Apresasyon Alang sa Pagmata!
DAGHANG ginatos ka sulat ang nadawat agig apresasyon sa gula sa Pagmata! sa Agosto 22, 1992, nga may ulohang “Chronic Fatigue Syndrome—Kon Unsaon sa Pagsagubang Niana.” Sa miaging ting-init usa ka doktor sa medisina gikan sa Tennessee, T.B.A., misulat:
“Sa ika-22 ug 23 sa Agosto mihatag akog mga pakigpulong sa duha ka lahi nga mga grupo sa habagatang California. Ang akong ulohan: Chronic Fatigue Syndrome.
“Gihatagan ako sa usa sa mga tawo nga mitambong sa komperensiya sa Pasadena ug kopya sa Agosto 22, 1992, nga gula sa Pagmata! ug gibalikbalik nakog basa ang sugilanon sa hapin. Ako nagsulat sa paghatag ug komendasyon kaninyo alang sa inyong maayo kaayong pagkasulat bahin niining misteryoso gihapon ug sagad masaypan ug sabot nga sakit. Kadto sa pagkatinuod mao ang labing maayong artikulo bahin sa ulohan nga akong nabasa—ug nakabasa na ako ug daghan niana.”
Sa Oktubre, usa sa mga Saksi ni Jehova nga gikan sa Illinois, T.B.A., nga nag-antos sa syndrome, miingon: “Aw, karong buntaga, nakapahimutang ako ug 319 ka magasin nga may mga artikulo bahin sa chronic fatigue syndrome. Nakapahimutang ako niini sa mga parmasista, sa mga eskribyente sa mga health-food, mga empliyado sa mga bangko sa dugo, mga nars, ug mga kawani sa medikal nga librariya.
“Ang medikal nga mga grupo mikuhag mga kopya alang sa mga doktor. Ang mga empliyado nga akong nakaestorya miingon nga tinoon gayod nila nga makadawat ang mga doktor sa ilang kopya. Gipangayo pa gani sa uban ang numero sa akong telepono engkaso magkinahanglan sila ug dugang mga magasin.”
Ang mga Saksi ni Jehova, nga gilangkoban sa usa ka internasyonal nga organisasyon nga kapin sa upat ka milyong mga estudyante sa Bibliya, mao ang mga magpapatik sa Pagmata! Ang magasin nagahimo ug labaw pa kay sa pagpakita sa mga magbabasa kon unsaon sa pagsagubang sa mga problema karong adlawa. Kini nagapalig-on usab sa pagsalig sa saad sa Maglalalang bahin sa usa ka malinawon ug may kasegurohang bag-ong kalibotan. Ang mga Saksi ni Jehova debotado sa pagtabang sa mga tawo nga makakat-on ug dugang pa bahin sa mga katuyoan sa Diyos.
Kon buot mo ang dugang impormasyon o usa ka libre nga pagtuon sa Bibliya diha sa balay, palihog pagsulat sa Watch Tower, P.O. Box 2044, 1099 Manila o ngadto sa nahiangay nga direksiyon nga gilista sa panid 5.