Kapitulo 24
Ang Paubos nga Pag-ihap Hapit na sa Taknang Sero!
Balik sa 1947, naghimo ang mga siyentista ug “orasan sa adlaw sa kalaglagan.” Nakita kini sa hapin sa The Bulletin of the Atomic Scientist ug gigamit sa pagdula kon unsa ka duol sumala sa ilang gituohan ang kalibotan sa nukleyar nga kalaglagan. Masubsob na nga ang mga kamot sa “orasan”—giliso—usahay paabante, usahay paatras, depende kon unsa ka peligroso na ang internasyonal nga situwasyon sumala sa gituohan. Sayo sa 1984 kadtong mga kamota gipaabante sa tres minutos sa dili pa magtungang gabii. Kon moabot man ugaling kini sa tungang gabii, nagkahulogan kini nga ang gikahadlokang nukleyar nga gubat nagsugod na.
2 Apan mga 6,000 ka tuig na kanhi dihang nagsugod si Jehova sa pag-ihap nga dili na mapugngan, nga wala nay pagbalik. Niana nga pag-ihap ang sero nga takna mao ang gitakdang panahon sa Diyos alang sa pagbayaw sa iyang pagkasoberano, diin diha niini nagadepende ang pakigdait ug kaayohan sa tibuok uniberso. Bukas niyang gipahayag ang katuyoan ug naghatag ug mga timaan sa panahon nga nakahimo kanato sa pagsabot sa pagdagan niini sa panahon. Tapos gilayon sa pag-alsa sa Eden, misaad si Jehova nga iyang ipatungha kining “babaye,” ang iyang organisasyon sa maunongon espirituhanong mga linalang, ang “binhi” nga mosamad kang Satanas, “ang serpente nga karaan,” sa ulo ug sa kataposan dugmokon siya sa iyang paglungtad sa walay kataposan. (Genesis 3:15; Pinadayag 12:9; Roma 16:20) Pagkadako sa pangandoy sa mga mahigugmaon sa pagkamatarong nianang panahona!
3 Sa tinudlong panahon sa Diyos, nga dugay nang gitagna, ang gisaad nga “binhi,” ang Mesiyas, ang kaugalingong Anak sa Diyos, mitungha sa yuta. Ingong malanog nga tubag sa mabatokong hagit ni Satanas, nagpabiling hingpit ang diyosnong debosyon ni Jesus hangtod sa kamatayon. Ug pinaagi sa iyang kamatayon ingong walay sala nga tawo siya nakatagana usab ug paagi nga malukat ang mga anak ni Adan gikan sa sala ug kamatayon. Busa natukod ang pasikaranan alang sa ‘pagbungkag sa mga buhat sa Yawa’ sa ulahi.—1 Juan 3:8; Daniel 9:25; Galacia 4:4, 5.
4 Dihang dinhi pa si Jesus sa yuta, misugod siya sa pagtigom ug mga lalalaki ug mga babaye nga mahimong kaubang mga manununod kaniya sa iyang langitnong Gingharian. Ang ilakip 144,000 lamang nga pinili, nasulayan ug mga maunongon. Dihang ang panahon sa pagtigom sa kataposang mga sakop niining pundoka miabot, “ang pagkahari ug kahalangdon ug gingharian” gihatag kanila ni Jesus mismo sa langit. (Daniel 7:13, 14) Untop sa iskedyol, sa 1914, milihok siya sa pagmando ingong Hari. Si Satanas ug ang iyang mga demonyo gitambog dayon gikan sa langit, nahinloan niining buhata ang kaulohan sa kagamhanan. (Pinadayag 12:7-12) Ang presenteng sistema sa kalibotan misulod na sa iyang kataposang mga adlaw.
5 Ang pag-ihap nga nagsugod sa unom na ka milenyo karon haduol na sa iyang taknang sero. Haduol na kaayo kini nga ang mga tawo nga nabuhi sa 1914, ug nga karon mga tigulang na, dili mahanaw sa esena sa dili pa moabot ang maukyabong mga hitabo nga nagatimaan sa kahimayaan sa pagkasoberano ni Jehova.—Marcos 13:30.
