Dili Bahin sa Kalibotan?

SINULAT SA KORESPONSAL SA PAGMATA! SA ALEMANYA

“SILA dili bahin sa kalibotan, maingon nga ako dili bahin sa kalibotan.” (Juan 17:16) Niining mga pulonga gibatbat ni Jesus ang absolutong neyutralidad sa iyang mga sumusunod ngadto sa politikanhong mga kalihokan. Ang nag-angkon bang mga Kristohanon karong adlawa nakakab-ot niining maong sukdanan?

Tagda ang mosunod nga mga pahayag sa mantalaan bahin sa kalangkitan sa Kakristiyanohan sa kanhing German Democratic Republic (GDR), nga hangtod sa pagkabungkag niini niadtong 1990 gimandoan sa usa ka Komunistang pamunoan.

• “Karon nga ang Luteranong Iglesya sa GDR nalipay sa dungog sa hamubo nga panahon ingong inahan sa malinawong rebolusyon, ang popularidad niini daw kusog nga nagakawala. Alang sa daghan kini gayod usa ka haligi nga nagsuportar sa pamunoan ug usa ka dapit sa kalihokan sa Stasi (State Security Service).”​—Die Zeit, Nobyembre 1991.

• “Ang lainlaing probinsiyal nga Luteranong mga Iglesya . . . nagpahayag ug kahibulong sa kalangkitan sa mga trabahante sa simbahan ug sa mga parokyano uban sa Stasi.”​—Evangelische Kommentare, Enero 1991.

• “Ang mga lider sa [Luteranong] Iglesya nakadungog ug mga reklamo nga ang mga pari wala na mag-atiman sa ilang katawhan nga sama kaniadto, tungod kay sila aktibo sa politika.”​—Süddeutsche Zeitung, Pebrero 1990.

• “Si Weizsäcker [kanhing presidente sa Pederal nga Republika sa Alemanya] miingon nga ang [Luteranong] Iglesya kanunayng nagdula ug matinabangong papel diha sa politikal nga relasyon sa duha ka Alemang Estado.”​—Wetterauer Zeitung, Pebrero 1992.

Ang pag-apil-apil sa politika dili gayod limitado sa Luteranong Iglesya. “Halos tanang [Protestanteng] organisasyon nasudlan sa mga ahente sa Stasi,” mitaho ang The European. Si Manfred Stolpe, kinsa gibatbat sa The European nga “ang pangulong tigpakigsabot sa protestanteng iglesya uban sa komunistang mga awtoridad,” namulong sa pagpanalipod sa iyang kaugalingon: “Makiglamano pa ako sa Yawa kon ang pagbuhat niana magpauswag sa among kawsa.”

Ang Guardian sa London mitaho bahin niining suod nga relasyon tali sa klero ug sa Mafia sa Italya. Kini nag-ingon: “Ang Iglesya ug ang Cosa Nostra nag-uban pagpuyo nga malinawon sulod sa dugayng panahon nga ang iglesya kanunayng giakusar nga nakigkonsabo.”

Ang Toronto Star nagpatik ug usa ka artikulo bahin sa pakigkonsabo sa pila ka pari sa Rusong Ortodokso uban sa kanhing KGB. Ang taho nagkanayon: “Ang mga pagpadayag bahin sa panagkombuya sa simbahan uban sa komunistang pamunoan naghawas sa labing makapahugno nga hapak. . . . Ang materyal gikan sa mga tipiganan sa dokumento sa KGB . . . nagpakita nga ang taas nga mga opisyal sa simbahan dili lang kay nagluib sa ilang kaugalingong mga prinsipyo kondili andam nga moyagyag sa relihiyosong mga lider sa laing nasod.”

Samtang ang mga iglesya sa Kakristiyanohan nagpadayon sa pag-apil-apil sa politika, ang tinuod nga Kristiyanidad nagsunod sa sugo ni Jesus nga mahimong dili bahin sa kalibotan