Ang Hunahuna sa Bibliya
Senemanang Adlaw nga Sagrado—Gikinahanglan Ba?
SA TIBUOK kalibotan, milyon-milyong Muslim, Hudiyo, ug nag-angkong mga Kristohanon naggahin ug usa ka adlaw matag semana alang sa espesyal nga relihiyosong kalihokan. Ngano? Pananglitan, si Ibrahim, usa ka debotadong Muslim nga tig-adtoag moske kada Biyernes aron mag-ampo ug maminaw ug sermon, miingon: “Gusto kong masuod sa Diyos ug makabatog kalinaw sa hunahuna.”
Gitudlo ba sa Bibliya nga ang Diyos nagsugo nga kita maggahin ug sagradong adlaw matag semana? Ang pagpili bag espesipikong adlaw alang sa pagsimba gikinahanglan sa pagbatog maayong relasyon sa Diyos?
Temporaryong Kahikayan
Kapin sa 3,500 ka tuig kanhi, ang Diyos naghatag ug linaing mga balaod pinaagi ni manalagnang Moises. Apil niini nga Balaod ang kahikayan sa mga adlaw sa pagpahulay, o Igpapahulay, nga gigahin alang sa pagsimba. Ang kasagarang adlaw sa pagpahulay mao ang senemanang Igpapahulay. Kini magsugod sa pagsalop sa adlaw sa Biyernes ug matapos sa pagsalop sa adlaw sa Sabado.—Exodo 20:8-10.
Angay bang sundon sa tanang tawo kining senemanang adlaw sa pagpahulay? Dili. Ang Balaod ni Moises gihatag para lang sa mga Israelitas ug sa ilang mga kinabig. Ang Diyos miingon kang Moises: “Ang mga anak sa Israel kinahanglang magbantay sa igpapahulay . . . Tali kanako ug sa mga anak sa Israel kini usa ka ilhanan hangtod sa panahong walay tino.”a—Exodo 31:16, 17.
Ang Bibliya nag-ingon nga ang Balaod ni Moises maoy “landong sa mga butang nga moabot.” (Colosas 2:17) Busa ang Igpapahulay maoy bahin sa temporaryong kahikayan sa pagsimba nga naghulagway sa umaabot nga mas dakong kahikayan. (Hebreohanon 10:1) Gipakita sa Bibliya nga sa panglantaw sa Diyos, ang Balaod nga gihatag ngadto sa Israel, nga naglakip sa sugo sa pagtuman sa senemana nga adlawng Igpapahulay, natapos sa dihang namatay si Jesus. (Roma 10:4) Unsay mipuli niini?
Bag-ong Paagi sa Pagsimba
Human matuman ang katuyoan sa Balaod ni Moises, ang Bibliya naghisgot sa matang sa pagsimba nga dalawaton sa Diyos. Naglakip ba kana sa pagpilig espesipikong adlaw matag semana alang sa pagsimba?
Ang Kasulatan nagpakita nga ang ubang sugo nga gihatag sa Israel mapadapat usab sa Kristohanong kongregasyon. Lakip niana ang sugo sa paglikay sa idolatriya, pakighilawas, ug sa dugo. (Buhat 15:28, 29) Matikdi nga ang senemanang Igpapahulay wala ilakip sa sugo nga kinahanglang sundon sa mga Kristohanon.—Roma 14:5.
Unsa pay giingon sa Bibliya bahin sa pagsimba sa mga Kristohanon sa unang siglo? Sila regular nga nagtigom aron sa pag-ampo, pagbasag kasulatan, pagpaminawg mga pakigpulong, ug pag-awit ug mga pagdayeg sa Diyos. (Buhat 12:12; Colosas 3:16) Sa maong mga panagkatigom, ang mga Kristohanon makakat-on, mapalig-on sa espirituwal, ug magkadinasigay sa usag usa.—Hebreohanon 10:24, 25.