6 Ang ubang maunongong mga alagad sa Diyos, usab, makakita sa mga hitabo nianang dakong adlaw. Ilabina sa sinugdanan sa 1935, dihang nasabtan kon kinsa ang “dakong katilingban,” o “dakong panon,” daghan kanila misugod sa pagpaila sa ilang kaugalingon. Sa sinugdan dihay ginatos, dayon linibo, sa ulahi ginatos ka libo, ug karon minilyon nga kaylap sa tibuok globo. Ang dili-masayop nga Pulong sa Diyos naglarawan niining pundoka nga ‘nanagpakalabang buhi sa dakong kasakitan,’ maluwas niana, ug magpuyo sa Bag-ong Sistema sa Diyos nga dili na gayod mamatay pa. (Pinadayag 7:9, 10, 14; Juan 11:26) Ang unang mga sakop niining pundoka karon anaa na sa ilang 60 kun 70 o mas gulang pa nga panuigon. Wala tugoti ni Jehova nga sugdan sa sayo nga panahon ang pagtigom niining pundoka. Ang “dakong panon,” lakip sa daghan pang mga sakop niini, makalabang ngadto sa “bag-ong yuta.”
7 Ang paglaom sa “dakong panon” dili mapukgo sa bisan unsang nukleyar nga pagkasunog nga molaglag sa tanang katawhan. Sa maayong katarongan sila may masanagong panan-aw sa umaabot ug maisogon. Samtang ang mga hitabo sa “kataposang mga adlaw” napadayag na, sila nagbantay kanila sa maidlot nga pagpaabot, gipadapat nila ang tambag ni Jesus: “Bumarog nga matul-id ug ihangad ang inyong mga ulo, tungod kay haduol na ang inyong kaluwasan.” (Lucas 21:28) Apan sa nanghibiling panahon sa dili pa moabot kanang maong kaluwasan, dugang pang makatay-og sa kalibotang mga hitabo ang moabot.
MGA HITABO NGA ANAA PA SA UNAHAN
8 Nagpunting sa usa niini, si apostol Pablo misulat: “Sa diha nga ang mga tawo magakanayon: ‘Ania na ang kalinaw ug kasegurohan!’ sa kalit moabot kanila ang pagkalaglag maingon sa pagbati sa kasakit nga moabot sa babaye nga talianak; ug sila dili makaikyas.” (1 Tesalonica 5:3) Kon sa unsang paagi mahitabo kanang maong proklamasyon tan-awon pa. Apan maayong matikdan nga nahitabo kini dihang gitukod ang entablado tapos misulod ang kalibotan sa “kataposang mga adlaw.” Sa 1919 ang gipahayag nga katuyoan sa Liga sa Kanasoran mao ang pagkab-ot sa “kalinaw ug kasegurohan.” Tapos sa Gubat sa Kalibotan II, gipadayag sa Karta sa Hiniusang Kanasoran ang “kalinaw ug kasegurohan” ingong prinsipal nga tumong nianang internasyonal nga lawas. Kini wala makakab-ot nianang tumonga. Apan, sa mga katuigang dili pa dugay ang mga tawo sa tanang matang sa kinabuhi nakaapil sa dagkong mga demonstrasyon sa katilingban diha sa daghang kayutaan, nga nag-awhag sa mga lider sa kalibotan sa paghunong sa tanang paggama, pagtesting ug pagpahimutang sa nukleyar nga mga hinagiban. Gusto sila nga pasaligan silag kalinaw sa kalibotan ug nangalisang sa ilang gituohan nga maoy kapilian.
9 Kon resulta man kini niana ug sa ubang mga paningkamot, ang mga tawhanong lider sa dili madugay mohimog tagsaon kaayong proklamasyon sa “Kalinaw ug kasegurohan!” Sa atubangan lamang kini. Apan kadtong moduso niini modeklarar nga ila nang nakab-ot ang ilang tumong sa ilang kaugalingong mga paagi, nga walay tabang sa Gingharian sa Diyos. Niining pagsalikway sa pagkasoberano ni Jehova, ang “kalit nga kalaglagan moabot diha kanila.”
10 Kalit nga molihok ang mga hitabo. Ang Babilonyang Bantogan, ang kalibotanong enpiryo sa bakak nga relihiyon, biyaan sa iyang kanhing politikal nga mga hinigugma. Ang mga magmamando nakamatikod na nga ang relihiyon maoy tagmugnag kagubot nga puwersa nga nakapukaw ug pagdumot, pag-ulag dugo ug gubat sa tibuok yuta. Ang mga politiko gilaayan na sa pag-ipit sa mga klero. Diha sa kadaghanang bahin sa kalibotan, ang tumatambong sa mga simbahan dako nag pag-us-os. Ang walay diyos nga kaisipan, dayag kun tinagoan, maoy mangibabawng opinyon sa katilingban. Lain pa, daghang mga membrong nasod sa Hiniusang Kanasoran adunay malig-on batok-relihiyosong mga polisa. Dihang moabot na ang gitakdang oras ni Jehova sa pagpakanaog sa paghukom, iyang tugotan ang politikal nga mga magmamando, diha sa masilhigon internasyonal nga lihok, sa pagbali batok sa Babilonyang Bantogan ug bug-os nga laglagon siya.—Pinadayag 17:15, 16; 19:1, 2.
