Kahingpitan—Kanunay ba Kining Bug-os?

ALANG sa hustong pagsabot sa Bibliya ang usa kinahanglang dili mohimog sagad nga sayop sa paghunahuna nga ang tanang gitawag ug “hingpit” maoy ingon niana sa bug-os nga diwa, nga mao, sa walay kinutobang sukod, walay limitasyon. Ang kahingpitan niining bug-os nga diwa iya lamang sa Maglalalang, si Jehova nga Diyos. Tungod niini si Jesus nakaingon bahin sa iyang Amahan: “Walay bisan kinsa nga maayo, gawas sa usa, ang Diyos.” (Marcos 10:18) Dili ikatandi si Jehova sa iyang pagkalabaw, takos sa tanang pagdayeg, kinatas-an sa iyang hamiling mga hiyas ug mga gahom, mao nga “ang iyang ngalan lamang ang gibayaw sa kahitas-an.” (Salmo 148:1-13; Job 36:3, 4, 26; 37:16, 23, 24; Salmo 145:2-10, 21) Gihimaya ni Moises ang kahingpitan sa Diyos, nga nag-ingon: “Kay igamantala ko ang ngalan ni Jehova. Pakadakoon ninyo ang atong Diyos! Ang Bato, ang iyang buhat hingpit man, kay ang tanan niyang mga dalan maoy hustisya. Usa ka Diyos sa pagkamatinumanon, kinsa walay inhustisya; siya matarong ug matul-id.” (Deuteronomio 32:3, 4) Ang tanang paagi sa Diyos, mga pulong, ug balaod maoy hingpit, inulay, walay sayop o depekto. (Salmo 18:30; 19:7; Santiago 1:17, 25) Wala gayoy bisan usang matarong nga hinungdan sa pagsupak, pagsaway, o pagpangitag sayop mahitungod Kaniya o sa iyang kalihokan; hinunoa, ang pagdayeg angay kanunay Kaniya.​—Job 36:22-24.

Ang Ubang Kahingpitan Relatibo

Busa, ang kahingpitan ni bisan kinsang ubang tawo o butang maoy relatibo, dili bug-os. (Itandi ang Salmo 119:96.) Sa ato pa, ang usa ka butang maoy “hingpit” sumala, o may kalabotan, sa katuyoan o tumong nga gitakda niini sa tigdisenyo o tigpatungha, o ang paggamit nga kapadapatan sa tigdawat o tiggamit niini. Ang mismong kahulogan sa kahingpitan nagkinahanglang adunay usa nga maghukom kon kanus-a ang “pagkakompleto” maabot, kon unsa ang mga sukdanan sa pagkamaayo, kon unsa ang mga kinahanglanon nga kab-oton, ug kon unsang mga detalye ang hinungdanon. Sa kataposan, ang Diyos nga Maglalalang mao ang Maghuhukom sa kahingpitan, ang Tigmugnag-Sukdanan, nga subay sa iyang matarong nga mga katuyoan ug intereses.​—Roma 12:2.

Ingong usa ka ilustrasyon, ang planetang Yuta maoy usa sa kalalangan sa Diyos, ug sa kataposan sa unom ka ‘adlaw’ sa paglalang nga buluhaton diha niana, ang Diyos mipahayag sa mga resulta nga “maayo kaayo.” (Genesis 1:31) Kini nakakab-ot sa iyang kinatas-ang mga sukdanan sa kamaayo, mao nga kadto hingpit. Apan human niadto iyang gibutang ang tawo aron “puy-an kana,” tataw sa diwa nga atimanon ang yuta ug himoon ang tibuok planeta, ug dili lamang ang Eden, nga usa ka tanaman sa Diyos.​—Genesis 1:28; 2:8.

Sa Unsang Paagi ang Dili Hingpit nga mga Alagad sa Diyos Matawag nga “Walay Kasaypanan”?

