mahugawan sa dugo.” Ang mga trabahante sa pag-atiman sa panglawas gitambagan usab sa “pagsul-ob ug taptap ug panalipod sa mata o tabon sa nawong sa panahon nga magtrabaho nga tingalig mapiskan sa dugo o mga pluwido sa lawas.”
Usa ka tibuok subseksiyon ang gitagana sa pagpasidaan sa mga trabahante sa pag-atiman sa panglawas batok sa pagdalag walay tabon nga mga dagom o sa pagpasagad ug bilin sa nagamit hait nga mga gamit. Bisan ngani ang “direktang pagtunol sa hait nga mga instrumento tali sa mga kawani sa lawak-disdisan” sa panahon sa operasyon kinahanglang likayan. Dugang pa, gitambag nga “ang tanang sampol sa dugo o pluwido sa lawas kinahanglang ibutang sa lig-on, way-kahungawan nga mga sudlanan” ug kini kinahanglang ihatod lamang diha sa “di-mabasa plastik nga bag o sudlanan.”
Kon ang trabahante sa pag-atiman sa panglawas naladlad sa kagaw kaha tungod sa pagkasamad sa nahugawan hait nga butang o pinaagi sa dugo nga nadapat diha sa abli nga samad, gitambag ang dihadihang aksiyon. Matud sa dokumento: “Ang trabahante sa pag-atiman sa panglawas kinahanglan nga eksaminon alang sa HIV sa panahon sa pagkaladlad, ug usab pagka 6 ka semana, 12 ka semana, ug 6 ka bulan. Sulod ning panahona ang linain mabinantayong mga paagi kinahanglang gamiton aron dili kini mapasa pinaagi sa sekso ngadto sa pares (mga) sa trabahante sa pag-atiman sa panglawas.”
Kining mga paagiha nagpabanaag sa nagatubong kiling sa bahin sa nasayod nga medikal nga mga kawani alang sa dakong pag-amping sa paggamit ug sa pag-atiman sa dugo.