Pornograpiya Nakaabot sa Kolehiyo
ANG “Matier & Ross Report” diha sa San Francisco Chronicle, Nobyembre 1, 1993, nagpasiugda sa usa ka kontrobersiyal nga klase nga gitanyag sa San Francisco State University. Kini gidumala ni Propesor John DeCecco bahin sa subject nga tawhanong seksuwalidad. Ang komento ni Matier ug Ross bahin niana ingon sa mosunod:
“Pagkangil-ad niana nga klase. Kon nagkinahanglan kag tulo ka makapukaw sa kaulag nga credit alang sa kurso sa SFSU, susiha lang ang makapukaw sa gana sa sekso (ug usahay tukma sa politika) nga mga subject nga gilista diha sa talaan sa mga panun-anan sa klase.”
Unya ang taho naglista sa masturbasyon, transvestism o pagsagop sa pamisti ug batasan sa kaatbang nga sekso, homoseksuwalidad, lesbianismo, pakigsekso sa mananap, sadomasochism o kalipay sa pagsakit sa uban o sa kaugalingon, lakip sa uban. Ang mga pagtudlo sa pila niining mga buhata makita diha sa mga videoteyp.
Ang maong mga buhat mahimong ikatandi “sa dulumtanang mga kustombre” nga gidumtan ni Jehova, nga ginganlan diha sa balaod ni Moises sa Levitico kapitulo 18. Human gisaway ang mga buhat sa pakigsekso sa duol nga kabanay, pagpanapaw, ug ubang seksuwal nga mga kahiwian, ang mga bersikulo 22 ug 23 nag-ingon: “Dili ka maghigda tipon sa usa ka lalaki sama sa imong paghigda tipon sa usa ka babaye. Kini usa ka dulumtanang butang. Ug ayawg ihatag ang imong binhi ngadto sa bisan unsang mananap aron mahimong mahugaw pinaagi niini, ug ang usa ka babaye dili motindog atubangan sa usa ka mananap sa pagpakighiusa niini. Kini usa ka paglapas sa kinaiyahan.”
Ang pagbuhat niining mga butanga nga gidumtan ni Jehova moresulta sa iyang pagkahinukman: “Ayaw ninyo paghugawi ang inyong kaugalingon sa bisan unsa niining mga butanga, kay tungod niining mga butanga naghugawhugaw ang mga nasod nga akong gihinginlan gikan sa atubangan kaninyo. Busa ang yuta nahugawan, ug ako magpakanaog ug silot tungod sa sala niini, ug isuka sa yuta ang mga pomuluyo niini. Ang bisan kinsa nga magabuhat sa bisan unsa niining tanang dulumtanang mga butang, nan ang mga kalag nga nagabuhat niana kinahanglang pagaputlon gikan sa taliwala sa ilang katawhan.”—Levitico 18:24, 25, 29.
Gidayeg sa usa ka estudyante nga mikuhag kurso sa SFSU si DeCecco tungod “sa pagwagtang sa naandang mga hunahuna labot sa mga tawong imoral ug nagpakita nga kining mga tawhana sama ra kang bisan kinsa.” Sama ra kang bisan kinsa? Dayag nga ang mga tawo sa katibuk-an wala malangkit sa seksuwal nga mga kahiwian sa homoseksuwalidad, lesbianismo, ug sadomasochismo, ni nagabatasan sila sa pagpakighilawas sa mga mananap. Sa pagkatinuod, grabe na kaayo ang pagkabungkag sa maayong pamatasan nga makapakurat kaayo sa katilingban karong adlawa, apan kining mga buhata nga gilarawan niini nga klase sa unibersidad maoy dayag nga pornograpiya nga gihimo ubos sa takoban sa binatid nga pagtuon ug panukiduki.