Ang matarong nga si Noe nagpamatuod nga “walay kasaypanan taliwala sa iyang katalirongan.” (Genesis 6:9) Si Job “walay ikasaway ug matul-id.” (Job 1:8) Ang susamang mga pahayag gibungat mahitungod sa ubang mga alagad sa Diyos. Sanglit ang tanan maoy mga kaliwat sa makasasala nga si Adan ug busa mga makasasala, tataw nga ang maong mga tawo maoy “walay kasaypanan” ug “walay ikasaway” sa diwa sa bug-os nga pagkab-ot sa mga gibaod kanila sa Diyos, mga kinahanglanon nga naghatag ug konsiderasyon sa ilang pagkadili-hingpit ug pagkawalay-mahimo. (Itandi ang Miqueas 6:8.) Maingon nga ang usa ka magkukulon dili makadahom ug samang kalidad sa dihang mag-umol ug usa ka panudlanan gikan sa ordinaryong yutang kulonon nianang sa iyang mahimo sa dihang mag-umol niana gikan sa espesyal nga pinong yutang kulonon, sa ingon ang mga kinahanglanon ni Jehova naghatag ug konsiderasyon sa kahuyangan sa dili hingpit nga katawhan. (Salmo 103:10-14; Isaias 64:8) Bisan kon nakahimog mga sayop ug mga dili maayo tungod sa ilang unodnong pagkadili-hingpit, ang maong matinumanong mga tawo bisan pa niana nagpasundayag ug “usa ka bug-os [Hebreohanon, sha·lemʹ] nga kasingkasing” ngadto kang Jehova. (1 Hari 11:4; 15:14; 2 Hari 20:3; 2 Cronicas 16:9) Busa, kutob sa ilang maarangan nga mahimo, ang ilang debosyon bug-os, maayo, nakakab-ot sa mga kinahanglanon sa Diyos sumala sa ilang kahimtang. Sanglit ang Diyos nga Maghuhukom nahimuot sa ilang pagsimba, walay tawo o espiritung linalang ang tukmang makakitag ikasaway bahin sa ilang pag-alagad Kaniya.​—Itandi ang Lucas 1:6; Hebreohanon 11:4-16; Roma 14:4.

Giila sa Kristohanon Gregong Kasulatan ang kinaiyanhong pagkadili-hingpit sa tawo nga nagagikan kang Adan. Ang Santiago 3:2 nagpakita nga ang tawo mahimong “usa ka hingpit nga tawo, makahimo sa pagrenda . . . sa iyang tibuok lawas,” kon makaarang siya sa pagrenda sa iyang dila ug dili mapandol sa pulong; apan niini “kitang tanan mangapandol man sa makadaghan.” (Itandi ang Santiago 3:8.) Hinunoa, adunay pipila ka relatibong kahingpitan ang gitagana nga maabot sa makasasalang katawhan. Gisultihan ni Jesus ang iyang mga sumusunod: “Busa kinahanglan kamong magmahingpit, ingon nga ang inyong langitnong Amahan hingpit.” (Mateo 5:48) Dinhi ang iyang gitumong mao ang mahitungod sa gugma ug pagkamahinatagon. Iyang gipakita nga ang yanong “paghigugma niadtong nahigugma kanimo” nagpaila sa dili-bug-os, kulang nga gugma; busa kinahanglang hingpiton sa iyang mga sumusunod ang ilang gugma o himoon kini sa bug-os nga sukod pinaagi sa paghigugma sa ilang mga kaaway usab, nga pinaagi niana nagasunod sa panig-ingnan sa Diyos. (Mateo 5:43-47) Sa susama, ang batan-ong lalaki nga misukna kang Jesus kon sa unsang paagi makabaton ug kinabuhing walay kataposan gipakitaan nga ang iyang pagsimba, nga nag-apil na sa pagsunod sa mga kasugoan sa Balaod, sa gihapon nakulangan sa hinungdanong mga butang. Kon siya ‘buot nga magmahingpit’ kinahanglan niyang himoon ang iyang pagsimba sa bug-os nga paglambo (itandi ang Lucas 8:14; Isaias 18:5) pinaagi sa pagtuman niini nga mga butang.​—Mateo 19:21; itandi ang Roma 12:2.

