Terapiya sa Hunahuna ug sa Lawas

ANG panukiduki nagpakita nga ang pagsige ug katawa makarelaks ug maayo sa hunahuna ug sa lawas. Kini “dili lamang makahumpay sa tensiyon, kondili makadugang usab sa mga tsansa nga maayo ang grabe nga sakit,” nag-ingon ang magasing Your Better Health. Kini kaamgid sa “mahimsog nga ehersisyo alang sa mga organo sa sulod sa lawas.” Ang mga pagsulay nagpakita nga ang pagsige ug katawa mopakunhod sa bationg sakit ug maayong pisikal nga ehersisyo usab sa kasingkasing. Mouswag ang sirkulasyon sa dugo, ang baba sa atay maehersisyo, ug ang gidaghanon sa oksiheno diha sa dugo motaas. Ang kaunoran sa dughan, liog, nawong, ug bagolbagol maehersisyo usab, uban sa kaunoran sa mata nga mopagawas sa mga luha.

Ang Journal of the American Medical Association nga nagtaho bahin sa usa ka pagtuon nga “nagsugyot nga ang programa nga terapiya sa pagkatawa mopataas sa kalidad sa kinabuhi sa mga pasyente nga adunay dukot nga mga sakit ug nga ang katawa adunay dihadiha nga simtoma sa makahupay nga epekto alang niining mga pasyenteha.” Ang mga resulta niining sikolohikal nga paagi sa rehabilitasyon ang nag-agda sa British Columbia Cancer Agency sa pagdugang ug “lawak sa pagkatawa” diha sa ilang librariya.

Ang pagsige ug katawa sa atong kinabuhi, hinunoa, dili makapaneguro ug maayong panglawas. Hinunoa, pagkatimbang ang gikinahanglan. Ang Bibliya nag-ingon nga adunay panahon sa pagkatawa ug panahon sa paghilom. Ang walay-hunahuna nga pagkatawa makapungot sa mga dalunggan sa uban ug ikatandi sa tingog sa pagpitipiti sa mga tunok nga nagkalayo ilalom sa kolon tungod kay kini walay hinungdan ug dili makapalagsik.​—Ecclesiastes 3:4, 7; 7:6.