Tinuod ba Gayod Kini nga Finch?

ANG mga finch ilado sa tibuok kalibotan. Nagpuyo kini sa tanang kontinente gawas lamang sa hilabihan ka tugnaw nga Antarctica. Gani daghang kaislahan sa kadagatan dunay ilang populasyon sa finch. Ug kasagaran kining matahom kaayo. Tagda ang Amerikanhong goldfinch ingong pananglitan. Kini “naghatag ug linaing kabibo sa halapad nga kabanikanhan tungod sa ilang hayag, dalag ug itom nga bulok . . . , ang lupad niini nga mosulbong-motiurok latas sa dili makitang kabungtoran ug kawalogan sa hangin, ug ang nindot nga tuwittuwit niini!​—Book of North American Birds.

Apan, dunay usa ka finch nga dili hilabwan sa talagsaong kanindot​—ang lima ka pulgadang Gouldian weaverfinch, nga makaplagan sa amihanang Australia, ilabina sa kasagbotan sa eucalyptus. Tingalig nakakita kag pipila ka nadakpan nga langgam diha sa mga halwa sa inyong nasod. Usa ka ensiklopedya nag-ingon: “Kini nagpahinabog dakong pag-us-os sa bag-o pang katuigan.”

Ang mga finch dunay sungo nga ang sulod gidesinyo sa paggunit ug pagpakpak sa mga lugas. “Ang matag lugas isuksok diha sa espesyal nga tudlingan sa kilid sa alingagngag ug dugmokon pinaagi sa pag-ugmod sa ubos nga sungo ngadto niini. Unya ang panit mapakpak pinaagi sa tabang sa dila, sa ingon makuha ang lugas, nga maoy tunlon.” (Birds: Their Life, Their Ways, Their World) Hinuon, bahin sa Gouldian finch, “inay motuktok [sa mga lugas] gikan sa yuta kini mobatog ingong sirkador diha sa pungpong sa mga lugas, o motuktok sa mga lugas samtang nagkumbabit sa duol nga sanga.”​—The Illustrated Encyclopedia of Birds.

Kon ugaling ikaw makakita sa Gouldian finch, batia nga ikaw pinaboran nga nakasaksi sa maong buloknong linalang diha sa ingon ka gamitoy nga langgam.

[Hulagway sa panid 31]

Gouldian finch

[Hulagway sa panid 31]

Amerikanhong goldfinch