Ikaw ba Makighisgot Bahin sa Relihiyon?

“Utang-buot, mag-estorya lang tag lain. Duha ka butang ang dili gayod nako gustong hisgotan—relihiyon ug politika!”

“Ang akong asawa ug mga anak na lay akong pagbut-on bahin sa relihiyon.”

“Dili ko gustong makighisgot bahin sa relihiyon karon. Mao pay akong pag-abot gikan sa simbahan.”

KINI bang mga komentoha pamilyar nga pamation? Ang uban mas gusto nga dili maghisgot ug relihiyon tungod kay ilang gilantaw kini ingong butang tali kanila ug sa Diyos. Si Jesus mismo nag-ingon: “Sa dihang mag-ampo ka, sulod sa imong kaugalingong lawak ug, human masirhi ang imong pultahan, pag-ampo sa imong Amahan nga anaa sa tago; unya ang imong Amahan nga nagatan-aw sa tago magabayad kanimo.”—Mateo 6:6.

Sa laing bahin, si Jesus ug ang iyang mga tinun-an wala magtuo nga ang matag bahin sa relihiyon angayng himoong pribado. Sila walay lipudlipod ug madayganong naghisgot bahin sa nagkalainlaing espirituwal nga mga ulohan, ug tungod niini ang ilang mga pagtulon-an napakaylap sa tibuok kalibotan. (Buhat 1:8; Colosas 1:23) Tinuod, dili tanan gustong makig-estorya kanila, ug ang uban nga namati nagpabiling maduhaduhaon.

Karong adlawa, usab, ang mga tinamdan sa paghisgot sa relihiyon lainlain gikan sa tawo ngadto sa tawo ug gikan sa kultura ngadto sa kultura. Diha sa kadaghanang kayutaan sa Kasadpan, pananglitan, ang mga tawo mas interesado sa sekular nga mga butang—edukasyon, trabaho, mga esport, mga kompiyuter, TV, ug uban pa. Diha sa ubang mga kultura, ang mga tawo mas andam sa pagpakighisgot bahin sa ilang mga tinuohan. Bisan pa niana, bisag unsa pay gigikanan sa mga tawo, may mahitabo sa ilang mga kinabuhi nga magpalihok sa pipila nga dili interesado kaniadto sa relihiyon nga mamalandong pag-usab sa ilang espirituwal nga panginahanglan.

Pagkahiktin-ug-Hunahuna Nagpaluya sa Kadaghanan

Kadtong dili gustong maghisgot bahin sa relihiyon tingali nakakita o nalangkit sa usa ka panaghisgot nga misangpot sa mainit nga panaglalis. “Ang panaglahi ug relihiyon mopahinabog mas daghang away kay sa panaglahi sa politika,” matod pa sa iladong mamumulong. Lain pa, si Richard M. Johnson, usa sa unang mga bise presidente sa Amerika, miingon: “Ang kasibot sa relihiyon makapukaw ug hugot kaayong mga pagpihig sa tawhanong hunahuna; ug, kon sayop nga pagkatumong, makapukaw ug grabeng kasibot sa atong kinaiyahan ubos sa malinglahong pasumangil nga nag-alagad sa Diyos.”

Katingalahan ba alang kanimo nga ang usa ka butang nga sama ka hamili ug ka halangdon sa mga pagtulon-an sa Bibliya pagaabusohan aron sa pagpalambo sa pagkahiktin-ug-hunahuna, pagkapanatiko, ug pagdumot? Sa pagkatinuod, dili ang mga pagtulon-an sa Bibliya ang nagpaayad sa kadaghanang tawo sa relihiyon. Hinunoa, ang pagkalayo na niini sa tinuod. Tagda, pananglitan, ang Kristiyanidad.

Sa pulong ug sa panig-ingnan, ang Magtutukod sa Kristiyanidad, si Jesu-Kristo, nagdasig sa paghigugma sa Diyos ug sa paghigugma sa silingan, dili pagkahiktin-ug-hunahuna ug panatisismo. Ang mga paagi nga gigamit ni Kristo ug sa iyang mga sumusunod sa ilang ministeryo mao ang katarongan ug pagkabig. (Mateo 22:41-46; Buhat 17:2; 19:8) Ug sila nag-ampo alang sa ilang mga kaaway ug mga maglulutos.—Mateo 5:44; Buhat 7:59, 60.

Ang tinuod nga relihiyon nagdan-ag sa hunahuna ug kasingkasing, ug kini nagpahiusa sa mga tawo. Busa, alang sa sinserong mga tigpangitag kamatuoran, ang dungganong panaghisgot sa relihiyon mahimong mabungahon kaayo, ingon sa atong makita unya.

[Kahon sa panid 3]

Kon Unsay Giingon sa Prominenteng mga Tawo

“Kon si Jesus mao ang dalan ngadto sa Diyos, katungdanan sa mga sumusunod ni Jesus ang pagpaambit niini ngadto sa ubang mga tawo.”—Ben Johnson, propesor sa ebanghelismo sa Columbia Theological Seminary.

“Gitudloan ni Jesus ang iyang mga tinun-an sa pagdala sa ebanghelyo ngadto sa mga tawo. Ang Dakong Sugo nagpangayo nga kita mangadto ngadto sa tibuok kalibotan. Ang Ginoo nagsugo sa iyang mga sumusunod sa paglakaw ngadto sa tanang dapit.”—Kenneth S. Hemphill, direktor sa Southern Baptist Center for Church Growth.

“Gawas kon kita mga saksi, kita dili mahimong tinuod nga mga Kristohanon. . . . Ang matag Kristohanon gisugo nga mahimong misyonaryo ug saksi.”—Papa Juan Paulo II.

“Daghan kaayong mga magwawali . . . mas interesado sa pagtukod ug dagkong mga kongregasyon ug pagtukod ug mga proyekto sa simbahan ug sa ilang sunod nga asaynment ingong pastor kay sa pagwali nila sa dili-ikakompromiso ug makapikal nga mensahe nga anaa sa Ebanghelyo.”—Cal Thomas, awtor ug kolumnista.

“Kinahanglang manuktok kita sa mga pultahan . . . Sama sa mga Saksi (ni Jehova) ug sa pipila pang uban, kinahanglang manggawas kita didto ug magwali sa Ebanghelyo ni Jesu-Kristo.”—Thomas V. Daily, Katolikong obispo.