Usa ka Relihiyon ang Magpabilin

HANDURAWA kon unsa unya ang kahimtang kon ang tanang tawo sa yuta nahiusa diha sa usa ka relihiyon, diha sa usa ka putling pagsimba sa bugtong matuod nga Diyos. Pagkadakong tuboran sa panaghiusa kana! Wala na unyay relihiyosong pag-awayay, pagbangiay, o paggubatay. Kini ba damgo lamang? Dili. Ang panan-awon ni apostol Juan bahin sa paglaglag sa bigaon, ang tibuok kalibotang imperyo sa bakak nga relihiyon, nagpakita nga usa ka matang sa pagsimba ang magpabilin human sa iyang kalaglagan. Unsa man kana?

Ang tingog nga nadungog ni Juan gikan sa langit naghatag kanato ug giya: “Gumula kamo kaniya, katawhan ko, kon dili kamo buot makaambit sa iyang mga sala, ug kon dili kamo buot makadawat ug bahin sa iyang mga hampak.” (Pinadayag 18:4) Dayag nga ang Diyos mismo ang nagsulti dinhi ngadto sa iyang katawhan. Matikdi nga wala niya sugoa ang iyang mga tawo nga makigsagol sa bigaon diha sa ekumenikal nga paningkamot aron sa pagluwas kaniya pinaagi sa pagtabang kaniya nga mag-usab ngadto sa desenteng kinabuhi. Wala, wala nay ikatabang kaniya. Busa, siya nagsugo kanila sa paggula ug pagpalayo kaniya aron malikayan nga mahugawan sa iyang grabeng pagkamakasasala ug aron malikayan nga sa kataposan mahukman ug malaglag uban kaniya.

Ang langitnong sugo nga ‘gumula gikan kaniya’ motabang usab sa sinserong mga nagapangita sa kamatuoran sa pag-ila sa katawhan sa Diyos. Sila tingali mangutana sa ilang kaugalingon, ‘Kinsa karong adlawa dinhi sa yuta ang nagtuman niining sugoa pinaagi sa pagluwat gikan sa bisan unsang relihiyon, organisasyon, o hugpong sa mga magsisimba nga konektado sa “Dakong Babilonya”? (Pinadayag 18:2) Kinsa dinhi sa yuta karong adlawa ang mibulag gikan sa tanang Babilonyanhong mga doktrina, mga kredo, mga tulumanon, ug mga tradisyon?’ Kinsa pa kon dili ang mga Saksi ni Jehova? Taliwala sa kapin sa 5.2 ka milyong Saksi sa kapin sa 230 ka nasod, ang tanan nga nalangkit sa usa ka Babilonyanhong relihiyon, sa pagkatawo man o pagkakabig, dayag nga miluwat gikan niana​—usahay bisan pa sa mga pagprotesta ug pagsupak gikan sa mga paryente, mga higala, ug relihiyosong mga lider.

Usa ka pananglitan mao si Henry, usa ka lalaki sa Habagatang Aprika, kinsa usa ka tesorero sa iyang simbahan ug dulot nga nalangkit niana. Apan siya nagpangita sa kamatuoran, ug usa ka adlaw midawat siya ug libreng pagtuon sa Bibliya sa balay uban sa mga Saksi ni Jehova. Ngadtongadto, sa dihang mihukom siya nga mahimong usa ka Saksi, iyang giingnan ang iyang pastor, kinsa suod usab niyang silingan, nga buot niyang moluwat gikan sa simbahan.

Ang pastor nakurat ug sa ulahi gidala ang nagadumalang opisyal sa simbahan ug ubang mga membro sa simbahan aron sa pagduaw kang Henry. Sila nangutana kon nganong mibiya siya sa ilang iglesya aron mahimong membro sa relihiyon nga, sumala nila, wala makabaton sa balaang espiritu sa Diyos. “Sa sinugdan, nahadlok akong motubag kanila,” matod ni Henry, “tungod kay kanunay silang may dakong impluwensiya kanako. Apan ako miampo kang Jehova alang sa tabang, ug siya nakapaarang kanako sa paghimo niining maong pangatarongan: ‘Sa tanang internasyonal nga mga relihiyon, kinsa lamang ang usa nga regular nga nagagamit sa ngalan sa Diyos, nga Jehova? Dili ba ang mga Saksi ni Jehova? Sa inyong hunahuna tugotan ba sila sa Diyos nga dad-on ang iyang ngalan ug dili usab sila hatagan sa iyang balaang espiritu?’” Ang mga opisyal sa simbahan wala makapanghimakak sa iyang pangatarongan, ug si Henry karon usa na sa mga Saksi ni Jehova.

Busa sa dihang ang tingog gikan sa langit nagsugo: “Gumula kamo kaniya,” adunay dapit nga maadtoan. (Pinadayag 18:4) Adunay mga tawo, mga magsisimba sa matuod nga Diyos, si Jehova, nga inyong kadangpan. Minilyon ang midangop. Nailhan ingong mga Saksi ni Jehova, sila nagalangkob sa internasyonal nga Kristohanong panag-igsoonay, nga giorganisar diha sa kapin sa 78,600 ka kongregasyon, ug karon nakasinati sa kinadak-ang pag-uswag sa ilang kasaysayan. Sila nakabawtismo ug kapin sa 1,200,000 ka tawo sa milabayng upat ka tuig! Una magpabawtismo, kining tanan nakakompleto ug usa ka makapadasig-sa-espirituwal nga kurso sa pagtuon sa Bibliya, nga nakapaarang kanila sa paghimog personal, lig-on-ug-pasukaranang desisyon nga moluwat gikan sa tanang kanhing mga kalangkitan sa bisan unsang laing relihiyon.​—Sofonias 2:2, 3.

Kon wala ka pa makatambong sa usa ka tigom sa mga Saksi ni Jehova sa usa sa ilang mga Kingdom Hall, nganong dili kini himoon niining semanaha? Mahimong madani ka pag-ayo sa imong makita ug madungog. Ug kon buot nimong makasabot sa Bibliya, nganong dili hangyoon ang usa sa mga Saksi ni Jehova nga magtuon uban kanimo, sama sa gibuhat sa minilyong uban pa? Kon ang imong pag-ampo maoy alang sa matuod nga pagsabot sa Pulong sa Diyos duyog sa usa ka paagi sa kinabuhi nga kaharmonya nianang maong Pulong, makaplagan nimo ang tubag sa imong pag-ampo.

[Mga hulagway sa panid 9]

Minilyon ang midangop sa pagsimba kang Jehova nga Diyos