Si apostol Juan nagpahayag nga ang gugma sa Diyos nahimong hingpit diha sa mga Kristohanon nga nagpabiling nahiusa Kaniya, nagtuman sa pulong sa iyang Anak ug naghigugmaay sa usag usa. (1 Juan 2:5; 4:11-18) Ang maong hingpit nga gugma nagwagtang sa kahadlok, nagtaganag “kagawasan sa pagsulti.” Dinhi ang konteksto nagpakita nga si Juan naghisgot sa “kagawasan sa pagsulti ngadto sa Diyos,” sama sa pag-ampo. (1 Juan 3:19-22; itandi ang Hebreohanon 4:16; 10:19-22.) Ang usa nga kaniya ang gugma sa Diyos napahayag sa bug-os makaduol sa iyang langitnong Amahan nga may pagsalig, nga dili mobating gihukman diha sa iyang kasingkasing nga daw salingkapaw o dili dalawaton. Siya nahibalo nga siya nagtuman sa mga sugo sa Diyos ug nga siya nagbuhat kon unsay makapahimuot sa iyang Amahan, ug busa siya gawasnon sa iyang mga pagpahayag ug mga pangaliyupo kang Jehova. Siya dili mobati nga daw ingon sa gipig-otan sa Diyos sa kon unsay iyang isulti o hangyoon. (Itandi ang Numeros 12:10-15; Job 40:1-5; Lamentaciones 3:40-44; 1 Pedro 3:7.) Walay daotang kahadlok nga nagpugong kaniya; dili siya maabtan sa “adlaw sa paghukom” nga mabalak-on sa pipila ka ‘depekto’ batok kaniya o matinguhaon sa pagtago sa pipila ka butang. (Itandi ang Hebreohanon 10:27, 31.) Sama nga ang bata dili mahadlok sa pagpangayo sa iyang mahigugmaong mga ginikanan ug bisan unsa, sa ingon ang Kristohanon diin ang gugma bug-os nga milambo makatino nga “walay sapayan kon unsay atong pangayoon sumala sa iyang kabubut-on, kita iyang dunggon. Dugang pa, kon nahibalo kita nga iya kitang dunggon mahitungod sa bisan unsa nga atong ginapangayo, nahibalo kita nga mabatonan nato ang mga butang nga gipangayo sanglit ato mang gipangayo kini kaniya.”​—1 Juan 5:14, 15.

Busa, kining “hingpit nga gugma” dili magwagtang sa tanang matang sa kahadlok. Dili niini wad-on ang balaanon ug anaknon nga kahadlok sa Diyos, nga resulta sa dulot nga pagtahod sa iyang posisyon, gahom, ug hustisya. (Salmo 111:9, 10; Hebreohanon 11:7) Ni isalikway niini ang normal nga kahadlok nga nagpahinabo sa usa ka tawo, kon posible, nga molikay sa kapeligrohan o protektahan ang iyang kinabuhi, ni uban ang kahadlok gumikan sa kalit nga kakuyaw.​—Itandi ang 1 Samuel 21:10-15; 2 Corinto 11:32, 33; Job 37:1-5; Habacuc 3:16, 18.

Usab, ang bug-os nga panaghiusa makab-ot pinaagi sa “hingpit nga bugkos” sa gugma, nga nagpahinabo sa tinuod nga mga Kristohanon nga “mahingpit sa pagkausa.” (Colosas 3:14; Juan 17:23) Tataw nga ang kahingpitan niini nga panaghiusa relatibo usab ug wala magpasabot nga ang tanang kalainan sa personalidad, sama sa indibiduwal nga mga katakos, mga batasan, ug tanlag, mawagtang. Hinunoa, sa dihang makab-ot, ang pagkabug-os niini motultol ngadto sa hiniusang aksiyon, pagtuo, ug pagtudlo.​—Roma 15:5, 6; 1 Corinto 1:10; Efeso 4:3; Filipos 1:27.