Kahibulongang Ugma-Damlag Alang sa Planetang Yuta
“ANG panukiduki nagpakita nga ang Yuta maoy kinainitan karon kay sukad masukad sa 600 ka tuig,” mitaho ang Globe and Mail sa Toronto. Sa 1995 usa ka heat wave sa tungatungang Tinipong Bansa ang mikalas sa kinabuhi sa kapin sa 500 ka tawo sa Chicago. Ang susamang grabeng mga kahimtang nahitabo sa India ug Australia, samtang ang Inglaterra nakasinati sa “ikatulong kinaugahang ting-init sulod sa 200 ka tuig.”
Unsa ang hinungdan niini? Si Henry Hengeveld, usa ka eksperto sa klima sa pederal nga Departamento sa Kalikopan sa Canada, miingon: “Ang kadaghanan sa ebidensiya nagpunting sa kamatuoran nga adunay makitang tawhanong impluwensiya diha sa klima sa yuta.” Sumala sa taho sa Globe and Mail, “ang talagsaong panahon susama sa mga modelo sa kompiyuter nga misundog sa mga epekto sa pag-init sa yuta, nga gihunahunang gipahinabo sa pagkasunog sa mga sugnod nga fossil.”
Ang paglungtad sa pag-init sa yuta gilantugian gihapon sa mga siyentipiko. Bisan pa niana, ang The New Encyclopædia Britannica nag-ingon: “Ang katawhan nag-abusar sa atmosperikong kalikopan nga mas kusog pa kay sa pagsabot niana.”
Ikalipay, ang Bibliya nagsulti kanato nga ang yuta “magpabilin sa panahong walay tino.” (Ecclesiastes 1:4) Kini tungod kay ang Maglalalang, si Jehova nga Diyos, dili motugot sa tawo o sa bisan unsang kinaiyanhong mga puwersa nga molaglag niini. Sa kasukwahi, siya ‘magdala ngadto sa kagun-oban niadtong mga nagagun-ob sa yuta.’—Pinadayag 11:17, 18.
Dugang pa, ang Bibliya nagpasalig kanato nga si Jehova nga Diyos adunay kahibulongang ugma-damlag nga giandam alang sa atong planeta, ang Yuta, ug alang sa tanang matinumanong katawhan. “Ang mga maaghop mismo magapanag-iya sa yuta, ug ilang makaplagan ang ilang hingpit nga kalipay diha sa kadagaya sa pakigdait.” Pagkamalipayon nato nga ang ugma-damlag sa yuta anaa sa mga kamot sa Diyos, dili sa tawo!—Salmo 37:11; 72:16; Isaias 65:17-25; 2 Pedro 3:13.
Kon buot nimong makadawat ug umaabot nga mga isyu sa Pagmata!, palihog kontaka ang mga Saksi ni Jehova sa inyong dapit o pagsulat sa kinadul-ang adres nga nalista sa panid 5.
[Picture Credit Line panid 32]
Letrato sa NASA