Nasayod Ka Ba?

(Ang mga tubag niini nga pasulit mahimong makaplagan sa mga teksto sa Bibliya nga gisitar, ug ang bug-os nga listahan sa mga tubag gipatik sa panid 27. Alang sa dugang kasayoran, susiha ang publikasyong “Insight on the Scriptures,” nga gipatik sa Watchtower Bible and Tract Society of New York, Inc.)

1. Bisan tuod ang uban tingali ‘mopahilayo sa ilang mga dalunggan gikan sa kamatuoran,’ unsa ang gipahimangno kang Timoteo nga buhaton? (2 Timoteo 4:​4, 5)

2. Kinsa ang duha ka opisyal sa palasyo nga nagkunsabo batok kang Haring Ahasuero? (Ester 2:21)

3. Gipaila ni Nimrod ang iyang kaugalingon ingong unsa? (Genesis 10:9)

4. Kinsa ang ikaduhang asawa ni Abraham? (Genesis 25:1)

5. Sa unsang paagi giayo ni Jesus ang babaye nga “napulog-duha ka tuig nang nag-antos sa pagtalinugo”? (Marcos 5:​27-29)

6. Sa pag-ilustrar kon unsa ka lisod alang “sa usa ka datong tawo nga makasulod sa gingharian sa Diyos,” unsay giingon ni Jesus nga mas sayon? (Lucas 18:25)

7. Unsang legal nga garantiya ang gigamit sa Diyos sa paghatag ug dugang pasalig sa iyang saad? (Hebreohanon 6:17)

8. Unsang bahin sa gidamgo ni Nabucodonosor nga larawan ang ginama sa puthaw ug yutang kulonon? (Daniel 2:41, 42)

9. Unsang tanom ang gigamit sa mga Israelinhon sa pagwisik ug dugo diha sa mga haligi sa pultahan aron ang manulonda sa Diyos magluwas sa ilang panganay nga anak? (Exodo 12:22)

10. Unsang hayop ang pangunang gigamit diha sa pagpakiggubat sa karaang kapanahonan? (Exodo 15:21)

11. Unsay giingon sa Kasulatan nga dili mahimo ni Jehova? (Hebreohanon 6:18)

12. Diin itudlo ni Jehova si Elias nga motago ug pakan-on pinaagi sa mga uwak? (1 Hari 17:3)

13. Kinsay gitudlo ni Jehova sa pagdala sa arka sa tugon? (Deuteronomio 10:8)

14. Kinsay gihisgotan ni Pablo ingong “ang usang pinili diha sa Ginoo”? (Roma 16:13)

15. Kinsa ang amahan ni Sechem, nga gipatay usab human among-amongi ni Sechem si Dina? (Genesis 34:26)

16. Kinsa ang amahan ni Abraham? (Josue 24:2)

17. Unsay gikinahanglan sa Diyos nga ibayad aron matumbasan ang 273 ka panganay sa ubang mga tribo nga sobra sa mga Levihanon? (Numeros 3:​46, 47)

18. Ang usa ka Israelinhong ulipon mahimong pagawason kung unsang mga bahin sa lawas ang gidaot sa iyang agalon? (Exodo 21:26, 27)

19. Unsay giingon ni Jesus nga magpagawas sa usa? (Juan 8:32)

20. Tungod sa intereses sa usag usa maingon man sa parehong ranggo ug posisyon, unsay tawag ni Haring Hiram kang Solomon? (1 Hari 9:13)

21. Unsang tanoma nga gimahal tungod sa iyang kahumot ug ingong usa ka kosmetiko ang gihisgotan lamang diha sa Awit ni Solomon? (Awit ni Solomon 1:14)

22. Sa katumanan sa tunglo ni Josue, kinsa ang nawad-an sa ilang mga kinabuhi sa dihang ang ilang amahan mitukod pag-usab sa Jerico? (1 Hari 16:34)

23. Unsang substansiya ang nagpahimo sa arka ni Noe nga dili malapsan ug tubig? (Genesis 6:14)

Mga Tubag sa Pasulit

1. ‘Huptan ang iyang panimuot, antoson ang daotan, himoon ang buluhaton sa usa ka tig-ebanghelyo, buhaton sa bug-os ang iyang ministeryo’

2. Bigthan ug si Teres

3. “Usa ka gamhanang mangangayam nga supak kang Jehova”

4. Ketura

5. Iyang gihikap ang iyang panggawas nga besti

6. “Sa usa ka kamelyo nga makalusot sa mata sa igtatahing dagom”

7. Usa ka panumpa

8. Ang mga tiil ug mga kumagko

9. Hisopo

10. Ang kabayo

11. Pamakak

12. Ang walog sa Cherith

13. Ang tribo ni Levi

14. Rufo

15. Hamor

16. Tera

17. Usa ka lukat nga lima ka siklo ang matag usa

18. Usa ka mata o usa ka ngipon

19. Pagkahibalo sa kamatuoran

20. Igsoon

21. Henna

22. Abiram ug Segub

23. Alkitran