Walay mabasa sa Bibliya nga ang Kristohanong panagkatigom kinahanglan gayong himoon sa adlawng Dominggo o sa bisan unsang espesipikong adlaw sa semana. Busa, nganong giisip sa daghang nag-angkong Kristohanon ang Dominggo ingong adlaw nga sagrado? Human nakompleto ang Bibliya, ang kostumbre sa pagsimba sa adlawng Dominggo mitungha, maingon man ang nagkadaiyang pagtulon-an ug tradisyon nga wala ibase sa Bibliya.
Ang Diyos ba nagpatuman sa ulahi ug usa ka espesipikong adlaw matag semana alang sa hiniusang pagsimba? Wala. Ang tibuok sumbanan sa matuod nga pagsimba gidetalye sa Bibliya. Walay laing inspiradong sinulat nga gidugang sa Balaang Kasulatan. Si apostol Pablo giinspirar sa pagsulat: “Bisan pa kon kami o kaha usa ka manulonda gikan sa langit ang magpahayag kaninyo ug usa ka butang ingon nga maayong balita nga sukwahi sa among gipahayag kaninyo ingong maayong balita, matinunglo siya.”—Galacia 1:8.
Makapalagsik nga Pagsimba ug Makapahimuot sa Diyos
Bisan tuod ang mga lider sa relihiyon sa panahon ni Jesus estriktong naggahin ug adlaw nga sagrado matag semana, ang ilang pagsimba wala dawata sa Diyos kay daotan silag kasingkasing. Sila materyalistiko ug ubos ug pagtan-aw sa mga tawong timawa. Sila gustong mainila, tikasan, ug nag-apil-apil sa politika. (Mateo 23:6, 7, 29-33; Lucas 16:14; Juan 11:46-48) Sila nangangkon nga naghawas sa Diyos. Apan ang Igpapahulay, nga gihatag sa Diyos aron makahatag ug kalagsik, ilang gihimong makapabug-at nga sistema sa mga lagda.—Mateo 12:9-14.
Tin-aw nga ang paggahin ug adlaw nga sagrado matag semana dili maoy labing hinungdanon sa pagsimba nga makapahimuot sa Diyos. Unsay gikinahanglan? Si Jesus naghatag niining makapadani nga pagdapit: “Umari kanako, kamong tanang nabudlayan ug nabug-atan, ug ako magapalagsik kaninyo.” (Mateo 11:28) Ang pagsimba nga tinuod nga gibase sa gitudlo ni Jesus makapalagsik gayod. Kini walay pagkasalingkapaw ug walay makapabug-at nga mga rituwal.
Ang mga Saksi ni Jehova sa tibuok kalibotan nagsunod gayod sa paagi sa pagsimba nga gihimo sa unang mga sumusunod ni Jesus. Sila dunay senemanang programa sa pagtuon sa Bibliya. Ang adlaw nga ilang gipili alang sa ilang panagkatigom nagdepende sa lokal nga mga kahimtang, dili sa mga tradisyon nga wala ipasukad sa Kasulatan. Nganong dili nimo sulayan pagtambong ang panagkatigom nga sama niana diha sa inyong lugar aron imong masinati kining makapalagsik nga pagsimba?
[Footnote]
a Ang ekspresyon sa Bibliya nga “panahong walay tino” wala lang magpasabot ug hangtod sa hangtod. Kini mahimong magtumong usab sa taas nga yugto sa panahon, nga dili tino ang gidugayon.
NAKAPAMALANDONG KA BA?
● Kinahanglan ba nimong simbahon ang Diyos sa usa ka espesipikong adlaw sa semana?—Roma 10:4; 14:5.
● Nganong angay kitang magtigom alang sa pagsimba?—Hebreohanon 10:24, 25.
● Unsay gikinahanglan aron ang pagsimba makapalipay gayod?—Mateo 11:28.
[Chart/Mga hulagway sa panid 10, 11]
(Alang sa aktuwal nga pagkahan-ay, tan-awa ang publikasyon)
MARTES
MIYERKULES
1 HUWEBES
2 BIYERNES
3 SABADO
4 DOMINGGO