Apresyaha ang Maayong mga Hiyas sa Uban
Ang Problema
Ang garbo mahimong moresultag pagpihigpihig. Ang tawong garboso taas ug panglantaw sa kaugalingon. Iyang giisip ang iyang kaugalingon nga labaw, ug naghunahuna nga ubos kadtong mga tawo nga dili parehas niya. Bisan kinsa mahimong maghunahuna niining paagiha. Ang Encyclopædia Britannica nag-ingon: “Ang kadaghanang grupo sa mga tawo mibati nga ang ilang pagkinabuhi, pagkaon, sininaan, kinaiya, gituohan, pamatasan, ug uban pa mas labaw kay sa ubang grupo.” Unsaon nato paglikay niining sayop nga panghunahuna?
Prinsipyo sa Bibliya
“Magpaubos mo ug isipa ang uban nga labaw kay kaninyo.”—FILIPOS 2:3.
Unsay gipasabot niini? Aron dili mahimong garboso, kinahanglan natong ugmaron ang pagkamapainubsanon. Kon mapainubsanon ta, atong makita nga ang uban labaw kay kanato sa ubang paagi. Walay grupo sa mga tawo nga nakabaton sa tanang maayong hiyas ug abilidad.
Tagda pananglitan si Stefan. Nagdako siya sa komunista nga nasod, pero iyang nabuntog ang iyang pagkamapihigon sa mga tawo nga gikan sa laing nasod. Siya miingon: “Importante nga isipon nato ang uban nga labaw kay kanato aron mawala ang pagkamapihigon. Wala ko mahibalo sa tanang butang. Busa naa koy makat-onan sa matag tawo.”
Ang Imong Mahimo
Magmarealistiko ug dawata nga masayop pod ka. Dawata nga mahimo sa uban ang pipila ka butang nga dili nimo mahimo. Ayaw hunahunaa nga ang tanang tawo sa usa ka grupo parehas ug kahuyangan o kinaiya.
Imbes maghunahunag negatibo sa usa ka tawo nga gikan sa laing lugar, pangutan-a ang kaugalingon:
Dawata nga mahimo sa uban ang pipila ka butang nga dili nimo mahimo
‘Ang mga kinaiya ba nga dili nako ganahan sa usa ka tawo daotan gyod, o lahi lang siyag kinaiya?’
‘Naa kaha siyay ikasaway nako?’
‘Asang bahina nga mas maayo siya kay kanako?’
Kon matinud-anon nimong tubagon kining mga pangutanaha, dili lang nimo mabuntog ang pagkamapihigon maapresyar pod nimo ang maong tawo.