11 Mahubog sa kadaogan ug hinulhogan sa ilang dili makitang magmamando, si Satanas nga Yawa, ang mga nasod karon moatake sa kaugalingon matinumanong mga Saksi ni Jehova sa yuta. (Eekiel 38:14-16) Ang kamatuoran nga sila makigdaiton, masinundanon sa balaod nga katawhan nga wala mangilabot sa politika kun mopas-an sa responsibilidad sa gubat dili hatagag konsiderasyon. Ang nasod magapangayo ug bug-os nga pagsuportar, pagsimba sa politikal nga sistema. Apan dihang molihok sila sa paglaglag sa makitang organisasyon ni Jehova, molihok ang Diyos sa mahukmanong paagi alang sa iyang maunongong mga alagad, magaluwas kanila. Ang mga panon sa kalangitan bug-os nga molaglag sa tanang lama sa makitang organisasyon ni Satanas, laglagon kadtong tanan nga mopabilin niana. Dayon, ang dakong kaaway, si Satanas nga Yawa mismo, sikopon ug bug-os nga dili na palihokon sulod sa usa ka libo ka tuig, diin niining panahona ang tanang mga epekto sa iyang daotang impluwensiya bug-os nga mawagtang ug ang yuta himoong Paraiso. Tapos niana, buhian si Satanas sa mubong panahon, aron sulayan ang napasig-uling katawhan. Ang katawhan nga mopili sa pagsunod kaniya laglagon, uban kang Satanas ug sa iyang mga demonyo.—Pinadayag 19:19-21; 20:1-3, 7-10.
AGAKON NGADTO SA KATINGALAHAN “BAG-ONG YUTA”
12 Uban sa makapukaw ug kalisang nga mga hitabo sa kataposan sa presenteng kalibotan sa ilang likod ug ang Milenyal nga Pagmando ni Kristo sa ilang atubangan, bation sa inuyonang mga mangaluwas sa yuta mapuno sa pasalamat samtang ilang ipatugbabaw ang ilang mga tingog sa pagpasalamat sa Diyos. Sa kinasingkasing ang “dakong panon” mosinggit sa makusog nga tingog: “Kaluwasan nautang namo sa among Diyos [Jehova], nga nagalingkod sa trono, ug sa Kordero [Jesu-Kristo].” Ug ang tanang maunongon langitnong organisasyon sa Diyos, mapukaw sa pagpabili sa dakong kahulogan niining mga hitaboa, moduyog kanila sa pagsimba, nga magaingon: “Amen! Ang pagdayeg ug ang himaya ug ang kaalam ug ang pasalamat ug ang kadungganan ug ang gahom ug ang kusog ipahinungod sa among Diyos hangtod sa kahangtoran. Amen.”—Pinadayag 7:10-12.
13 Ang tanang katawhan sa kataposan mahimong nahiusang tawhanong katilingban nga magapasidungog sa tinuod nga Diyos, “usa ka bag-ong yuta” ilalom sa “bag-ong langit” nga mopasundayag sa mahigugmaong pagkasoberano ni Jehova. Migamit ug matahom nga simbolismo, ang kataposang basahon sa Bibliya naglarawan sa katingalahang mga kaayohan nga moagos ngadto sa katawhan nianang panahona ingong “suba sa tubig nga nagahatag sa kinabuhi, nga matin-aw morag kristal, nga nagaagos gikan sa trono sa Diyos ug sa Kordero” ngadto sa tunga sa halapad nga dalan sa langitnon Bag-ong Jerusalem. Diha sa kadaplinan sa suba anaa ang “mga kahoy sa kinabuhi” nga nagapamunga nga makapalig-on sa mokaon niini ug kansang mga dahon makaayo sa kanasoran. Gihawasan dinhi mao ang tibuok tagana nga gihimo sa Diyos aron sa pag-ayo ug sa pagpalig-on sa matinuohon, masinundanong katawhan ug nakahimo kanila sa pagtagamtam sa kinabuhing walay kataposan pinaagi ni Jesu-Kristo.—Pinadayag 21:1, 2; 22:1, 2.
14 Ang kahimtang unya sa yuta lahi kaayo gikan sa bisan unsa nga gipatungha sa daang kalibotan. Pinaagi sa pagpadapat sa mga kaayohan sa halad ni Kristo ug pinaagi sa pagpaedukar sumala sa kabubut-on sa Diyos, ang mga masinundanon, lakip niadtong banhawon gikan sa mga patay, makagawas gikan sa tanang lama sa sala ug tabangan sa pag-uswag sa pisikal, sa hunahuna, emosyonal ug sa espirituwal nga paagi hangtod nga ilang makab-ot ang kahingpitan. Inay magpatungha ug makabahing “mga binuhatan sa unod,” ang tanan makakat-on sa pagpatungha sa abundang paagi sa diyosnong bunga sama sa gugma, kalipay, kalinaw, pagkamainantuson, kalulot, pagkamaayo, pagtuo, kalumo ug pagpugong sa kaugalingon. (Galacia 5:19-23) Sanglit kaylap ang ingon niana nga espiritu, ang abot sa yuta gamiton sa pagtagana sa mga panginahanglan sa tanang katawhan. Ang kinabuhi mahimong tugob sa kahulogan nga wala pa sukad mahitabo samtang ang katawhan hiusang magatrabaho sa katumanan sa orihinal nga katuyoan sa Maglalalang alang niining yutaa ug sa mga pumoluyo niini.
15 Ang malipayong pagpaabot niining tanan, ang espiritu sa Diyos ug ang pangasaw-onon ni Kristo karon nagatanyag ug mahigugmaong pagdapit sa tanang tawo bisan diin, nga nagaingon: “Umari ka!’ Ug siya nga nagapatalinghog, paingna: “Umari ka!’ Ug ang giuhaw paaria; ang may tinguha paimna sa walay bayad nga tubig nga nagahatag sa kinabuhi.” (Pinadayag 22:17) Busa, dili na karon panahon sa paghulat lamang hangtod ang pag-ihap sa dakong adlaw ni Jehova moabot sa taknang sero sa dakong kasakitan. Midawat sa mahigugmaong pagdapit nga “uminom sa tubig nga walay bayad,” ikaw karon adunay pribilehiyo sa paghatod sa pagdapit ngadto sa uban. Panahon na kini sa madasigong kalihokan alang sa tanan kansang dakong tinguha mao ang pagkahimong maluwas sa matahom “bag-ong yuta” sa Diyos.
[Mga Pangutana nga Pagatun-an]
1. Sumala sa iladong mga siyentipiko, unsa na ka duola ang “adlaw sa kalaglagan”?
2. Kanus-a nagsugod si Jehova sa iyang pag-ihap, ug unsay kahulogan sa taknang sero?
3. (a) Unsay nagpakita nga tukma kaayong pagkaoras ang pag-abot sa Mesiyas? (b) Alang sa unsa nga gitukod ang pasikaranan niadto?
4. (a) Unsang grupoha ang gisugdan ni Jesus sa pagtigom dihang dinhi pa siya sa yuta? (b) Sibo sa iskedyol sa Diyos, kanus-a nagsugod si Kristo sa pagmando ingong Hari? (c) Unsay iyang unang gihimo?
5. Kinsa ang mga buhi nga makasaksi unya sa kabayawan sa pagkasoberano ni Jehova?
6, 7. (a) Unsang mga kamatuoran mahitungod sa “dakong panon” ang nagpakita nga haduol na kaayo ang dakong kasakitan? (b) Nganong nagalantaw sila sa unahan nga may masibotong pagpaabot?
8. (a) Unsang makahuloganon kaayong hitabo ang gitagna sa 1 Tesalonica 5:3 nga umaabot pa? (b) Sa daghan nang katuigang milabay, sa unsang paagi gitukod ang entablado alang niini? (c) Sa mga katuigang dili pa dugay, unsang dakong pag-ipit ang gihimo aron mapaneguro ang kalinaw sa kalibotan?
9. Nganong moabot ang kalit nga kalaglagan niadtong moduso sa gitagnang proklamasyon sa “Kalinaw ug kasegurohan”?
10. Sa unsang paagi giandam ang kahimtang alang sa kalaglagan sa Babilonyang Bantogan?
11. (a) Batok kang kinsa mobali ang mga nasod? (b) Motultol kini sa unsang dugang mga hitabo?
12. (a) Ngadto kang kinsa ipasidungog sa “dakong panon” ang ilang kaluwasan? (b) Kinsa ang moduyog kanila sa pagdayeg sa Diyos?
13. Sa unsang paagi gilarawan sa Bibliya ang gihimong tagana sa pagpalig-on ug pag-ayo sa katawhan?
14. Sa unsang mga paagi ang kahimtang sa “bag-ong yuta” lahi nianang sa kalibotan karon?
15. (a) Unsang madanihong pagdapit ang gitanyag karon ngadto sa katawhan? (b) Busa, sa tagsa-tagsa unsay angay natong buhaton?